ភ្នំពេញ៖ សហមេធាវីរបស់ អៀង សារី បានស្នើឲ្យសាលាក្ដីខ្មែរក្រហមធ្វើការកាត់ទោសត្រឹមតែពាក់កណ្តាលថ្ងៃរាល់ការបើកសវនាការម្ដងៗ។ មូលហេតុដោយសារតែលោក អៀង សារី មានបញ្ហាសុខភាព។
ការស្នើនេះធ្វើឡើងកាលពីថ្ងៃពុធដល់អង្គជំនុំជម្រះសាលាដំបូងរបស់សាលាក្តីខ្មែរក្រហមដោយក្រុមមេធាវីសម្អាងទៅលើមូលហេតុសុខភាពរបស់កូនក្តីរបស់ពួកគេ។
សំណើនេះធ្វើឡើងខណៈពេលដែលអង្គជំនុំជម្រះសាលាដំបូងគ្រោងនឹងធ្វើការកាត់ទោសអតីតមេដឹកនាំកំពូលនៃរបបកម្ពុជាប្រជាធិបតេយ្យរបស់ពួកខ្មែរក្រហមចំនួនបួននាក់នៅក្នុងសំណុំរឿង០០២នៅក្នុងអំឡុងខែមិថុនាឆ្នាំនេះ។
សហមេធាវីកម្ពុជាលោក អាង ឧត្តម និងសហមេធាវីអន្តរជាតិលោក ម៉ាយឃើល កាណាវ៉ាស(Michael Karnavas) បានលើកឡើងនៅក្នុងសំណើរបស់ខ្លួនថា លោក អៀង សារីឈឺខ្នងហើយបណ្តាលឲ្យមានការឈឺចាប់នៅពេលដែលអង្គុយយូរ។
កូនក្តីរបស់ខ្លួនមានបញ្ហាតម្រងនោម ហើយគាត់ពិបាកនឹងប្រមូលអារម្មណ៍និងថាមពលសម្រាប់អង្គុយនៅក្នុងសវនាការរយៈពេលយូរ។
សហមេធាវីទាំងពីររូបក៏បានស្នើផងដែរសុំឲ្យមានការសម្រាករយៈពេល១៥នាទី រាល់ការបើកសវនាការម្តងៗ។
លោកអាង ឧត្តម សហមេធាវីកម្ពុជាមានប្រសាសន៍ថា ការបើកសវនាការរយៈពេលពេញមួយថ្ងៃនិងធ្វើឲ្យកូនក្តីរបស់លោកកាន់តែមានសភាពជំងឺធ្ងន់ធ្ងរ។
«ខ្ញុំកត់សម្គាល់ថា គាត់មិនអាចអង្គុយបានទេពេញម៉ោងពេញថ្ងៃនេះ គឺដូចឲ្យគាត់កាន់តែឈឺធ្ងន់ទៅ ហើយរឹតតែបង្អាក់ពេលវេលារបស់តុលាការទៅវិញទេ។ យើងមើលឃើញថា ការជំនុំជម្រះក្តីតែមួយពេល សម្រាប់មួយថ្ងៃជាការសមរម្យ»។
លោកឡាស អលសិន មន្រ្តីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហមមានប្រសាសន៍ថា សាលាដំបូង នឹងពិចារណាទៅលើសំណើរបស់ក្រុមមេធាវីការពារក្តី។
«តុលាការបានទទួលសំណើពីលោកអៀង សារី ហើយ។ តុលាការនឹងពិចារណាលើសំណើនេះ ខណៈ ដែលពេលនេះ តុលាការកំពុងរៀបចំផែនការសម្រាប់ការកាត់ទោស។ ប៉ុន្តែយើងមិនទាន់ដឹងថា តើតុលា ការនិងធ្វើការសម្រេចលើសំណើនេះនៅពេលណានោះទេ»។
អតីតឧបនាយករដ្ឋមន្រ្តីនិងជារដ្ឋមន្រ្តីការបរទេសខ្មែរក្រហមអៀង សារី អាយុ៨៥ឆ្នាំនៅឆ្នាំនេះ លោកត្រូវចោទប្រកាន់ពីបទឧក្រិដ្ឋកម្មសង្គ្រាម ឧក្រិដ្ឋកម្មប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។
របបកម្ពុជាប្រជាធិបតេយ្យរបស់ពួកខ្មែរក្រហមត្រូវបានស្តីបន្ទោសចំពោះការបណ្តាលឲ្យប្រជាជនកម្ពុជាស្លាប់ពី១,៧ លាននាក់ ទៅ ២,២ នាក់ ចន្លោះពីឆ្នាំ១៩៧៥ ដល់ឆ្នាំ១៩៧៩៕