ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ស្រី មូរ សុខហួរ មិន​បង់​ប្រាក់​ពិន័យ


លោក​ស្រី​មូរ សុខហួរ ​បាន​បញ្ជាក់​ពី​ជំហរ​ចុង​ក្រោយ​ថា​ លោក​ស្រី​នឹង​មិន​បង់​ប្រាក់​ពិន័យ​ទេ។ ការ​បញ្ជាក់​ជំហរ​ចុង​ក្រោយ​របស់​លោក​ស្រី​ បាន​កើត​ឡើង​ក្រោយ​ពី​គណៈ​ប្រតិភូ​គណបក្ស​ប្រឆាំង​មួយ​ក្រុម​ ដែល​មាន​គ្នា​ចំនួន ​៧ រូប ​បាន​ទៅ​ជួប​លោកស្រី​នៅ​ទីក្រុងម៉ានីល (Manila) ប្រទេស​ហ្វីលីពីន​នៅ​ថ្ងៃ​ចន្ទ័​នេះ ដើម្បី​ជជែក​ជា​មួយ​លោក​ស្រី​អំពី​ការ​បង់​ប្រាក់។ លោក​ស្រី​មូរ សុខហួរ អ្នក​តំណាង​រាស្រ្ត​គណបក្ស​ប្រឆាំង​ បាន​ថ្លែង​ប្រាប់​វីអូអេ​សំឡេង​សហ​រដ្ឋ​អាមេរិក​តាម​រយៈ​សារអេឡិចត្រូនិក ឬ​អ៊ីម៉េល​ថា លោក​ស្រី​នៅ​តែ​ប្រកាន់​ជំហរ​មិន​បង់​ប្រាក់​ពិន័យ​ ហើយ​គណបក្ស​សម រង្ស៊ីក៏​ពុំ​បង់​ប្រាក់​ពិន័យ​ជំនួស​លោកស្រី​ដែរ។ លោកស្រី​បាន​លើក​ឡើង​ទៀត​ថា ការ​សម្រេច​ចិត្ត​នេះ គឺ​ធ្វើ​ទៅ​តាម​ឧត្តមគតិ​របស់​លោកស្រី។

រតនាគារ កាល​ពី​ពីរ​សប្តាហ៍​មុន បាន​ចេញ​សេចក្តី​ជូន​ដំណឹង​មួយ ដោយ​ទុក​រយៈ​ពេលពីរ​សប្តាហ៍​ឲ្យ​លោក​ស្រី​មូរ សុខហួរ បង់​ប្រាក់​ពិន័យ​ដំបូង​ចំនួន​៨.៥០០.០០០​រៀល គឺ​ស្មើនឹងប្រមាណ​ជាង​២.០០០​ដុល្លារ​អាមេរិក។ ចំនួន​នេះ​ គឺ​ស្មើ​នឹងពាក់​កណ្តាល​នៃ​ទឹក​ប្រាក់​ពិន័យ​សរុប​ចំនួន​ ១៦.៥០០.០០០ ​រៀល ឬ​ស្មើនឹង​ប្រមាណ​ជាង ​៤.០០០ ​ដុល្លារ​អាមេរិក ដែល​លោក​ស្រី​ត្រូវ​បង់​ប្រាក់​ពិន័យ។

តុលាការ​កំពូល កាល​ពី​ថ្ងៃ​ទី​២ ខែ​មិថុនា​កន្លង​ទៅ​នេះ​បាន​សម្រេច​តម្កល់​សាល​ដីកា​របស់​សាលា​ឧទ្ឋរណ៍ ដោយ​តម្រូវ​ឲ្យ​លោក​ស្រី​បង់​ប្រាក់​ពិន័យ​ចំនួន ​២.០០០ ដុល្លារ​អាមេរិក ជូន​ដល់​រដ្ឋាភិបាល និង​ប្រាក់​សំណង​ជម្ងឺ​ចិត្ត​ជូន​លោក​នាយក​រដ្ឋ​មន្រ្តី​ហ៊ុន សែន ចំនួន​ជាង​១.៩០០ដុល្លារ​អាមេរិក។

លោក​សុខ រឿន ព្រះរាជ​អាជ្ញា​រង​នៃ​តុលាការ​ក្រុង​ភ្នំពេញ បាន​និយាយ​ថា រហូត​មក​ដល់​ពេលនេះ លោក​ពុំ​ទាន់​បាន​ទទួល​សេចក្តីរាយការណ៍ពី​រតនាគារ​ក្រុង​ភ្នំពេញ ថា​តើ​លោកស្រី​សម្រេច​បង់​ប្រាក់​ពិន័យ ឬ​មិន​បង់​ប្រាក់​ពិន័យ​យ៉ាង​ណា​នៅ​ឡើយ​ទេ។ លោក​បន្ត​ថា៖

«គាត់​អត់​ព្រម​បង់​ទេ យើង​អនុវត្ត​តាម​នីតិ​វិធី​បន្ត ពេល​ហ្នឹង​គឺ​ព្រះរាជ​អាជ្ញា គឺ​នឹង​ធ្វើ​លិខិត​ជូនទៅ​គាត់​មិន​ឲ្យ​លើស​ពី​ ១០ ថ្ងៃ​ទេ ជូន​ដំណឹង​គេ​ហៅ​ថា ដំណឹង​ចុង​ក្រោយ »

លោក​កែ ប៊ុនឡេង ប្រធាន​រតនាគារ​ក្រុងភ្នំពេញ បាន​បដិសេធ​ផ្តល់​អត្ថាធិប្បាយ​ ដោយ​មាន​ប្រសាសន៍​ថា៖

«បាទ! ខ្ញុំអត់​ធ្វើ​បទសម្ភាសន៍​អី​ទេ អត់​ទេ»

លោក​សុខ រឿន បាន​មាន​ប្រសាសន៍​ទៀត​ថា ប្រសិន​ណា​បើ​លោកស្រី​មូរ សុខហួរ នៅ​តែ​មិនបង់​ប្រាក់​ពិន័យ​ទេ លោក​ស្រី​នឹង​ប្រឈម​មុខ​ដាក់​ពន្ឋនាគារ​បង្ខំ​លើ​រូប​រាង​កាយ។ លោក​បន្ត​ថា៖

«ជា​បង្ខំ​ គឺ​មាន​ន័យ​ថា យើង​ប្រើ​ប្រាស់​កម្លាំង​សាធារណៈ​ឲ្យ​ហៅ​គាត់​មក ដើម្បី​ដាក់​គុក​បង្ខំ​ដល់​រូប​កាយ​នៅ​ក្នុង​មាត្រា​៥៣០ »

លោក​ស្រីមូរ សុខហួរ គ្រោង​នឹង​មក​កាន់​ប្រទេស​កម្ពុជា​វិញ នៅ​ថ្ងៃ​ទី៥ ខែ​កក្កដា ខាង​មុខ​នេះ។

XS
SM
MD
LG