ភ្ជាប់​ទៅ​គេហទំព័រ​ទាក់ទង

ព្រះ​មហាក្សត្រ និង​អតីត​ព្រះ​មហាក្សត្រ​បំពេញ​ព្រះរាជ​ទស្សនកិច្ច​នៅ​វៀតណាម


សម្តេចឪ​ នរោត្តម សីហនុ និង​សម្តេច​ម៉ែ នរោត្តម មុនីនាថ​សីហុន ព្រម​ទាំង​ព្រះ​ករុណា​សម្តេច​ព្រះ នរោត្តម សីហមុនី​ នៅ​ថ្ងៃ​ច័ន្ទ​នេះ​ បាន​យាង​ចាក​ចេញ​ពី​ប្រទស​កម្ពុជា ដើម្បី​ទៅ​បំពេញ​ព្រះ​រាជ​ទស្សនកិច្ច​ជាលក្ខណៈ​ឯក​ជន​ តាម​ការ​អញ្ចើញ​របស់​លោក​ង្វៀន មិញ ទ្រៀត (Nguyen Minh Triet) ប្រធានា​ធិបតី​នៃ​ប្រទេស​វៀត​ណាម​ ។

ជូន​ព្រះ​រាជ​ដំណើរ​សម្តេច​ឪ នរោត្តមសីហនុ និង​សម្តេច​ម៉ែ ព្រម​ទាំង​ព្រះកុរណា​នៅ​ឯ​ព្រលាន​យន្តហោះ​អន្តរ​ជាតិភ្នំពេញ ​រួមមាន ​លោក​ជា ស៊ឹម ប្រធាន​ព្រឹទ្ឋ​សភា លោក​ហេង សំរិន ប្រធាន​រដ្ឋ​សភា លោក​នាយក​រដ្ឋ​មន្រ្តី​ហ៊ុន សែន ព្រមទាំង​មន្រ្តី​ជាន់​ខ្ពស់​នៃ​រដ្ឋាភិបាល​មួយ​ចំនួន​ទៀត។

ព្រះអង្គម្ចាស់​ ស៊ីសុវត្ថិ ធម្មិកោ ព្រះរាជ​លេខា​ផ្ទាល់​របស់សម្តេចឪ នរោត្តមសីហនុ បានថ្លែង​ប្រាប់ វីអូអេ​ សំឡេង​សហ​រដ្ឋ​អាមេរិក​តាមរយៈ​ទូរស័ព្ទ​ថា សម្តេចឪ សម្តេចម៉ែ និងព្រះមហាក្សត្រ និង​គង់​ប្រថាប់​នៅ ក្នុង​ប្រទេស​វៀតណាម​ចំនួន​៣​ថ្ងៃ។ ព្រះអង្គ​ម្ចាស់​ស៊ីសុវត្ថិ ធម្មិកោ បាន​មាន​បន្ទូល​ថា ព្រះរាជ​ដំណើ​ទស្សនកិច្ច​នេះ បាន​បង្ហាញ​ឲ្យ​ឃើញ​អំពី​ទំនាក់​ទំនង​មិត្តភាព​រវាង​ប្រទេស​ទាំង​ពីរ។ ព្រះអង្គបន្តថា៖

«ការ​ដែល​ប្រទេសវៀតណាម ស្តេច​លោក​ទៅ​ហើយ​ហ្នឹង លោក​សព្វ​ព្រះរាជហឫទ័យ​ឆ្លុះ​បញ្ចាំង​មិត្តភាព មេត្រីភាព​រវាង​ប្រទេស​កម្ពុជា និង​ប្រទេស​វៀតណាម ហើយនិង​រវាង​ប្រជារាស្រ្ត​កម្ពុជា និង ប្រជាជន​វៀតណាម តែ​ប៉ុណ្ណឹង​ទេ អត់​មាន​អី​វែង​ឆ្ងាយ​ទេ»។

ព្រះរាជ​ទស្សនកិច្ចរបស់​សម្តេចឪ​ទៅ​កាន់​ប្រទេស​វៀតណាម​លើក​នេះ ចំ​ពេល​ដែល​ប្រទេស​កម្ពុជា ​និង​ប្រទេស​វៀតណាម​បាន​ចាប់​ផ្តើម​បោះ​បង្គោល​ព្រំដែន ដែល​ក្រុម​មន្រ្តី​គណបក្ស​ប្រឆាំង​បាន​ចោទ​ប្រកាន់​ថា ប្រទេស​វៀតណាម បាន​បោះ​តម្រុយ​បង្គោល​ព្រំដែន​រំលោភ​ចូល​បូរណភាព​ដែន​ដី​នៃ​ប្រទេសកម្ពុជា។

ព្រះ​អង្គម្ចាស់​ ស៊ីសុវត្ថិធម្មិកោ បាន​មាន​បន្ទូល​ថា សម្តេចឪ នឹង​មិន​លើក​យក​បញ្ហា​ព្រំដែន​ទៅ​ជជែក​ជា​មួយនឹង​រដ្ឋាភិបាល​វៀតណាម​ទេ ពីព្រោះ​នេះ គឺ​ជា​កាតព្វកិច្ច​របស់​រដ្ឋាភិបាល។

លោក​យឹម សុវណ្ណ អ្នក​នាំ​ពាក្យ និង​ជា​អ្នក​តំណាងរាស្រ្ត​នៃ​គណបក្សសម រង្ស៊ី បាន​និយាយ​ថា សម្តេចឪ​ អាច​នឹង​លើក​យក​បញ្ហា​ព្រំដែន​ទៅ​ពិភាក្សា​នៅ​ក្នុង​ពេល​មាន​ជំនួប​ ជាមួយ​មេដឹក​នាំ​វៀតណាម។ លោក​បន្ថែម​ថា៖

«ខ្ញុំ​មាន​ជំនឿ​ថា បញ្ហា​នេះ​នឹង​ត្រូវ​បាន​លើក​យក​ទៅ​ពិភាក្សា​ក្នុង​កិច្ច​ប្រជុំ ពីព្រោះ​ថា ឥឡូវ​នេះ យើង​ពឹង​ទៅ​លើ​រដ្ឋាភិបាល រដ្ឋាភិបាល​ធ្វើ​ព្រងើយ​កន្តើយ​មិន​អើពើ​នឹង​សូម​ណូមពរ​របស់​យើង ការ​ព្រួយបារម្ភ​របស់​យើង​ចំពោះ​បញ្ហា​ព្រំដែន»។

លោក​ខៀវ កាញ្ញារិទ្ឋ អ្នក​នាំពាក្យ​រដ្ឋាភិបាល​កម្ពុជា បាន​បញ្ជាក់​ថា អ្នក​ដែល​ជំរុញ​បញ្ហា​ព្រំដែន នៅ​ក្នុង​ពេល​ដែល​សម្តេចឪ​បំពេញ​ទស្សនកិច្ច​ក្នុង​ប្រទេស​វៀតណាម​នោះ វា​ហាក់បី​ដូចជា​ការ​ទម្លាក់​ទោស​ទៅ​លើ​ព្រះអង្គ។ លោកខៀវ កាញ្ញារិទ្ឋ មាន​ប្រសាសន៍​ថា តាម​រដ្ឋធម្មនុញ្ញ ព្រះមហាក្សត្រ​គ្រប់គ្រង​រាជ្យ​តែ​មិន​កាន់​អំណាច​ទេ។ លោក​ថ្លែង​ដូច្នេះថា៖

«ព្រះអង្គ​លើក​មកទាល់​តែ​ព្រះអង្គ​ក្តាប់​ការ​ងារ​ហ្នឹង ​ជាប់​ទាំង​អ្នក​ឯកទេស។ ធម្មតា វា​ជា​ការងារ​មួយ​វែង​ឆ្ងាយ​ណាស់ មិន​មែន​គ្រាន់​តែ​មក​អង្គុយ​ជជែក​លេង​ទេ។ អញ្ចឹង​អ្នក​និយាយ​ហ្នឹង ចង់​ជំរុញ​ឲ្យ​ព្រះករុណា​ទទួល​ខុស​ត្រូវ​បញ្ហា​ទាំង​អស់​ហ្នឹង​ម៉េច​បាន»។

សម្តេចឪ នរោត្តម សីហនុ ធ្លាប់​បាន​បំពេញ​ព្រះរាជ​ទស្សនកិច្ច​លើកទី១ ទៅ​កាន់​ប្រទេស​វៀតណាម​កាល​ពី​ឆ្នាំ​១៩៩៥ នៅ​ពេល​ដែល​ព្រះអង្គ​គ្រប់​គ្រង​រាជ​សម្បត្តិ។

XS
SM
MD
LG