ក្រសួងព័ត៌មាន បានបញ្ជាឲ្យបិទភ្នាក់ងារសារព័ត៌មាន ក្នុងស្រុកដែលមិនសូវមានឈ្មោះបោះសំឡេងចំនួន ៣៧អង្គភាពបន្ទាប់ពីមិនបានចេញផ្សាយ និងផុតអាជ្ញាប័ណ្ណអស់រយៈពេលជិត១០ឆ្នាំ។ ប៉ុន្តែមន្ត្រីអង្គការសារព័ត៌មាននិងសិទ្ធិមនុស្ស បានរិះគន់ការបិទនេះថាជា ការបិទសិទ្ធិសេរីភាព។
លោក ខៀវ កាញ៉ារិទ្ធ រដ្ឋមន្ត្រីក្រសួងព័ត៌មាន បានបញ្ជាក់នៅក្នុងប្រកាសថា ក្រសួងបានសម្រេចបញ្ឈប់ការអនុញ្ញាតឲ្យបោះពុម្ភផ្សាយសារព័ត៌មាន ចំនួន៣៧ភ្នាក់ងារ រួមមានកាសែតចំនួន១៦ ទស្សនាវដ្តីចំនួន១៥ និងព្រឹត្តិបត្រចំនួន៦។
លោក យ៉ែម ណយ ប្រធានមណ្ឌលព័ត៌មាន នៃក្រសួងព័ត៌មាន បានថ្លែងថាក្រសួងបានទុកពេលឲ្យម្ចាស់សារព័ត៌មានទាំងនោះរយៈពេលជិត១០ឆ្នាំ បន្ទាប់ពីបានផុតសុពលភាពនៃអាជ្ញាប័ណ្ណ ប៉ុន្តែម្ចាស់សារព័ត៌មានទាំងនេះ មិនបានមកបន្ត និងហាក់បីដូចជាបោះបង់ចោល អាជីវកម្មកាសែតនេះ។
«កាសែត ទាំងអស់ហ្នឹងផុតអាជ្ញាប័ណ្ណយូរហើយតាំងពីឆ្នាំ២០០២ ដែលគាត់អត់មកបន្ត។ ក្រសួងលុបចោលកាសែតអសកម្ម កាសែត អត់ចេញផ្សាយ គ្មានអាស័យដ្ឋាន ហើយអត់មកបន្តសុពលភាពអាជ្ញាប័ណ្ណអាជីវកម្ម។ យើងចុះស្រាវជ្រាវរកស្នាក់ការមិនឃើញមាន ដូចដែលគាត់បានសុំបែបបទមកក្រសួងបើកអាជីវកម្មទេ»។
លោក សុខ សុវណ្ណ ប្រធានក្រុមប្រឹក្សាសារព័ត៌មានកម្ពុជា បានគាំទ្រដល់ការបិទអង្គការសារព័ត៌មានទាំងនេះ។
លោក ជា គឹមសាន ចាងហ្វាងការផ្សាយនៃកាសែតចរិតខ្មែរ ដែលត្រូវបានបិទនោះ បានថ្លែងថា ក្នុងច្បាប់របបសារព័ត៌មាន ក្រសួងគ្មានសិទ្ធិបិទកាសែតដែល មិនដំណើរការទេ។ ក្រសួងព័ត៌មាន អាចមានសិទ្ធិត្រឹមតែចេញអាជ្ញាប័ណ្ណឲ្យបើកកាសែតប៉ុណ្ណោះ។
លោក ជា គឹមសាន បានបញ្ជាក់ថា កាសែតរបស់លោកបានផុតសុពលភាព នៃអាជ្ញាប័ណ្ណយូរមែន និងមិនបានបោះពុម្ពចេញផ្សាយទេ។
«ក្រសួង គួរតែជូនដំណឹងដល់អ្នកកាន់អាជ្ញាប័ណ្ណហ្នឹងដែរ ប៉ុន្តែក្រសួងអត់ដែលជូនដំណឹងផង និងអត់ដែលចេញសេចក្តីណែនាំថាឲ្យបន្តអាជ្ញាប័ណ្ណផង។ ស្រាប់តែចេញប្រកាស មកបិទកាសែតតែម្តង។ ខ្ញុំ ស្រងាកចិត្តចំពោះការបិទនេះ ដោយក្រសួងធ្វើអ្វីស្ងាត់ៗ អត់មាន ប្រាប់ដល់អ្នកកាន់អាជ្ញាប័ណ្ណថា ត្រូវបន្តដោយជូនដំណឹងជាលាយលក្ខណ៍អក្សរ»។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សា ផ្នែកសារព័ត៌មាន បានថ្លែងថាការបិទកាសែត ទស្សនាវដ្តី និងព្រឹត្តិបត្រនេះ បានរំលោភលើរដ្ឋធម្មនុញ្ញ និងច្បាប់សារព័ត៌មាន ប៉ុន្តែការបិទអាចធ្វើទៅបាន លុះត្រាតែកាសែតនោះ បានប្រព្រឹត្តបទល្មើសព្រហ្មទណ្ឌ។
«ការបិទកាសែតទាំងអស់ហ្នឹងគឺខុសនឹងគោលការណ៍ នៃរដ្ឋធម្មនុញ្ញផង និងច្បាប់សារព័ត៌មានផង។ ការបិទកាសែតនេះ អាចជាទម្រង់មួយនៃការចាប់ពិរុទ្ធជាមុន»។
លោក អំ សំអាត ប្រធានផ្នែកស៊ើបអង្កេត នៃអង្គការសិទ្ធិមនុស្សលីកាដូ បានបញ្ជាក់ថា ការបិទសារព័ត៌មាននេះ ប៉ះពាល់ដល់សិទ្ធិផ្សាយព័ត៌មាន សិទ្ធិទទួលព័ត៌មាន និងសិទ្ធិបញ្ចេញមតិរបស់ប្រជាពលរដ្ឋតាមរយៈសារព័ត៌មាន។
«ខ្ញុំយល់ថាការបិទនេះ ប៉ះពាល់ទៅដល់សិទ្ធិក្នុងការចែកចាយព័ត៌មាន។ វាបានន័យថាការបញ្ចេញមតិ ឬ ការចែកចាយព័ត៌មាន តាមរយៈសារព័ត៌មានទាំងអស់នេះផងដែរ។ នេះ ជាចំណុចអវិជ្ជមានមួយ»។
ក្រុមមន្ត្រីសារព័ត៌មាន បាននិយាយថា ក្រសួងព័ត៌មាន បានផ្តល់អាជ្ញាប័ណ្ណដល់អង្គភាពកាសែត ទស្សនាវដ្តី និងព្រឹត្តិប័ត្រជាង៥០០៕