ភ្ជាប់​ទៅ​គេហទំព័រ​ទាក់ទង

ភ្នំ​​សំពៅ​ខេត្ត​​បាត់ដំបង​រក្សា​ទុក​​ភស្តុតាង​​នៃ​​អំពើ​​កាប់​​សម្លាប់​​មនុស្ស​​យ៉ាង​​សាហាវ​​នា​​សម័យ​​ខ្មែរ​​ក្រហម​


អ្នកស្រុក​បាត់ដំបង​ខិតខំ​ថែរក្សា​លលាដ៍ក្បាល​និង​ឆ្អឹង​ជន​រងគ្រោះ​ក្នុង​ល្អាង​ពិឃាដ​របស់​ខ្មែរ​ក្រហម​នៅលើ​កំពូលភ្នំ​សំពៅ​ ដើម្បី​ទុក​ជា​ភស្តុតាង​នៃ​អំពើ​កាប់​សម្លាប់​មនុស្ស​យ៉ាង​សាហាវ​ព្រៃផ្សៃ​នា​សម័យ​កាល​នោះ។

"គេ​បណ្ដើរ​មក​តាម​នេះ​ម៉ោ​ គេ​បោះ​កូន​ក្មេង​ចូល​ក្នុង​អា​រូង​តូច​នេះ​មួយ​ បោះ​ចូល​ភ្លុក​ៗ​ទៅ​ ជម្រៅ​ប្រហែល​ជា​៥​ម៉ែត្រ​ក្នុង​នេះ​ ឡើង​មិន​រួច​ទេ​ក្នុង​ហ្នឹង​ មនុស្ស​ចាស់​ក៏​មិន​ងាយ​ឡើង​ដែរ...”

នេះ​ជា​ការ​រៀបរាប់​របស់​អ្នកភូមិ​ម្នាក់​អំពី​សកម្មភាព​របស់​ពួក​ខ្មែរ​ក្រហម​ ក្នុង​ការ​សម្លាប់​អ្នកទោស​ដោយ​បោះ​ពួកគេ​ចូល​ក្នុង​ល្អាង​មួយ​ក្នុងចំណោម​ល្អាង​ចំនួន​បី​នៃ​វត្ត​គីរីរម្យ​ ដែល​ជាអតីត​ទីកន្លែង​ពិឃាដ​របស់​ខ្មែរក្រហម​ ស្ថិត​នៅលើ​កំពូល​ភ្នំ​សំពៅ​ ក្នុង​ភូមិ​សំពៅលិច​ ឃុំភ្នំសំពៅ​ នៃ​ស្រុក​បាណន់​ ​នៃ​ខេត្ត​បាត់ដំបង។

"ដល់​ចាស់ៗ​គេ​បណ្តើរ​បញ្ចូល​ទៅក្នុង​នេះ​ មួយ​ខ្សែ​ទៅក្នុង​នេះ​ ហើយ​មួយ​ខ្សែ​ទៀត​គេ​វាយ​ពី​លើ​មក​ក្នុង​ល្អាង​ល្ខោន​ វា​មាន​បី​ល្អាង​ នៅឯ​ល្អាង​តែង​ខ្លួន​មួយ​ទៀត​នៅ​ឯណោះ​ អញ្ចឹង​វា​មាន​បី​ល្អាង​ដែល​សម្លាប់​មនុស្ស​នៅ​អាស្រម​គីរីរម្យ​នេះ"។

អាស្រម​ឬ​វត្ត​គីរីរម្យ​នេះ​ គឺជា​អតីត​មន្ទីរ​ឃុំឃាំង​ទី២​របស់​ពួក​ខ្មែរ​ក្រហម​នៅ​ខេត្ត​បាត់ដំបង​ បន្ទាប់ពី​មន្ទីរ​សន្តិសុខ​ចន្លោះ​ភ្នំក្តោង​មួយទៀតដែល​នៅ​អែប​នឹង​ជើង​ភ្នំ​សំពៅ​នេះ។

នៅក្នុង​ឆ្នាំ​១៩៧៦​ ពួក​ខ្មែរ​ក្រហម​បាន​យក​បរិវេណ​វត្ត​គីរីរម្យ​ទាំងមូល​ធ្វើ​ជា​មន្ទីរ​សន្តិសុខ​ឬ​គុក​ធំ​របស់​ពួកគេ។​ អ្នកទោស​ដែល​ត្រូវ​បញ្ជូន​មក​ទី​នេះ​ ត្រូវ​ឃុំឃាំង​នៅ​ក្នុង​កុដិ​និង​នៅ​តាម​ទីធ្លា​ជុំវិញ​វត្ត។​ ចំណែក​ព្រះវិហារ​ត្រូវ​បាន​ខ្មែរ​ក្រហម​ប្រើ​ជា​កន្លែង​សួរ​ចម្លើយ​អ្នកទោស។

មាន​អ្នកទោស​ចំនួន​ជាង​១៥,៧០០​នាក់​ត្រូវបាន​សម្លាប់​រួច​បោះ​ចូល​ក្នុង​ល្អាង​ទាំងបី​នៃវត្ត​គីរីរម្យ​នេះ។​ នេះ​បើ​យោង​តាម​ឯកសារ​ស្រាវជ្រាវ​របស់​មជ្ឈមណ្ឌល​ឯកសារ​កម្ពុជា។

ហើយ​អតីត​មន្ទីរ​សន្តិសុខ​វត្ត​គីរីរម្យ​នៅលើ​ភ្នំ​សំពៅ​នេះ​ ក៏​ស្ថិត​នៅ​ក្រោម​ការ​ស៊ើប​អង្កេត​នៅ​ក្នុង​ករណី​លេខ​០០២​ របស់​សាលាក្តី​ខ្មែរ​ក្រហម​ផង​ដែរ។

សំណុំរឿង​លេខ​០០២​ មាន​ជន​ជាប់ចោទ​ចំនួន​៤​រូប​ រួមមាន​លោក​ ខៀវ​ សំផន​ អតីត​ប្រមុខរដ្ឋ​នៃ​របប​ខ្មែរ​ក្រហម​ លោក​ នួន​ ជា​ អតីត​ប្រធាន​សភា​ដែល​គេ​ស្គាល់​ថា​ ជា​បង​ធំ​ទី២​បន្ទាប់​ពី​ប៉ុល ពត​ លោក​ អៀង​ សារី​ អតីត​ឧប​នាយក​រដ្ឋមន្រ្តី​និង​ជា​រដ្ឋមន្រ្តី​ក្រសួង​ការបរទេស​ និង​ភរិយា​របស់​លោក​គឺ​លោកស្រី​ អៀង​ ធីរិទ្ធ​ អតីត​រដ្ឋមន្រ្តី​សង្គមកិច្ច​ ហើយ​អាច​ជាប់​ពាក់ព័ន្ធ​ជាមួយ​ជន​ជាប់ចោទ​លោក កាំង​ ហ្គិកអ៊ាវ​ ហៅឌុច ​អតីត​ប្រធាន​មន្ទីរ​សន្តិសុខ ​ស ២១​ ឫ​គុក​ទួលស្លែង​ផងដែរ។

មាន​មន្ទីរ​សន្តិសុខ ​ឬ​គុក​ចំនួន​យ៉ាង​តិច​១៩៦​កន្លែង​ នៅក្នុង​របបខ្មែរ​ក្រហម​ ដែល​បាន​គ្រប់គ្រង​ប្រទេស​កម្ពុជា​ពី​ឆ្នាំ​១៩៧៥​ដល់១៩៧៩។​ នៅ​ក្នុង​សម័យ​នោះ​ ប្រជាជន​ចំនួន​ប្រមាណ​១.៧​លាន​នាក់ ​បាន​ស្លាប់​បាត់បង់​ជីវិត​ដោយសារ​ការ​ធ្វើការ​ហួស​កម្លាំង​ ការ​បង្អត់​អាហារ​ ការ​ធ្វើ​ទារុណកម្ម​ និង​ការ​កាប់​សម្លាប់​ជាដើម។

ក្រោយ​ឆ្នាំ​១៩៧៩​ សាកសព​ជន​រងគ្រោះ​នៅក្នុង​ល្អាង​ទាំង​បី​នៃ​វត្ត​គីរីរម្យ​នេះ​ ពុំ​ទាន់​ត្រូវបាន​អូស​យក​ទៅ​កប់​នៅ​ឡើយ​ទេ។

អ្នកភូមិ​វ័យ​ជាង​៦០ឆ្នាំ​ប្លាយ​ដែល​ជា​អ្នក​ថែរក្សា​លលាដ៍​ក្បាល​និង​ឆ្អឹង​ជន​រងគ្រោះ​ដែល​ស្លាប់​នៅក្នុង​ល្អាង​ពិឃាដ​នេះ​ បាន​និយាយ​ដោយ​សុំ​មិន​បញ្ចេញ​ឈ្មោះ​ថា​ ស្នាម​ឈាម​និង​ក្លិន​ស្អុយ​របស់​សាកសព​បាន​សាយភាយ​ពេញ​ទីធ្លា​វត្ត​ស្ទើរ​ដើរ​ទៅ​ជិត​ពុំបាន។

"ឃើញ​វាបែក​ឈាម​ពេញហ្នឹង​ទាំងអស់​ នៅក្នុង​ល្អាង​ល្ខោន​សុទ្ធតែ​ឈាម​ក្រហម​ភ្លឺ​អស់​ហើយ​ គ្រាន់​តែ​ឃើញ​ឈាម​ក៏​ញាក់​សាច់​ដែរ​ ឃើញ​តែ​សាកសព​ ដេក​រណូក​រណែល​ពេញហ្នឹង​ទាំងអស់​ គ្រប់​ល្អាង​ទាំង​បី​ គរ​លើ​គ្នា​ដូច​ដំបូក​អញ្ចឹង"។

អដ្ឋិធាតុ​របស់​ជន​រងគ្រោះ​នៅក្នុង​របប​ខ្មែរ​ក្រហម​ទាំង​នេះ​ ក្រោយមក​ត្រូវបាន​ប្រជាជន​ប្រមែ​ប្រមូល​គរទុក​នៅក្នុង​ល្អាង​គីរីរម្យ​នេះ​ ប៉ុន្តែ​អដ្ឋិធាតុ​ខ្លះ​បាន​បាត់​និង​ខ្លះ​ត្រូវបាន​ដុត​ចោល។

បច្ចុប្បន្ន​ អដ្ឋិធាតុ​ដែល​នៅ​សេសសល់​ត្រូវបាន​រក្សា​ទុក​យ៉ាង​សមរម្យ​នៅក្នុង​ស្តូប​ធ្វើ​ពី​ថ្ម​និង​ទ្វារ​កញ្ចក់​នៅក្នុង​ល្អាង​ល្ខោន​នៃវត្ត​គីរីរម្យ​នេះ។

អ្នក​ថែរក្សា​អដ្ឋិធាតុ​ទាំងនេះបាន​ប្រាប់​ឲ្យ​ដឹង​ថា​ ការ​ខិតខំ​រក្សា​អដ្ឋិធាតុ​ដែល​នៅ​សេសសល់​របស់​ជន​រងគ្រោះ​នៅក្នុង​ល្អាង​នេះ​ គឺដើម្បី​ទុកជា​ភស្តុតាង​សម្រាប់​បង្ហាញ​សាធារណជន​ជាតិ​និង​អន្តរជាតិ​អំពី​អំពើ​ឃោរឃៅ​នៅក្នុង​របប​កម្ពុជា​ប្រជាធិបតេយ្យ​ឬ​របប​ខ្មែរក្រហម​នោះ។

"បើ​យើង​ដុត​អស់​ទៅ​វា​អស់​ភស្តុតាង​ ដល់អញ្ចឹង​ទៅ​យើង​ប្រាប់​ថា​ខ្មែរ​ក្រហម​សម្លាប់​ប្រជាជន​ខ្មែរ​យើង​ គេ​លែង​ជឿ​បាត់​ទៅ​ហើយ​ គេ​នឹង​មិន​ជឿ​ថា​ខ្មែរ​សម្លាប់​ខ្មែរ​គ្នាឯង​ទេ​ អញ្ចឹង​ទុក​ជា​ភស្តុតាង​សម្រាប់​ឲ្យ​ជនជាតិ​បរទេស​គេ​មក​មើល​ឲ្យ​ឃើញ​ផ្ទាល់​ភ្នែក​ថា​ខ្មែរ​សម្លាប់​ខ្មែរ​មែន"។

ក្នុង​មួយ​ថ្ងៃៗ​ជាធម្យម​ មាន​ភ្ញៀវ​ទេសចរណ៍​បរទេស​និង​ខ្មែរ​ប្រមាណ​១០​នាក់​ដែរ​បានចូល​មក​ទស្សនា​ស្តូប​ដាក់​អដ្ឋិធាតុ​នៅក្នុង​ល្អាង​គីរីរម្យ​នេះ។​ នេះ​បើយោង​តាម​ព្រះ​ចៅអធិការ​និង​គណ​កម្មការ​វត្ត​នេះ។

លោក​ អ៊ុំ សារឿន​ មេ​ឃុំ​ភ្នំសំពៅ​និង​ជា​សាក្សី​ម្នាក់​នៅក្នុង​សំណុំ​រឿង​លេខ​០០២​ បាន​មាន​ប្រសាសន៍​នៅឯ​ផ្ទះ​របស់​លោក​នៅអែប​នឹង​ជើង​ភ្នំសំពៅ​នេះ​ថា​ លោក​ចង់​ឃើញ​មាន​ការ​កាត់​ទោស​មេដឹកនាំ​ខ្មែរ​ក្រហម​ដែល​ទទួល​ខុសត្រូវ​ចំពោះ​ការស្លាប់​រង្គាល​របស់​ប្រជាជន​ខ្មែរ​ឲ្យ​បាន​ឆាប់​ ដើម្បី​ទុកជា​មេរៀន​សម្រាប់​មនុស្ស​ជំនាន់​ក្រោយ​ កុំ​ឲ្យ​យក​តម្រាប់​តាម​ពួកគេ​ត​ទៅ​ទៀត។

"រឿង​ហ្នឹង​គ្រាន់តែ​ផ្ដន្ទាទោស​ទៅ​ ធ្វើ​ម៉េច​កុំឲ្យ​តែ​យុវជន​យើង​ដឹកនាំ​ទៅរក​អាអញ្ចឹង​ឡើងវិញ​ ដើម្បី​កុំ​ឲ្យ​មាន​របប​ហ្នឹង​កើត​ឡើង​ទៀត​ អាហ្នឹង​ធ្វើ​យ៉ាង​ម៉េច​ឲ្យ​យុវវ័យ​សព្វថ្ងៃ​ហ្នឹង​ ស្អប់​អា​របប​ហ្នឹង"។

ជន​ជាប់ចោទ​ទាំង​៤​នាក់​នៅក្នុង​ករណី​លេខ​០០២​ ដែល​អាច​ជាប់​ពាក់ព័ន្ធ​នឹង​ឌុច​ផង​ដែរ​នោះ​ គ្រោង​នឹង​ត្រូវ​នាំ​ខ្លួន​យក​ទៅ​កាត់ទោស​នៅ​ដើម​ឆ្នាំ​២០១១។

លោក​ ឆាំង យុ​ នាយក​មជ្ឍមណ្ឌល​ឯកសារ​កម្ពុជា​ មាន​ប្រសាសន៍​ថា ​អតីត​មន្ទីរ​សន្តិសុខ​វត្ត​គីរីរម្យ​នេះ​ អាច​ក្លាយ​ជា​ភស្តុតាង​ដ៏​មាន​ទម្ងន់​មួយ​ សម្រាប់​ការ​កាត់ទោស​អតីត​មេ​ដឹកនាំ​ខ្មែរ​ក្រហម​ នា​ពេល​ដ៏ឆាប់​ខាង​មុខ​ ដោយសារ​តែ​មាន​អ្នក​ដែល​បាន​ប្រព្រឹត្ត​ឬ​អ្នក​ធ្លាប់​រស់នៅ​ទីនោះ​នៅ​រស់រាន​មានជីវិត​នៅ​ឡើយ៕

XS
SM
MD
LG