ភ្នំពេញ៖ អង្គការសិទ្ធិមនុស្ស Human Rights Watch បានរិះគន់សហរដ្ឋអាមេរិកចំពោះការជ្រើសរើសយកកងទ័ពកម្ពុជា ដែលមានប្រវត្តិរំលោភសិទ្ធិមនុស្សឱ្យធ្វើជាអ្នករៀបចំសមយុទ្ធថែរក្សាសន្តិភាពពហុជាតិ។ អង្គការសិទ្ធិមនុស្សHuman Rights Watch នេះបានប្រកាសនៅក្នុងបូរីញូយ៉ក កាលពីយប់ថ្ងៃព្រហស្បតិ៍ថា ការជ្រើសរើសនេះធ្វើឱ្យអន្តរាយដល់ការប្តេជ្ញាចិត្តរបស់សហរដ្ឋអាមេរិកក្នុងការលើកកម្ពស់សិទ្ធិមនុស្សនៅកម្ពុជា។
សមយុទ្ធថែរក្សាសន្តិភាពពហុជាតិ ដែលគាំទ្រដោយអង្គការសហប្រជាជាតិនេះនឹងចាប់ផ្តើមពីថ្ងៃទី១៧ រហូតដល់ចុងខែកក្កដានេះ។ កម្លាំងកងទ័ពដែលចូលរួមនៅក្នុងសមយុទ្ធមានចំនួនជាង១.០០០នាក់ មកពីប្រទេសចំនួន២៦ រួមមាន សហរដ្ឋអាមេរិក ចិន ឥណ្ឌា អាឡឺម៉ង់ បារាំង អូស្ត្រាលី ថៃ ម៉ាឡេស៊ី ហ្វីលីពីន ប្រុយណេ និងតុងហ្គោ។
លោកឧត្តមសេនីយឯក ឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងថា សមយុទ្ធនេះមិនមែនសម្រាប់គោលដៅប្រយុទ្ធដោយកាំភ្លើងធំទេ ប៉ុន្តែវាគ្រាន់តែជាសមយុទ្ធសម្រាប់ការថែរក្សាសន្តិភាពក្រោមការដឹកនាំរបស់អង្គការសហប្រជាជាតិប៉ុណ្ណោះ។ លោកឧត្តមសេនីយ ឈុំ សុជាតិ បានបញ្ជាក់ថា សមយុទ្ធនេះត្រូវបានចែកចេញជាពីរផ្នែកសំខាន់ៗ គឺសមយុទ្ធនៅទីបញ្ជាការ ដើម្បីផ្សព្វផ្សាយបទបញ្ជាទៅកាន់ទីបញ្ជាការនៅតាមតំបន់ និងសមយុទ្ធហ្វឹកហាត់នៅលើទីលានជាក់ស្តែងដែលមានកម្លាំងដឹកជញ្ជូនស្បៀងអាហរ ថ្នាំពេទ្យ និងសម្ភារៈផ្សេងៗ និងកម្លាំងការពារសន្តិសុខ និងសណ្តាប់ធ្នាប់សម្រាប់ប្រជាពលរដ្ឋនៅក្នុងប្រទេស ដែលអង្គការសហប្រជាជាតិគ្រប់គ្រង។
លោកឧត្តមសេនីយឯក ឈុំ សុជាតិ បានថ្លែងថា សមយុទ្ធនេះបង្ហាញពីមោទនភាពរបស់កម្ពុជាជាលើកដំបូង ក្រោយពីសង្គ្រាមជិត៣០ឆ្នាំ។ សមយុទ្ធនេះសំដៅលើកតម្កើងសុឆន្ទៈក្នុងការចូលរួមថែរក្សាសន្តិភាព និងមនុស្សធម៌សម្រាប់ជួយដល់មនុស្សជាតិដែលរងគ្រោះដោយសារសង្គ្រាម។ លោកបន្តថា៖
«ខ្ញុំគិតថា បញ្ហារិះគន់របស់អង្គការសិទ្ធិមនុស្ស Human Rights Watch នេះ គឺជាបញ្ហាមួយ ដែលគ្មានមូលដ្ឋានច្បាស់លាស់ទេ។ វាមិនមានបញ្ហាអ្វីទាក់ទងដល់ការសម្រេចចិត្តរបស់អង្គការសហប្រជាជាតិ និងបណ្តាប្រទេសនានាទេ។ គេគិតពិចារណាត្រឹមត្រូវណាស់ មុននឹងគេសម្រេចចិត្តធ្វើ នៅប្រទេសកម្ពុជា»។
លោកចន ចនសាន់ (John Johnson) អ្នកនាំពាក្យស្ថានទូតអាមេរិកប្រចាំកម្ពុជា បានថ្លែងថា សហរដ្ឋអាមេរិកបានធានាការផ្តួចផ្តើមគំនិតប្រតិបត្តិការថែរក្សាសន្តិភាពពិភពលោក ដែលត្រូវបានគាំទ្រ និងចាត់ចែងដោយកងទ័ពសហរដ្ឋអាមេរិក និងដៃគូរបស់យើងនៅក្រសួងការពារប្រទេសកម្ពុជា។
លោកចន ចនសាន់ បានបន្ថែមថា អ្នកចូលរួមនៅក្នុងសមយុទ្ធទាំងនេះ ត្រូវបានត្រួតពិនិត្យ និងវាយតម្លៃយ៉ាងហ្មត់ចត់ និងយ៉ាងពិបាកដោយស្ថានទូត និងក្រសួងការពារជាតិ និងក្រសួងការបរទេស ដែលបានតម្រូវដោយច្បាប់សហរដ្ឋអាមេរិក។ លោកចន ចនសាន់បានថ្លែងថា សហរដ្ឋអាមេរិកបានផ្តល់ជំនួយយោធា និងការបណ្តុះបណ្តាល សម្រាប់ប្រតិបត្តិការថែរក្សាសន្តិភាពដល់កងទ័ពកម្ពុជាតាំងពីឆ្នាំ២០០៦ ក្នុងកិច្ចខិតខំជំរុញសមត្ថភាពនានារបស់កម្ពុជា។
ប្រទេសកម្ពុជាថ្មីៗនេះ បានបញ្ជូនកងទ័ពថែរក្សាសន្តិភាពទៅកាន់តំបន់ជម្លោះនៅក្នុងប្រទេសស៊ូដង់ ឆាត និងអាហ្វ្រិកកណ្តាលសម្រាប់គោលដៅមនុស្សធម៌៕