នៅឱកាសនិស្សិតសាកលវិទ្យាល័យនិងមហាវិទ្យាល័យនៅក្នុងសរអកំពុងអបអរទទួលសញ្ញាបត្របញ្ចប់ការសិក្សាឆ្នាំ២០១០ ព្រះភិក្ខុ ហឿន សំនៀងគង់នៅវត្តដំណាក់ ខេត្តសៀមរាប ដែលបានទទួលអាហារូបករណ៍ពីសាកលវិទ្យាល័យ St. Ambrose University រដ្ឋ Iowa ក៏បាននិមន្តទៅទទួលសញ្ញាប័ត្របញ្ចប់ការសិក្សាថ្នាក់បរិញ្ញាប័ត្រផ្នែកគ្រប់គ្រង កាលពីថ្ងៃសៅរ៍ទី១៥ ខែឧសភា ឆ្នាំ២០១០ ផងដែរ។
អ្នកស្រី នុច សារីតា មានសេចក្តីរាយការណ៍អំពីការសិក្សានិងកិច្ចការរបស់ព្រះភិក្ខុ ហឿន សំនៀង ដូចតទៅនេះ៖
ភិក្ខុ ហឿន សំនៀង ជាអតីតប្រធានកម្មវិធីអង្គការមជ្ឈមណ្ឌលសហសង្គ្រោះកម្ពុជាសាខាខេត្តសៀមរាប ជាអតីតប្រធានបណ្តាញសង្គមស៊ីវិលប្រឆាំងពលកម្មកុមារ ជាអនុប្រធានបណ្តាញតស៊ូអង្គការក្រៅរដ្ឋាភិបាលប្រចាំខេត្ត។ល។ ហើយបច្ចុប្បន្ន ព្រះអង្គជានាយកប្រតិបត្តិ សមាគមជីវិតនិងក្តីសង្ឃឹម មានទីតាំងនៅវត្តដំណាក់ ដែលសមាគមនេះមានគោលបំណងដើម្បីចូលរួមពង្រឹងគុណភាពជីវិតប្រសើរឡើង ពិសេសក្មេងកំព្រា ក្មេងអនាថា និងគ្រួសារក្រីក្រក្នុងបំណងឲ្យពួកគេមានសេចក្តីសង្ឃឹមក្នុងជីវិត ដើម្បីអនាគតភ្លឺស្វាង។ ដោយព្រះអង្គជឿថា មនុស្សគ្រប់គ្នាអាចកែប្រែវាសនាអនាគតរបស់ខ្លួនបាន ដែលចាប់ផ្តើមពីការមានសេចក្តីសង្ឃឹមធ្វើឲ្យមានការជឿជាក់លើខ្លួនឯងនោះ ក៏នាំឲ្យមានការតស៊ូប្រឹងប្រែង ជម្នះរាល់ឧបសគ្គក្នុងជីវិត មិនចុះចាញ់ តែទាំងនោះក្លាយជាមេរៀនទៅវិញ។
ភិក្ខុ ហឿន សំនៀង មានស្រុកកំណើតនៅភូមិសំរោង ឃុំសំរោង ស្រុកសូទ្រនិគម ខេត្តសៀមរាប។ កាលពីកុមារភាព ដោយសារតែភាពក្រីក្រនិងវិបត្តិគ្រួសារ កុមារសំនៀងបានបែកពីគ្រួសារបងប្អូន ទៅរស់នៅជាមួយគ្រួសារគេនៅក្នុងស្រុកសូទ្រនិគមតាំងពីអាយុពីរឬបីឆ្នាំ រហូតដល់អាយុ១៤ឆ្នាំទើបមកនៅជាមួយម្តាយបង្កើតវិញ។ ១៥ឆ្នាំក្រោយ វិបត្តិគ្រួសារនិងភាពក្រីក្រនៅតែបន្ត កុមារសំនៀងក៏បានសុំការអនុញ្ញាតពីម្តាយ ចូលបួសជ្រកកោនក្នុងម្លប់ព្រះពុទ្ធសាសនានៅឆ្នាំ១៩៦៦។ ដោយមានប្រវត្តិកម្សត់ពីកុមារភាព និងទទួលបទពិសោធន៍ក្នុងស្ថានភាពក្រីក្រនោះ ភិក្ខុសំនៀងក៏តែងតែចូលរួមក្នុងការងារសង្គមផ្សេងៗ ក្នុងមុខងារជាភិក្ខុ។ ដោយគុណធម៌និងសេចក្តីព្យាយាម នៅចុងឆ្នាំ២០០៥ ព្រះអង្គត្រូវបាននិមន្តឲ្យទៅធ្វើទស្សនកិច្ចនៅសហរដ្ឋអាមេរិកដោយលោក Jon Ryder វេជ្ជបណ្ឌិតធ្មេញជាតិអាមេរិកាំង ហើយក៏បានទទួលអាហារូបករណ៍ពីសាកលវិទ្យាល័យ St. Ambrose University រដ្ឋ Iowa។ មិនត្រឹមតែការឃើញទឹកដីសហរដ្ឋអាមេរិកដែលជារឿងព្រះអង្គមិនធ្លាប់គិតដល់នោះទេ ឥឡូវនេះកាលពីថ្ងៃទី១៥ខែឧសភាឆ្នាំ២០១០នេះ ព្រះអង្គបានទទួលបរិញ្ញាប័ត្រផ្នែកគ្រប់គ្រងប្រកបដោយនិទ្ទេសដ៏ល្អទៀតផង។
ក្នុងរយៈបំពេញការសិក្សានៅសរអ ព្រះភិក្ខុសំនៀងបានបង្ហាត់បង្រៀនសិស្ស និស្សិត និងប្រជាជនអាមេរិកាំងទូទៅ អំពីព្រះពុទ្ធសាសនានិងការធ្វើសមាធិបែបមូលដ្ឋានសម្រាប់ជីវិត។ នេះបានធ្វើឲ្យព្រះអង្គមានមិត្តភ័ក្រ និងការគោរពរាប់អានជាច្រើនពីសំណាក់សិស្ស និស្សិត និងជនជាតិ អាមេរិកាំង។
លោក John Hawry ជាអ្នកប្រតិបត្តិសមាធិ ហើយបច្ចុប្បន្ននេះលោកបង្រៀននៅក្នុងគិលានុបដ្ឋាននៃមហាវិទ្យាល័យ Black Hawk College និងធ្វើការជាគិលានុបដ្ឋាកនៅមន្ទីរពេទ្យ Illini Hospital នៃរដ្ឋIllinois ផងនោះ បានប្រាប់វីអូអេថា ភិក្ខុហឿន សំនៀងជាព្រះសង្ឃដែលយកចិត្តទុកដាក់ចំពោះមនុស្សក្រីក្រ ព្រះសង្ឃ និងកុមារកំព្រានៅក្នុងវត្តដំណាក់ដែលធ្វើការជាមួយព្រះអង្គ។
“ភិក្ខុសំនៀងបានជួយបង្កើតវត្តតូចមួយសម្រាប់សហគមន៍ព្រះពុទ្ធសាសនាដែលរស់នៅជុំវិញយើង។ យើងមានមនុស្សជាច្រើន ដែលបានចាកចេញពីប្រទេសវៀតណាម ថៃ កម្ពុជា និងលាវ ហើយបានមករស់នៅក្នុងភូមិយើង។ នេះជាលើកទីមួយដែលភូមិយើងមានវត្តព្រះពុទ្ធសាសនាសម្រាប់ធ្វើបុណ្យ។ ខ្ញុំយល់ថា ការប្រតិបត្តិសមាធិ ជាវិធីល្អសម្រាប់មនុស្សដែលរកការស្ងប់ចិត្ត ចង់បន្ធូរការតានតឹងក្នុងចិត្ត និងឲ្យមានសុខភាពផ្លូវចិត្ត”។
លោក Adam Vilmont ជាអ្នកប្រតិបត្តិសមាធិ ជានិស្សិតថ្នាក់បរិញ្ញាទោនៅសាកលវិទ្យាល័យ St. Ambrose University និងធ្វើការនៅមជ្ឈមណ្ឌលថែទាំកុមារនៅ Rock Island Child Care Center រដ្ឋ Illinois និយាយប្រាប់ វីអូអេ ភាសាខ្មែរថា៖
“សមាធិជាការពិសោធន៍ដ៏ជ្រាលជ្រៅសម្រាប់រូបខ្ញុំនៅពេលខ្ញុំមានការឈឺចាប់ផ្លូវចិត្តខ្លាំង ខ្ញុំមិនដឹងធ្វើដូចម្តេចឲ្យបាត់ទុក្ខព្រួយទេ ខ្ញុំគ្រាន់តែអង្គុយបិទភ្នែក និងផ្តោតអារម្មណ៍ទៅលើដង្ហើម។ ខ្ញុំមិនចេះវិធីប្រតិបត្តិសមាធិទេ ទាល់តែបានជួបព្រះអង្គសំនៀងទើបខ្ញុំយល់ច្បាស់អំពីសមាធិ” ។
នៅក្នុងមជ្ឈមណ្ឌលថែទាំកុមារ លោក Vilmont ជួបកុមារមានវិបត្តិ និងកុមារមានបញ្ហាកំហឹងជាប់ខ្លួន ។ លោក Vilmont បានយកវិធីសមាធិទៅអប់រំ និងជួយក្មេងទាំងនោះដើម្បីឲ្យក្មេងយល់អំពីហេតុនិងបច្ច័យដែលធ្វើពួកវាឲ្យមានកំហឹង ជម្លោះ និងអាកប្បកិរិយាកោងកាច។
អ្នកស្រី Vivian Norton ជាគ្រូបង្រៀនចូលនិវត្តន៍ និងជាអ្នកគាំទ្រម្នាក់នៃសមាគមជីវិតនិងក្តីសង្ឃឹមរបស់ភិក្ខុសំនៀងនៅវត្តដំណាក់។ អ្នកស្រី Norton ជាមួយក្រុមមិត្តភ័ក្ត និងនិស្សិត អ្នកប្រតិបត្តិសមាធិ បានរៀបចំពិធីជប់លៀងអបអរសាទរប្រគេនព្រះអង្គ ហើយបានបង្កើតកម្មវិធីរៃអង្គាសប្រាក់មួយ ដើម្បីយកទៅទិញអង្ករចំនួន១២តោនសម្រាប់ផ្គត់ផ្គង់សិស្ស កុមារកំព្រា និងអ្នកធ្វើការនៅសមាគមជីវិតនិងក្តីសង្ឃឹមនៅខេត្តសៀមរាប ក្នុងរយៈពេលមួយឆ្នាំ។
“ខ្ញុំបានទៅប្រទេសកម្ពុជាកាលពីបីឆ្នាំកន្លះកន្លងទៅនេះ។ ខ្ញុំបានទៅទស្សនាមជ្ឈមណ្ឌលបណ្តុះបណ្តាលវិជ្ជាជីវៈកាត់ដេរដែលព្រះភិក្ខុសំនៀងបានបង្កើតឡើងសម្រាប់ក្មេងស្រី។ ខ្ញុំបានជួបលោកនៅកន្លែងកាត់ដេរនោះ ហើយបានឃើញថា គម្រោងរបស់លោកមានដំណើរការល្អ ហើយឃើញថា ព្រះអង្គជាអ្នកគ្រប់គ្រងមានសមត្ថភាពណាស់ ក៏ប៉ុន្តែនៅពេលជាមួយគ្នានោះ ព្រះអង្គទ្រទ្រង់ព្រះធម្មវិន័យព្រះពុទ្ធសាសនាបានបរិសុទ្ធ ហើយព្រះអង្គបានដាក់កាយនិងចិត្តបូជាចំពោះការជួយសង្គមក្រីក្រនិងមនុស្សដែលព្រះអង្គជួយ”។
បច្ចុប្បន្នសមាគមជីវិតនិងក្តីសង្ឃឹមកំពុងអនុវត្តគម្រោងចំនួន៦ ដែលមានអ្នកទទួលផលសរុបទាំងកុមារកំព្រា កុមារងាយរងគ្រោះ យុវជន-យុវតី ស្ត្រីរងគ្រោះនិងងាយរងគ្រោះចំនួនជិត១០០០នាក់។ព្រះភិក្ខុ ហឿន សំនៀងបានសន្យាចំពោះមុខមិត្តភ័ក្ត និងសិស្សគណៈថា ព្រះអង្គនឹងយកចំណេះដឹងដែលព្រះអង្គបានទទួលពីសហរដ្ឋអាមេរិកទៅបម្រើកិច្ចការដែលព្រះអង្គបាននិងកំពុងធ្វើ សម្រាប់សង្គមដែលព្រះអង្គជឿថា ជាការតបស្នងសងគុណចំពោះប្រទេសជាតិ និងសាសនា។ ព្រះអង្គនឹងធ្វើទស្សនកិច្ចទីក្រុងជាច្រើននៅសរអនិងនៅប្រទេសកាណាដា តាមការនិមន្តអញ្ជើញពីក្រុមអ្នកឧបត្ថម្ភ និងក្រុមគណៈកម្មការនាយក សមាគមមុននឹងព្រះអង្គនិមន្តទៅប្រទេសខ្មែរវិញ៕