ភ្នំពេញ៖ ក្រសួងកសិកម្មបានធ្វើសេចក្តីព្រាងអនុក្រឹត្យស្តីពីផលិតផលកសិកម្មតាមកិច្ចសន្យា សំដៅជំរុញមានទំនាក់ទំនងផ្នែកផលិត និងទីផ្សារសម្រាប់លក់ផលិតផលឱ្យប្រសើរ។ សេចក្តីព្រាងអនុក្រឹត្យនេះនឹងផ្តល់ជំនឿទុកចិត្ត និងលើកទឹកចិត្តដល់អ្នកវិនិយោគមកនៅកម្ពុជា ព្រមទាំងបម្រើ ផលប្រយោជន៍របស់កសិករនិងអ្នកទិញក្នុងការធ្វើកិច្ចសន្យាដោយផ្ទាល់។ អនុក្រឹត្យនេះបានជួយជំរុញផែនការជំរុញផលិតផលស្រូវ និងនាំអង្ករចេញរបស់រដ្ឋាភិបាល។
ក្រុមមន្ត្រីរដ្ឋាភិបាលបាននិយាយនៅថ្ងៃពុធនេះថា ក្រសួងកសិកម្មបានបញ្ចប់ការតាក់តែងសេចក្តីព្រាងអនុក្រឹត្យដ៏មានសារៈសំខាន់ថ្មីមួយ សម្រាប់ផ្តល់តួនាទីដ៏ចាំបាច់ដល់ក្រសួងកសិកម្មនៅក្នុងការបង្កើតកិច្ចសន្យាផលិតផលកសិកម្មរវាងកសិករ និងអ្នកវិនិយោគ។
លោកម៉ៅ សុភារ៉េត ប្រធាននាយកដ្ឋានកសិឧស្សាហកម្មនៃក្រសួងកសិកម្ម បានថ្លែងប្រាប់ VOA ថា សេចក្តីព្រាងអនុក្រឹត្យនេះបានតម្រូវឱ្យក្រសួងកសិកម្មរកដៃគូវិនិយោគផ្នែកកសិកម្ម និងរកទីផ្សារ សម្រាប់ផលិតផលកសិកម្មរបស់កសិករ ព្រមទាំងធ្វើជាអ្នកសម្របសម្រួលរកផលប្រយោជន៍ឱ្យកសិករផង និងអ្នកវិនិយោគផង។
«អនុក្រឹត្យមានសារៈសំខាន់សម្រាប់ភាគីអ្នកផលិត និងភាគីអ្នកទិញមានជំនឿជឿជាក់លើគ្នាទៅ វិញទៅមក។ ក្រោយពីអនុក្រឹត្យនេះចេញទៅ យើងមានការភ្ជាប់ទំនាក់ទំនងរវាងអ្នកវិនិយោគនិងកសិករផ្ទាល់ ដើម្បីឱ្យអ្នកវិនិយោគទៅធ្វើការវិនិយោគដោយចុះកិច្ចសន្យាជាមួយកសិករ ឬសហគមន៍កសិកម្ម។ អនុក្រឹត្យនេះនឹងលុបបំបាត់ឈ្មួញកណ្តាល និងនាំយកអ្នកវិនិយោគទៅវិនិយោគផ្ទាល់ជាមួយកសិករ និងសហគមន៍កសិករ»។
លោកម៉ៅ សុភារ៉េតបានបញ្ជាក់ថា សេចក្តីព្រាងអនុក្រឹត្យនេះនឹងផ្តល់ជំនឿទុកចិត្ត និងលើកទឹកចិត្តឲ្យអ្នកវិនិយោគមកវិនិយោគនៅកម្ពុជា។
លោកម៉ៅ សុភារ៉េតបានបន្ថែមថា ក្រសួងកសិកម្មបានបញ្ចប់សេចក្តីព្រាងអនុក្រឹត្យស្តីពីផលិតផល កសិកម្មតាមកិច្ចសន្យានេះ និងបានបញ្ជូនទៅទីស្តីការគណៈរដ្ឋមន្ត្រី ហើយសេចក្តីព្រាងអនុក្រឹត្យនេះកំពុងស្ថិតនៅក្រោមការត្រួតពិនិត្យរបស់ក្រុមប្រឹក្សាអ្នកច្បាប់ប្រចាំទីស្តីការគណៈរដ្ឋមន្ត្រី ដែលនឹងអាចអនុម័តដោយគណៈរដ្ឋមន្ត្រីនៅក្នុងខែកុម្ភៈខាងមុខនេះ។
លោកម៉ៅ សុភារ៉េតបានថ្លែងថា ក្រសួងកសិកម្មនឹងធ្វើជាអ្នកសម្របសម្រួលសម្រាប់ផលិតផល កសិកម្មតាមកិច្ចសន្យាដែលក្នុងនោះឈ្មួញ និងកសិករផ្តោតទៅលើតម្លៃគុណភាព និងបរិមាណផលដំណាំសម្រាប់ការលក់ចេញ។
លោកម៉ៅ សុភារ៉េតបានបញ្ជាក់ថា សេចក្តីព្រាងអនុក្រឹត្យនេះត្រូវបានធ្វើឡើងដើម្បីជួយរដ្ឋាភិបាល ឱ្យសម្រេចបាននូវការនាំចេញអង្ករចំនួនមួយលានតោននៅឆ្នាំ២០១៥ និងជួយបង្កើនការផលិតស្រូវ របស់កសិករ កាន់តែច្រើនឡើងថែមទៀតសម្រាប់ការនាំចេញ។
សេចក្តីព្រាងអនុក្រឹត្យនេះបានចង្អុលបង្ហាញថា ក្រសួងកសិកម្មជាស្ថាប័ននាំមុខក្នុងការសម្របសម្រួល និងការដោះស្រាយរាល់ការអនុវត្តកិច្ចសន្យាផលិតកម្មកសិកម្មដែលមានវិវាទ។
លោកម៉ៅ សុភារ៉េតបានបញ្ជាក់ថា សេចក្តីព្រាងអនុក្រឹត្យនេះបានតម្រូវឱ្យភាគីអ្នកទិញចុះកិច្ចសន្យាដោយផ្ទាល់ជាមួយកសិករ ឬសមាគមកសិករដែលជាអ្នកផលិត និងលក់ផលិតផលកសិកម្មទៅឱ្យភាគីអ្នកទិញតាមតម្លៃទីផ្សារ។
លោកយ៉ង់ សាំងកុមារ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្ម បានថ្លែងថា សេចក្តីព្រាងអនុក្រឹត្យនេះបានលើកទឹកចិត្តដល់ក្រុមហ៊ុនធំៗចុះកិច្ចសន្យាជាមួយកសិករ ឬសមាគមកសិកម្ម។
លោកយ៉ង សាំងកុមារនិយាយថា៖
«វាជារឿងល្អ ប៉ុន្តែយើងត្រូវអនុវត្តអនុក្រឹត្យនេះ កុំឱ្យមានភាពលំអៀង។ បើវាអនុវត្តទៅប្រកបដោយយុត្តិធម៌ កសិករមានកិច្ចសន្យាច្បាស់លាស់លើទីផ្សារ បរិមាណ និងតម្លៃដែលមានភាពច្បាស់លាស់ ហើយក្រុមហ៊ុនធំៗត្រូវការទិញផលិតផលនោះ។ ក្រុមហ៊ុនអាចមានភាពច្បាស់លាស់ និងទទួលបានផលិតផលតាមគុណភាព បរិមាណ និងស្តង់ដារដែលគេចង់បាន»។
លោកម៉ៅ សុភារ៉េតបានបញ្ជាក់ថា អនុក្រឹត្យនេះបានតម្រូវឱ្យក្រសួងកសិកម្មផ្តល់សេវាបច្ចេកទេស ដល់កសិករ ឬសមាគមកសិកម្ម ខណៈដែលកសិករនៅមានចំណុចខ្សោយផ្នែកបច្ចេកទេសច្បាប់និងព័ត៌មានផ្នែកទីផ្សារ៕