ភ្ជាប់​ទៅ​គេហទំព័រ​ទាក់ទង

នៅ​ថ្ងៃនេះ​ ​មេធាវី​របស់​ឌុច​​ប្ដឹង​ឧទ្ធរណ៍​​ទាម​ទារ​ឲ្យ​ដោះ​លែង​ឌុច


ភ្នំពេញ៖ នៅ​ថ្ងៃនេះ​ ​សហ​មេធាវី​របស់​ឌុច​បាន​ប្ដឹង​ឧទ្ធរណ៍​ប្រឆាំង​ទៅ​នឹង​ការ​ផ្តន្ទា​ទោស​កូន​ក្ដី​របស់​ខ្លួន​ដោយ​អង្គ​ជំនុំ​ជម្រះ​សាលា​ដំបូង​របស់​សាលាក្ដី​ខ្មែរ​ក្រហម​ ​ដោយ​សំអាង​ថា​ ​ការ​ផ្ដន្ទា​ទោស​នោះ​ធ្វើ​ឡើង​ដោយ​មាន​ការ​ភាន់​ច្រឡំ​មួយ​ចំនួន។

សហ​មេធាវី​ការពារ​ក្ដី​ឲ្យ​ ឌុច ​បាន​សម្រេច​ប្ដឹង​ឧទ្ធរណ៍​នៅ​ថ្ងៃពុធនេះ​ ​ទៅ​កាន់​អង្គ​ជំនុំ​ជម្រះ​តុលាការ​កំពូល​របស់​សាលាក្ដី​ខ្មែរ​ក្រហម ​ដើម្បី​ទាម​ទារ​ឲ្យ​អង្គ​ជំនុំ​ជម្រះ​ចុង​ក្រោយនេះ​ ​សម្រេច​ដោះ​លែង​ ឌុច​ ​ឲ្យ​មាន​សេរីភាព​ឡើង​វិញ។

បណ្ដឹង​សារទុក​នេះ​ធ្វើ​ឡើង​ស្របពេល ​ដែល​មេធាវី​តំណាង​ឲ្យ​ដើម​បណ្ដឹង​រដ្ឋប្បវេណី​ក្នុង​ក្រុម​ពីរ​ បាន​ជូន​ដំណឹង​ពី​ការ​ប្ដឹង​ឧទ្ធរណ៍​របស់​ខ្លួន​ ដើម្បី​ស្នើ​ឲ្យ​មាន​ការ​ទទួល​យក​កូន​ក្ដី​របស់​ពួកខ្លួន​ចំនួន​ប្រាំនាក់​ជាដើម​បណ្ដឹង​រដ្ឋប្បវេណី​ក្នុង​សំណុំ​រឿង​០០១​ ​ករណី​ឌុច​ ​ឡើង​វិញ។

កាល​ពី​ថ្ងៃទី​២៦​ខែ​កក្កដា​ ​អង្គ​ជំនុំ​ជម្រះ​សាលា​ដំបូង​របស់​សាលាក្ដី​ខ្មែរ​ក្រហម​ ​បាន​ដាក់​ទោស​អតីតប្រធាន​មន្ទី​រ​ស២១ ឬ​គុក​ទួលស្លែង​រូបនេះ​ ​ឲ្យ​ជាប់​ពន្ធនាគារ​ចំនួន​៣៥​ឆ្នាំ​ ​ក៏ប៉ុន្ដែ​ទោស​នេះ​ត្រូវ​កាត់​កង​អស់​នៅសល់​ត្រឹម​តែ​១៩ឆ្នាំ​ប៉ុណ្ណោះ។

នៅ​ក្នុង​សេចក្ដី​ជូន​ដំណឹង​ស្ដីពី​ការ​ប្ដឹង​ឧទ្ធរណ៍​របស់​ខ្លួន​ ​លោក​មេធាវី​ការ សាវុធ​ ​និង​លោក​មេធាវីកង ឫទ្ធារី​ ​បាន​ស្នើ​ឲ្យ​អង្គ​ជំនុំជម្រះ​តុលាការ​កំពូល​បដិសេធ​សាលក្រម​របស់​អង្គ​ជំនុំជម្រះ​សាលា​ដំបូង​ទាំង​ស្រុង​ ​ហើយ​បាន​ស្នើ​ឲ្យ​ចាត់​ទុក​ថា​ ឌុច​គ្រាន់តែ​ជា​សាក្សី​ម្នាក់​ ​ហើយ​ចាត់​ទុក​ថា​ ​រយៈ​ពេល​ឃុំ​ខ្លួន​របស់​ឌុច​ ​ដោយ​រាប់ចាប់​តាំង​ពី​ថ្ងៃ​ចាប់​ខ្លួន​រហូត​ដល់​ថ្ងៃ​សម្រេច​សេចក្ដីជា​ចុងក្រោយ​នោះ​ថា​ ​គឺជា​រយៈ​ពេល​នៃ​ការ​ថែ​រក្សា​សាក្សី។

លោក​ការ សាវុធ​ និង​លោក​កង ឫទ្ធារី ​បាន​លើក​ឡើង​ថា​ ​ការ​ផ្ដន្ទា​ទោស​កូន​ក្ដី​របស់​ខ្លួន​ ​ធ្វើ​ឡើង​ដោយ​មាន​ការ​ភាន់ច្រឡំ​អំពី​យុត្តាធិការ​របស់​អង្គ​ជំនុំជម្រះ​សាលា​ដំបូង​ ​និង​ដោយ​មាន​ការ​ភាន់​ច្រឡំ​ក្នុង​ការ​ដាក់​ទោស​សរុប​រហូត​ទៅ​ដល់​៣៥​ឆ្នាំ​ ​លើ​កូន​ក្ដី​របស់​ពួក​ខ្លួន។

កាំង ​ហ្គេកអ៊ាវ ​ហៅ ​ឌុច​ ​អាយុ​៦៧​ឆ្នាំ​ ​ជាប់ចោទ​ពី​បទ​ឧក្រិដ្ឋ​កម្ម​សង្រ្គាម​ ​ ​ឧក្រិដ្ឋ​កម្ម​ប្រឆាំង​មនុស្សជាតិ​ ​ឧក្រិដ្ឋ​កម្ម​ស្ដីពី​ការ​ធ្វើ​ទារុណ​កម្ម ​និង​មនុស្ស​ឃាត​ ​ដែល​បាន​បណ្ដាល​ឲ្យ​អ្នក​ទោស​គុកទួល ​ស្លែង​ ​យ៉ាង​តិច​ចំនួន១២៣៨០​នាក់ស្លាប់​បាត់​បង់​ជីវិត។

លោក​ឡាស​ អលសិន​ ​មន្ដ្រី​ទំនាក់​ទំនង​កិច្ចការ​ច្បាប់​របស់​សាលាក្ដី​ខ្មែរ​ក្រហម​ ​មាន​ប្រសាសន៍​ថា​ ​តុលាការ​កំពូល​ទំនង​ជា​ត្រូវ​ការ​ពេល​រហូត​ដល់​ខែវិច្ឆិកា​ ឆ្នាំ​២០១០​នេះ​ ​ដើម្បី​អាច​បើក​សវនាការ​ស្ដីពី​បណ្ដឹង​ឧទ្ធរណ៍​របស់​ក្រុម​មេធាវី​ការពារ​ ឌុច។

«យើង​រំពឹងថា​ ​រយៈពេលឆាប់​បំផុត​ ​ដែល​អាច​ចាប់ផ្ដើម​បើក​សវនាការ​ស្ដីពី​បណ្ដឹង​ឧទ្ធរណ៍​គឺនៅ​ក្នុង​អំឡុង​ចុង​ខែវិច្ឆិកា ​ក្នុង​ឆ្នាំ​នេះ»។

កាល​ពី​ថ្ងៃច័ន្ទ​សប្ដាហ៍​មុន​ ​សហ​ព្រះរាជ​អាជ្ញាបាន​សម្រេច​ប្ដឹង​ឧទ្ធរណ៍​ប្រឆាំង​ទៅ​នឹង​ការ​ផ្ដន្ទា​ទោស​ ឌុច​ ​ដែល​ខ្លួន​ចាត់​ទុក​ថា​ ​នៅ​មាន​កម្រិត​ស្រាល​នៅ​ឡើយ។​ សហ​ព្រះ​រាជ​អាជ្ញា​ធ្លាប់​បាន​ស្នើ​សុំ​ឲ្យ​អង្គជំនុំ​ជម្រះ​សាលា​ដំបូង​ផ្ដន្ទា​ទោស​ឌុច​ ​ឲ្យ​ជាប់​គុក​យ៉ាងតិច​ចំនួន​៤០ឆ្នាំ។

ជាមួយ​គ្នានេះ​ដែរ​ ​មេធាវី​តំណាង​ឲ្យ​ដើម​បណ្ដឹង​រដ្ឋ​ប្បវេណី​ក្រុម​ពីរ​បាន​ជូនដំណឹង​កាលពី​ថ្ងៃអង្គារ​ម្សិល​មិញ​ថា​ ខ្លួន​នឹង​ប្ដឹង​ឧទ្ធរណ៍​ទៅ​កាន់​អង្គ​ជំនុំ​ជម្រះ​តុលាការ​កំពូល​ ​ដើម្បី​ទាមទារ​ឲ្យ​មាន​ការ​ទទួល​ស្គាល់​សិទ្ធិ​ជា​ដើម​បណ្ដឹង​រដ្ឋ​ប្បវេណីរបស់​កូនក្ដី​ផង​ខ្លួន​ចំនួន​ប្រាំនាក់​វិញ។

អង្គ​ជំនុំ​ជម្រះ​សាលាដំបូង​របស់​សាលាក្ដី​ខ្មែរ​ក្រហមបាន​សម្រេច​ក្នុង​សាលក្រម​ស្ដីពី​ការ​កាត់ទោស​ ឌុច ​កាល​ពី​ខែ​មុន​ ​ដោយ​ទាត់ចោល​ជន​រងគ្រោះ​ដែល​ជាដើម​បណ្ដឹង​រដ្ឋ​ប្បវេណី​សរុប​ចំនួន​២៤​នាក់​ ក្នុង​ចំណោម​ដើម​បណ្ដឹង​សក្ដានុពល​សរុប​ចំនួន​៩០​នាក់​ ​ក្នុង​សំណុំរឿង​ឌុច៕

XS
SM
MD
LG