ភ្ជាប់​ទៅ​គេហទំព័រ​ទាក់ទង

ការ​ដំឡើង​ប្រាក់​ឈ្នួល​បន្ថែម​​មិន​ទាន់​ធ្វើ​ឲ្យ​ជីវភាព​កម្មករ​កាត់​ដេរ​កម្ពុជា​ល្អ​ប្រសើរ​នៅ​ឡើយ​ទេ​


ក្រុម​កម្មការិនី​រោងចក្រ​កាត់ដេរ​ បាន​ស្វាគម​ការ​ដំឡើង​ប្រាក់​ឈ្នួល​ប្រចាំ​ខែ​ដល់​ពួក​គេ​ ក៏ប៉ុន្ដែ​ពួក​គេ​យល់​ថា​ ការ​ដំឡើង​ប្រាក់​ឈ្នួល​បន្ថែម​នេះ​មិនទាន់​ធ្វើ​ឲ្យ​ជីវភាព​ពួក​គេ​ល្អ​ប្រសើរ​នៅ​ឡើយ​ទេ។

នៅ​តាម​ដង​មហា​វិថី​ព្រះ​នរោត្តម​ឆ្ពោះ​ទៅ​កាន់​ខេត្ត​កណ្ដាល​ កម្មករ​ កម្មការិនី​ បាន​ឈរ​ជា​ក្រុម​តូចៗ​នៅ​ពី​មុខ​ទ្វារ​ចូល​រោងចក្រ​កាត់ដេរ​របស់​ពួក​គេ។​ ពួក​គេ​ហាក់​បី​ដូច​ជា​ពុំ​មាន​ការ​ភ្ញាក់​ផ្អើល​នៅ​ពេល​ដែល​ពួក​គេ​បាន​ទទួល​ដំណឹង​ពី​ការ​ដំឡើង​ប្រាក់​ឈ្នួល​ប្រចាំ​ខែ​ចំនួន​ប្រាំដុល្លារ​ពី​លើ​ប្រាក់​ខែ​ដែល​ពួក​គេ​ទទួល​បាន​ក្នុង​ពេល​បច្ចុប្បន្ន​នេះទេ។

អ្នកស្រី​ សាន សុភក្ដ្រ័ ​កម្មការីនី​នៃ​រោងចក្រ​សាន់លីហ្វុង​ ដែល​ស្ថិត​នៅ​ក្នុង​សង្កាត់​ចក្រ​អង្រែ​លើ​ ខណ្ឌ័​មានជ័យ​ ជាយ​ទីក្រុង​ភ្នំពេញ​ទើបតែ​បាន​ដឹង​តាម​ប្រពន្ធ័​ផ្សព្វផ្សាយ​នានា​អំពី​ការ​ដំឡើង​ប្រាក់​ខែ​នេះ។​ នាង​ពោល​ដោយ​ក្ដី​ត្រេកអរ ​ប៉ុន្ដែ​ប្រកប​ទៅ​ដោយ​ទឹកមុខ​ស្ងួត​ថា​ ការ​តំឡើង​ប្រាក់​ខែ​នេះ​នឹង​ជួយ​សម្រួល​ដល់​ការ​ចាយវាយ​របស់​កម្មករ​បាន​បន្ដិចបន្ដួច​តែប៉ុណ្ណោះ ​ប៉ុន្ដែ​កម្មករ​ទាំងអស់​នៅ​តែ​មិន​អាច​គេច​ផុត​ពី​ការ​លំបាក​បាន​ទេ​ នៅ​ពេល​ដែល​ទំនិញ​សព្វ​សារពើ​ឡើង​ថ្លៃ​កប់​ពពក​នោះ។

“ខ្ញុំ​ថា​ មិន​សម​ស្រប​ព្រោះ​អី​ទំនិញ​ទីផ្សារ​ ខ្ពស់​ជាង​ប្រាក់ខែ​ហ្នឹង​ច្រើន។​ ទោះបី​បាន​ប៉ុណ្ណឹង​មក​ក៏​ទប់ទល់​មិន​រួច​ ប៉ុន្ដែ​វា​ធូរ​ស្រាល​ជាង​យើង​បាន​ប្រាក់ខែ​ ៥០​ដុល្លារ"។

អ្នកស្រី​ សាន សុភក្ដ្រ័ ​មាន​ប្រាក់ខែ​ក្នុង​រង្វង់​ ៨០ ដុល្លារ​ក្នុង​មួយខែ​ ប៉ុន្ដែ​អ្នកស្រី​ត្រូវ​ធ្វើ​ការ​បន្ថែម​ម៉ោង​ជា​រៀង​រាល់​ថ្ងៃ​ទើប​អាច​ទទួល​បា្រក់ខែ​នេះ។​ អ្នកស្រី​ សាន សុភក្រ្ដ័​ មាន​ប្រសាសន៍​ដោយ​ត្អូញត្អែរ​ថា ​ប្រាក់​ទាំងនោះ​មិន​អនុញ្ញាត្ត​ឲ្យ​អ្នកស្រី​ធ្វើ​ការ​សន្សំ​ទុក​បាន​ទេ​ ដោយសារ​តែ​ទំនិញ​និង ​ចំណី​អាហារ​ឡើង​ថ្លៃ ​ព្រម​ទាំង​តម្លៃ​ផ្ទះ​ឈ្នួល​ក៏​ត្រូវ​ឡើង​ថ្លៃ​ផងដែរ។

កម្មករ​ក្នុង​វិស័យ​កាត់ដេរ​សម្លៀកបំពាក់​នៅ​កម្ពុជា​ ទទួល​ប្រាក់ខែ​ទាប​បំផុត​ជា​ផ្លូវការ​ត្រឹម​ ៤៥​ ដុល្លារ​ ក្នុង​មួយខែ​សម្រាប់​កម្មករ​សាក​ល្បង​រយៈពេល​បីខែ​ដំបូង​ និង​កម្មករ​ពេញ​សិទ្ធិ​ទទួល​បាន​ប្រាក់ខែ​ អប្បបរមា​ ឬ​ប្រាក់ខែ​តិច​បំផុត​ជា​ផ្លូវការ​ ចំនួន​៥០​ ដុល្លារ។​ កាលពី​ឆ្នាំ​ ២០០៧ ​ក្រុម​ថៅកែ​រោងចក្រ​ បាន​បដិសេធ​ដំឡើង​ប្រាក់ខែ​ជា​ផ្លូវការ​ដល់​កម្មករ​ ប៉ុន្ដែ​បាន​យល់ព្រម​ផ្ដល់​លុយ​ទ្រទ្រង់​ជីវភាព​ចំនួន​ ៦ដុល្លារ​ក្នុង​មួយខែ​ បន្ថែម​ពីលើ​ប្រាក់ខែ​របស់​ពួក​គេ​ ក្នុង​ពេល​ដែល​វិបត្តិ​សេដ្ឋកិច្ច​ទើប​នឹង​លេច​ចេញ​ ជា​រូប​រាង។

កាលពី​ថ្ងៃ​ព្រហស្បតិ៍​សប្ដាហ៍​មុន​ គណកម្មការ​ប្រឹក្សា​ការងារ ​ដែល​មាន​តំណាង​មក​ពីខាង​រដ្ឋាភិបាល​ ពី​ខាង​ថៅកែ​រោងចក្រ​កាត់ដេរ ​និង​តំណាង​មកពី​សហជីព​កម្មករ ​សរុប​មាន​សមាជិក​ ចំនួន​ ២៦​នាក់​ បាន​សម្រេច​ដំឡើង​ប្រាក់ខែ​ទាប​បំផុត​ដល់​កម្មករ​រោងចក្រ​កាត់ដេរ ​ចំនួន​ប្រាំ​ដុល្លារ​ជាបន្ថែម​ទៀត​ ហើយ​ប្រាក់​ឧបត្ថម្ភ​សម្រាប់​ទ្រទ្រង់​ជីវភាព​ចំនួន​ ៦ដុល្លារ​ក្នុង​មួយខែ​ ត្រូវ​កាត់​បញ្ចូល​ជា​ផ្លូវការ​ឲ្យ​ទៅ​ជា​ប្រាក់ខែ​វិញ។​ ដូច្នេះ​កម្មករ​ដែល​ស្ថិត​ក្នុង​ដំណាក់​កាល​សាកល្បង​នឹង​ទទួល​បាន​ប្រាក់​ខែ​អប្បបរមា​ចំនួន​ ៥៦​ ដុល្លារ ​និង​កម្មករ​ដែល​ពេញ​សិទ្ធិ​ នឹង​ទទួល​បាន​ប្រាក់ខែ​អប្បបរា​ចំនួន​ ៦១ ដុល្លារ​ក្នុង​មួយខែ។

គណកម្មការ​ប្រឹក្សា​ការងារ ​បាន​ចែង​ថា​ ការ​ដំឡើង​ប្រាក់ខែ​អប្បបរិមា​ដល់​កម្មករ​រោងចក្រ​កាត់ដេរ​នេះ​ នឹង​ត្រូវ​អនុវត្ត​ជា​ផ្លូវការ​ចាប់ពី​ខែ​តុលា​ឆ្នាំ២០១០ ​នេះ​តទៅ​ ដោយ​អនុញ្ញាត​ឲ្យ​មាន​ការ​ធ្វើការ​តវ៉ា​ ទាមទារ​ការ​ដំឡើង​ប្រាក់ខែ​ឡើងវិញ​នៅ​ឆ្នាំ​ ២០១៤។

កញ្ញា​ កែ សុធារិទ្ធ​ កម្មការីនី​រោងចក្រ​ម្នាក់​ទៀត​ និយាយ​ថា ​នាង​នៅ​តែ​ចង់​ឲ្យ​មាន​ការ​ដំឡើង​ប្រាក់ខែ​នេះ​បន្ថែម​ទៀត​ ដើម្បី​ឲ្យ​កម្មករ​រោងចក្រ​មាន​ជីវភាព​សមរម្យ។

“សម្រាប់​កម្មករ​ ប្រាំ​ដុល្លារ​ហ្នឹង​វា​មិន​ច្រើន​ទេ​ គ្រាន់​តែ​ថា​ ប្រាំ​ដុល្លារ​ហ្នឹង​វា​អាច​ច្រើន​ជាង​មុន​បន្ដិច ​មិន​ដឹង​ថា​ត្រូវ​ធ្វើ​ម៉េច​ឲ្យ​បាន​ប្រាក់ខែ​ច្រើន ​ចង់​ឲ្យ​ខាង​ក្រសួង​ស្នើ​ដល់​ថៅកែ​រោងចក្រ​សុំ​ឲ្យ​ដំឡើង​ប្រាក់ខែ​កម្មករ​ទាំងអស់"។

នៅ​តាម​ផ្ទះ​ជួល​កម្មករ​រោងចក្រ​កាត់ដេរ​សម្លៀកបំពាក់​ត្រូវ​រស់​នៅ​ដោយ​ប្រជ្រៀត​គ្នា​ក្នុង​ស្ថានភាព​ ពុំ​មាន​ផាសុខភាព​គ្រប់គ្រាន់​នោះ​ទេ។​ ពួក​គេ​ចែក​រំលែក​គ្នា​ក្នុង​បន្ទប់​តូចៗ​ដែល​មាន​គ្នា​ចាប់ពី​ពីរ​នាក់​ ឬ​រហូតដល់​បួន​នាក់។​ ការ​រស់នៅ​ជុំគ្នា ​គឺ​ដើម្បី​ជួយ​ពួកគេ​អាច​កាត់​បន្ថយ​ការ​ចំណាយ​ច្រើន​លើ ប្រាក់​ឈ្នួល​ផ្ទះ​ ដែល​មាន​តម្លៃ​ចាប់ពី​ ២០​ដុល្លារ​ក្នុង​មួយ​ខែ​ ឬ​ស្មើ​នឹង​មួយ​ភាគបី​នៃ​ប្រាក់ខែ​អប្បបរមា​របស់​ពួកគេ។

បន្ថែម​ពីនោះ​ក្រុម​កម្មករ​ត្រូវ​ធ្វើការ​ចាយវាយ​យ៉ាង​ត្បិតត្បៀត​បំផុត​ ដើម្បី​គេច​វេះ​ពី​វិបត្តិ​អស់​ប្រាក់ខែ​មុន​ដំណាច់​ខែថ្មី​មកដល់។

កញ្ញា​ កែ សុធារិទ្ធ ​រៀបរាប់​ថា​ កម្មករ​ឬ​កម្មការីនី​ម្នាក់​ជា​មធ្យម​ធ្វើ​ការ​ចាយវាយ​ត្រឹមតែ​ ២០០០​ រៀល​ ឬ​ស្មើនឹង​ប្រហាក់​ប្រហែល​ ៥០​សេន​អាមេរិក​ សម្រាប់​ការ​បរិភោគ​អាហារ​មួយ​ពេល​ ដែល​កម្មករ​មួយ​ចំនួន​ប្រឈម​នឹង​ បញ្ហា​សុខភាព​នៅ​ពេល​ពួកគេ​ធ្វើការ​ច្រើន​ម៉ោង។

លោក​ អ៊ុំ មាន​ អនុ​រដ្ឋលេខាធិការ​ក្រសួង​ការងារ​និង​បណ្ដុះបណ្ដាល​វិជ្ជាជីវៈ​ មាន​ប្រសាសន៍​ថា​ ការដំឡើង​ប្រាក់​ឈ្នួល​កម្មករ​ត្រឹម​ប្រាំ​ដុល្លារ​នេះ​ ដោយ​យោង​តាម​កម្រិត​សេដ្ឋកិច្ច​បច្ចុប្បន្ន​ ខណៈ​ដែល​រោងចក្រ​កាត់ដេរ​ទើប​នឹង​ងើបពីវិបត្តិ​សេដ្ឋកិច្ច​បាន​បន្ដិច។

“ដំឡើង​ប្រាក់​ឈ្នួល​អប្បបរមា​នេះ​ វា​ទៅ​តាម​ស្ថានភាព​សេដ្ឋកិច្ច​ដែល​ទើប​នឹង​ងើប​ឡើង​វិញ​ខ្លះៗ​ ដូច្នេះ​បើសិន​ជា​យើង​ធ្វើ​មិន​ស្រួល​ ការ​ប្រកួតប្រជែង​របស់​យើង​ជាមួយ​នឹង​អ្នក​ផលិត​ទំនិញ​នៃ​ប្រទេស​ផ្សេងៗ​ទៀត ​គឺ​យើង​ត្រូវ​បរាជ័យ។​ កាលណា​ទំនិញ​កម្ពុជា ​ត្រូវ​បរាជ័យ​ក្នុង​ការ​លក់​នៅ​ក្នុង​ទីផ្សារ​អន្តរជាតិ​ រោងចក្រ​ក៏​ដួល។​ កាលណា​រោងចក្រ​(ក៏)​បិទ​កម្មករ​ក៏​អត់​ការងារ​ធ្វើ"។

ដោយឡែក​ លោក​ ជាតិ ខេមរា​ មន្ដ្រី​ជាន់ខ្ពស់​នៃ​សមាគម​រោងចក្រ​កាត់ដេរ​កម្ពុជា​ ទទួល​បន្ទុក​ សម្របសម្រួល​និង​ដោះស្រាយ​វិវាទ​ការងារ ​អះអាង​ថា​ ភាគី​និយោជក​បាន​ពិនិត្យ​អស់​លទ្ធភាព​ សម្រាប់​ការ​ដំឡើង​ប្រាក់​ឈ្នួល​នេះ​ នៅ​ពេល​ដែល​ក្រុម​ថៅកែទាំងនេះមាន​លទ្ធភាព​តំឡើង​ប្រាក់ឈ្នួល​កម្មករ​បន្ថែម​ត្រឹមតែ​ ៤​ ដុល្លារ​តែ​ប៉ុណ្ណោះ។

ក៏ប៉ុន្ដែ​របាយការណ៍​និង​អ្នក​ជំនាញ​មួយ​ចំនួន​និយាយ​ថា​ ការ​ដំឡើង​ប្រាក់ខែ​ច្រើន​ជាង​នេះ ​ដើម្បី​ឲ្យកម្មករ​មាន​ជីវភាព​បាន​សមរម្យ ​នឹង​មិន​ធ្វើ​ឲ្យ​កម្ពុជា​ប៉ះពាល់​ដល់​ការ​ប្រកួត​ប្រជែង​របស់​រោងចក្រ​នៅកម្ពុជា​នោះ​ទេ។

ក្រុម​សហជីព​កម្មករ​នានា​បាន​ទាមទារ​ឲ្យ​មាន​ការ​ដំឡើង​ប្រាក់ខែ​គោល​ដល់​កម្មករ​ ចន្លោះពី​ជាង​ ៧០ ​ដុល្លារ​ដល់ជាង​ ៩០​ដុល្លារ​ក្នុង​មួយ​ខែ។​ រីឯ​វិទ្យាសា្ថន​កម្ពុជា​ដើម្បី​ការ​សិក្សា​អភិវឌ្ឍន៍​ ដែល​បានធ្វើ​ការសិក្សា​ដោយ​ឯករាជ្យ​មួយ​បាន​រកឃើញ​ថា​ កម្មករ​រោងចក្រ​កាត់ដេរ​នៅ​កម្ពុជា​ត្រូវការ​ប្រាក់​ឈ្នួល​យ៉ាង​ហោច​ណាស់​ពី​ ៩០​ ទៅ​ ១២០​ ដុល្លារ​ក្នុង​មួយ​ខែ ដើម្បី​ទ្រទ្រង់​ជីវភាពពួក​គេ​រស់នៅ​ឲ្យ​បាន​សមរម្យ។​ ហើយ​បើ​ធៀប​នឹង​ប្រាក់​ចំណេញ​នៃ​រោងចក្រ​កាត់ដេរ​ទទួល​បាន​នៅ​ប្រទេស​កម្ពុជា​ ក្រុម​ថៅកែ​រោងចក្រ​ មាន​លទ្ធភាព​ដំឡើង​ប្រាក់ខែ​ទាប​បំផុត​ដល់​កម្មករ​រហូត​ដល់​ជាង​ ៧០ ដុល្លារ​ក្នុង​មួយ​ខែ។

លោក​ អាត់ ធន់​ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា​ ហៅកាត់​ថា​ CCAWDU ​លើក​ឡើង​ថា​ ការ​សម្រេចតំឡើង​ប្រាក់​ឈ្នួល​កម្មករ​ត្រឹមតែ​មួយខែ​ ៥ ដុល្លារ​ជា​បន្ថែម​ទៀត​នេះ​ មិនបាន​ឆ្លងកាត់​ការ​ពិភាក្សា​គ្នា​ឲ្យ​គ្រប់​ភាគី​ដោយ​ល្អិតល្អន់​នោះ​ទេ។​ ហើយ​លោក​នៅតែ​មិន​ពេញចិត្ដ​នៅឡើយ។

“យើង​មិន​ពេញចិត្ត​នៅ​ក្នុង​ការ​ដំឡើង​នេះ​ទេ។​ ដោយសារ​តែ​ទីមួយ​វា​ជា​ចំនួន​តិច​ដែល​មិន​អាច​ធានា​ ទៅ​ដល់​ការ​រស់នៅ​បាន​ អញ្ចឹង​យើង​នឹង​បន្ដ​ធ្វើការ​ជជែក​ជាមួយ​នឹង​កម្មករ​ទៀតថា ​តើ​ភាគី​ច្រើន​យល់ព្រម ​ឬ​ភាគ​ច្រើន​មិន​យល់ព្រម។​ បើ​មិន​យល់ព្រម​ទេ ​យើង​នឹង​ធ្វើការ​តវ៉ា​ដូចជា​ការ​ធ្វើ​កូដកម្ម​បាតុកម្ម​ ដើម្បី​ទាមទារ​ចរចា​បន្ថែម​ទៀត​ទៅ​លើ​ប្រាក់​ដែល​បាន​តិច​នេះ"។

លោក​ ជា មុន្នី​ ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​ យល់​ស្រប​ដូចគ្នា​នេះ​ដែរ។​ លោក​ ជា មុន្នី ​គ្រោង​នឹង​ស្វែងរក​ការ​ចរចា​ជាមួយ​ក្រុម​ថៅកែ​រោងចក្រ​ដើម្បី​ស្វែងរក​ផល​ប្រយោជន៍បន្ថែម​ទៀត។

បច្ចុប្បន្ននេះ​ វិស័យ​កាត់ដេរ​របស់​ប្រទេស​កម្ពុជា​ដែល​ប្រមូល​ផ្តុំ​ដោយ​រោងចក្រ​តូច​ធំ​ ប្រហែល​៣០០​ បាន​ផ្តល់​ការងារ​ឲ្យ​ប្រជាជន​ជាង​ ៣០ ​ម៉ឺន​នាក់។​ គឺ​ជា​វិស័យ​ដែល​តំណាង​ឲ្យ​ការ​នាំចេញ​យ៉ាង​ធំ​បំផុត​របស់​ប្រទេស​កម្ពុជា៕

XS
SM
MD
LG