ភ្ជាប់​ទៅ​គេហទំព័រ​ទាក់ទង

សាលាក្ដី​​ខ្មែរ​ក្រហម​​ច្រាន​​ចោល​​បណ្ដឹង​​​ខ្មែរ​​ក្រោម​​និង​​ជន​ជាតិ​​វៀតណាម​


ការ​ស៊ើប​អង្កេត​អំពី​បទ​ឧក្រិដ្ឋ​កម្ម​ប្រឆាំង​មនុស្ស​ជាតិ ​និង​បទ​ប្រល័យ​ពូជ​សាសន៍​ទាក់​ទិនទៅ​នឹង​ការ​សម្លាប់​រង្គាល​ជន​ជាតិ​វៀតណាម ​និង​ប្រជា​ពល​រដ្ឋ​ខ្មែរ​កម្ពុជា​ក្រោម ​នៅ​ក្នុង​ខេត្ត​ចំនួន​បី​ នឹង​មិន​អាច​ធ្វើ​ទៅ​បាន​នោះ​ទេ។ ​នេះ​គឺ​ជា​សេចក្ដី​សម្រេច​របស់​អង្គ​បុរេ​ជំនុំ​ជម្រះ​នៃ​សាលាក្ដី​ខ្មែរ​ក្រហម​ កាល​ពី​ចុង​ខែ​មេសា​ ក៏​ប៉ុន្ដែ​ទើប​តែ​ត្រូវ​បាន​ផ្សព្វ​ផ្សាយ​ជា​សាធារណៈ​កាល​ពី​ថ្ងៃ​ពុធ​ម្សិល​មិញ​នេះ។

នេះ​ជា​បទ​ឧក្រិដ្ឋ​ទាំង​ពីរ ​ដែល​អតីត​មេ​ដឹក​នាំ​កំពូលៗ​ខ្មែរ​ក្រហម​ចំនួន​៤​នាក់​កំពុង​ទទួល​រង​ការ​ចោទប្រកាន់​ ដូច​ជា​ នួន ​ជា ​អតីត​បង​ធំ​ទី​២ ​និង​ជា​អតីត​ប្រធាន​សភា​ខ្មែរ​ក្រហម​ អៀង ​សារី​ អតីត​បង​ធំទី​បី ​និង​ជា​អតីត​រដ្ឋ​មន្ដ្រី​ការ​បរទេស​ ខៀវ​ សំផន​ អតីត​ប្រមុខ​រដ្ឋ​ខ្មែរ​ក្រហម​ និង​អ្នក​ស្រី ​អៀង ​ធីរិទ្ធ​ អតីត​រដ្ឋ​មន្ដ្រី​ក្រសួង​សង្គម​កិច្ច។

កាល​ពី​ខែ​កុម្ភៈ​ ឆ្នាំ​២០១០​នេះ​ សហ​មេធាវី​តំណាង​ដើម​បណ្ដឹង​រដ្ឋ​ប្បវេណី​ខ្មែរ​ក្រោម​៩​នាក់​ រួម​ទាំងអ្នក​សុំ​តាំង​ខ្លួន​ជា​ដើម​បណ្ដឹង​រដ្ឋ​ប្បវេណី​ដែល​អះ​អាង​ថា​ ជា​ខ្មែរ​ក្រោម​ចំនួន​១៧​នាក់​ និង​ក្រុម​ អ្នក​អះអាង​ថា​ ជា​ជាតិ​ភាគ​តិច​វៀតណាម​១៦​នាក់​ទៀត​ មក​ពី​ខេត្ត​កំពង់​ឆ្នាំង​ តាកែវ​ និង​មក​ពី​ខេត្ត​ ពោធិសាត់​ បាន​ប្ដឹង​ឧទ្ធរណ៍​ទៅ​កាន់​អង្គ​បុរេ​ជំនុំ​ជម្រះ​ ប្រឆាំង​ទៅ​នឹង​ដីការ​សម្រេច​ រួម​របស់​សហ​ចៅ​ ក្រម​ស៊ើប​អង្កេត​ លើ​សំណើ​សុំ​បំពេញ​កិច្ច​ស៊ើប​អង្កេត​ចំនួន​ពីរ​របស់​សហ​ព្រះ​រាជ​អាជ្ញា​ ព្រម​ទាំង​ សំណើ​សុំ​ឲ្យ​មាន​កិច្ច​ស៊ើប​សួរ​បន្ថែម​របស់​ដើម​បណ្ដឹង​រដ្ឋ​ប្បវេណី​ពាក់​ព័ន្ធ​នឹង​ឧក្រិដ្ឋ​កម្ម​ប្រឆាំង​ មនុស្ស​ជាតិ ​និង​បទ​ប្រល័យ​ពូជ​សាសន៍​ទៅ​លើ​ពល​រដ្ឋ​ខ្មែរ​ក្រោម ​និង​លើ​ជន​ជាតិ​វៀតណាម។

ហើយ​សហ​មេធាវី​តំណាង​ដើម​បណ្ដឹង​រដ្ឋ​ប្បវេណី​ស្នើ​សុំ​ឲ្យ​ដាក់​បញ្ចូល​ឧក្រិដ្ឋ​កម្ម​ទាំង​នេះចូល​ទៅ​ក្នុង​សំណុំ​រឿង​លេខ​០០២​ ដែល​មាន​ជន​ជាប់​ចោទ​ទាំង​បួន​ខាង​លើ​ និង​រួម​ជា​មួយ​ឌុច​ផង​ដែរ។

ក៏​ប៉ុន្ដែ​នៅ​ក្នុង​សេចក្ដី​សម្រេច​របស់​ខ្លួន ​ចៅ​ក្រម​ទាំង​ប្រាំ​រូប​របស់​អង្គ​បុរេជំនុំ​ជម្រះ​ចាត់​ទុក​ថា​ បណ្ដឹង​ឧទ្ធរណ៍​នោះ​មិន​អាច​ទទួល​យក​បាន​ទេ។

លោក ​ឡាស ​អលសិន​ មន្រ្ដី​ផ្នែក​ទំនាក់​ទំនង​កិច្ច​ការ​ច្បាប់​របស់​សាលាក្ដី​ខ្មែរ​ក្រហម​ មាន​ប្រសាសន៍ ​ថា ​បណ្ដឹង​នោះ​ត្រូវ​បាន​បដិសេធ ​ដោយ​សារ​តែ​ដើម​បណ្ដឹង​ខាង​លើ​មិន​ស្ថិត​នៅ​ក្រោមយុ​ត្តាធិការ​ នៃ​ការ​ស៊ើប​អង្កេត​របស់​សហ​ចៅ​ក្រម​ស៊ើប​អង្កេត​នោះ​ទេ។

ដោយ​ឡែក ​លោក​ នី ​ចាន់ឌី ​មេធាវី​មួយ​រូប​តំណាង​ឲ្យ​ដើម​បណ្ដឹង​រដ្ឋ​ប្បវេណី​ក្នុង​បណ្ដឹង​ឧទ្ធរណ៍នេះ​ មាន​ប្រសាសន៍​ថា ​ការ​សម្រេច​របស់​អង្គ​បុរេ​ជំនុំ​ជម្រះ​មិន​បាន​ផ្ដល់​យុត្តិ​ធម៌​ដល់​ពល​រដ្ឋ​ខ្មែរក្រោម​ និង​ជន​ជាតិ​វៀតណាម​ដែល​ជា​ម្ចាស់​បណ្ដឹង​នោះ​ទេ។

"ក្នុង​ឋានៈ​គាត់​ជា​ជន​រង​គ្រោះ​ពី​ឧក្រិដ្ឋ​កម្ម​ពី​សម័យ​ខ្មែរ​ក្រហម​ ការ​បដិសេធ​នេះគឺ​មាន​ភាព​អយុត្តិធម៌​ដែរ​ ដោយ​សារ​តែ​ជា​ការណ៍​ពិត​គឺ​គាត់​ជា​ជន​រង​គ្រោះ ​ដូច​ជន​រង​គ្រោះ​ទូទៅ​ដែរ"។

សូម​រំឭក​ថា ​សេចក្ដី​សម្រេច​របស់​អង្គ​បុរេ​ជំនុំ​ជម្រះ​មិន​អនុញ្ញាត​ឲ្យធ្វើ​ការ​ស៊ើបអង្កេត​លើ​បទ​ឧក្រិដ្ឋ​កម្ម​ប្រឆាំង​មនុស្ស​ជាតិ ​និង​បទ​ប្រល័យ​ពូជ​សាសន៍​ទាក់​ទិន​ទៅ​នឹង​ការ​សម្លាប់​រង្គាល​ជន​ជាតិ​វៀតណាម ​និង​ប្រជា​ពល​រដ្ឋ​ខ្មែរ​កម្ពុជា​ក្រោម ​នេះ​ធ្វើ​ឡើង​ស្រប​ពេល​ដែល​សំណុំ​រឿង​លេខ​០០២​ ត្រូវ​គេ​រំពឹង​ថា ​អាច​នឹង​ត្រូវ​បើក​សវនាការ​នៅ​ដើម​ឆ្នាំ​២០១១​ខាង​មុខ​នេះ៕

XS
SM
MD
LG