លោកនាយករដ្ឋមន្ត្រីហ៊ុន សែននៃប្រទេសកម្ពុជា និងលោកនាយករដ្ឋមន្ត្រីថៃ Abhisit Vejjajiva គ្រោងនឹងជួបទ្វេភាគីមួយ បន្ទាប់ពីកិច្ចប្រជុំមហាសន្និបាតអង្គការសហប្រជាជាតិ (អ.ស.ប.) នៅបូរីញូយ៉ក នៅថ្ងៃទី២៤ ខែកញ្ញាខាងមុខនេះ។ ក៏ប៉ុន្តែមន្ត្រីរដ្ឋាភិបាលមិនបានបញ្ជាក់អំពីរបៀបវារៈនៃជំនួបទ្វេភាគីនេះទេ គ្រាន់តែបានអះអាងថា ជំនួបនេះនឹងធ្វើឡើងបន្ទាប់ពីមានសំណើជាផ្លូវការពីភាគីថៃដើម្បីជួបចរចាទ្វេភាគីជាមួយកម្ពុជា។
លោកកុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់នៅថ្ងៃព្រហស្បតិ៍នេះថា លោកនាយករដ្ឋមន្រ្តីហ៊ុន សែន និងលោកនាយករដ្ឋមន្រ្តីថៃ Abhisit Vejjajiva គ្រោងនឹងជួបទ្វេភាគីមួយ បន្ទាប់ពីកិច្ចប្រជុំមហាសន្និបាតរបស់អ.ស.ប. ដែលគ្រោងធ្វើនៅបូរីញូវយ៉ក សហរដ្ឋអាមេរិក។
លោកកុយ គួងមិនបានបញ្ជាក់លម្អិតអំពីរបៀបវារៈនៃជំនួបរវាងមេដឹកនាំនៃប្រទេសទាំងពីរនោះទេ លោកគ្រាន់តែនិយាយថា ជំនួបនេះនឹងធ្វើឡើង បន្ទាប់ពីលោកនាយករដ្ឋមន្រ្តីថៃ Abhisit Vejjajiva បានធ្វើលិខិតជាផ្លូវការមួយមកនាយករដ្ឋមន្រ្តីកម្ពុជាដើម្បីស្នើសុំឲ្យមានជំនួបចរចាទ្វេភាគីនេះ។
លោកកុយ គួងមានសុទិដ្ឋិនិយមថា ស្ថានភាពបញ្ហាព្រំដែននឹងមានភាពធូរស្រាលក្រោយពីមេដឹកនាំទាំងពីរបានជួបពិភាក្សាគ្នានោះ។
«ខ្ញុំយល់ថា បន្ទាប់ពីថ្នាក់ដឹកនាំប្រទេសទាំងពីរបានជួបគ្នានៅទីនោះ ខ្ញុំយល់ថា ភាពតានតឹងរវាងប្រទេសទាំងពីរនឹងកាន់តែធូរស្រាល ហើយកិច្ចសហប្រតិបត្តិការផ្សេងៗទៀតនឹងអាចមានការរីកចម្រើន»។
តាមសេចក្តីប្រកាសព័ត៌មានរបស់អគ្គលេខាធិការអាស៊ានកាលពីថ្ងៃទី៦ខែកញ្ញាបានឲ្យដឹងថា លោកប្រធានាធិបតីសហរដ្ឋអាមេរិកបារ៉ាក់ អូបាម៉ា បានអញ្ជើញមេដឹកនាំនៃបណ្តាប្រទេសអាស៊ានទាំង១០ រួមទាំងអគ្គលេខាធិការអាស៊ានផងដែរ ដើម្បីចូលរួមកិច្ចប្រជុំថ្នាក់ដឹកនាំអាស៊ាននិងសហរដ្ឋអាមេរិកលើកទីពីរ នៅបូរីញូវយ៉កសហរដ្ឋអាមេរិក ដែលគ្រោងធ្វើនៅថ្ងៃទី២៤ ខែកញ្ញាខាងមុខនេះ។
លោកកុយ គួងបានមានប្រសាសន៍ទៀតថា បន្ទាប់ពីបញ្ចប់កិច្ចប្រជុំអាស៊ាន-អាមេរិក លោកនាយករដ្ឋមន្រ្តីហ៊ុន សែន និងលោក Abhisit Vejjajiva នឹងមានជំនួបទ្វេភាគីដាច់ដោយឡែកមួយផ្សេងទៀត។
«ជំនួបទ្វេភាគីនេះគឺថា បន្ទាប់ពីកម្ពុជាបានទទួលសំណើពីនាយករដ្ឋមន្រ្តីថៃដើម្បីឲ្យមានជំនួបទ្វេភាគីនៅទីក្រុងញូយ៉ក នៅថ្ងៃទី២៤ ខែកញ្ញានោះ បាទ»។
លោកនាយករដ្ឋមន្រ្តីហ៊ុន សែនធ្លាប់បានលើកឡើងថា នឹងមានជំនួបទ្វេភាគីរវាងនាយករដ្ឋមន្រ្តីនៃប្រទេសទាំងពីរដើម្បីបន្ធូរបន្ថយភាពតានតឹងបញ្ហាព្រំដែន។
លោកហ៊ុន សែនបានមានប្រសាសន៍ទៀតថា ជំនួបទ្វេភាគីនោះនឹងលើកឡើងអំពីបញ្ហាជម្លោះព្រំដែន បញ្ហាពាណិជ្ជកម្ម និងបញ្ហាវិនិយោគទុននៃប្រទេសទាំងពីរផងដែរ។
លោកប៉ានីតាន វឌ្ឍនាយ៉ាកន អ្នកនាំពាក្យរាជរដ្ឋាភិបាលថៃ ត្រូវបានកាសែត Bangkok Post ដកស្រង់សម្តីមកចុះផ្សាយកាលពីថ្ងៃពុធថា នាយករដ្ឋមន្រ្តីថៃនិងកម្ពុជាពិតជានឹងមានជំនួបទ្វេភាគីនៅបូរីញូវយ៉កពិតប្រាកដមែន។
លោកបានមានប្រសាសន៍ថា មេដឹកនាំទាំងពីរនឹងជជែកអំពីបញ្ហាផ្សេងៗ រួមទាំងបញ្ហាព្រំដែនផងដែរ។
លោករ៉ុង ឈុន ប្រធានក្រុមឃ្លាំមើលកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ថា ជំនួបរវាងមេដឹកនាំទាំងពីរនឹងបង្ហាញពីសញ្ញាវិជ្ជមានមួយ ដើម្បីឈានទៅរកភាពបន្ធូរបន្ថយភាពតានតឹងក្នុងបញ្ហាព្រំដែន។
ក៏ប៉ុន្តែលោករ៉ុង ឈុនពុំមានជំនឿថា ជំនួបទ្វេភាគីនេះនឹងអាចបញ្ចប់ជម្លោះព្រំដែនរវាងប្រទេសទាំងពីរនោះទេ ប្រសិនណាមិនមានការសម្របសម្រួលពីភាគីរបស់អង្គការសហប្រជាជាតិទេនោះ។
«ពីព្រោះយើង តាមឃ្លាំមើលរាល់កិច្ចចរចាទ្វេភាគី។ បើយើងគិតជាដងវិញ យើងច្រើនដងរហូតដល់ភ្លេច។ ហើយលទ្ធផលគឺ Zero អត់បានលទ្ធផលអីទាំងអស់ទាក់ទិនករណីសៀមឈ្លានពាន»។
ប្រទេសកម្ពុជា និងប្រទេសថៃមានបញ្ហាជម្លោះជុំវិញប្រាសាទព្រះវិហារអស់រយៈពេលជាងពីរឆ្នាំមកហើយ។ ប្រទេសទាំងពីរនៅតែដាក់ពង្រាយកងកម្លាំងប្រដាប់អាវុធយ៉ាងច្រើនក្រាស់ក្រែលនៅឡើយនៅតាមក្រវ៉ាត់ព្រំដែន បន្ទាប់ពីបានប៉ះទង្គិចគ្នាជាច្រើនលើក ដែលបានបណ្តាលឲ្យកងទ័ពទាំងសងខាងស្លាប់និងរងរបួស៕