ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេដឹកនាំ​សភា​មាន​សុទិដ្ឋ​និយម​អំពី​ការ​ពិភាក្សាសារពើ​ពន្ធ


លោកស្រី​ ណានស៊ី ប៉េឡូស៊ី (Nancy Pelosi) ប្រធាន​សភា​តំណាង​រាស្រ្ត​​សំឡេង​ភាគតិច
លោកស្រី​ ណានស៊ី ប៉េឡូស៊ី (Nancy Pelosi) ប្រធាន​សភា​តំណាង​រាស្រ្ត​​សំឡេង​ភាគតិច
Dan Robinson

វ៉ាស៊ីនតោន៖ មេដឹកនាំ​សភា​ខាង​គណបក្ស​សាធារណរដ្ឋ​និង​ប្រជា​ធិប​តេយ្យ​ បាន​សម្តែង​សុទិដ្ឋនិយម​បន្ទាប់​ពី​ការ​ពិភាក្សា​នៅ​សេតវិមាន​កាល​ពី​ថ្ងៃ​សុក្រជាមួយ​ប្រធានាធិបតី​បារ៉ាក់ ​អូបាម៉ា​អំពី​ឱកាស​នៃ​កិច្ច​ព្រម​ព្រៀង​ដើម្បី​បញ្ចៀស​អ្វីដែល​ហៅ​ថា មហន្តរាយ​សារពើពន្ធ «Fiscal Cliff » ដែល​សហរដ្ឋ​អាមេរិក កំពុង​ប្រឈម។ សេតវិមាន​បាន​ហៅ​ការ​ពិភាក្សានេះ​ថា ជា​ការ​ពិភាក្សា​ប្រកប​ដោយ​ស្ថាបនា។
តាមរយៈ​ការ​ពិភាក្សា​រយៈពេល​ជាង​មួយ​ម៉ោង​ជាមួយ​លោក​ប្រធានាធិបតី​ មេ​ដឹក​នាំ​សភា​តំណាង​រាស្រ្ត និង​ព្រឹទ្ធ​សភា​បាន​វាយ​តម្លៃ​ថា ជំនួប​នោះ​មាន​ភាព​វិជ្ជមាន។

លោក​ ចន បេន័រ (John Boehner) ប្រធាន​សភា​តំណាង​រាស្រ្ត​ខាង​គណបក្ស​សាធារណរដ្ឋ​បាននិយាយ​ថាលោក​បាន​ដាក់​គម្រោង​ការងារដែល​លោក​ជឿជាក់​ថាស្រប​តាម​គោល​ដៅ​របស់​លោក​អូបាម៉ា​ដើម្បីធ្វើ​ឲ្យ​សម្រេច​កិច្ច​ព្រម​ព្រៀង​សម្រាប់​កាត់​បន្ថយឱនភាព​ប្រកប​ដោយ​តុល្យភាព។

លោក បេន័រ និង​មន្ត្រី​ផ្សេង​ទៀត​បាន​បញ្ជាក់​ថា បញ្ហា​នៃ​ប្រាក់​ចំណូល​ថ្មី​ដ៏​ចម្រូង​ចម្រាស​សម្រាប់​កាត់​បន្ថយ​ឱនភាព ឥឡូវនេះ​បាន​ស្ថិត​លើតុ​សម្រាប់​ពិភាក្សា​ ប៉ុន្តែ សមាជិកសភារដ្ឋ​អូហៃយ៉ូ បានបញ្ជាក់​ពី​សារៈ​សំខាន់​នៃ​ការកំណត់​អត្តសញ្ញាណ​នៃ​ការ​កាត់​បន្ថយ។

«ខណៈ​ដែលយើង​កំពុង​បន្ត​ការពិភាក្សា​អំពី​ប្រាក់​ចំណូល កិច្ចការ​ធ្លាក់​ទៅ​លើ​សហការី​របស់​ខ្ញុំ​ដែល​ជា​គណបក្ស​គ្រប់​គ្រង​អំណាច​ដើម្បី​បង្ហាញ​ប្រជា​ពលរដ្ឋ​អាមេ​រិក​ថា យើង​យក​ចិត្ត​ទុកដាក់​យ៉ាង​ខ្លាំងអំពីការកាត់​បន្ថយ​ការ​ចំណាយ​និង​ដោះស្រាយ​ភាព​អល់ឯក​សារពើ​ពន្ធ​ដ៏​លំបាក»។

លោក ហារី រ៉េដ (Harry Reid) មេដឹកនាំ​សំឡេង​ភាគ​ច្រើន​របស់​ព្រឹទ្ធសភា​ពី​ខាង​គណបក្ស​ប្រជាធិបតេយ្យ​ក៏​បាន​សម្តែង​សុទិដ្ឋិនិយម ដោយ​និយាយ​ថា​ភាគី​ទាំង​អស់​ដែល​បាន​ជួប​ពិភាក្សា​ជាមួយ​លោក​អូបាម៉ា​បាន​ដឹង​ថា ការពន្យារ​ពេលនៃ​កិច្ច​ព្រម​ព្រៀង​មិនមែន​ជា​ជម្រើសទេ។

«យើង​ទាំងអស់​គ្នា​ដឹង​ថា​មាន​បញ្ហាត្រូវ​ធ្វើ​ឲ្យ​សម្រេច។ ឈប់​មាន​ពាក្យ​ថា​ទុក​កិច្ចការ​ធ្វើ​នៅ​ពេល​ក្រោយ​ទៀត​ហើយ។ យើង​ត្រូវ​ធ្វើ​វា​នៅ​ពេល​ឥឡូវនេះ​ យើង មាន​អារម្មណ៍​ថា​មាន​ការ​ស្រុះស្រួលនឹង​គ្នា ហើយ​នេះ​មិនមែន​ជា​អ្វី​ដែលយើង នឹង​រង់​ចាំ​រហូត​ដល់​ខែ​ធ្នូ​ដែល​ជា​ថ្ងៃ​ចុងក្រោយ​ដើម្បី​សម្រេចកិច្ច​ការ​នោះ​ទេ»។​

លោក អូបាម៉ា បាន​បើក​កិច្ច​ប្រជុំដោយ​មាន​ការ​អំពាវ​នាវ​ឲ្យ​មាន​កិច្ច​សហ​ប្រតិបត្តិការ​ពី​គណបក្ស​ទាំង​ពីរ។

«ការ​ប្រឈម​របស់​យើង​នោះ​គឺ​ធ្វើ​ឲ្យ​ប្រាកដ​ថា យើង​អាច​សហការ​គ្នា ធ្វើ​ការ​ជាមួយ​គ្នា​ រក​ជំហរ​រួម ធ្វើ​ការ​សម្រប​សម្រួល​ដ៏​តឹងតែង​មួយ ធ្វើ​ឲ្យ​មានការ​មូល​មតិ​ខ្លះ​ដើម្បី​ធ្វើ​កិច្ចការ​របស់​ប្រជាពលរដ្ឋ។ ហើយ​នេះ​ជាអ្វី​ដែល​គេ​កំពុង​ស្វែងរក ហើយ ខ្ញុំ​គិត​ថា យើង​ទាំងអស់​គ្នា​បាន​ព្រម​ព្រៀង​គ្នា​លើ​បញ្ហា​នេះ។ ពួកគេ​ចង់​ឃើញថា យើង​ផ្តោត​ការ​យក​ចិត្ត​ទុកដាក់​លើ​ពួកគេ មិន​មែន​ផ្តោត​ការ​យក​ចិត្ត​ទុកដាក់លើ​នយោបាយ​របស់​យើង​ក្នុង​រដ្ឋ​ធានី​វ៉ាស៊ីន​តោន​ទេ»។​

លោកស្រី​ ណានស៊ី ប៉េឡូស៊ី (Nancy Pelosi) ប្រធាន​សភា​តំណាង​រាស្រ្តសំឡេង​ភាគតិច​បាន​និយាយ​ថា លោកស្រី​ មាន​ទំនុកចិត្តថា​នឹង​ឈាន​ដល់​ការ​ព្រម​ព្រៀង​គ្នា​ហើយ​សង្ឃឹម​ថា គ្រោះ​ថ្នាក់​នៃ​វិបត្តិ​សេដ្ឋកិច្ច​មួយ​ផ្សេង​ទៀត​នឹង​អាច​ត្រូវ​បញ្ចៀស​បាន។
សមាជិក​ព្រឹទ្ធ​សភា​សំឡេង​ភាគ​តិច​ខាង​គណបក្ស​សាធារណរដ្ឋ​ មីត្ច ម៉ាក់ខូន្នែល្ល (Mitch McConnell) បាន​និយាយ​ឡើង​វិញ​ពី​ការ​អំពាវនាវ​ឲ្យ​មាន​ការ​កាត់​បន្ថយ​ការ​ចំណាយ​លើ​កម្មវិធី​ដែល​មាន​តែ​ឈ្មោះ ដោយ​លោក​និយាយ​ថា​ដំណោះស្រាយ​តម្រូវឲ្យ​មាន​ការ​ជួសជុល​បញ្ហា​ពិត​ប្រាកដ។

សរសេរ​សម្រួល​ដោយ ជឹង ប៉ូជីន
XS
SM
MD
LG