ភ្ជាប់​ទៅ​គេហទំព័រ​ទាក់ទង

អន្តរ​សភា​សិក្សា​តួនាទី​សមាជិក​សភា​ ជន​ជាតិ​ភាគ​តិច​ និង​យេនឌ័រ


អន្តរ​សភា​ពិភព​លោក​កំពុង​សិក្សា​ស្វែង​យល់​ពី​តួនាទី​របស់​សមាជិក​សភា​ ដែល​ជា​ជន​ជាតិ​ដើម​ ជន​ជាតិ​ភាគ​តិច​ និង​យេនឌ័រ​នៅ​ក្នុង​ប្រទេស​កម្ពុជា។

លោក​ ជន​ សក្តា​ ជូន​សេចក្តី​រាយ​ការណ៍​ដូច​ត​ទៅ៖

អ្នក​ស្រាវ​ជ្រាវ​របស់​អន្តរ​សភា​ពិភព​លោក​ IPU​បាន​ជួប​ជា​មួយ​សមាជិក​សភា​គណ​បក្ស​គ្រប់​គ្រង​អំណាច​ និង​គណ​បក្ស​ប្រឆាំង​នៅ​ថ្ងៃ​ពុធ​នេះ ​ដើម្បី​ស្វែង​រក​វិធី​ធ្វើ​ឱ្យ​ប្រសើរ ​ជាប់​ទាក់​ទង​នឹង​សេចក្តី​ត្រូវ​ការ​ជន​ជាតិ​ដើម​ជន​ជាតិ​ភាគ​តិច​ និង​យេនឌ័រ​នៅ​ក្នុង​រដ្ឋ​សភា​កម្ពុជា។

លោក ​ហ្សាការីយ៉ា ​អាដាម ​តំណាង​រាស្ត្រ​មណ្ឌល​កណ្តាល​ បាន​ថ្លែង​ប្រាប់​អ្នក​ស្រាវ​ជ្រាវ​ IPU​ថា​ អង្គការ​នីតិបញ្ញត្តិ​ ត្រូវ​បាន​រាយ​ការណ៍​ប្រាប់​ដោយ​សមាជិក​ជន​ជាតិ​ដើម ​និង​ជន​ជាតិ​ភាគ​តិច​ដែល​មាន​កម្រិត​អប់រំ​ទាប​ និង​ការ​អភិវឌ្ឍន៍។

លោក​ស្រី​ មួរ សុខហួរ​ តំណាង​រាស្រ្ត​គណ​បក្ស​ប្រឆាំង​ បាន​និយាយ​ថា ​ចំនួន​សមាជិក​សភា ​តំណាង​ ស្ត្រី​ត្រូវ​ខំ​ធ្វើ​ការ​ឱ្យ​ខ្លាំង​ឡើង ​ដើម្បី​ដោះ​ស្រាយ​អំពើ​ហិង្សា​ក្នុង​គ្រួសារ​ ​បញ្ហា​សុខភាព​ បញ្ហា​ក្រីក្រ​របស់​ស្ត្រី ​និង​ការ​ជួញ​ដូរ​ស្ត្រី។ ​សមាជិក​សភា​ជា​ស្ត្រីពី​គណ​បក្ស​គ្រប់​គ្រង​អំណាច​ និង​គណ​បក្ស​ប្រឆាំង​គួរ​តែ​បោះ​បង់​ចោល​គំនិត​ប្រកាន់​គោល​នយោបាយ​បក្ស​របស់​ខ្លួន​ ដើម្បី​រួប​រួម​គ្នា​ដោះ​ស្រាយ​បញ្ហា​ប្រឈម​នានា​របស់​ស្ត្រី។

"យើង​ចង់​ឃើញ​គណៈ​កម្មការ​ពហុ​បក្ស​នៃ​តំណាង​រាស្ត្រ​ស្ត្រី។​ បើ​យើង​មាន​ឆន្ទៈ​ពិត​ប្រាកដ​ ដើម្បី​ដោះ​ស្រាយ​បញ្ហា​ស្ត្រី​ពិត​ប្រាកដ​ គណៈ​កម្មការ​ពហុ​បក្ស​របស់​តំណាង​រាស្ត្រ​ស្ត្រី​នេះ​ អាច​មាន​សហ​ប្រធាន។​ អ្នក​តំណាង​រាស្ត្រ​ជា​ស្ត្រី​យក​បញ្ហា​របស់​ស្ត្រី​មក​ដោះ​ស្រាយ​ដោយ​ មិន​យក​គោល​ការណ៍​នយោបាយ​នៃ​គណ​បក្ស​របស់​យើង​មក​ធ្វើ​ជា​ធំ"។

ចំពោះ​សិទ្ធិ​ និង​សេរីភាព​របស់​សមាជិក​រដ្ឋ​សភា​ចំនួន​១២៣​រូប ​រួម​មាន​ជន​ជាតិ​ដើម​៣​រូប​ ជន​ជាតិ​ភាគ​តិច​៥​រូប​វិញ។

លោក ​ឈាន​ វុន ​ប្រធាន​គណៈ​កម្មការ​កិច្ចការ​បរទេស​នៃ​រដ្ឋ​សភា​ខាង​គណ​បក្ស​ប្រជាជន​កម្ពុជា​ បាន​ថ្លែង​ថា ​រដ្ឋ​ធម្មនុញ្ញ​របស់​យើង​បាន​ផ្តល់​សិទ្ធិ ​និង​សេរីភាព​គ្រប់​យ៉ាង​ដល់​ប្រជាពល​រដ្ឋ​ខ្មែរ​ទូទៅ​ ដោយ​គ្មាន​ការ​រើស​អើង​ជន​ជាតិ​ដើម​ និង​ខ្មែរអ៊ិស្លាម​ ដែល​សុទ្ធ​តែ​ជា​ជន​ជាតិ​ខ្មែរ​ ទើប​អាច​មក​ធ្វើ​ជា​អ្នក​តំណាង​រាស្ត្រ​បាន។

"យើង​បាន​ចង​ក្រង​រដ្ឋ​ធម្មនុញ្ញ ​ក្នុង​មាត្រា​មួយ​ចំនួន​ការ​ពារ​សញ្ញា​ជាតិ​ខ្មែរ​ទាំង​អស់ ​ឱ្យ​ទុក​ជាតិ​ដើម​ វប្បធម៌ ​ទំនៀម​ទម្លាប់ ​ប្រពៃណី ​និង​សាសនា​របស់​ខ្លួន ​ហើយ​ឱ្យ​សញ្ញា​ជាតិ​ខ្មែរ​ទាំងអស់​ សូម្បី​ជាតិ​ដើម​អ្វី​ក៏​ដោយ ​គឺ​ថែ​ទាំ​គ្នា​ ការ​ពារ​គ្នា​ និង​ស្រឡាញ់​រាប់​អាន​គ្នា​ដោយ​មិន​អនុញ្ញាត​ឱ្យ​ប្រកាន់​ពូជ​សាសន៍​ទេ"។

ចំពោះ​យេនដ័រ​វិញ ​លោក​ស្រី ​ឃួន ​សុដារី ​ប្រធាន​គណៈ​កម្មការ​សិទ្ធិ​មនុស្ស​នៃ​រដ្ឋ​សភា ​បាន​ ថ្លែង​ថា យេនឌ័រ​នៅ​កម្ពុជា​មាន​ការ​រីកចម្រើន​ជាង​បណ្តា​ប្រទេស​ក្នុង​តំបន់ ​ដោយ​តួនាទី​របស់​ស្ត្រី​ មាន​នៅ​ថ្នាក់​ជាតិ ​រហូត​ដល់​ថ្នាក់​មូលដ្ឋាន ​ជាពិសេស​សមាជិក​សភា​កម្ពុជា​ជា​ស្ត្រី​ចំនួន​២១​ភាគ​រយ​ បើ​ប្រៀប​ធៀប​នឹង​តំបន់​មាន​ចំនួន​១៦​ភាគ​រយ។

"យើង​បាន​បញ្ចូន​បញ្ហា​សមភាព​យេនឌ័រ​នៅ​ក្នុង​កម្ម​វិធី​គោល​នយោបាយ​ជាតិ​របស់​យើង"។

លោក​ស្រី ​រស់ សុភាព ​នាយីកា​អង្គការ​យេនឌ័រ​និង​ការ​អភិវឌ្ឍ​បាន​ទទូច​ដល់​តំណាង​រាស្ត្រ​ ជា​ស្ត្រី​ឱ្យ​ជួយ​ដោះ​ស្រាយ​បញ្ហា​របស់​ស្ត្រី។

"សមាជិក​សភា​ ដែល​ជា​ស្ត្រី​មិន​ទាន់​បាន​យល់​ជ្រួត​ជ្រាប​ឱ្យ​បាន​ស៊ី​ជម្រៅ​ ដែល​មាន​លទ្ធ ភាព​ក្នុង​ការ​វិភាគ​ទៅ​នឹង​ស្ថានភាព​យេនឌ័រ​ដែល​ទាក់​ទង​នឹង​បញ្ហា​គ្រប់​វិស័យ ​នៅ​មិន​ទាន់​មាន​លទ្ធភាព​នៅ​ឡើយ​ទេ។ ​ប៉ុន្តែ​គាត់​មាន​សមត្ថភាព​ហើយ​ផ្នែក​ច្បាប់"។

លាក​ស្រី​ Sonia ​Palmient ​អ្នក​ស្រាវជ្រាវ​ជាន់​ខ្ពស់​របស់​អន្តរ​សភា​ពិភព​លោក​ Inter-Parliamentary​ Union ​បាន​ជួប​ជា​មួយ​លោក​ស្រីហូ ណូន ​ប្រធាន​គណៈ​កម្មការ​កិច្ចការ​ស្ត្រី​ លោក​ឈាង​ វុន​ ប្រធាន​គណៈ​កម្មការ​កិច្ចការ​បរទេស​ លោក​ស្រី​ឃួន សុដារី ​ប្រធាន​គណៈ​ កម្មការ​សិទ្ធិ​មនុស្ស​ និង​លោក​ជាម យៀប ​ប្រធាន​គណៈ​កម្មការ​សេដ្ឋកិច្ច​ និង​លោក​ស្រី​ មួរ សុខហួរ​ តំណាង​រាស្ត្រ​គណ​បក្ស​ប្រឆាំង។

ពី​ទី​ក្រុង​ភ្នំពេញ ​ខ្ញុំ ​ជន សក្តា ​VOA ​សំឡេង​ស.រ.អ.៕

XS
SM
MD
LG