ភ្ជាប់​ទៅ​គេហទំព័រ​ទាក់ទង

មាន​បណ្តឹង​ជិត​១០០​ករណី​ប្តឹង​អំពី​ការ​ប្រមូល​ពន្ធ​ពុករលួយ


អគ្គនាយកដ្ឋាន​ពន្ធដារ​នៅ​ទី​ក្រុង​ភ្នំពេញ។​ មន្ត្រី​ពន្ធដារ​ជា​ក្រុម​មន្ត្រី​ដំបូង​គេ​មួយ​ដែល​រង​ការ​ចោទ​ប្រកាន់​ពី​អំពើ​ពុក​រលួយ​ក្នុង​​មធ្យោបាយ​បណ្តឹង​អំពើ​ពុក​រលួយ​ថ្មី​នេះ។

អង្គការ​ឃ្លាំ​មើល​ការប្រមូល​ពន្ធ​យានយន្ត​ប្រចាំ​ឆ្នាំ​២០១០​ទទួល​បាន​បណ្តឹង​ចំនួន​៩០​ករណី​ទាក់ទង​នឹង​ភាព​មិន​ប្រក្រតី​ក្នុង​ការ​ប្រមូល​ពន្ធ​របស់​ភ្នាក់ងារ​ពន្ធដារ​ចំនួន​៨០​នាក់​ រវាង​ពី​ថ្ងៃ​ទី​១៦​ ខែសីហា​ដល់​ថ្ងៃ​ទី​២០ ​ខែ​កញ្ញា​ពី​ខេត្ត​ក្រុង​ចំនួន​១៤ ​ដើម្បី​បញ្ជូន​ទៅ​អង្គភាព​ប្រឆាំង​អំពើ​ពុករលួយ​ធ្វើ​ការ​ស៊ើប​អង្កេត​បន្ថែម។​ អង្គភាព​ប្រឆាំង​អំពើ​ពុក​រលួយ​នឹង​ទទួល​យក​រាល់​ពាក្យ​បណ្តឹង​គ្រប់​ប្រភេទ​មក​ធ្វើ​ការ​ស៊ើប​អង្កេត​ទាក់ទង​នឹង​អំពើ​ពុក​រលួយ​ដោយ​គ្មាន​ការ​រើសអើង។

អង្គការ​ឃ្លាំមើល​បាន​បញ្ចូន​ពាក្យ​បណ្តឹង​ចំនួន​៩០​ករណី​ពី​ប្រជា​ពលរដ្ឋ​ខ្មែរ​ប្រមាណ​២.៧០០​នាក់​ នៅ​ក្នុង​ខេត្ត​ចំនួន​១៤​ទៅ​កាន់​អង្គភាព​ប្រឆាំង​អំពើ​ពុករលួយ​នៅ​ថ្ងៃ​ព្រហស្បតិ៍​នេះ​ ដើម្បី​ប្រឆាំង​នឹងភ្នាក់ងារ​ពន្ធដារ​ចំនួន​៨០​នាក់​របស់​ក្រសួង​សេដ្ឋ​កិច្ច​ និង​ហិរញ្ញវត្ថុ​ ​អំពី​ការ​លក់​សន្លឹង​ពន្ធ​យានយន្ត​លើស​តម្លៃ​រដ្ឋ​កំណត់។

យានយន្ត​ចំនួន​១.៣៩១​.៥៦៥​គ្រឿង​ ដែល​រួមមាន​ម៉ូតូ​ចំនួន​១.១៣៥.៦៣៨​គ្រឿង​ត្រូវ​បាន​ចុះ​បញ្ចី​ ​និង​ អនុញ្ញាត​ឱ្យ​ធ្វើ​ចរាចរណ៍​នៅ​កម្ពុជា​ ​ហើយ​ត្រូវ​មាន​កាតព្វ​កិច្ច​បង់ពន្ធ។

បណ្តឹង​ទាំងនេះ​ទាក់ទង​នឹង​ការ​លក់​សន្លឹក​ពន្ធ​យានយន្ត​លើស​តម្លៃ​រដ្ឋ​កំណត់​ ​ដូចជា​សម្រាប់​ម៉ូតូតម្លៃ​រដ្ឋ​កំណត់​៣.០០០​រៀល​ ​ប៉ុន្តែ​ភ្នាក់ងារ​ពន្ធដារ​លក់​តម្លៃ​៥.០០០​រៀល​ និង​តម្លៃ​រដ្ឋ​កំណត់​៤.៥០០​ រៀល​ ​ប៉ុន្តែ​ភ្នាក់ងារ​ពន្ធដារ​លក់​តម្លៃ​៦.០០០​រៀល​ ​ហើយ​សម្រាប់​រថយន្ត​ ​ភ្នាក់ងារ​ពន្ធដារ​បាន​លក់​ លើស​តម្លៃ​រដ្ឋ​កំណត់​ពី​១០.០០០​រៀល​ទៅ២០.០០០​រៀល​ក្នុង​មួយ​គ្រឿង​ ​នេះ​បើ​យោងតាម​សេចក្តីថ្លែង​ការណ៍។

លោក​សន ជ័យ​ អ្នក​សម្រប​សម្រួល​បណ្តាញ​រួបរួម​ដើម្បី​គណនេយ្យ​ភាព​សង្គម​នៅ​អាស៊ី​បូព៌ា​ ​និង​ប៉ាស៊ីហ្វិក​ ​បាន​ថ្លែង​ប្រាប់​ក្រុម​អ្នក​រាយ​ការណ៍​ព័ត៌មាន​ថា​ ​ក្រុម​ការងារ​ទទួល​បាន​បណ្តឹង​ចំនួន​៩០​ករណី​ទាក់ទង​នឹង​ភាព​មិន​ប្រក្រតី​ក្នុង​ការ​ប្រមូល​ពន្ធ​របស់​ភ្នាក់ងារ​ពន្ធដារ​ចំនួន​៨០​នាក់​រវាង​ពី​ថ្ងៃ​ទី​១៦​ ខែ​សីហា​ដល់​ថ្ងៃ​ទី​២០​ ខែ​កញ្ញា​ ​ពី​ខេត្ត​បាត់ដំបង់​ ​ខេត្ត​បន្ទាយ​មានជ័យ​ ​ខេត្ត​សៀមរាប​ ​ខេត្ត​តាកែវ​ ​ខេត្ត​កំពង់ធំ​ ​ខេត្ត​ពោធិសាត់​ ​ខេត្ត​ព្រៃវែង​ ​ខេត្ត​កំពង់ចាម​ ​ខេត្ត​ព្រះ​សីហនុ​ ​ខេត្ត​កណ្តាល​ ខេត្ត​កំពង់ឆ្នាំង​ ​ខេត្ត​កំពត​ ​និង​រាជធានី​ភ្នំពេញ។

លោក​សន ជ័យ​ បាន​បញ្ជាក់​ថា​ ​ខេត្ត​ដែល​ជាប់​ចំណាត់​ថ្នាក់​លេខ​មួយ​ក្នុង​ការ​លក់​សន្លឹក​ពន្ធ​លើសតម្លៃ​រដ្ឋ​កំណត់​នេះ​គឺ​ខេត្ត​កំពង់ចាម​មាន​១៨​ករណី​ ​ខេត្ត​តាកែវ​ជាប់​លេខ​ពីរ​មាន​១៧​ករណី​ ​និង​ខេត្តកណ្តាល​ ​ខេត្ត​ព្រៃវែង​ ​និង​រាជធានី​ភ្នំពេញ​ជាប់​លេខ​បី​មាន​៩ករណី។

លោក​សន ជ័យ ​បាន​បន្ថែម​ថា​ ​ក្នុង​ចំណោម​ពាក្យ​បណ្តឹង​៩០​នេះ​មាន​១៨​ករណី​និយាយ​អំពី​ភ្នាក់ងារ​ពន្ធដារ​លក់​សន្លឹក​ពន្ធ​មិន​បាន​ពាក់​ឯក​សណ្ឋាន​ដោយ​ខ្លាច​ប្រជា​ពលរដ្ឋ​កត់​ឈ្មោះ​ និង​អត្តលេខ​ ហើយ​១០​ករណី​ទៀត​និយាយ​អំពី​ស្មៀន​ឃុំ​ ​ប៉ូលិស​ ​អាជីវ​ករ​ ​កូន​របស់​ភ្នាក់ងារ​ពន្ធដារ​ ​មេភូមិ​ ​និង អនុ​ប្រធាន​ភូមិ​ ដែល​មិនមែន​ជា​ភ្នាក់ងារ​ពន្ធដារ​បាន​លក់​សន្លឹក​ពន្ធ។

លោក​វន់ ពៅ​ ប្រធាន​សមាគម​ប្រជាធិប​តេយ្យ​នៃ​សេដ្ឋ​កិច្ច​ក្រៅ​ប្រព័ន្ធ​ ​បញ្ជាក់​ថា​ ​ពាក្យ​បណ្តឹង​៩០នេះ​មាន​អ្នក​ប្តឹង​រហូត​ដល់​២.៧០០​នាក់​ ​ដោយ​បណ្តឹង​នីមួយៗ​មាន​អ្នក​ប្តឹង​រហូត​ដល់​៣០​នាក់។

លោក​សន ជ័យ​ ​អ្នក​សម្រប​សម្រួល​បណ្តាញ​រួបរួម​ដើម្បី​គណនេយ្យ​ភាព​សង្គម​នៅ​អាស៊ីបូព៌ា​ និង​ ប៉ាស៊ីហ្វិក​ ​បាន​ថ្លែង​ថា​ ​អង្គការ​ឃ្លាំង​មើល​របស់​លោក​ចង់​ឱ្យ​អគ្គ​នាយក​ដ្ឋាន​ពន្ធដារ​និង​អង្គភាពប្រឆាំង​អំពើ​ពុក​រលួយ​បើក​ការ​ស៊ើប​អង្កេត​លើ​ពាក្យ​បណ្តឹង​របស់​ប្រជា​ពលរដ្ឋ​អំពី​ការ​ប្រព្រឹត្ត​អំពើ​ពុក រលួយ​នៅ​ក្នុង​ការ​លក់​សន្លឹក​ពន្ធ​យានយន្ត​នេះ។

«យើង​ចង់​ឱ្យ​មាន​ការ​ដាក់​ពិន័យ​ផ្នែក​រដ្ឋបាល​ ​ដូចជា​ការ​ហៅ​មក​សាកសួរ​ ឬ​បើក​ការ​ស៊ើប​អង្កេត។​ យើង​ចង់​ឱ្យ​មាន​ការ​ផ្តល់​ឱកាស​មួយ​សម្រាប់​ការ​ស៊ើប​អង្កេត​ ​ជាជាង​យើង​ដាក់​ឈ្មោះ​ចំៗ​ ​ទោះ​បី​ជា​យើង​មាន​ឈ្មោះ​ ​និង​អត្តលេខ​ក៏​ដោយ​នៅ​ពេល​នេះ»។

លោក​ឱម យិនទៀង​ ​ប្រធាន​អង្គភាព​ប្រឆាំង​អំពើ​ពុករលួយ​ធ្លាប់​បាន​បញ្ជាក់​ថា​ ​អង្គភាព​របស់​លោក​ នឹង​ទទួល​យក​រាល់​ពាក្យ​បណ្តឹង​គ្រប់​ប្រភេទ​មក​ធ្វើ​ការ​ស៊ើប​អង្កេត​ទាក់ទង​នឹង​អំពើ​ពុករលួយ​ ​ដោយគ្មាន​ការ​រើសអើង​ឡើយ។

លោក​អោម ចន​ ​អនុ​ប្រធាន​នៃ​នាយក​ដ្ឋាន​ច្បាប់​ ​វិវាទ​ ​និង​ស្ថិតិ​នៃ​អគ្គ​នាយក​ដ្ឋាន​ពន្ធដារ​ ​បាន​បញ្ជាក់​ថា​ ​ភ្នាក់ងារ​ទាំងអស់​ត្រូវតែ​គោរព​ច្បាប់ ​និង​ការ​ណែនាំ​របស់​អគ្គ​នាយក​ដ្ឋាន​ពន្ធដារ។

លោក​សន ជ័យ​ បាន​បញ្ជាក់​ថា​ ​អង្គការ​ឃ្លាំ​មើល​របស់​លោក​នឹង​ជួប​ជាមួយ​លោក​ឱម យិនទៀង​ ប្រធាន​អង្គការ​ភាព​ប្រឆាំង​អំពើ​ពុករលួយ​នៅ​សប្តាហ៍​ក្រោយ​នេះ​ ​ដើម្បី​ពិភាក្សា​បណ្តឹង​ទាក់ទង​នឹង​ភាព​មិន​ប្រក្រតី​ក្នុង​ការ​ប្រមូល​ពន្ធ​លើ​យានយន្ត​គ្រប់​ប្រភេទ៕

XS
SM
MD
LG