ភ្ជាប់​ទៅ​គេហទំព័រ​ទាក់ទង

ម្ចាស់​ជំនួយ​ស្វាគមន៍​​ការ​បញ្ចប់​ការ​កាត់​ក្តីមេ​គុក​ទួលស្លែង


សាលាក្តី​កាត់ទោស​មេដឹកនាំ​ខ្មែរក្រហម​។​

វ៉ាស៊ីនតោន៖ ការ​កាត់​ក្តី​មួយ​វគ្គ​ ក្នុងសំណុំ​រឿងមេ​ដឹក​នាំខ្មែរក្រហម​ ​បាន​ទាក់​ទាញឱ្យ​មាន​ការ​គាំទ្រ​បន្ថែមទៀត​ពី​ក្រុម​ប្រទេស​ម្ចាស់​ជំនួយ​ទៅ​លើ​សាលា​ក្តី​ខ្មែរ​ក្រហម។

សាល​ក្រម​ដំបូង​ក្នុង​រឿងក្តី​លេខ​០០១​លើ​សំណុំ​រឿង​មេគុក​ទួល​ស្លែង​កាំង ហ្កេក​អ៊ាវ ហៅ​ឌុច​ ​បាន​ទាក់​ទាញ​ឱ្យ​មាន​ការ​គាំទ្រ​ពី​ក្រុម​ប្រទេស​អ្នក​ផ្តល់​ជំនួយ​ដល់​សាលាក្តី​ខ្មែរ​ក្រហម​ ​ដោយ​ចាត់​ទុក​ថា​ ​វាអាច​នឹង​ជួយ​បាន​ថែម​ទៀត​ដល់​ដំណើរ​ការ​ស្វែង​រក​យុត្តិ​ធម៌​សម្រាប់​ជន​រង​គ្រោះនិង​ជាគំរូ​មួយដល់ប្រព័ន្ធ​យុត្តិ​ធម៌ខ្មែរ។

ភ្លាមៗ​ក្រោយ​ពី​សាល​ក្រមឌុច​ត្រូវ​បាន​តុលាការ​កាត់​ទោស​ពួកខ្មែរ​ក្រហម​បាន​ចេញ​កាលពី​ថ្ងៃ​ទី​២៦ ខែ​កក្កដា​ ​ដោយ​ដាក់​ទោស​ឌុច​ឱ្យ​ជាប់​ពន្ធនាគារ​រយៈ​ពេល​៣៥ឆ្នាំ​ ​សហ​ភាពអឺរ៉ុបបានប្រកាសផ្តល់​ជំនួយចំនួន​ពីរ​លាន​អឺរ៉ូ​ដែល​ប្រហាក់​ប្រហែល​នឹង​២,៦​លានដុល្លា​រសហរដ្ឋ​អា​មេ​រិក​សម្រាប់បើកប្រាក់បៀ​វត្សរ៍ដល់​ចៅក្រម ព្រះរាជអាជ្ញានិងបុគ្គលិក​ជំនួយ​ការផ្នែកច្បាប់ខាងភាគី​កម្ពុជា​ដែល​កំពុង​តែ​ជួប​ប្រទះ​កង្វះ​ខាត​ថវិកា។

នៅ​ក្នុង​សេចក្តីប្រកាស​ព័ត៌មាន​ ​ ​លោក​ David Lipman​ ប្រធាន​គណៈ​ប្រតិភូ​សហភាព​អឺរ៉ុប​ប្រចាំ​ព្រះ​រាជា​ណា​ចក្រ​កម្ពុជា​បាន​ចាត់​ទុក​ថា​ “ការកាត់​សេចក្តី​លើក​ទីមួយ​របស់​តុលាការ​នេះ​ គឺ​ជា​ព្រឹត្តិ​ការណ៍​ជា​ប្រវត្តិ​សាស្រ្ត​និង​ជា​ឱកាស​តែ​មួយ​គត់​សម្រាប់​បិទ​ទំព័រ​ខ្មៅងងឹត​មួយ​នៃ​ប្រវត្តិសាស្រ្ត​សម័យ​ទំនើប​របស់​ប្រទេស​កម្ពុជា”។

លោក Lipman បាន​ដាក់​ក្តី​សង្ឃឹមថា​ ​“ការ​កាត់​សេចក្តី​នេះ​ក៏ជា​ការ​ចាប់​ផ្តើម​អនុវត្ត​ច្បាប់​អន្តរ​ជាតិនៅ​ក្នុងព្រះ​រាជា​ណា​ចក្រកម្ពុជាផង​ដែរ”។

រីឯ​ប្រទេស​បារាំង​និង​ប្រទេស​ជប៉ុនវិញ​បាន​ចេញ​សេចក្តី​ថ្លែងការណ៍រួមគ្នា​ខ្លី​មួយតំណាង​ឱ្យ​ម្ចាស់​ជំនួយ​ដទៃទៀត​ដល់​តុលាការ​ខ្មែរ​ក្រហម​ដោយ​ស្វាគមន៍និង​លើក​សរសើរ​ដល់​ដំណើរ​ការ​នៃ​ការ​កាត់​ក្តី​កន្លង​មក​នេះ។

តុលាការ​ខ្មែរ​ក្រហម​បាន​ចាប់​ផ្តើម​ដំណើរ​ការ​កាត់​ក្តី​លើ​សំណុំ​រឿង​របស់​ឌុច ពី​ថ្ងៃ​ទី៣០ ​ខែ​មិនាដល់​ថ្ងៃទី២៧ ​ខែ​វិច្ឆិកា​ ឆ្នាំ​២០០៩​ដោយ​ដំណើរ​ការ​អស់រយៈ​ពេល​៧៧​ថ្ងៃ​មុន​នឹង​ចេញ​សាល​ក្រម​នៅ​ថ្ងៃ​ទី​២៦ ខែ​កក្កដា​កន្លងមក​នេះ។

លោក ​Philip J. Crowley ​ឧបការីរដ្ឋមន្រ្តី​ការ​បរទេស​សហ​រដ្ឋ​អាមេរិក​ក៏​បាន​ស្វាគមន៍ដល់​ការ​បញ្ចប់​ការ​កាត់​ទោស​ឌុច​នេះ​ផង​ដែរ។

“យើង​សូម​ស្វាគមន៍ចំពោះ​សេចក្តី​សម្រេច​ជា​ប្រវត្តិ​សាស្រ្ត​នៃ​សា​លា​ក្តី​ខ្មែរ​ក្រហម​និង​ការ​បញ្ចប់​ការ​កាត់​ទោស​កាំង​ ហ្កេកអ៊ាវ ហៅ​ឌុច​ ​អតីត​មេ​គុក​ស២១។​ យើង​សាទរ​ចំពោះ​ការ​តាំង​ចិត្ត​របស់ចៅក្រម​ជាតិ​ ​និង​អន្តរជាតិ​ចំពោះ​កិច្ចការ​ដ៏​ល្អិត​ល្អន់​ ​និង​ឯករាជ្យ​របស់​ពួក​អស់​លោក​ដើម្បីលើក​តម្កើង​ស្តង់ដារយុត្តិ​ធម៌​អន្តរ​ជាតិ​និង​ការ​អនុវត្ត​តាម​គោល​ការណ៍​ច្បាប់”។

នៅ​ពេល​ដែល​វីអូអេ​សំឡេង​សហ​រដ្ឋ​អាមេរិក​សាក​សួរ​ពី​សាល​ក្រម​របស់​ឌុច​ដែល​ចេញ​ដោយសាលាក្តីខ្មែរក្រ​ហម​ ​លោក ​Mike Quigley​ សមាជិកសភានៃគណ​បក្ស​ប្រជាធិប​តេយ្យប្រចាំរដ្ឋ​ Illinois​ បានបញ្ជាក់​ថា​ ​លោក​នឹង​ខិតខំ​ធ្វើការងារ​តាម​លោក​អាច​ធ្វើ​បាន​ដើម្បី​ធានា​ថា សហ​រដ្ឋ​អាមេរិក​នឹង​បន្ត​ជួយ​ដល់​ដំណើរ​ការ​ស្វែង​រក​យុត្តិ​ធម៌​នៅ​ប្រទេស​កម្ពុជា។

“​ការ​ស្វែង​រក​យុត្តិធម៌​ត្រូវ​បាន​អូសបន្លាយ​អស់​រយៈពេល​យូរ​រ​ពេកហើយ​ ​ហើយ​ខ្ញុំគិត​ថា​ ​វាជា​ការ​សំខាន់​សម្រាប់សហ​រដ្ឋអាមេរិក​ត្រូវ​ទទួល​ស្គាល់​ពី​បញ្ហា​នេះ​ ​ហើយ​ធ្វើ​កិច្ចការ​បន្ថែម​ទៀត​ដើម្បី​ធ្វើ​ឱ្យ​ប្រាកដ​ថា​ ​ក្រៅ​ពី​ទប់​ស្កាត់​អំពើ​របៀប​នេះ​មិន​ឱ្យ​កើត​មាន​ឡើង​ជា​ថ្មី​ទៀ​ត​គឺ​ត្រូវ​ធានា​ថា​ ​ត្រូវ​ស្វែង​រកយុត្តិ​ធម៌​ឱ្យ​បាន​ ​ទោះ​ជាយូរ​ប៉ុណ្ណា​ ឬ​ក្នុងតម្លៃ​ប៉ុណ្ណា​ក៏​ដោយ"។

រហូត​មក​ដល់​ពេល​នេះ​ ​កាំង​ ហ្កេក​អ៊ាវ​បាន​ក្លាយ​ជា​បុគ្គល​ទី​មួយ​ក្នុង​ចំណោម​មេដឹកនាំ​ក្រុម​ខ្មែរ​ក្រហម​ដែល​ត្រូវ​បាន​យក​មក​ជំនុំ​ជម្រះ​នៅ​មុខ​តុលាការ​កាត់​ក្តី​ពួក​ខ្មែរ​ក្រហម។

លោក​រាជ សម្បត្តិ​ អ្នក​នាំពាក្យតុលាការ​ខ្មែរ​ក្រហម​ ​ បានបញ្ជាក់​ថា​ ​ប្រតិកម្ម​ល្អ​ពី​ប្រទេស​ម្ចាស់​ជំនួយ​នេះ​ជា​ការ​លើក​ទឹក​ចិត្ត​មួយដែលអាចជួយ​ឱ្យ​មាន​ដំណើរ​ការ​សម្រាប់​ករណី​ទីពីរ​ទៀត​ដែល​នឹងដំណើរការនៅ​ចុង​ឆ្នាំ​២០១០ ឬ​ដើម​ឆ្នាំ​ ២០១១ ​ដោយ​ផ្តោតលើមេ​ដឹក​នាំជាន់ខ្ពស់នៃរបប​ខ្មែរ​ក្រហម។

“យើង​សូមថ្លែងអំណរ​គុណ​ដ៏​ជ្រាល​ជ្រៅ​ដល់​ប្រទេស​ទាំងអស់​នោះ​ដែល​ជាមិត្ត​របស់​សាលា​ក្តី​ ​ដូចជា​ជប៉ុន​និង​បារាំង​ ​ហើយ​ពួក​គាត់​គាំទ្រ​ ជា​ការ​លើក​ទឹក​ចិត្ត​ធំ​ណាស់​ដែល​ជំរុញ​ឱ្យ​មន្រ្តី​ច្បាប់និងមន្ត្រី​ផ្នែក​រដ្ឋ​បាល​នៅ​ក្នុង​តុលាការ​ធ្វើការ​ឱ្យ​រឹតតែ​មាន​ប្រសិទ្ធិ​ភាព​ជាងមុន​ទៅ​ទៀត​ ជា​ពិសេស​គឺ​ឈាន​ទៅ​ដល់​សំណុំ​រឿង​០០២​ ក្នុង​ការ​ជំនុំ​ជម្រះក្តី​មេដឹក​នាំ​ខ្មែរក្រហមជាន់​ខ្ពស់​បួនរូបទៀត ​ដែលនៅ​សល់​ រួម​មាន​លោក​នួន ជា​ ​លោក​អៀង សារី​ ​លោក​ស្រី អៀង​ ធីរិទ្ធ​ និង​លោក​ខៀវ សំផន”។

ឌុច​ត្រូវបាន​ផ្តន្ទា​ទោស​ពី​បទ​ឧក្រិដ្ឋ​កម្ម​ប្រឆាំង​មនុស្ស​ជាតិ​និង​ការ​បំពារ​បំពាន​យ៉ាង​ធ្ងន់​ធ្ងរ​លើ​អនុសញ្ញាទីក្រុង​ហ្សឺណែវ​ ឆ្នាំ​១៩៤៩ ​ ​ចំពោះ​តួនាទី​ជា​មេគុក​ទួល​ស្លែង​ដែល​បាន​បង្ក​ឱ្យ​មាន​ការស្លាប់បាត់បង់ជីវិត​អ្នក​ទោស​យ៉ាង​ហោច​ណាស់​ជាង​១២.០០០​នាក់៕

XS
SM
MD
LG