ក្រុមអ្នកតំណាងរាស្រ្តគណបក្សប្រឆាំងបានទទួចដល់សមាជិកព្រឹទ្ឋសភាសហរដ្ឋអាមេរិកមួយរូបឲ្យជួយពិនិត្យមើលការទាញយកផលប្រយោជន៍ពីការរុករកប្រេង និងឧស្ម័ន ដើម្បីឲ្យមានតម្លាភាពនៅក្នុងប្រទេសកម្ពុជា ។
នៅក្នុងលិខិតមួយច្បាប់របស់អ្នកតំណាងរាស្រ្តគណបក្សសម រង្ស៊ី ដែលបានផ្ញើជូនលោក ចន ឃ័ររី (John Kerry) សមាជិកព្រឹទ្ឋសភាសហរដ្ឋអាមេរិកមួយរូប និងជាប្រធានគណៈកម្មការទំនាក់ទំនងអន្តរជាតិ បានគាំទ្រចំពោះគោលនយោបាយរបស់សហរដ្ឋអាមេរិក ដែលបានអនុម័តលើវិសោធនកម្មច្បាប់ ហិរញ្ញវត្ថុ ដែលច្បាប់នេះបានជះឥទ្ឋិពលដល់ប្រទេសកម្ពុជា ដើម្បីឲ្យមានតម្លាភាពលើវិស័យប្រេង និងឧស្ម័ន ។
លោកសុន ឆៃ ប្រធានក្រុមអ្នកតំណាងរាស្រ្គគណបក្សប្រឆាំង បានថ្លែងប្រាប់អង្គសន្និសីទកាសែតនៅថ្ងៃសុក្រនេះថា ក្រុមហ៊ុនប្រេង ដែលបានមករកស៊ីក្នុងប្រទេសកម្ពុជា ត្រូវប្រកាសការបង់កំរៃផ្សេងៗ។ លោកបានមានប្រសាសន៍ថា វាគឺជាការល្អមួយ ដែលធ្វើឲ្យមន្រ្តីដែលធ្លាប់ទទួលលាភសក្ការៈមានការប្រុងប្រយ័ត្ន។ លោកថ្លែងដូច្នេះថា៖
«យើងអាចជួយឲ្យប្រាក់ចំណូលដល់ប្រទេសជាតិយើង គឺថាបានចូលត្រឹមត្រូវ»។
កម្ពុជាគ្រោងនឹងចាប់ផ្តើមធ្វើអាជីវម្មរ៉ែប្រេង និងឧស្ម័ននៅឆ្នាំ២០១២ខាងមុខនេះ ខណៈដែលប្រទេសនេះកំពុងប្រឈមនឹងកង្វះខាតច្បាប់សម្រាប់គ្រប់គ្រងការធ្វើអាជីវកម្មរ៉ែ ប្រេង និងឧស្ម័ន ប្រកបទៅដោយតម្លាភាព និងប្រសិទ្ឋភាព ដើម្បីជៀសវាងបណ្តាសាប្រេង ។
លោក ជាម យៀប ប្រធានគណៈកម្មាធិការហិរញ្ញវត្ថុនៃរដ្ឋសភាខាងគណបក្សប្រជាជនកម្ពុជា ធ្លាប់បានមានប្រសាសន៍ថា អ្នកតំណាងរាស្រ្តតែងតែត្អូញត្អែរអំពីកង្វះយន្តការគ្រប់គ្រងការធ្វើអាវីកម្មរ៉ែប្រេង និងឧស្ម័ននៅក្នុងពេលដែលកម្ពុជាត្រៀមខ្លួនបូមយកប្រេង និងឧស្ម័ននៃឆ្នាំ២០១២។
លោកសុន ឆៃ បានមានប្រសាសន៍ថា ការរកចំណូលបានមកពីប្រេង និងឧស្ម័ន គួរតែមានច្បាប់មួយគ្រប់គ្រង ដើម្បីធ្វើយ៉ាងណានៅពេលដែលអស់ប្រេងមិនអាចទាញយកបាននោះ ចំណូលដែលបានមកពីប្រេង និងឧស្ម័ននេះ អាចត្រូវបានយកមកទ្រងទ្រង់សេដ្ឋកិច្ចកម្ពុជា ។ លោកបន្តថា៖
«ជាមួលដ្ឋានក្នុងការពង្រឹងសេដ្ឋកិច្ចរបស់ប្រទេស ជាជាងឲ្យចូលទៅក្នុងហោប៉ៅជនណាមួយនោះ នេះជាបំណងរបស់យើង ហើយយើងសង្ឃឹមបានផលបែបហ្នឹង»។
កម្ពុជានៅពុំទាន់មានច្បាប់សម្រាប់គ្រប់គ្រងការធ្វើអាជីវកម្មប្រេង និងឧស្ម័ននៅឡើយទេ ដែលទាមទារឲ្យរដ្ឋាភិបាលត្រូវតែមានការទទួលខុសត្រូវក្នុងការធ្វើអាជីវកម្មរ៉ែប្រេង និងឧស្ម័នទាំងនេះ។ រហូតមកដល់ពេលនេះ មានក្រុមហ៊ុនចំនួន២៣ ត្រូវបានផ្តល់សិទ្ឋិឲ្យរុករកប្រេង និងឧស្ម័ន ក្នុងសមុទ្រកម្ពុជា។ ក៏ប៉ុន្តែ ក្នុងចំណោមក្រុមហ៊ុនទាំងនោះ មានក្រុមហ៊ុនមួយចំនួនបានចាក់ចេញពីកម្ពុជាដោយសារតែធនធានប្រេង និងឧស្ម័នមិនអាចអភិវឌ្ឍបានក្នុងលក្ខណៈជាពាណិជ្ជកម្ម។