ភ្ជាប់​ទៅ​គេហទំព័រ​ទាក់ទង

អាជ្ញាធរ​ខ្មែរ​ហាម​ការ​ជួប​ប្រជុំ​គ្នា​ក្នុង​ពេល​ដំណើរ​ទស្សនៈកិច្ច​លោក​ Ban Ki-moon


កង​កម្លាំង​នគរបាល​នៃប្រទេសកម្ពុជា​។​

ភ្នំពេញ៖ អង្គការ​សង្គម​ស៊ីវិល​ និង​គណបក្ស​ប្រឆាំង​ បាន​បញ្ចូន​ការ​ព្រួយបារម្ភ​របស់​ខ្លួន​ទាក់ទង​នឹង​បញ្ហា​សិទ្ធិ​មនុស្ស​ក្នុង​ស្រុក​និង​ការ​រំលោភ​ព្រំដែន​ពី​ប្រទេស​ជិត​ខាង​ជា​ដើម​ ជូន​លោក​ Ban Ki-moon​ អគ្គ​លេខាធិការ​អង្គការ​សហ​ប្រជាជាតិ​ ជួយ​រក​ដំណោះស្រាយ។ មន្ត្រី​រដ្ឋាភិបាល​បាន​និយាយ​ថា ​កម្ពុជា​មាន​បរិយាកាស​ប្រជាធិបតេយ្យ​ និង​សេរីភាព​ក្នុង​ការ​បញ្ចោញ​មតិ​គ្រប់គ្រាន់។

កង​កម្លាំង​សន្តិសុខ​ជាង​២០០​នាក់ ​ត្រូវ​បាន​ដាក់​ពង្រាយ​នៅ​សួនច្បារ​មុខ​វត្ត​បុទមវត្តី​នៅ​ថ្ងៃអង្គារ​នេះ ​ដើម្បី​រារាំង​ការប្រមូល​ផ្តុំ​របស់​សហភាព​សហជីព​កម្ពុជា​ ដែល​មាន​គោល​បំណង​នាំ​យក​ញត្តិ​ជូន​លោក​ Ban Ki-moon ​អគ្គ​លេខាធិការ​អង្គការ​សហ​ប្រជាជាតិ​ ដែល​នឹង​មក​ដល់​ទីក្រុង​ភ្នំពេញ​នៅ​យប់​នេះ។

កង​កម្លាំង​សន្តិសុខ​ទាំង​នេះ​ដែល​បាន​ប្រដាប់​ដោយ​ខែល ​ដំបង​ឆក់​ និង​អាវុធ​ ​បាន​រា​បិទ​ច្រក​ផ្លូវ​ទាំងអស់​ចូល​ទៅកាន់​អតីត​តំបន់​រដ្ឋសភា​ ដើម្បី​ទប់​ស្កាត់​ការ​ប្រមូល​ផ្តុំ ​និង​ការ​ដង្ហែ​ក្បួន​នាំយក​ញត្តិ​របស់សហភាព​សហជីព​កម្ពុជា​ ទៅ​ជូន​លោក ​Ban Ki-moon។

របង​សន្តិសុខ​នេះ​ បាន​ធ្វើឡើង​ បន្ទាប់ពី​សាលា​ក្រុង​ភ្នំពេញ​ បាន​បដិសេធ​សំណើ​សុំ​ជួប​ប្រជុំ​របស់​សហភាព​សហជីព​កម្ពុជា​នៅ​មុខ​អតីត​រដ្ឋសភា​នៅ​ថ្ងៃទី​២៦​នេះ។

លោក​ រ៉ុង ឈុន​ ប្រធាន​សមាគម​គ្រូ​បង្រៀន​កម្ពុជា​ឯករាជ្យ​ បាន​ថ្លែង​ប្រាប់​ក្រុម​អ្នក​រាយការណ៍​ព័ត៌មាន​នៅ​ការិយាល័យ​របស់​លោក​ថា នៅ​ក្នុង​ញត្តិ​នេះ​ លោក​បាន​លើក​ឡើង​ពី​ការ​ព្រួយ​បារម្ភ​អំពី​ការ​រំលោភ​បំពាន​ច្បាប់​ ការ​រើស​អើង ​និង​វប្បធម៌​និទ្ទណ្ឌភាព​នៅ​កម្ពុជា ​ជូនលោក ​Ban Ki-moon​។ លោក​មាន​ប្រសាសន៍​ថា៖

«ការ​ជួបជុំ​នេះ​ មាន​គោល​បំណង​សម្តែង​មតិ ​និង​អបអរ​សាទរ​ស្វាគមន៍​វត្តមាន​របស់​លោក​អគ្គ​លេខាធិការ​អង្គការ​សហ​ប្រជាជាតិ​នៅ​លើ​ទឹកដី​កម្ពុជា​នេះ។ យើង​គិត​ថា​ វត្តមាន​របស់​គាត់​មាន​សារៈសំខាន់​ណាស់​ក្នុង​ការ​ចូល​រួម​ជំរុញ​កម្ពុជា​ឱ្យ​ដើរ​តាម​ផ្លូវ​លទ្ធិ​ប្រជាធិបតេយ្យ ​និង​នីតិរដ្ឋ»។

លោក ​អ៊ំ​ សំអាត ​ប្រធាន​ផ្នែក​ស៊ើប​អង្កេត​នៃ​អង្គការ​សិទ្ធិ​មនុស្ស​ Licadh​o បាន​ថ្លែង​យ៉ាង​ដូច្នេះ​ថា៖

«ការ​មិន​អនុញ្ញាត​ឱ្យ​មាន​ការ​ជួប​ប្រជុំ​និង​ការ​ប្រើប្រាស់​ដាក់​កម្លាំង​បិទ​ផ្លូវ​នេះ​ ធ្វើឲ្យ​សិទ្ធិ​សេរីភាព​នៅក្នុង​ការ​ជួបជុំ​ ឬ ​ការ​ប្រមូល​ផ្តុំនៅ​កម្ពុជា​នេះ​ ត្រូវ​បាន​រឹត​បន្តឹង​ ដែល​ប៉ះពាល់​ទៅ​ដល់​ដំណើរ​ឆ្ពោះ​ទៅ​រក​លទ្ធិ​ប្រជាធិបតេយ្យ ​ឬ ​នីតិ​រដ្ឋ​នៅ​ក្នុង​ប្រទេស​កម្ពុជា»។

អង្គការ​សិទ្ធិ​មនុស្ស ​និង​គណបក្ស​ប្រឆាំង​បាន​លើក​យក​បញ្ហា​ជម្លោះ​ដីធ្លី​ ​ការ​បណ្តេញ​ចេញ​ដោយ​បង្ខំ​ ការ​រិតត្បិត​សិទ្ធិ​សេរីភាព​នៃ​ការ​បញ្ចោញ​មតិ ​ ការ​រិតត្បិត​សិទ្ធិ​សេរីភាព​នៃ​អ្នក​ការពារ​សិទ្ធិ​មនុស្ស​ ការ​ចាប់​ឃុំ​ខ្លួន​អ្នក​តវ៉ា​រឿង​ជម្លោះ​ដីធ្លី ​បញ្ហា​រំលោភ​បំពាន​ព្រំដែន​ពី​ប្រទេស​ជិតខាង​ សេរីភាព​របស់​អង្គការ​ សង្គម​ស៊ីវិល​ បញ្ហា​ជួញដូរ​មនុស្ស ​និង​កម្មករ​ចំណាក​ស្រុក​ ជូន​លោក​ Ban Ki-moon។

លោក​យឹម សុវណ្ណ​ អ្នក​នាំពាក្យ​គណបក្ស​សម រង្សី ​បាន​ថ្លែង​ថា តំណាងរាស្ត្រ​គណបក្ស​សម រង្សី ​បាន​សរសេរ​ញត្តិ​ជូន​លោក ​Ban Ki-moon ​ដើម្បី​សម្តែង​ទុក្ខ​កង្វល់​អំពី​ការរំលោភ​សិទ្ធិ​សេរីភាព​ និង​បូរណភាព​ទឹកដី​ខ្មែរ​ដែល​ប្រទេស​ជិតខាង​បំពាន​យក។

«យើង​មាន​ការព្រួយបារម្ភ​អំពី​ការរំលោភ​សិទ្ធិមនុស្ស​ ជាពិសេស​សិទ្ធិ​កាន់កាប់​ដីធ្លី ​និង​ផ្ទះ​សម្បែង​របស់​ប្រជា​ពលរដ្ឋ​រាប់​សែន​នាក់​ ដែល​អ្នក​មាន​អំណាច​រំលោភ​យក​ ហើយ​ប្រព័ន្ធ​តុលាការ​ ត្រូវ​បាន​គេ​ប្រើ​ជា​ឧបករណ៍​សម្រាប់​បង្ក្រាប​ទៅ​លើ​គណបក្ស​ប្រឆាំង​និង​ការ​កាត់​សេចក្តី​យ៉ាង​អយុត្តិធម៌​ឱ្យ​អ្នកក្រ​ចាញ់​ក្តី​យ៉ាង​អាណោច​អាធម។ នេះ​ជា​បញ្ហា​ដែល​យើង​មាន​ការ​ព្រួយបារម្ភ ​ហើយ​យើង​បាន​លើក​ជូន​ទៅ​លោក ​ដើម្បី​ដាក់​សម្ពាធ​ទៅ​លើ​រដ្ឋាភិបាល​ឱ្យ​គោរព​កិច្ច​ព្រមព្រៀង​ទី​ក្រុង​ប៉ារីស​ឱ្យ​បាន​ត្រឹមត្រូវ»។

លោក​ ធន សារ៉ាយ ​ប្រធាន​សមាគម​សិទ្ធិមនុស្ស​ ADHOC ​បាន​បញ្ជាក់​ថា ​ប្រធានបទ​ដ៏​សំខាន់​សម្រាប់​លោក​ Ban Ki-moon ​គឺ​ជំរុញ​ការ​លើក​កម្ពស់​ការ​គោរព​សិទ្ធិ​មនុស្ស​នៅ​កម្ពុជា។

«យើង​នឹង​លើក​ឡើង​ពី​បញ្ហា​វិបត្តិ​ដីធ្លី​ដែល​មាន​រវាង​អ្នកក្រ ​និង​អ្នកមាន​អំណាច​ បញ្ហា​សកម្មជន​សិទ្ធិ​មនុស្ស​និង​អ្នក​តំណាង​នៃ​ក្រុម​ជន​រងគ្រោះ​ពី​ជម្លោះ​ដីធ្លី ​និង​ធនធាន​ធម្មជាតិ​កំពុង​ប្រឈម​នឹង​ការ​ចាប់ខ្លួន​កាន់​តែ​ច្រើន​ឡើងៗ​ដោយ​តុលាការ។ ដូច្នេះ​យើង​កុំ​ឱ្យ​ប្រើ​ការ​គាប​សង្កត់​ទៅ​លើ​តំណាង​សហគមន៍ជន​រងគ្រោះ ​និង​សិទ្ធិ​សេរីភាព​របស់​អង្គការ​សង្គម​ស៊ីវិល​តាម​រយៈ​ច្បាប់​អង្គការ​ កុំ​ឱ្យ​មាន​ការ​រិតត្បិត​ ទៅ​លើ​ការងារ​របស់​អង្គការ​មិន​មែន​រដ្ឋាភិបាល​ជា​ដើម»។

លោក​ ផៃ ស៊ីផាន ​រដ្ឋលេខាធិការ ​និង​ជា​អ្នក​នាំ​ពាក្យ​ទី​ស្តីការ​គណៈ​រដ្ឋមន្ត្រី ​បាន​ថ្លែង​ថា​ ប្រទេស​កម្ពុជា​ មាន​បរិយាកាស​ប្រជាធិបតេយ្យ ​និង​សេរីភាព​ក្នុង​ការ​បញ្ចោញមតិ។ រដ្ឋាភិបាល​បាន​ប្តេជ្ញា​ពង្រឹង​យន្តការនិង​ច្បាប់ ​ដើម្បី​លើក​កម្ពស់​ការ​គោរព​សិទ្ធិមនុស្ស។

«អង្គការ​សហ​ប្រជាជាតិ​មិនមែន​ជា​ស្ថាប័ន​អ្វី​ ដែល​មក​គំរាម​គំហែង​ឬ​ ដាក់​សម្ពាធ​មក​លើ​កម្ពុជា​ទេ។ យើង​ជា​ដៃគូរ​បស់​អង្គការ​សហ​ប្រជាជាតិ។ យើង​មិន​មែន​នៅ​ក្រោម​អាណានិគម​របស់​អង្គការ​សហ​ប្រជាជាតិ​ទេ។​ ព្រះ​រាជាណាចក្រ​កម្ពុជា​ បាន​បើក​ចំហ​សេរីភាព​ក្នុង​ការ​បញ្ចោញ​យោបល់»។

លោក​ Ban Ki-moon ​អគ្គ​លេខាធិការ​អង្គការ​សហ​ប្រជាជាតិ​ បាន​អញ្ជើញ​មក​ដល់​ប្រទេស​កម្ពុជា​នៅ​យប់​ថ្ងៃ​អង្គារ​នេះ ​ហើយ​គ្រោងនឹង​ជួប​ជាមួយ​លោក​នាយករដ្ឋមន្ត្រី​ហ៊ុន សែន​ នៅ​ថ្ងៃពុធ​ស្អែក​នេះ៕

XS
SM
MD
LG