ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ខ្មែរ​ធ្វើការ​ក្រៅស្រុក​ផ្ញើលុយមក​ផ្ទះវិញ​១៥០លាន​ដុល្លារក្នុង​មួយឆ្នាំ


កាល​ពី​ឆ្នាំ​មុន កម្ពុជា​បាន​បញ្ជូន​ពលករ​ស្រប​ច្បាប់​ចំនួន​ ៩៤.៥៦៤នាក់​ទៅ​ប្រទេស​ថៃ ១៩.៥៨៨នាក់​ទៅ​ប្រទេស​ម៉ាឡេស៊ី ៩.០៨២នាក់​ទៅ​ប្រទេស​កូរ៉េ​ខាង​ត្បូង និង ៩៧នាក់​ទៅ​ប្រទេស​ជប៉ុន។
កាល​ពី​ឆ្នាំ​មុន កម្ពុជា​បាន​បញ្ជូន​ពលករ​ស្រប​ច្បាប់​ចំនួន​ ៩៤.៥៦៤នាក់​ទៅ​ប្រទេស​ថៃ ១៩.៥៨៨នាក់​ទៅ​ប្រទេស​ម៉ាឡេស៊ី ៩.០៨២នាក់​ទៅ​ប្រទេស​កូរ៉េ​ខាង​ត្បូង និង ៩៧នាក់​ទៅ​ប្រទេស​ជប៉ុន។

ភ្នំពេញៈ ពលករ​ទេសន្តរប្រវេសន៍ខ្មែរ​ច្រើន​រាប់​ម៉ឺន​នាក់ ​បាន​ចូល​រួម​ចំណែក​យ៉ាង​សំខាន់​នៅ​ក្នុង​គោល​នយោបាយ​កាត់​បន្ថយ​ភាព​ក្រីក្រ​របស់​រដ្ឋាភិបាល​ ដោយ​ពួកគេ​បានផ្ញើ​ប្រាក់​មួយ​ផ្នែកនៃ​ប្រាក់ខែរបស់​ខ្លួន​ មក​ផ្គត់ផ្គង់​ជីវភាព​គ្រួសារ​នៅក្នុងប្រទេស​កម្ពុជា​។ ក្រសួង​ការងារ​បានពង្រឹង​ការគ្រប់គ្រង​ និង​ការការពារ​ដល់​ពលករ​ទេសន្តរប្រវេសន៍ខ្មែរ​តាម​រយៈ​ការរៀបចំ​ឯកសារ​ច្បាប់​ និង​គោលនយោបាយ​។ អង្គការ​សង្គមស៊ីវិល​បានទទួលស្គាល់​ថា​ ជីវភាពគ្រួសាររបស់​ពលករ​ទេសន្តរប្រវេសន៍​ភាគច្រើន​មាន​ភាពប្រសើរ​ឡើង​។

លោក​រដ្ឋមន្ត្រី​ក្រសួង​ការងារ​ វង់សូត ​បាន​ថ្លែង​នៅថ្ងៃព្រហស្បត៍​នេះ​ថា ​ពលករ​ទេសន្តរ​ប្រវេសន៍​ខ្មែរ​ចំនួន​ជាង១២០.០០០​នាក់​ដែល​កំពុងធ្វើការ​នៅក្នុង​ប្រទេស​អាស៊ី​មួយចំនួន​ បាន​ផ្ញើ​ប្រាក់​ប្រមាណ​១៥០​ លាន​ដុល្លារអាមេរិក​ក្នុងមួយ​ឆ្នាំ​ៗ​សម្រាប់​ផ្គត់ផ្គង់​ជីវភាព​គ្រួសារ​របស់​ពួកគាត់​។

លោក ​វង់ សូត រដ្ឋមន្ត្រី​ក្រសួង​ការងារ ​បានថ្លែង​ប្រាប់​សមាជិក​សភា​នៅក្នុង​ការប្រជុំ​ចោទ​សួរថា ​ទឹក​ប្រាក់របស់​ប្រជាពលរដ្ឋ​ខ្មែរ​ដែល​បានទៅ​ធ្វើការ​នៅ​បរទេស​ទាំងនេះ​ បានចូលរួម​ចំណែក​យ៉ាង​សំខាន់​នៅ​ក្នុង​ការ​ជួយលើក​កម្ពស់​ជីវភាព​រស់នៅ​របស់​ក្រុម​គ្រួសារ ស្របតាម​គោលនយោបាយ​កាត់បន្ថយ​ភាពក្រីក្រ​របស់​រដ្ឋាភិបាល​។

"ពលករ​ខ្មែរ​ដែល​បាន​និង​កំពុង​ធ្វើការ​នៅ​បរទេស​ មាន​ចំនួន​១២២.៧៣១​នាក់ ​បាន​រួម​ចំណែក​យ៉ាង​សំខាន់ដល់​ការអភិវឌ្ឍ​សេដ្ឋកិច្ច​ជាតិ​។ បើ​ពួកគេ​បានផ្ញើ​ប្រាក់ចំណូល​មក​ក្នុង​ស្រុក​ប្រមាណ​តែ​៥០​ភាគរយ​នៃ​ប្រាក់បៀវត្សរ៍របស់​ខ្លួន​ យើង​ឃើញ​ថា​ជាមធ្យម​ មាន​ប្រមាណ​១៥០​លាន​ដុល្លារ​អាមេរិក​ក្នុង​មួយ​ឆ្នាំ​ៗ​។ យើង​ចាត់ទុក​ថា​ ជា​ការរួមចំណែក​របស់​ប្រជាពលរដ្ឋ​ខ្មែរ​ដែល​បានទៅ​ធ្វើការ​នៅ​បរទេស ក្នុង​គោលនយោបាយ​កាត់បន្ថយ​ភាពក្រីក្រ​"។

លោក​រដ្ឋ​មន្ត្រី​ វង់ សូត​បាន​បំភ្លឺ​ ដើម្បី​ជា​ការ​ឆ្លើយ​តប​ទៅនឹង​សំណួរ​របស់​សមាជិក​សភា​គណបក្ស​ប្រឆាំង​ ដែល​បាន​ចោទសួរ​តំណាង​រដ្ឋាភិបាល​ទាក់ទងនឹង​កម្មករ​រោងចក្រ​កាត់ដេរ ​ប៉ុន្តែ​ពួកគេ​បាន​ធ្វើ​ពហិការ​សម័យ​ប្រជុំ​នៅ​ថ្ងៃនេះ​ ដើម្បីជា​ការតវ៉ា​ប្រឆាំង​នឹង​ការមិន​អនុញ្ញាត​ឱ្យ​ពួក​អស់​លោក​អាន​សំណួរ​ចំនួន​១៨ ​ដើម្បី​ឱ្យ​លោក​រដ្ឋមន្ត្រី​ការងារ​ឆ្លើយ​ម្តង​មួយ​ៗ​។

ពលករ​ទេសន្តរ​ប្រវេសន៍ខ្មែរ​នៅ​ក្នុង​ប្រទេស​ម៉ាឡេស៊ី ​និង​ថៃ​បាន​ទទួល​ប្រាក់​ខែ​ជា​មធ្យម​ពី​២៥០​ដុល្លារ​អាមេរិក​ដល់​៣០០​ដុល្លា​រ​អាមេរិក​ ​ប៉ុន្តែ​ផ្ទុយ​ទៅ​វិញ ពលករ​ទេសន្តរប្រវេសន៍​ខ្មែរ​នៅក្នុង​ប្រទេសជប៉ុន​ និង​ប្រទេស​កូរ៉េ​ខាងត្បូង​អាច​មាន​ប្រាក់ខែ​រហូតដល់​៩០០​ដុល្លារ​អាមេរិក ​និង​៦០០​ដុល្លារ​អាមេរិក។ ​នេះ​បើ​យោងតាម​របាយ​ការណ៍​។

លោក​រដ្ឋ​មន្ត្រី​ វង់ សូត ​បាន​បញ្ជាក់​ថា ​តួលេខ​ផ្លូវការ​នៃ​ពលករ​ទេសន្តរប្រវេសន៍​ខ្មែរ​នៅក្នុង​ប្រទេស​ម៉ាឡេស៊ី​មាន​ចំនួន​១៩.៥៨៨ នាក់ ​នៅ​ប្រទេស​ថៃ​ ៩៤.៥៦៤​ នាក់ នៅ​ប្រទេស​កូរ៉េ​ខាងត្បូង​ ៩.០៨២ ​នាក់​ និង​ប្រទេស​ជប៉ុន ​៩៧ ​នាក់​នៅក្នុង​ឆ្នាំ​២០១០​នេះ​។

លោក​យ៉ា ណាវុធ​ ប្រធាន​អង្គការ​ CARAM ​កម្ពុជា​ បានថ្លែង​ថា​បញ្ហា​ពលករ​ទេសន្តរ​ប្រវេសន៍​នេះ​ជា​រឿង​ល្អ​ ប៉ុន្តែ​ដើម្បី​បង្កើន​ប្រាក់​ដែល​ផ្ញើ​មក​ផ្ទះ​របស់​ពលករ​ទេសន្តរប្រវេសន៍​នេះ​ រដ្ឋាភិបាល​ត្រូវ​បង្កើត​យន្តការ​សម្រាប់​ការពារ​ពួកគាត់​បន្ថែម​ទៀត​។

"អ្នក​ខ្លះ​ក៏​មាន​ជីវភាព​ល្អ​ប្រសើរ ​ប៉ុន្តែ​អ្នក​ខ្លះ​ទៀត​មិន​មាន​លក្ខណៈ​ប្រសើរ​ទេ កាន់​តែ​យ៉ាប់​ថែមទៀត​។ នៅ​ពេល​ដែល​គាត់​បានទៅ​ដល់​ក្រៅ​ប្រទេស​ ហើយត្រូវថៅកែ​រំលោភបំពាន​។ វា​មាន​ន័យ​ថា ​អ្នក​នោះ​អាច​កាន់​តែ​ក្រ​ឡើង​ថែម​ទៀត​ ដោយ​សារ​ទី​មួយ​នៅ​ពេល​ដែល​គាត់​ចេញ​ទៅ​ គាត់​ជំពាក់​បំណុល​ក្រុមហ៊ុន ​ហើយ​ដល់​ពេល​យើង​មាន​បញ្ហា​ យើង​ត្រូវ​ត្រឡប់​មក​វិញ​។ អញ្ចឹង​ ក្រុមហ៊ុន​ត្រូវ​ឱ្យ​សង​បំណុល​វិញ"។

លោក​រដ្ឋមន្ត្រី​ក្រសួង​ការងារ​ បាន​ថ្លែង​ថា​នៅ​ដើម​ឆ្នាំ​២០១០​នេះ​ ក្រសួង​បាន​ពង្រឹង​ការគ្រប់​គ្រង​ និងការ​ការពារ​ដល់​ពលករ​ទេសន្តរប្រវេសន៍ខ្មែរ​តាមរយៈ​ការរៀបចំ​ឯកសារ​ច្បាប់​ និង​គោលនយោបាយ​ ព្រមទាំង​ការពង្រឹង​ការគ្រប់គ្រង​ប្រព័ន្ធ​ព័ត៌មាន​សម្រាប់​ឃ្លាំមើល​សុខទុក្ខ​ពលករ​ ដូចជា​ ធ្វើការងារ​តាម​កិច្ចសន្យា​ ការបញ្ចប់​ការងារ​តាម​ការកំណត់​ និង​ការវិល​ត្រឡប់​មក​ប្រទេស​វិញ​។

លោក ​វង់សូត បានបញ្ជាក់​ថា ​ក្រសួង​បាន​ពិនិត្យ​ឃើញ​មាន​បាតុភាព​ខ្លះ​ ដូចជា​ការ​ជ្រើស​រើស​ពលករ​ក្រោម​អាយុ​កំណត់​ ការ​ប្រកួតប្រជែង​ និង​ការអូស​ទាញ​ដោយ​ប្រើប្រាស់​ប្រាក់​សម្ភារៈ​ក្នុង​ការជ្រើសរើសទីកន្លែង​ស្នាក់​នៅ​មុនពេល​ចេញ​ដំណើរ​តូច​ចង្អៀត​ និង​ភ្នាក់ងារ​ជ្រើសរើស​មិនទាន់​បាន​បណ្តុះ​បណ្តាល​ត្រឹមត្រូវ​។

XS
SM
MD
LG