ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​កម្ពុជា​ ​បរាជ័យ​ ក្នុង​ការ​ធ្វើ​បដិដុល្លារូបនីយកម្ម​


ប្រទេសកម្ពុជា​ ជា​ប្រទេស​មួយ​ក្នុង​ចំណោម​បណ្ដា​ប្រទេសផ្សេង​ទៀត​ក្នុង​ពិភពលោក ​ដែល​កំពុង​ប្រើប្រាស់​ប្រាក់​ដុល្លារ​យ៉ាង​ច្រើនលើសលប់​នៅលើ​ទីផ្សារ​របស់ខ្លួន។​ ការ​ប្រើប្រាស់​ប្រាក់​ដុល្លារ​យ៉ាង​ទូលំទូលាយ​នេះ​ នឹង​ធ្វើ​ឲ្យ​គោលនយោបាយ​រូបិយវត្ថុ​ជាតិ​ងាយ​នឹង​រង​គ្រោះថ្នាក់។​ ជាច្រើនឆ្នាំ​មក​ហើយ​ រដ្ឋាភិបាល​កម្ពុជា​មាន​បរាជ័យ​ក្នុង​ការ​លុបបំបាត់​ការនិយម​ប្រើប្រាស់ប្រាក់​ដុល្លារ​នេះ។

យ៉ាងហោច​ណាស់​ជិត​ ១​ ទសវត្សរ៍​ហើយ​ ដែល​រដ្ឋាភិបាល​កម្ពុជា​និង​ស្ថាប័ន​ហិរញ្ញវត្ថុ​កំពូល​បាន​ប្រឹងប្រែង​រក​វិធី​ ដើម្បី​លុប​បំបាត់ចរាចរ​ប្រាក់​ដុល្លារ​ ឬ​ហៅ​ថាការ​ធ្វើ​បដិដុល្លារូបនីយកម្ម​ ដែល​កំពុង​តែ​កើត​ឡើង​យ៉ាង​ពេញ​បន្ទុក​នៅ​ទីផ្សារ​ទូទំាង​ប្រទេស​កម្ពុជា។​ ក៏​ប៉ុន្តែ​ រហូត​មក​ដល់​ពេល​នេះ​ ចរន្ត​សាច់​ប្រាក់​ក្នុង​ប្រទេស​កម្ពុជា​នៅ​តែ​គ្រប​ដណ្តប់​ដោយ​ប្រាក់ដុល្លារ​ជាង​ ៩០% នៅ​ឡើយ​ ដែល​ធ្វើ​ឲ្យ​កម្ពុជា​នៅ​តែ​ជា​ប្រទេស​មួយ​ ដែល​ធ្វើ​ការ​ចាយ​វាយ​ប្រាក់​ដុល្លារ​ច្រើន​បំផុត​មួយ​ក្នុង​ពិភពលោក។

មាន​មូលដ្ឋាន​ជា​ច្រើន​ ដែល​បាន​ញ៉ាំង​ឲ្យ​ប្រទេស​កម្ពុជា​ក្លាយ​ជា​ប្រទេស ​ដែលប្រើប្រាស់​ប្រាក់​ដុល្លារ​ ឬ​ដុល្លាររូបនីយកម្ម​យ៉ាង​ច្រើន​បំផុត​បែប​នេះ។​ កត្តា​ចំបង​គឺ​បណ្ដាល​មក​ពីភាព​វឹកវរ​ផ្នែក​នយោបាយ​ និង​ប្រព័ន្ធ​រដ្ឋបាល។​ ជា​មួយ​គ្នានេះ​ អតិផរណា​លុយ​រៀល​ដែល​ឡើង​ខ្ពស់​ពេក​ បាន​ញុំាង​ប្រជាជន​កម្ពុជា​ឱ្យ​បាត់បង់​ទំនុកចិត្ត​ស្ទើរតែ​ទំាងស្រុង​លើប្រាក់​រៀល​របស់​ខ្លួន​ ហើយ​ក៏​បាន​ងាក​មក​ប្រើប្រាស់​ប្រាក់​ដុល្លាររ​ជា​គោល​វិញ។​ មួយវិញ​ទៀត​ ការ​ធ្វើ​ចរាចរ​សាច់​ប្រាក់​ដុល្លារ​ក្នុង​បណ្ដូរ​ពាណិជ្ជកម្ម​ក្នុងស្រុកកាន់​តែរីក​ដុះដាល​ថែម​ទៀត​ នា​ដើម​ទសវត្ស​ឆ្នាំ​១៩៩០​ នៅ​ពេល​ដែល​អាជ្ញាធរ​បណ្តោះ​អាសន្ន​អង្គការ​សហ​ប្រជាជាតិ​ ឬ​ហៅ​កាត់​ថា​ អ៊ុនតាក់​ បាន​ចូល​មក​ជួយ​រៀបចំ​ប្រទេស​កម្ពុជា​ឡើងវិញ ​ហើយ​បាន​នាំ​យក​ជា​មួយ​នូវ​លំហូរ​សាច់​ប្រាក់ប្រមាណ​ជា​ ២ ពាន់លានដុល្លារ​សម្រាប់​បំពេញ​ប្រតិ្តបត្តិការ​របស់​ខ្លួន។​ ចាប់​តំាង​ពី​ពេល​នោះ​មក​ ប្រាក់​ដុល្លារបាន​ដើរ​តួនាទី​យ៉ាង​សំខាន់​ក្នុង​ការ​ចាយវាយ​ប្រចំា​ថ្ងៃរបស់​ប្រជាពលរដ្ឋ​កម្ពុជា​ ការ​ប្រើប្រាស់​ក្នុង​គណនេយ្យ​ធនាគារ​ និង​ការ​ទុក​ជា​ប្រាក់​សន្សំ។

ការសិក្សា​ជាច្រើន​របស់​ឧត្តម​ក្រុមប្រឹក្សា​សេដ្ឋកិច្ច​ជាតិ​ មូលនិធិ​រូបិយវត្ថុ​អន្តរជាតិ IMF និង​ធនាគារ​អភិវឌ្ឍន៍​អាស៊ី ADB បានឲ្យ​ដឹង​ថា​ ចរាចរ​ប្រាក់​ដុល្លារ​យ៉ាង​ទូលំ​ទូលាយ​ អនុញ្ញាតិ​ឲ្យ​កម្ពុជា​ទាក់​ទាញ​បាន​លំហូរ​ទុនវិនិយោគ​ និង​ពាណិជ្ជកម្ម​ពី​បរទេស​ ជួយឲ្យ​ប្រព័ន្ធ​ហិរញ្ញវត្ថុ​និង​ធនាគារ​មាន​ការ​រីក​ចម្រើន​យ៉ាង​ឆាប់​រហ័ស​ តាម​រយៈ​ការ​កើនឡើង​នូវ​ប្រាក់​បញ្ញើ​ ការ​ទប់​ស្កាត់​ការអុកឡុក​ទីផ្សារ​ ដើម្បី​ឲ្យ​ប្រាក់​រៀល​ចុះ​ថ្លៃ​ និង​ជួយ​ទប់​ស្កាត់​អតិផរណា​មុខ​ទំនិញ។

ក៏ប៉ុន្តែ របាយការណ៍​របស់​ស្ថាប័ន​ទាំងនោះ​បាន​លើក​ឡើង​ទៀត​ថា​ ប្រាក់​ដុល្លារ​បាន​ធ្វើ​ឲ្យ​ធនាគារ​ជាតិ​មាន​ភាព​ទន់ខ្សោយ​ក្នុង​ការបង្កើត​គោលនយោបាយ​រូបិយវត្ថុ​ ដែល​រួម​មាន​ការ​ទប់​ស្កាត់​វិបត្តិ​ហិរញ្ញវត្ថុក្នុងប្រព័ន្ធធនាគារ​ អតិផរណា​ អត្រា​ប្ដូរ​ប្រាក់​ និង​ការ​បោះពុម្ព​លុយ​ជាដើម។

ជាក់ស្ដែង ​កម្ពុជា​ត្រូវ​គេ​ប៉ាន់​ប្រមាណ​ថា​ បាន​បាត់បង់​ចំណូល​ប្រមាណ​ពី​២០​ លាន​ដុល្លារ​ទៅ​៩០​លាន​ដុល្លារ​ ជា​រៀងរាល់​ឆ្នាំ​ ដោយសារ​ការ​មិន​អាច​បោះពុម្ភ​ប្រាក់​រៀល​របស់​ខ្លួន​ ត្បិត​ទីផ្សារ​គ្មាន​តម្រូវការ។

អ្នកជំនាញ​អន្តរជាតិ​មក​ពី​ប្រទេស​កូរ៉េ​ ឥណ្ឌា​ ថៃ​ និង​មក​ពីប្រទេសវៀតណាម ​បាន​ព្រមាន​នៅ​ក្នុង​សិក្ខា​ស្តីពី​គោលនយោបាយ​ម៉ាក្រូ​សេដ្ឋកិច្ច​កាល​ពី​សប្តាហ៍​មុនក្នុង​ក្រុង​ភ្នំពេញ​ថា​ គុណវិបត្តិ​នៃ​ការ​ប្រើប្រាស់​ប្រាក់​ដុល្លារ​ អាច​នឹង​ធ្វើ​ឲ្យ​ប្រព័ន្ធ​រូបិយវត្ថុ​របស់​កម្ពុជា​ត្រូវ​ដួល​រលំ​ ហើយ​ទីផ្សារ​ហិរញ្ញវត្ថុ​ត្រូវ​មានចលាចល​ ប្រសិន​បើ​គោលនយោបាយ​ប្រាក់​ដុល្លារអាមេរិកាំង​មាន​ការ​ប្រែប្រួល​ ឬ​វិបត្តិ​សាច់​ប្រាក់​ផ្ទុះឡើងនា​ពេល​អនាគត។​ លោក Jaynant​ Menon អ្នក​សេដ្ឋកិច្ច​ជាន់​ខ្ពស់​នៃ​ធនាគារ​អភិវឌ្ឍន៍​អាស៊ី​ ដែល​បាន​សិក្សា​យ៉ាង​ស៊ី​ជម្រៅ​ទៅលើ​ការ​ប្រើប្រាស់​ប្រាក់​ដុល្លារ​នៅ​ប្រទេស​កម្ពុជា​ និយាយ​នៅ​ក្នុង​បទ​សម្ភាសន៍​ជា​មួយ VOA កាល​ពី​ថ្ងៃ​អង្គារ​ ថាប្រទេស​កម្ពុជា​មិន​អាច​ធ្វើ​បដិដុល្លារូបនីយកម្ម​ដោយ​បង្ខំ​បាន​ទេ​ ក្នុង​កាលៈទេសៈ​បច្ចុប្បន្ន​នេះ។

លោក Jaynant​ Menon បាន​បន្ត​ថា​ កម្ពុជា​មាន​ជម្រើស​តែ​មួយ​គត់​ក្នុង​ការ​លុបបំបាត់​ប្រាក់​ដុល្លារ​នេះ​ នោះ​គឺ​ការ​ប្រឹងប្រែង​ធ្វើ​ឲ្យ​សាធារណជន​មាន​ទំនុកចិត្ត​លើ​ប្រាក់​រៀល​ តាម​រយៈ​ការ​ពង្រីក​មូលដ្ឋាន​សេដ្ឋកិច្ច​ឲ្យ​បាន​ទូលំទូលាយ​ ការ​បន្ត​ការ​កែទម្រង់​ប្រព័ន្ធ​តុលាការ​ និង​ការ​ជម្រុញ​ការអនុវត្ត​ច្បាប់​ឲ្យ​បាន​ត្រឹមត្រូវ​ជាង​ពេល​បច្ចុប្បន្ន។

"ផលចំណេញ​ពី​ការ​ធ្វើ​បដិដុល្លារូបនីយកម្ម​អាច​កើត​មាន​ឡើង​ លុះ​ត្រា​តែ​វា​ធ្វើ​ឡើង​ដោយ​ប្រើ​មធ្យោបាយ​ប្រកប​ដោយ​និរន្តភាព ​និង​ទៅ​តាម​បែបបទ​ធម្មជាតិ​ ដូចជា​រដ្ឋាភិបាល​ត្រូវ​ជម្រុញ​ការ​កែទម្រង់​សេដ្ឋកិច្ច​ ការ​រក្សា​សេ្ថរភាព​ម៉ាក្រូ​សេដ្ឋកិច្ច​ ដោយ​ការ​បង្កើន​ចំណូល​ពន្ធដា​ ការ​ពង្រឹង​ស្ថាប័ន​រដ្ឋ​ ស្ថេរភាព​នយោបាយ​ បង្កើន​ការ​ទុក​ចិត្ត​លើ​ប្រព័ន្ធ​តុលាការ​ និង​ការ​អនុវត្ត​ច្បាប់​កម្មសិទ្ធិ​បញ្ញា។​ ប្រសិន​បើ​រដ្ឋាភិបាល​អាច​បង្កើន​ល្បឿន​កំណែ​ទម្រង់​នេះ ​ប្រជាជន​នឹង​ចាប់ផ្តើម​ប្រើប្រាស់​ប្រាក់​រៀល​កាន់​តែ​ច្រើន"។

លោក Hal Hill សាស្ត្រាចារ្យ​ផ្នែក​សេដ្ឋកិច្ច​អាស៊ី​អាគ្នេយ៍​នៃ​សាកលវិទ្យាល័យ​ជាតិ​អូស្ត្រាលី ANU ក៏​យល់​ឃើញ​ដូច​គ្នា​នេះ​ដែរ​ ហើយ​លោក​បាន​សរសេរ​នៅ​ក្នុង​សារ​អេឡិចត្រូនិច​ថា​ ដើម្បី​ធ្វើ​បដិដុល្លារូបនីយកម្ម​ ធនាគារ​ជាតិ​ត្រូវតែ​ជា​ស្ថាប័ន​ដែល​មាន​គុណភាព​និង​សមត្ថភាព​ខ្ពស់​បំផុត​ ហើយ​ដាច់ខាត​ត្រូវតែ​មាន​ភាព​ឯករាជ្យ​ពី​នយោបាយ។

សូម​បញ្ចាក់​ផង​ដែរ​ថា​ រយៈពេល​កន្លង​ទៅ​នេះ​ ដើម្បី​កាត់បន្ថយ​ប្រាក់​ដុល្លារ​ រដ្ឋាភិបាល​កម្ពុជា​បាន​កំណត់​គោលការណ៍​តែ​ពីរ​ប៉ុណ្ណោះ​ គឺ​ការ​បើក​ប្រាក់ខែ​ឲ្យ​បុគ្គលិក​មន្ត្រី​រាជការ​ និង​ការ​បង់ពន្ធ​គ្រប់​ប្រភេទ​ ត្រូវ​ធ្វើ​ឡើង​ជា​មួយ​លុយ​រៀល។​ ចំណែក​គ្រឹះស្ថាន​ធនាគារ​ធំៗ​នៅ​ប្រទេស​កម្ពុជា​ក៏​បាន​លើក​ទឹកចិត្ត​ឲ្យ​ អតិថិជន​រក្សាទុក​ប្រាក់​រៀល​ដែរ​ ដោយ​ការ​ផ្តល់​អត្រា​ការប្រាក់​ខ្ពស់​ជាង​ប្រាក់​ដុល្លារ​ ក៏ប៉ុន្តែ​កំណើន​ប្រាក់​បញ្ញើ​ជា​ប្រាក់​រៀល ​នៅតែ​មាន​កំណើន​តិចតួច​បំផុត​បើ​ធៀប​នឹង​ដុល្លារ។

របាយការណ៍​វិភាគ​ឆ្នាំ២០០៨ ​របស់​ធនាគារ​អភិវឌ្ឍន៍​អាស៊ី​ ស្តី​ពី​ដុល្លាររូបនីយកម្ម​នៅ​ប្រទេស​កម្ពុជា​ បានលើក​ឡើង​ថា​ កម្ពុជា​មិន​ទាន់​មាន​លក្ខណៈសម្បតិ្ត​គ្រប់គ្រាន់​សម្រាប់​ធ្វើ​បដិដុល្លារូបនីយកម្ម​នៅ​ឡើយ ត្បិតកម្ពុជា​នៅតែ​ជា​ប្រទេស​ដែល​មាន​ចំណូល​ទាប​ និង​មាន​គម្លាត​យ៉ាងខ្ពស់​ រវាង​អ្នកមាន​និង​អ្នកក្រ។​ ម្យ៉ាងទៀត​ ភាព​មិន​ប្រកដ​ប្រជា​ក្នុង​បញ្ហា​នយោបាយ​នៅតែ​កើតមាន។​ ពិសេស​ជាង​នេះ​ទៅ​ទៀត​ កំណែ​ទម្រង់​ហិរញ្ញវត្ថុ​និង​រូបិយវត្ថុ​ ប្រព័ន្ធ​តុលាការ​ ធនធាន​មនុស្ស​ សុទ្ធតែ​នៅ​យឺតយ៉ាវ​ ខណៈ​ដែល​ប្រព័ន្ធ​ធនាគារ​នៅ​មាន​ហានិភ័យ​ច្រើន។

លោក​បណ្ឌិត​ ណាហ្ការ៉ា សាស្ត្រាចារ្យ​នៃ​វិទ្យាស្ថាន​ស្រាវជ្រាវ​អភិវឌ្ឍន៍ Indira Gandi របស់​ឥណ្ឌា​ បាន​ប្រាប់ VOA ក្នុង​បទ​សម្ភាសន៍​កាល​ពី​សប្តាហ៍​មុន​ថា​ រដ្ឋាភិបាល​កម្ពុជា​គួរតែ​មាន​វិធានការ​ណា​មួយ​ដែល​មិន​ត្រឹមតែផ្តល់​ការ​លើក​ទឹកចិត្ត​សម្រាប់​ការ​រក្សាទុក​ប្រាក់​រៀល​នោះ​ទេ​ តែ​ក៏​ត្រូវ​ធានា​លើ​តម្លៃ​ប្រាក់​រៀល​ផង​ដែរ។​ ជម្រើស​មួយ​ទៀត​ រដ្ឋាភិបាល​គួរ​ចាប់​ផ្តើម​ដាក់​វិធានការ​បង្ខំ​ឲ្យ​វិស័យ​ឯកជន​ប្រើប្រាស់ប្រាក់​រៀល​ឲ្យ​បាន​ច្រើន​បំផុត។

"ប្រទេស ​នេះ​អាច​ចាប់ផ្តើម​បោះបង់​ប្រាក់​ដុល្លារ​ជា​បណ្តើរៗ​បាន​ហើយ​ តាម​រយៈ​ការ​ផ្តល់​ការ​លើក​ទឹក​ចិត្ត​ច្រើន​ ដើម្បី​ឲ្យ​ប្រជាជន​កាន់​សាច់​ប្រាក់​ក្នុង​ស្រុក។​ អ្នក​ក៏​អាច​ប្រើ​វិធី​រដ្ឋបាល​ជម្រុញ​ឲ្យ​ការចរាចរ​សាច់​ប្រាក់​ក្នុង​ ផ្នែក​សំខាន់ៗ​ ដូច​ជា​នៅ​តាម​ព្រលាន​យន្តហោះ​ជាដើម​ ត្រូវ​ចាយ​វាយ​ជា​ប្រាក់​ក្នុងស្រុក​ដែរ។​ ម្យ៉ាង​ទៀត​ត្រូវ​ជម្រុញ​ ឲ្យ​ក្រុមហ៊ុន​ឯកជន​ប្រើ​ប្រាក់​ក្នុងស្រុក​ឲ្យ​បាន​ច្រើន​ឡើង"។

លោក Jaynant​ Menon នៃ​ធនាគារ​អភិវឌ្ឍន៍​អាស៊ី ADB បាន​ផ្តល់​អនុសាសន៍​បន្ថែម​ថា​ រដ្ឋាភិបាល​កម្ពុជា​ អាច​កំណត់​ឲ្យ​ក្រុមហ៊ុនឯកជន ​ត្រូវ​បើក​ប្រាក់ខែ​ឲ្យ​បុគ្គលិក​របស់​ខ្លួនជា​ប្រាក់​រៀល​ យ៉ាង​ហោច​ណាស់​ ៤០% នៃ​ប្រាក់ខែ​សរុប។

នៅ​ក្នុង​សន្និសិទ​សេដ្ឋកិច្ច​កាល​ពី​សប្តាហ៍​មុន​ លោកស្រី​ នាវ​ ចន្ថាណា​ ទេសាភិបាល​រង​នៃ​ធនាគារ​ជាតិ​នៃ​កម្ពុជា​ ក៏​បាន​អំពាវនាវ​ឲ្យ​វិស័យ​ឯកជន​គាំទ្រ​ដំណើរការ​បដិដុល្លារូបនីយកម្ម​ដែរ។​ ប៉ុន្តែ​លោកស្រី​ មិន​មាន​បង្ហាញ​ពី​វិធានការ​ជាក់លាក់​ណា​មួយ​តម្រូវ​ឲ្យ​វិស័យ​ឯកជន​អនុវត្ត ​ដើម្បី​ចូលរួម​លុបបំបាត់​ប្រាក់​ដុល្លារ​នោះ​ទេ។

លោក ​ហង់ ជួនណារ៉ុន​ អគ្គលេខាធិការ​នៃ​ក្រសួង​សេដ្ឋកិច្ច​និង​ហិរញ្ញវត្ថុ​ មាន​ប្រសាសន៍​ថា​ ការ​ធ្វើ​បដិដុល្លារូបនីយកម្ម​ត្រូវការ​រយៈពេល​យូរ​ឆ្នាំ​ត​ទៅ​ទៀត​ ហើយ​ក្នុង​ពេល​នេះ​ រដ្ឋាភិបាល​ត្រូវ​ពង្រឹង​ផ្នែក​ម៉ាក្រូ​សេដ្ឋកិច្ច​ឲ្យ​បាន​រឹងមាំ​ និង​លើក​តម្លៃ​ប្រាក់​រៀល​ឲ្យ​ខ្ពស់។

"សំខាន់ ​គឺ​ត្រូវ​មាន​គោល​នយោបាយ​សេដ្ឋកិច្ច​មួយ​ដែល​ប្រុង​ប្រយ័ត្ន​ ពង្រីក​ការ​ប្រើប្រាស់​ប្រាក់​រៀល​ ធ្វើ​ម៉េច​ឲ្យមាន​កំណើន​សេដ្ឋកិច្ច​ខ្ពស់​ អតិផរណា​ទាប​ តម្លៃ​ប្រាក់​រៀល​ចេះ​តែ​កើន​ឡើង។​ នៅ​ពេល​ដែល​តម្លៃ​ប្រាក់​រៀល​កាន់​តែ​កើន​ឡើង​ ប្រជាជន​កាន់​តែ​មាន​ការ​ទុកចិត្ត​ហើយ​ ហើយ​នឹង​ជួយ​ដោះស្រាយ​បញ្ហា​ដុល្លារភាវូបនីយកម្ម​ហើយ​ ប៉ុន្តែ​អាហ្នឹង​ទាមទារ​ពេលវេលា​វែងអាច​ប្រាំ​ឆ្នាំ​ ឬ​អាច​ច្រើន​ជាង​ហ្នឹង"។

យ៉ាង​ណា​ក៏​ដោយ​ ការ​ប្រើ​ប្រាស់​ប្រាក់​ដុល្លារ​ច្រើន​បំផុត​ក្នុង​ទីផ្សារ​ មិន​មែន​មាន​តែ​ក្នុង​ប្រទេស​កម្ពុជា​នោះ​ទេ​ ពោល​គឺ​ ប្រទេស​ឥណ្ឌូចិន​ផ្សេង​ទៀត​ ដូចជា​ប្រទេស​វៀតណាម​និង​លាវ​ជាដើម​ ក៏​ជា​ប្រទេស​ដែល​កំពុងតែ​ជួប​នូវ​បញ្ហា​ ដោយសារ​តែ​ប្រាក់​ដុល្លារ​បាន​គ្រប​ដណ្ដប់​ខ្លាំង​ពេក​ក្នុង​ការ​ធ្វើ​ចរាចរ​សាច់​ប្រាក់​ក្នុង​ស្រុក។

នៅ​ក្នុង​របាយការណ៍​ចុងក្រោយ​បំផុត​របស់​ខ្លួន​ ដែល​គ្រោង​នឹង​ចេញ​ផ្សាយ​នៅ​ថ្ងៃ​អង្គារ​សប្ដាហ៍​ក្រោយ​ធនាគារ​អភិវឌ្ឍន៍​ អាស៊ី​បាន​លើក​ឡើង​ថា​ ប្រទេស​នៃ​ជ្រោយ​ឥណ្ឌូចិន​ទាំង​បី​នេះ​ត្រូវតែ​ធ្វើ​កិច្ច​សហ​ប្រតិបត្តិការ​ជា​មួយ​គ្នា​ ដើម្បី​ឆ្ពោះ​ទៅ​រក​ការ​លុប​បំបាត់​ប្រាក់​ដុល្លារ​លើ​ទីផ្សារ​សេរី​រួមគ្នា៕

XS
SM
MD
LG