ភ្ជាប់​ទៅ​គេហទំព័រ​ទាក់ទង

កំណែ​ទម្រង់​គោល​នយោបាយ​ពន្ធនាគារ​សម្រួល​ដល់ការ​សួរ​សុខទុក្ខ​អ្នកទោស


ការ​ផ្តួច​ផ្តើម​គំនិត​កំណែ​ទម្រង់​គោល​នយោបាយ​នេះ​ត្រូវបាន​ពិភាក្សា​នៅ​ក្នុង​កិច្ច​ប្រជុំ​ប្រចាំ​ឆ្នាំ​របស់​នាយក​ដ្ឋាន​ពន្ធនាគារ​កាលពី​សប្តាហ៍​មុន។

ភ្នំពេញ៖ ​ក្រសួង​មហា​ផ្ទៃ​កែ​ទម្រង់​គោល​នយោបាយ​ពន្ធនាគារ​សំដៅ​ជួយ​សម្រួល​ដល់​អ្នកទោស​ទាំងអស់​នៅ​ទូទាំង​ប្រទេស​ឲ្យ​មាន​ពេល​វេលា​ច្រើន​ថែមទៀតដើម្បី​ជួប​ជាមួយ​សមាជិក​គ្រួសារ​របស់​ខ្លួន​នៅថ្ងៃ​បុណ្យ​ជាតិ​សំខាន់ៗ។​ ក្រុម​មន្ត្រី​សិទ្ធិ​មនុស្ស​បាន​ហៅ​កំណែ​ទម្រង់​នេះ​ថា​ ​ជា​ការ​លើក​ស្ទួយ​សិទ្ធិ​ និង​សេរីភាព​របស់​អ្នក​ទោស​ ​និង​បង្ហាញ​ពី​ភាព​ស្និទ្ធស្នាល​រវាង​សមាជិក​គ្រួសារ​ដើម្បី​បញ្ជៀស​នូវ​ការ​កើតមាន​ជម្ងឺ​ផ្លូវចិត្ត​ និង​ជម្ងឺ​ផ្សេងៗ​ទៀត។

ក្រុម​មន្ត្រី​បាន​និយាយ​នៅថ្ងៃ​ព្រហស្បតិ៍​នេះ​ថា​ ​ក្រសួង​មហាផ្ទៃ​កំពុង​រៀបចំ​ធ្វើ​កំណែ​ទម្រង់​គោល​នយោបាយ

ពន្ធនាគារ​របស់​ខ្លួន​សម្រាប់​អនុញ្ញាត​ឱ្យ​អ្នកទោស​ជាប់​ពន្ធនាគារ​ទាំងអស់​នៅទូទាំង​ប្រទេស​អាច​ជួប​ជាមួយ​សមាជិក​គ្រួសារ​ច្រើន​ម៉ោង​ថែមទៀត​នៅ​ក្នុង​អំឡុង​បុណ្យ​ជាតិ​សំខាន់ៗ។

លោក​នុត​ សាអាន​ ​រដ្ឋលេខាធិការ​ក្រសួង​មហាផ្ទៃ​ ​បានថ្លែង​ថា​ ​កំណែ​ទម្រង់​នេះ​នឹង​អនុញ្ញាត​ឱ្យ​អ្នកទោស​ត្រូវ​បាន​លើកលែង​ទោស​មួយ​ថ្ងៃ​ ​មុន​ពេល​ចាប់ផ្តើម​ពិធី​បុណ្យ​ជាតិ​សំខាន់ៗដើម្បី​ផ្តល់​ឱ្យ​អ្នកទោស​នូវ​ពេលវេលា​បរិបូណ៌​សម្រាប់​ជួប​ជាមួយ​សមាជិក​គ្រួសារ​របស់​ពួកគេ។

ការ​ផ្តួច​ផ្តើម​គំនិត​កំណែ​ទម្រង់​គោល​នយោបាយ​នេះ​ត្រូវបាន​ពិភាក្សា​នៅ​ក្នុង​កិច្ច​ប្រជុំ​ប្រចាំ​ឆ្នាំ​របស់​នាយក​ដ្ឋាន​ពន្ធនាគារ​កាលពី​សប្តាហ៍​មុន។

លោក​ឧត្តម​សេនីយ៍​ឯក​គុយ ប៊ុនសន​ ​ប្រធាន​នាយកដ្ឋាន​ពន្ធនាគារ​នៃ​ក្រសួង​មហាផ្ទៃ​ ​បាន​ថ្លែង​បញ្ជាក់​យ៉ាង​ដូច្នេះ​ថា​៖

«ដូចជា​បុណ្យ​ចូល​ឆ្នាំ ​និង​បុណ្យ​ភ្ជុំបិណ្ឌ​ ​មាន​ការ​បើក​ឱកាស​ថា​ ​មុន​ចូល​ឆ្នាំ​បី​ថ្ងៃ​ ឬ​មុន​ភ្ជុំបិណ្ឌ​ ​យើងអាច​អនុញ្ញាត​ឱ្យ​គ្រួសារ​សាច់ញាតិ​របស់​អ្នកទោស​ទៅ​សួរ​សុខទុក្ខ​បាន​ច្រើន​ជាង​ពេល​ធម្មតា»។

លោក​ឧត្តម​សេនីយ៍ឯក​គុយ ប៊ុនសន​បាន​បញ្ជាក់​ថា​ ​កំណែ​ទម្រង់​គោល​នយោបាយ​ពន្ធនាគារ​នេះ​បាន​ផ្តោត​លើ​ការ​បង្រៀន​ជំនាញ​ជួសជុល​ម៉ាញ៉េ​ ​វិទ្យុ​ ​ទូរទស្សន៍​ ​និង​គ្រឿង​ប្រដាប់​ប្រដា​អេឡិចត្រូនិក​ផ្សេងៗ​ទៀត​នៅ​ក្នុង​ទីក្រុង​ភ្នំពេញ​ ​និង​ជំនាញ​ការ​ដាំដុះ​ផ្នែក​កសិកម្ម​ ​ការ​ចិញ្ចឹម​មាន់​ទា​ ​និង​ស្រឡាញ់​ពលកម្ម​សម្រាប់​ចិញ្ចឹម​ជីវិត​រស់នៅ​ជនបទ​ ​ដើម្បី​កុំ​ឱ្យ​ពួកគេ​ប្រព្រឹត្ត​ល្មើស​ត​ទៅ​ទៀត​ ​ហើយ​ការ​បណ្តុះ​បណ្តាល​ជំនាញ​វិជ្ជាជីវៈ​នេះ​ត្រូវ​ប្រើ​ពេល​ពី​បី​ខែ​ទៅ​ដល់​៣​ឆ្នាំ។

«កំណែ​ទម្រង់​គឺជា​ការ​កំណែ​ទម្រង់​គោល​នយោបាយ​ពន្ធនាគារ​ ​ជាពិសេស​ការស្តារ​នីតិសម្បទាដើម្បី​ធ្វើ​សមាហរណ​កម្ម​អ្នកទោស​ ​ក្រោយ​ពេល​ដោះលែង​ទៅ​សហគមន៍​វិញ​ ​ឱ្យ​គាត់​មាន​វិជ្ជាជីវៈ​មួយ​ច្បាស់លាស់​ ​ដើម្បី​បញ្ចៀស​នូវ​សកម្មភាព​ល្មើស​ច្បាប់​ផ្សេងៗ​ទៀត​ ​ជា​លើក​ទី​ពីរ»។

លោក​ចាន់ ​សាវ៉េត​ ​ប្រធាន​ផ្នែក​ត្រួត​ពិនិត្យ​ស្ថានភាព​សិទ្ធិ​មនុស្ស​នៃ​សមាគម​សិទ្ធិ​មនុស្ស​ ​Adhoc​ ​បាន​ថ្លែង​ថា​ ​គោល​នយោបាយ​នេះ​គឺ​ជា​ការ​គិតគូរ​របស់​អាជ្ញាធរ​ពន្ធនាគារ​សម្រាប់​អ្នកទោស​ទាំងអស់​ ​ពីព្រោះ​សមាជិក​គ្រួសារ​អ្នកទោស​ភាគច្រើន​មាន​ជីវភាព​ក្រីក្រ​ ​និង​នៅ​ឆ្ងាយ​ពី​ពន្ធនាគារ​ដែល​គ្មាន​ប្រាក់​ធ្វើ​ដំណើរ​មក​សួរ​សុខទុក្ខ​អ្នកទោស​ដែល​ជា​សាច់ញាតិ​របស់​ពួកគេ។

«គោល​នយោបាយ​នៃ​ការ​រៀបចំ​ដើម្បី​ឱ្យ​ពួក​គាត់​ (អ្នកទោស) ​អាច​ជួប​ជុំ​គ្រួសារ​បាន​នៅក្នុង​ឱកាស​ពិធី​បុណ្យ​ចូល​ឆ្នាំ​ ​ឬ​បុណ្យ​ភ្ជុំបិណ្ឌ​នេះ​ ​ខ្ញុំ​គិត​ថា​ ​វា​ជា​ការ​លើកស្ទួយ​សិទ្ធិ​ និង​សេរីភាព​របស់​អ្នកទោស​ដែល​មាន​ជាធរមាន​ ​មាន​ន័យ​ថា​ ​ពួកគេ​ (អ្នកទោស)​ មិន​ត្រូវ​បាន​ដកហូត​សិទ្ធិទាំងអស់​ទេ។​ ​គេ​ (អ្នកទោស) ​មាន​សិទ្ធិ​មួយ​ចំនួន​ទៀត​ត្រូវបាន​គោរព»។

លោក​អំ សំអាត​ ​ប្រធាន​ផ្នែក​ស៊ើប​អង្កេត​នៃ​អង្គការ​សិទ្ធិ​មនុស្ស​ Licadho​ ​បាន​ថ្លែង​ថា​ ​គោល​នយេបាយ​នេះមាន​ប្រយោជន៍​សំខាន់​ណាស់​សម្រាប់​អ្នកទោស​ ​ដើម្បី​បង្ហាញ​ពី​ភាព​ស្និទ្ធស្នាល​រវាង​សមាជិក​គ្រួសារ ​និងអ្នកទោស​ប្រសើរ​ជាង​ទុក​អ្នកទោស​ចោល​នៅ​ក្នុង​ពន្ធនាគារ​ដែល​អាច​កើត​មាន​ជម្ងឺ​ផ្លូវចិត្ត​ និង​ជម្ងឺ​ផ្សេងៗ​ទៀត។

«គោល​នយោបាយ​នេះ​គឺ​សំខាន់​ណាស់​ ​ដើម្បី​បង្កើត​ការផ្តល់​ភាពមិន​ឯកោ​ ​និង​ការ​កាត់បន្ថយ​ជម្ងឺ​ផ្លូវចិត្ត​របស់អ្នកទោស។​ គោល​នយោបាយ​នេះ​ជា​ការ​ចូលរួម​មួយ​លើក​កម្ពស់​សិទ្ធិ​មនុស្ស​ដែល​ទាក់ទង​នឹង​សិទ្ធិ​និង​សេរីភាព​របស់​អ្នកទោស​ ​ដែល​មាន​សិទ្ធិ​ជួប​ជាមួយ​ក្រុម​គ្រួសារ​របស់​គាត់​បាន​ទាំងអស់​ ​នៅ​ពេល​មាន​បុណ្យ​ទាន»។

ក្រុមមន្ត្រី​ក្រសួង​មហាផ្ទៃ​ និង​អង្គការ​សិទ្ធិ​មនុស្ស​បាន​អះអាង​ថា​ ​មាន​អ្នកទោស​ជាង​១៤​០០០​នាក់​នៅ​ក្នុង​ពន្ធនាគារ​ទូទាំង​ប្រទេស៕

XS
SM
MD
LG