របាំសហសម័យខ្មែរ មានឈ្មោះថា “Khmeropedies I & II” ដែលទើបបានសម្តែងថ្មីៗនេះនៅទីក្រុង New Haven រដ្ឋ Connecticut និងទីក្រុង New York នឹងទៅសម្តែងនៅប្រទេសសឹង្ហបូរីនៅថ្ងៃទី២០ និងទី២១ ខែសីហា ឆ្នាំ២០១០ខាងមុខនេះ នៅរោងមហោស្រព Esplanade Theatre។
សិល្បៈរបាំ “Khmeropedies I & II” ភាគទីមួយនិងភាគទីពីរទើបបង្កើតថ្មីនៅឆ្នាំ២០០៧ ដោយអ្នកស្រីអេម៉ានុយអែល ភួន និងផលិតដោយក្រុមប្រឹក្សានៃអង្គការអម្រឹតាសិល្បៈនៅប្រទេសកម្ពុជា និងចេញទៅសម្តែងនៅប្រទេស សឹង្ហបូរី ក្នុងទ្រង់ទ្រាយធំដោយមានសិល្បករសម្តែង១២នាក់។
សិល្បករដែលបានទៅសម្តែងនៅរោងមហោស្រពសិល្បៈនិងគំនឹតហៅ Festival of Arts & Ideas នៅទីក្រុង New Haven រដ្ឋ Connecticut និងរោងមហោស្រព Baryshnikov នៅទីក្រុង New York កាលពីខែមិថុនាឆ្នាំ២០១០នោះ មានទាំងអស់៤នាក់ គឺអ្នកគ្រូ សំ សត្យា នាងជុំវ៉ាន់ សូដានី នាងជ័យចាន់កត្យា និងលោក ផុន សុភាព។ ប៉ុន្តែការសម្តែងនៅរោងមហោស្រព Esplanade Theatre នៅក្នុងប្រទេសសឹង្ហបូរី របាំ“Khmeropedies I & II” នឹងមានបន្ថែមសិល្បករ៨នាក់ទៀត ដើម្បីសម្តែងជាឆាកធំមួយ ក្នុងបំណងទាក់ទាញទស្សនិកជនអន្តរជាតិឲ្យស្គាល់និងចូលចិត្តការសម្តែងសិល្បៈសហសម័យខ្មែរ និងទទួលបាននូវបរិយាកាសសំរាប់ការអភិវឌ្ឍន៍សិល្បៈរបស់ខ្លួន។
នៅក្នុងទស្សនីយភាពរបាំសហសម័យ Khmeropedies អ្នកស្រីអេម៉ានុយអែល ភួន បានបង្ហាញអំពីប្រឌិតញាណនៃសិល្បៈខ្មែរជំនាន់ក្រោយដល់ទស្សនិកជនអន្តរជាតិ ដោយយករបាំក្បាច់បូរាណខ្មែរ លាយជាមួយក្បាច់បស្ចឹមប្រទេស ទៅរាំជាមួយនឹងភ្លេងរ៉ាពដែលក្មេងៗខ្មែរនិយមរាំតាមផ្លូវថ្នល់ បទភ្លេងអាល្លឺម៉ង់ និងបទភ្លេង Gymnopedies របស់អ្នកនិពន្ធបទភ្លេងជាតិបារាំងនៅឆ្នាំ១៨៨៧ លោក Erik Satie។
អត្ថន័យនៅក្នុងរបាំ Khmeropedies គឺជាការសន្ទនាររវាងអ្នកគ្រូរបាំអភិរក្សម្នាក់ជាមួយនឹងក្រុមសិស្សដែលចង់បានការពិសោធន៍ជាមួយនឹងបច្ចេកទេសថ្មីនៃរបាំដទៃទៀត។ នៅទីបំផុតការពិភាក្សារបស់អ្នកគ្រូរបាំអភិរក្សម្នាក់ដែលយល់ថារបាំរបស់ខ្មែរមានយ៉ាងល្អប្រណិតទៅ ហើយមិនគួរទៅរៀនរបាំដទៃនោះ ក៏ចុះសម្រុងជាមួយសិស្ស ហើយសាកល្បងយកបច្ចេកទេសថ្មីមួយតាមបែបសិល្បៈសហសម័យ។
អង្គការអម្រឹតាសិល្បៈជាអង្គការក្រៅរដ្ឋាភិបាលអន្តរជាតិមួយ ដែលមានបេសកកម្មរក្សាមរតកនៃរបាំក្បាច់បូរាណនិងមហោស្រពខ្មែរ ហើយនិងលើកស្ទួយឲ្យបង្កើតសិល្បៈសហសម័យ។ អង្គការអម្រឹតាសិល្បៈមានភារកិច្ចនាំក្រុមសិល្បករខ្មែរនិងសិល្បករអន្តរជាតិ ឲ្យធ្វើការជាមួយគ្នា ចែករំលែកគំនឹតនិងជំនាញសិល្បៈគ្នា និងបង្កើតទស្សនីយភាពរបាំសហសម័យ៕