បន្ទាប់ពីមានការប្រយុទ្ធគ្នារវាងកងទ័ពកម្ពុជា និងកងទ័ពថៃកាលពីថ្ងៃអាទិត្យឈានដល់ព្រឹកថ្ងៃច័ន្ទ សភាពការណ៍នៅតាមព្រំដែនបានស្ងប់ស្ងាត់ ក៏ប៉ុន្តែមានភាពតានតឹង។ កងទ័ពនៃប្រទេសទាំងពីរនៅប្រុងប្រៀបប្រយុទ្ធរៀងៗខ្លួនស្របពេលដែលប្រជាពលរដ្ឋទាំងពីរប្រទេសនៅជិតព្រំដែនមានជម្លោះបានភៀសខ្លួនចេញរាប់ពាន់គ្រូសារ ដើម្បីរកទីតាំងមានសុវត្ថិភាព។
លោកនាយឧត្តមសេនីយ៍ផ្តាយមាសបួន ប៉ុល សារឿន អគ្គមេបញ្ជាការនៃកងយោធពលខេមរភូមិន្ទបានថ្លែងប្រាប់វីអូអេសំឡេងសហរដ្ឋអាមេរិកតាមរយៈទូរស័ព្ទនៅថ្ងៃច័ន្ទនេះថា សភាពការណ៍នៅតាមក្រវ៉ាត់ព្រំដែនបានវិលទៅរកភាពស្ងប់ស្ងាត់មួយរយៈវិញហើយ ក៏ប៉ុន្តែកងទ័ពនឹងស្ថិតនៅក្នុងសភាពប្រុងជើងការ។ លោកថ្លែងថា៖
«អត់មានអ្វីទេ ស្ងប់ស្ងាត់ហើយ ទាក់ទងទៅអ្នកនាំពាក្យកងទ័ពទៅ»។
កាលពីយប់ថ្ងៃអាទិត្យឈានដល់ព្រឹកព្រលឹមថ្ងៃច័ន្ទនេះ កងទ័ពរវាងកម្ពុជា និងថៃ បានបើកការវាយប្រហារគ្នាសារជាថ្មីម្តងទៀតនៅជិតប្រាសាទព្រះវិហារ ដែលមានវ័យចំណាស់ជាង៩០០ឆ្នាំ។ ការវាយប្រយុទ្ធគ្នាកាលពីយប់ថ្ងៃអាទិត្យ មានរយៈពេលប្រមាណជាងបីម៉ោង ហើយនៅព្រឹកថ្ងៃច័ន្ទនេះ បានប្រើរយៈពេលខ្លីប៉ុណ្ណោះ។ ភាគីទាំងពីរបានប្រើប្រាស់អាវុធធុនធ្ងន់ទំនើបៗ ដែលរួមមាន កាំជ្រួចហ្វូងប្រតិកម្ម BM40 កាំភ្លើងធំ និងកាំភ្លើងភ្លោងគ្រប់ប្រភេទព្រមទាំងបានបាញ់គ្រាប់ប្រើឧស្ម័នបង្ហូរទឹកភ្នែកដាក់គ្នាទៀតផង។
ការវាយប្រយុទ្ធគ្នាទាំងបួនលើកនេះ បើតាមការបញ្ជាក់របស់លោកឧបនាយករដ្ឋមន្រ្តីហោ ណាំ ហុង ដល់ក្រុមអ្នកយកព័ត៌មាននៅព្រលប់ថ្ងៃច័ន្ទនេះថា ទាហានកម្ពុជាចំនួនប្រាំនាក់បានស្លាប់បាត់បង់ជីវិត និងរងបួសជាង៤៥នាក់។
ចំណែកកាសែតបាងកកប៉ុស្ត៍ (Bangkok Post) នៅប្រទេសថៃបានដកស្រង់សម្តីរដ្ឋមន្រ្តីក្រសួងសុខាភិបាលថៃថា បន្ទាប់ពីមានការវាយប្រយុទ្ធគ្នាកាលពីថ្ងៃទី៤ រហូតដល់ ថ្ងៃទី៧ កន្លងទៅនេះ ទាហានថៃម្នាក់ត្រូវបានស្លាប់ និងជនស៊ីវិលម្នាក់បានស្លាប់ព្រមទាំងរងរបួសចំនួន៣៤នាក់។ ក៏ប៉ុន្តែមន្រ្តីយោធាកម្ពុជា បានរំពឹងថា ចំនួនស្លាប់ និងរងរបួសខាងភាគីថៃមានច្រើនជាងនេះ។
ប្រទេសកម្ពុជា បានចាប់ទាហានថៃមួយរូប អាយុ២១ឆ្នាំ ហើយបច្ចុប្បន្ននេះ កំពុងឃុំឃាំងនៅ ក្នុងទីក្រុងភ្នំពេញ។ នៅក្នុងពិធីប្រគល់សញ្ញាប័ត្រនៅសាកលវិទ្យាល័យមួយនៅក្នុងទីក្រុងភ្នំពេញនៅថ្ងៃច័ន្ទនេះ លោកនាយករដ្ឋមន្រ្តីហ៊ុន សែន បាននិយាយថា ទាហានថៃ ដែលកម្ពុជាចាប់បាននោះកំពុងស្ថិតនៅក្រោមការគ្រប់គ្រងយ៉ាងល្អរបស់ភាគីកម្ពុជា ហើយកម្ពុជា និងប្រគល់ឲ្យភាគីថៃវិញប្រសិនបើមានការស្នើសុំជាផ្លូវការមកកម្ពុជា។ លោក ហ៊ុន សែនថ្លែងថា៖
«យើងអនុវត្តច្បាប់សង្គ្រាម ឈ្លើយសឹកមិនត្រូវបានកាត់ទោសទេ ឈ្លើយសឹកត្រូវបានថែទាំ ឲ្យល្អ។ ឈ្លើយសឹកនឹងត្រូវបានដោះលែង ដោយមានការព្រមព្រៀងនៃភាគីទាំងពីរចុះហត្ថលេខាទទួល និងប្រគល់ និងសូមអញ្ជើញ CE CR គណៈកម្មាធិការអន្តរជាតិចូលរួមធ្វើជាសាក្សី»។
កាលពីថ្ងៃសុក្រសប្តាហ៍មុននេះ កងទ័ពកម្ពុជាបានចាប់ទាហានចំនួនបួនរូប ហើយក្រោយមក បានបញ្ជូនឲ្យភាគីថៃវិញ។ ចំណែកឯទាហានថៃចុងក្រោយកំពុងស្ថិតនៅក្រោមការគ្រប់គ្រងរបស់ មន្រ្តីយោធាកម្ពុជានៅឡើយ ។
នៅតាមក្រវ៉ាត់ព្រំដែន ដែលមានជម្លោះ ប្រជាពលរដ្ឋទាំងពីរប្រទេសរាប់ពាន់គ្រួសារ បានត្រូវជម្លៀសចេញ ដើម្បីស្វែងរកទីតាំង ដែលមានសុវត្ថិភាព។ អ្នកស្រីលាភ ញ៉ អាយុ៥៥ឆ្នាំ ប្រជាពលរដ្ឋមួយរូបដែលរស់នៅភូមិធម្មជាតិ ចម្ងាយប្រមាណ២០គីឡូម៉ែត្រពីប្រាសាទព្រះវិហារ បានផ្តល់បទសម្ភាសន៍ដោយផ្ទាល់ជាមួយវីអូអេសំឡេងសហរដ្ឋអាមេរិកថា អ្នកស្រីនិងប្រជាជនផ្សេងទៀត បានភៀសខ្លួនចេញពីភូមិ ដោយសារតែភ័យខ្លាចការប្រយុទ្ធគ្នារវាងកងទ័ពថៃនិងកម្ពុជានៅតាមព្រំដែន។ អ្នកស្រីថ្លែងថា៖
«ប្រជាជន ដូចថា ឃើញគ្នារត់ចេះតែភ័យ។ ចេះតែមកតាមគ្នា។ បើគ្រាប់វាបាញ់ខ្លាំងដែរ បើថាលើកមុនមិនសូវប៉ុន្មានទេ ដល់ម្តងនេះ ច្រើនខ្លាំងជាងលើកមុន»។
បន្ទាប់ពីមានការវាយប្រយុទ្ធជាប់ៗគ្នាចំនួនបួនលើក លោកនាយករដ្ឋមន្រ្តីហ៊ុន សែន បានសរសេរលិខិតភ្លាមៗជាបន្ទាន់មួយទៅកាន់លោកស្រី ម៉ារា លូហ្សា រីបេរ៉ូវីអូទី (Maria Luza Ribeiro Viotti) ប្រធានក្រុមប្រឹក្សាសន្តិសុខអង្គការសហប្រជាជាតិឲ្យកោះប្រជុំជាបន្ទាប់ ដើម្បីបញ្ឈប់រាល់ការឈ្លានពានរបស់ថៃមកលើកម្ពុជា។
លិខិតរបស់លោកនាយករដ្ឋមន្រ្តីហ៊ុន សែន បានចាត់ទុកថា ការឈ្លានពានរបស់ថៃបានរំលោភកិច្ចព្រមព្រៀងក្រុងប៉ារីសឆ្នាំ១៩៩១ សាលក្រមតុលាការយុត្តិធម៌អន្តរជាតិកាលពីថ្ងៃទី១៥ ខែមិថុនាឆ្នាំ១៩៦២ និងមាត្រាមួយចំនួននៃធម្មនុញ្ញរបស់អង្គការសហប្រជាជាតិ៕