ប្រជាពលរដ្ឋអ្នកភូមិបឹងកក់ចំនួនប្រាំមួយនាក់ត្រូវបានសាលាដំបូងរាជធានីភ្នំពេញ កោះឲ្យចូលខ្លួនតាមកាលបរិច្ឆេទផ្សេងៗគ្នាចាប់ពីថ្ងៃសុក្រសប្តាហ៍នេះរហូតដល់ថ្ងៃសុក្រសប្តាហ៍ក្រោយ នេះបើយោងតាមដីកាកោះដែលត្រូវបានចុះហត្ថលេខាដោយព្រះអាជ្ញាសុខ រឿន ដែលវីអូអេ សំឡេងសហរដ្ឋអាមេរិកទទួលបាននៅថ្ងៃពុធនេះ។
អ្នកភូមិទាំងប្រាំមួយនាក់ត្រូវបានប្តឹងពីបទប្រមាថ និងគំរាមកំហែងដោយលោក ឆាយ ធារិទ្ធិ ចៅសង្កាត់ស្រះចក ក្រុងភ្នំពេញ។ នៅក្នុងចំណោមអ្នកត្រូវបានចោទប្រកាន់ទាំងនោះ មានពីររូបគឺជាម្ចាស់បណ្តឹងប្រឆាំងនឹងអាជ្ញាធរ និងក្រុមហ៊ុនស៊ូកាគូអ៊ីន ពីបទបំផ្លាញផ្ទះរបស់ពួកគេ និងអ្នកស្រី ទេពវ៉ាន់នី តំណាងយ៉ាងសកម្មមួយរូបរបស់អ្នកភូមិបឹងកក់។
អ្នកស្រី ទេព វ៉ាន់នី ដែលត្រូវចូលខ្លួនទៅតុលាការនៅថ្ងៃសុក្រសប្តាហ៍នេះ ហាក់ដូចជាភ្ញាក់ផ្អើល នៅពេលដែលអ្នកស្រីអះអាងថា ក្រុមប្រជាពលរដ្ឋមិនដែលមានការប្រឆាំងនឹងចៅសង្កាត់ម្ចាស់បណ្តឹងនោះទេ។
«ពួកខ្ញុំក៏មិននឹកនាទៅរករឿងគាត់ ធ្វើបាបគាត់ណាបន្តិចដែរ ហើយគាត់មកចោទខ្ញុំជាស្រ្តីជេរ ប្រមាថ»។
លោក ដួង គា ម្ចាស់បណ្តឹងម្នាក់ក្នុងចំណោមម្ចាស់បណ្តឹងទាំងប្រាំមួយនាក់ ដែលបានដាក់ពាក្យបណ្តឹងទៅតុលាការក្រុងភ្នំពេញកាលពីថ្ងៃម្សិលមិញ ប្រឆាំងនឹងក្រុមហ៊ុនស៊ូកាគូអ៊ីន និងអាជ្ញាធរក្រុងភ្នំពេញ ក៏ជាអ្នកទទួលរងបណ្តឹងម្នាក់ដែរពីចៅសង្កាត់ដែលគ្រប់គ្រងកន្លែងដែលគាត់ធ្លាប់រស់នៅនោះ។ លោក ដួង គា យល់ឃើញថា បណ្តឹងនេះគឺជាការគាបសង្កត់ទៅលើប្រជារាស្រ្ត។
«ការពិតទៅ រឿងហ្នឹង ខ្ញុំឥតបានដឹង ឥតបានឮ ហើយខ្ញុំក៏ឥតប្រព្រឹត្តិបទល្មើសដែរ។ បណ្តឹងចាប់ខ្លួនហ្នឹងដើម្បីពួកខ្ញុំរត់ចោលផ្ទះចោលសម្តែងអញ្ចឹងទៅ ហើយគាត់យកដីហ្នឹងស្រួល»។
លោក ឆាយ ធារិទ្ធិ ម្ចាស់បណ្តឹងប្រឆាំងទៅនឹងប្រជាពលរដ្ឋ មិនផ្តល់សេចក្តីអធិប្បាយណាមួយទេ ដោយលោកប្រាប់ថា លោកកំពុងតែជាប់រវល់។
«ជាប់នៅក្នុងពិធី។ ខ្ញុំស្តាប់ឥតបានទេ។ ជាប់នៅក្នុងពិធី ហើយប៉ុនហ្នឹងបានណាស់»។
ដីបឹងកក់ទំហំ១៣៣ហិកតា បានក្លាយទៅជាប្រធានបទនៃទំនាស់យ៉ាងខ្លាំងក្លា រវាងក្រុមហ៊ុន ស៊ូកាគូអ៊ីន និងរវាងអាជ្ញាធរក្រុងភ្នំពេញ ជាមួយប្រជាពលរដ្ឋជាងបួនពាន់គ្រួសារ។ ប្រជាពលរដ្ឋ ភាគច្រើនបានសុខចិត្តចាកចេញពីលំនៅស្ថាន ដោយពួកគេយល់ព្រមទទួលសំណង ដែលពួកគេបានអះអាងថា ពួកគេមិនពេញចិត្តនោះទេ។
អ្នកភូមិទាំងប្រាំមួយនាក់ គឺជាអ្នកប្រឈមមុខនឹងតុលាការដំបូងគេបន្ទាប់ពីទំនាស់ដីធ្លីនេះ កើតមានឡើងហើយអូសបន្លាយចាប់តាំងពីឆ្នាំ២០០៧មកម៉្លេះ។
លោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជា បានហៅបណ្តឹងប្រឆាំងនឹងអ្នកបឹងកក់ថា ជាការចាប់ផ្តើមយន្តការផ្លូវច្បាប់សម្រាប់គាបសង្កាត់ទៅលើក្រុមអ្នកតវា។
«ពីដើមមកដែលថា យុទ្ធសាស្ត្រនេះអស់ប្រសិទ្ធិភាព ទើបអាជ្ញាធរ ពួកក្រុមហ៊ុនទាំងអស់គ្នាហ្នឹង គាត់ប្រើប្រព័ន្ធតុលាការ ហើយដើម្បីគាបសង្កត់ប្រជាពលរដ្ឋ។ យើងឃើញត្រឹមករណីជាច្រើន ប្រជាពលរដ្ឋដែលរងគ្រោះ អញ្ចឹងប្រជាពលរដ្ឋដែលប្តឹងទៅ ឥតមាននរណាហ៊ានយកទៅដាក់ទេ។ ហើយការដោះស្រាយតាមប្រព័ន្ធតុលាការ វាមានប្រវត្តិជោគជ័យជាច្រើន»។
ក្រុមប្រជាពលរដ្ឋទន់ខ្សោយត្រូវបានរាយការណ៍ថា គឺជាអ្នកប្រឈមនឹងគ្រោះថ្នាក់បំផុត។ លោក អ៊ូច ឡេង មន្ត្រីទទួលបន្ទុកផ្នែកកម្មវិធីដីធ្លីរបស់អង្កការការពារសិទ្ធិមនុស្សអាដហុកបានឲ្យដឹងថាមានប្រជាពលរដ្ឋជាង២០០នាក់កំពុងត្រូវបានប្តឹងតាមផ្លូវតុលាការ និងប្រជាពលរដ្ឋជាង៣០នាក់ផ្សេងទៀតកំពុងជាប់ឃុំឃាំងដោយសារតែទំនាស់ដីធ្លី នៅក្នុងអំឡុងប៉ុន្មានខែនៃឆ្នាំ២០១១នេះ៕