ភ្ជាប់​ទៅ​គេហទំព័រ​ទាក់ទង

កម្ពុជា​មិនទាន់​មាន​សមភាព​យេនឌ័រ​នៃ​អំណាច​ខាង​នយោបាយ


ទិដ្ឋភាព​នៃ​ការបោះឆ្នោត​មួយ​នៅក្នុង​រដ្ឋសភា​កម្ពុជា។

ភ្នំពេញ៖ យោងតាម​របាយការណ៍​របស់​ខុមហ្រ្វែលបាន​អះអាងថា​ ​នៅ​ក្នុង​អំឡុង​ពេលនេះ​កម្ពុជា​មិនទាន់​មាន​សមភាព​យេនឌ័រ​នៃ​ការផ្តល់​អំណាច​ខាង​នយោបាយ​សម្រាប់ស្ត្រី​នៅឡើយ​ទេ។

ស្ដ្រី​នៅក្នុង​ប្រទេសកម្ពុជា​ ​នៅតែ​មាន​ឱកាស​តិចតួច​នៅឡើយ​ក្នុង​ការ​ចូល​ប្រឡូក​ក្នុង​ឆាក នយោបាយ​ ​នេះ​បើយោង​ទៅតាម​របាយការណ៍​ផ្សព្វផ្សាយ​ជា​សាធារណៈ​កាលពី​ថ្ងៃច័ន្ទ​សប្ដាហ៍នេះ​របស់​គណៈកម្មាធិការ​ដើម្បី​ការ​បោះឆ្នោត​ដោយ​សេរី​និង​យុត្តិធម៌​នៅ​កម្ពុជា​ ​ហៅកាត់​ថា​ ​ខុមហ្រ្វែល។

មូលហេតុ​ដោយសារ​តែ​គោល​នយោបាយ​យេនឌ័រ​ និង​ការផ្តល់​អំណាច​នយោបាយ​ដល់​ស្រ្តី​នៅ​ក្នុង​ប្រទេស​មិនទាន់​បាន​ទូលំទូលាយ។

រដ្ឋាភិបាល​បាន​កំណត់​ថា​ ​នៅ​ឆ្នាំ២០១៥​ ​មន្រ្តី​ជាប់ឆ្នោត​ជា​ស្រ្តី​នៅ​ថ្នាក់ជាតិ​យ៉ាង​តិច​៣០​ភាគរយ​និង​ថ្នាក់ឃុំ​សង្កាត់​២៥​ភាគរយ។ ​ក៏ប៉ុន្តែ​យោងតាម​របាយ​ការណ៍​របស់​ខុមហ្រ្វែល​ដដែល​បាន​ឲ្យ​ដឹង​ដែរ​ថា​ ​កម្ពុជា​មិនទាន់​មាន​សមភាព​យេនឌ័រ​នៃ​ការ​ផ្តល់​អំណាច​ខាង​នយោបាយ​ទេ​ ពិសេស​ភាព​ជាអ្នក​តំណាង​អ្នក​បោះឆ្នោត​ជាប់ឆ្នោត​ ​ថ្វីបើ​អ្នក​ចុះ​ឈ្មោះ​បោះឆ្នោត​ជាស្ត្រី​មាន​៥៣​ភាគរយ​ ក៏​ដោយ។ ​ជាក់ស្ដែង​តំណាង​រាស្រ្ត​ស្រ្តី​មាន​ចំនួន​តែ​២២​ភាគរយ​សម្រាប់​អាណត្តិ​ទី​៤​ ​ក្នុង​ចំណោម តំណាង​រាស្ដ្រ​សរុប​ចំនួន​១២៣រូប។​ ស្រ្តី​ដែល​កំពុង​តែ​បម្រើការ​ក្នុង​ក្រុម​បឹ្រក្សា​ឃុំ ​សង្កាត់​មាន ចំនួន​២០​ភាគរយ​សម្រាប់​អាណត្តិ​ទី២។

របាយ​ការណ៍​នេះ​ដែល​បាន​ធ្វើការ​សិក្សា​ទៅក្នុង​ស្រុក​ចំនួន​១០​នៃ​ខេត្ត​ចំនួន​៥​ គឺ​ខេត្ត​កំពង់ធំ​ ​កំពង់ចាម​ ​កំពង់ឆ្នាំ ​តាកែវ ​និង​ខេត្ត​ព្រះវិហារ។

របាយ​ការណ៍​ដដែល​ក៏បាន​បញ្ជាក់​ផង​ដែរ​ថា​ ​អ្នក​នយោបាយ​កម្ពុជា​ភាគច្រើន​គឺ​ជា​បុរស​ រី​ឯស្រ្តី​វិញ​មាន​ឱកាស​តិចតួច​ក្នុង​ការ​ចូលរួម​ក្នុង​ឆាក​នយោបាយ។​ ផ្នែក​ខ្លះ​នៃ​បញ្ហានេះ​កើតឡើង​ ដោយសារ​ទំនៀម​ទម្លាប់​អភិរក្ស​និយម​និងវប្បធម៌ ​ដែល​ត្រូវ​បាន​គេ​សន្មត់​និង​ផ្តល់​តំលៃ​ស្រ្តី​ទាប​ ជាង​បុរស​នៅគ្រប់​វិស័យ​ក្នុង​សង្គម។ ​ជាងនេះ​ទៅទៀត​ភាព​ក្រីក្រ​ ​អវិជ្ជា​ ​ការរើសអើង​ ​ខ្វះ​ការ​លើក​ទឹកចិត្ត​ និង​ឱកាស ​និង​អវត្តមាន​នូវ​គោល​នយោបាយ​ជាក់លាក់​ក្នុង​ការ​លើក​កម្ពស់​និង​ ការ​ផ្តល់​ឱកាស​ដល់ស្រ្តី​ ​គឺ​ជា​បច្ច័យ​ដែល​ក្លាយ​ជា​ឧបសគ្គ​សម្រាប់ស្រ្តី​ក្នុង​ការទទួល​បាន​នូវ​សមភាព ​និង​ផល​ចំណាយ​ពីការ​ចូលរួម​ក្នុង​វិស័យ​នយោបាយ​ និង​កិច្ចការ​សង្គម។

លោក​គល់ បញ្ញា ​នាយកប្រតិបត្តិ​នៃ​អង្គការ​ខុមហ្វ្រែល​ ​បាន​មានប្រសាសន៍​ថា​ ​នៅ​មិនទាន់​មាន​ការ​ចែង​គោល​នយោបាយ​ជា​លាយ​លក្ខណ៍​អក្សរ​ឲ្យ​បាន​ច្បាស់លាស់​ដើម្បី​ជំរុញ​ការ​លើក​ស្ទួយ​ស្ដ្រី​ក្នុង​នយោបាយ​នៅ​ឡើយ​ទេ។

លោក​បាន​សម្តែងការ​ព្រួយ​បារម្ភ​ថា​ ​បើសិន​នៅតែ​ធ្វើ​បែបនេះ​បន្ត​ទៀត​ ​ចំនួន​ស្ត្រី​នៅ​ក្នុង​ឆាក​នយោបាយ​នឹង​មាន​ការ​ថយចុះ។

«យើង​អត់​មាន​គោល​នយោបាយ​ ​អត់មាន​ច្បាប់​និយាយ​ពី​ការ​លើក​ស្ទួយស្រ្តី​នៅ​ក្នុង​កិច្ចការ​នយោបាយឲ្យបាន​ច្បាស់លាស់​ ​ហើយ​នៅថ្នាក់​មូលដ្ឋាន​ ​នៅក្រុម​ប្រឹក្សា​ឃុំ សង្កាត់​ ​យើង​អត់​មាន​គោល​នយោបាយ​យេនឌ័រ​ ​ដើម្បី​ពិនិត្យ​មើល​អំពី​ភាព​លើកស្ទួយ​នៃ​បុរស ​ស្រ្តី​ឲ្យ​ស្មើគ្នា​ទេ។​ ​យើង​អត់​មាន​គោល​នយោបាយ​នេះ​នៅ​ថ្នាក់​មូលដ្ឋានគឺជា​បញ្ហា​ដែរ​ ​ហើយ​ដែល​ធ្វើ​ឲ្យ​យើង​មាន​ការ​ព្រួយ​បារម្ភ​អំពី​ចីរភាព​ពីកំណើន​នៃ​ចំនួន​ស្រ្តី​នៅ​ក្នុង​កិច្ចការ​នយោបាយ​នេះ»។

របាយ​ការណ៍​របស់​អង្គការ​ខុមហ្វ្រែល​បាន​បន្ថែម​ថា​ ​គណបក្ស​សំខាន់ៗដែល​មាន​អាសនៈ​ នៅ​ក្នុង​សភា​ចង់​ឲ្យ​មាន​គោល​នយោបាយ​យេនឌ័រ​សម្រាប់​ឲ្យស្រ្តី​និង​បុរស​បាន​ចូលរួម​ក្នុង​កិច្ចការ​នយោបាយ​ស្មើគ្នា។​ គណបក្ស​ខ្លះ​បាន​លើក​ឡើង​ថា​ ​ការផ្តល់​អំណាច​នយោបាយ​ខាង​យេនឌ័រ​ មាន​ចែង​នៅ​ក្នុង​បទបញ្ជា​ផ្ទៃក្នុង​របស់​គណបក្ស​ខ្លួន​ ​ឬ​នៅក្នុង​កម្មវិធី​នយោបាយ។ ​ក៏ប៉ុន្តែ​ទោះបី​ជា​យ៉ាងណា​ក៏ដោយ​ ​គណបក្ស​ទាំងនេះ​ពុំទាន់​មាន​គោល​នយោបាយ​ ឬ​ផែនការ​ ​សកម្មភាព​ជា​លាយ​លក្ខណ៍​អក្សរ​ឲ្យ​បាន​ច្បាស់លាស់​ទាក់ទិន​នឹង​យេនឌ័រ​ក្នុង​កិច្ចការ​របស់​គណបក្ស​នៅឡើយ​ដែរ។

ទោះបី​ជា​យ៉ាងណា​ក៏ដោយ​ ​លោក​ជាម យៀប​ ​តំណាងរាស្ត្រ​គណបក្ស​ប្រជាជន​កម្ពុជា​ ​បាន​មាន​ប្រសាសន៍​ថា​ ​ទាំង​រដ្ឋាភិបាល​ ​ក៏ដូចជា​គណបក្ស​ប្រជាជន​កម្ពុជា​ ព្យាយាម​ជំរុញ​ និង​លើក​ទឹកចិត្ត​ដល់​ស្រ្តី​ក្នុង​ការ​ចូលរួម​ក្នុង​ឆាក​នយោបាយ​ ​ដោយ​មាន​ការផ្តល់​ចំណេះដឹង​ទៅដល់​គ្រប់​មូលដ្ឋាន​ដើម្បី​កសាង​សមត្ថភាព​ស្រ្តី​ឲ្យ​បាន​ល្អ​ប្រសើរ​ជាង​នេះ​ ​ងាយស្រួល​ក្នុងការ​ចូលរួម​នៅ​ក្នុង​ឆាក​នយោបាយ។ ​លោក​បាន​ទទួល​ស្គាល់​ថា​ ​ចំនួន​ស្រ្តី​នៅ​ក្នុង​ឆាក​នយោបាយ​នៅមាន​ចំនួន​ទាប​នៅ​ឡើយ​ ​ពីព្រោះ​បញ្ហា​សំខាន់​គឺ​ទំនៀម​ទម្លាប់​ប្រពៃណី​ ​ការ​ចេះ​ដឹង​របស់​ស្រ្តី​នៅ​មាន​កម្រិត​ នៅ​ឡើយ​ ​ដែល​ជា​ឧបសគ្គ​ដ៏​ធំ​សម្រាប់​ស្រ្តី​នៅ​ក្នុង​កិច្ច​ការងារ​នេះ។

«អំពាវនាវ​ដល់​នារី​ទាំងឡាយ​ ​សូមធ្វើ​យ៉ាងណា​បង្កើន​គុណភាព​ ​បង្កើន​សមត្ថភាព​របស់​ខ្លួន​ឲ្យ បាន​កាន់តែ​ច្រើន​ឡើង​ ល្អ​ប្រសើរ​ឡើង​ ​ដើម្បី​ចូលរួម​ក្នុង​ការ​កសាង​ប្រទេស​ជាតិ​និង​ស្តារ​ប្រទេស​ ជាតិ​ឲ្យ​បាន​ទាន់​ពេលវេលា»។

ជា​មួយគ្នា​នេះ​ដែរ​ ​លោក​កឹម សុខា​ ​ប្រធាន​គណបក្ស​សិទ្ធិមនុស្ស​ ​បាន​មាន​ប្រសាសន៍​ថា​ ​វត្តមាន​របស់​ស្រ្តី​ចូលរួម​ក្នុង​ការងារ​នយោបាយ​ដែល​មាន​ចំនួន​ទាប​នោះ​ ​គឺ​មិនមែន​ជា​កំហុស​របស់​គណបក្ស​នយោបាយ​និមួយៗ​នោះ​ទេ​ ​គឺជា​កំហុស​ទាំងអស់​គ្នា​ ​ពីព្រោះ​កត្តា​ទំនៀម​ទម្លាប់​ ចំណេះ​ដឹង​ ​ជីវភាព​ដែល​ធ្វើឲ្យ​ស្រ្តី​រុញរា​ក្នុង​ការ​ចូល​ប្រឡូក​ក្នុង​ឆាក​នយោបាយ។

«ទោះបី​យើង​ខំ​លើក​ទឹកចិត្ត​ឲ្យ​ស្រ្តី​ចូលរួម​ក្នុង​ឆាក​នយោបាយ​ច្រើន​យ៉ាងណា​ក៏ដោយ​គឺ​យើង​ នៅ​តែ​មិនអាច​ទទួល​លទ្ធផល​បាន​ជាទី​ពេញចិត្ត​របស់​យើង​ដដែល។ ​បញ្ហានេះ​មិនមែន​កំហុស​ របស់​គណបក្ស​នយោបាយ​ណាមួយ​ ​ឬ​ក៏​កំហុស​របស់​ក្រុម​ណាមួយ​ទេ​ គឺជា​ចំណុច​ខ្វះខាត​របស់​យើង​ទាំងអស់​គ្នា​ ​របស់​សង្គមខ្មែរ​យើង​ទាំងអស់​គ្នា​ ​ដោយសារ​ទំនៀម​ទម្លាប់​របស់​ខ្មែរ​យើង​តាំង​ពី​យូរណាស់​ហើយ​ថា​ ​ស្រ្តី​គាត់​មិនសូវ​ចង់​ចេញ​មុខ»។

ផ្ទុយ​ទៅវិញ​លោក​យឹម សុវណ្ណ ​អ្នក​តំណាងរាស្រ្ត​គណបក្ស​សម រង្ស៉ី​បាន​ឲ្យ​ដឹង​ដែរ​ថា​ ភាព​ក្រីក្រ​និង​ការ​គំរាមកំហែង​ ​បំភិតបំភ័យគឺជា​កក្តា​សំខាន់​ក្នុង​ការ​រារាំង​មិនឲ្យ​ស្រ្តី​ចូលរួម​ក្នុង​ឆាក​នយោបាយ។

«ក៏ប៉ុន្តែ​ភាពក្រីក្រ​សព្វថ្ងៃ​វា​នៅតែ​ជា​បញ្ហា​ចំពោះ​ប្រជា​ពលរដ្ឋ។ ​សព្វថ្ងៃ វានៅតែ​មាន​ការ​គំរាម កំហែង​ ​បំភិតបំភ័យ​ដែល​ធ្វើឲ្យ​ស្រ្តី​របស់​យើង​មាន​ការ​ខ្លាច​រអា។​ ភាគច្រើន​គាត់​មិនចង់​ចូលរួម​នៅ​ក្នុង​ឆាក​នយោបាយ​ទេ​ ​ដោយសារ​មាន​ការ​ភ័យខ្លាច។ ​កត្តា​ទាំងពីរ​នេះ​ហើយ​ដែល​ខ្ញុំ​យល់​ឃើញ​ថា​ ​មិនទាន់​បាន​ជំរុញ​ និង​លើក​ទឹក​ចិត្ត​ស្រ្តី​ឲ្យ​បាន​ចូលរួម​ក្នុង​កិច្ចការ​នយោបាយ​ឲ្យ​បាន​ ច្រើន​ទេ។ ​ទាល់តែ​យើង​ជំនះ​បញ្ហា​ទាំងពីរ​នេះ​ ​ទើប​យើង​អាច​ធ្វើឲ្យ​ស្រ្តី​ចូលរួម​ក្នុង​ឆាក​នយោ បាយ​ឲ្យបាន​ច្រើន»។

ទោះជា​យ៉ាងណា​របាយការណ៍​របស់​អង្គការ​ខុមហ្វ្រែល​បាន​រកឃើញ​ថា​ ​ស្រ្តី​បាន​ដើរ​តួនាទី​យ៉ាង​សំខាន់​ក្នុង​ការ​ទប់ស្កាត់ការ​រំលោភ​បំពាន​ ​អំពើ​ហិង្សា​ក្នុង​គ្រួសារ​ ​ហើយ​ស្ត្រីអាច​ដោះស្រាយ​បញ្ហា​ស្រ្តី​ និង​កុមារ​មាន​ប្រសិទ្ធិភាព​ជាង​បុរស៕

XS
SM
MD
LG