ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចៅក្រម​ស៊ើប​អង្កេត​តុលាការ​ខ្មែរក្រហម​ពិនិត្យ​បណ្ដឹង​រដ្ឋប្បវេណី​​សំណុំ​រឿង​០០២


ភ្នំពេញ៖ សហ​ចៅក្រម​ស៊ើបអង្កេត​ បាន​ចាប់​ផ្ដើម​ពិនិត្យ​ទៅ​លើ​ភាព​អាច​ទទួល​យក​បាន​នូវ​បណ្តឹង​របស់​ជន​រងគ្រោះ ដែល​បាន​ដាក់​ពាក្យ​សុំ​តាំង​ខ្លួន​ជាដើម​បណ្ដឹង​រដ្ឋ​ប្បវេណី​សម្រាប់​សំណុំ​រឿង​ ០០២។​ សំណុំ​រឿង​នេះគ្រោង​នឹង​បើក​សវនាការ​នៅ​ឆ្នាំ​ក្រោយ។

សហ​ចៅក្រម​ស៊ើប​អង្កេត​របស់​សាលាក្ដី​ខ្មែរ​ក្រហមបាន​ឲ្យ​ដឹង​នៅ​ថ្ងៃ​ច័ន្ទ​នេះ​ថា​ ​ខ្លួន​កំពុង​តែ​ពិនិត្យ​បញ្ចប់​នូវ​ភាព​អាច​ទទួល​យក​បាន​នូវជន​រងគ្រោះ​ប្រមាណ​ជា​៤០០០​នាក់​ដែល​បាន​សុំ​តាំងខ្លួន​ជា​ដើម​បណ្ដឹង​រដ្ឋ​ប្បវេណី​សម្រាប់​សំណុំ​រឿង​០០២​ ​ខណៈ​ដែល​សំណុំ​រឿង​នេះ​នឹង​យក​ទៅ​ជំនុំ​ជម្រះ​នៅ​ដើម​ឆ្នាំ​២០១១​ខាង​មុខ។

មន្ដ្រី​សាលាក្ដី​ខ្មែរ​ក្រហម​អះអាង​ថា​ ​ការ​សម្រេច​អំពី​ការ​ទទួល​ស្គាល់​ដើម​បណ្ដឹង​រដ្ឋ​ប្បវេណី​ទាំង​នេះ​ នឹង​ត្រូវ​ធ្វើ​ឡើង​នៅ​ក្នុង​អំឡុង​សប្ដាហ៍​ក្រោយ​នេះ។

ដើម​បណ្ដឹង​រដ្ឋ​ប្បវេណី​គឺ​ជា​ផ្នែក​មួយ​យ៉ាង​សំខាន់​នៅ​ក្នុង​ដំណើរ​ការ​កាត់ទោស​ដោយ​សាលាក្ដី​ពិសេស​ ដែល​ឧបត្ថម្ភ​ដោយ​អង្គការ​សហ​ប្រជាជាតិ​នេះ។​ ក្រុម​អង្គការ​សង្គម​ស៊ីវិល​ធ្លាប់​បាន​ទាមទារ​ នា​ពេល​កន្លង​មក​ថា​ ​ដើម​បណ្ដឹង​ដែល​សុំ​តាំងខ្លួន​ជាដើម​បណ្ដឹង​រដ្ឋ​ប្បវេណី​ ​គួរតែ​ត្រូវ​សាលាក្ដី​ទទួលយក​ឲ្យ​បាន​ច្រើន​បំផុត​តាម​តែ​អាច​ធ្វើ​ទៅ​បាន។

នៅ​ក្នុង​សេចក្ដី​ថ្លែង​ការណ៍​របស់​ខ្លួន​នៅ​ថ្ងៃ​នេះ​ ​សហ​ចៅក្រម​ស៊ើប​អង្កេត​ ​លោក​យូ ប៊ុនឡេង ​និង​ លោក​ម៉ាកសែល ឡឺម៉ុង​បាន​លើក​ឡើង​ថា​ ​ ការ​ចូល​រួម​របស់​ជន​រងគ្រោះ​នៅ​ក្នុង​នីតិវិធី​តុលាការ​ គឺ​ជា​ចំណុច​កណ្ដាល​របស់​សាលាក្ដី​ខ្មែរ​ក្រហម។

សហ​ចៅក្រម​ស៊ើប​អង្កេត​ទាំង​ពីរ​បញ្ជាក់​ថា​ ​ខ្លួន​នឹង​ចេញ​ដីកា​សម្រេច​ទៅ​លើ​ការ​ទទួល​យក​ជាដើម​ បណ្ដឹង​រដ្ឋ​ប្បវេណី​របស់​ជន​រងគ្រោះ​សម្រាប់​ខេត្ត​ក្រុង​ទាំង​២៤​ ​និង​សម្រាប់​ជន​រងគ្រោះ​ដែល​កំពុងស្នាក់​នៅ​ឯ​បរទេស​ផង​ដែរ។

លោក​ឡាស អលសិន​ មន្ដ្រី​ផ្នែក​ទំនាក់​ទំនង​កិច្ចការ​ច្បាប់​របស់​សាលាក្ដី​ខ្មែរ​ក្រហម​ ​មាន​ប្រសាសន៍​ថា​ ​គេអាច​ដឹង​ពី​សេចក្ដី​សម្រេច​របស់​សហ​ចៅក្រម​ស៊ើប​អង្កេត​លើ​បញ្ហា​នេះ​ ​នៅ​សប្ដាហ៍​ក្រោយ។

«យើង​នឹង​ដឹង​នៅ​ក្នុង​អំឡុង​សប្ដាហ៍​ក្រោយ​ ​កាល​ណា​មាន​សេចក្ដី​សម្រេច​អំពី​ការ​ទទួល​ស្គាល់​ជន​រងគ្រោះ​ជាដើម​បណ្ដឹង​រដ្ឋ​ប្បវេណី​នោះ»។

នៅ​ក្នុង​ពេលនេះមាន​ជន​រងគ្រោះ​ដោយ​របប​ខ្មែរ​ក្រហម​ចំនួន​៣៩៨៨​នាក់​បាន​ដាក់​ពាក្យ​សុំ​តាំង​ខ្លួន​ជាដើម​បណ្ដឹង​រដ្ឋ​ប្បវេណី​សម្រាប់​សំណុំ​រឿង​០០២។ ​សំណុំរឿងនេះ​មាន​ជន​ជាប់ចោទ​នួន ជា​ ​ខៀវ សំផន​ ​អៀង សារី​ ​អៀង ធិរិទ្ធ​ ​និង​អាច​មាន​ឌុច​ អតីត​ប្រធាន​គុក​ទួល​ស្លែង​ផង​ដែរ។​ កាល​ពី​ថ្ងៃ​ទី ២៥ ​និង​ថ្ងៃ​ទី​២៦ ​ខែ​សីហា​នេះ​ ​សហ​ចៅក្រម​ស៊ើប​អង្កេត​បាន​សម្រេច​ទទួល​ស្គាល់​ជន​រងគ្រោះ​ចំនួន​៥៨​នាក់​ជាដើម​បណ្ដឹង​រដ្ឋ​ប្បវេណី​ក្នុង​ខេត្ត​កែប​ ​ខេត្ត​រតនគិរី ​ ​មណ្ឌលគិរី​ និង​ខេត្ត​ ឧត្តរ​មានជ័យ។

សហ​ចៅក្រម​ស៊ើប​អង្កេត​រំពឹងថា​ ​ខ្លួន​មាន​ពេល​រហូត​ទៅ​ដល់​តំណាក់​កាល​បញ្ជូន​ដីកា​បញ្ជូន​រឿង​ទៅ​ជំនុំ​ជម្រះ​ទៅ​កាន់​អង្គ​ជំនុំ​ជម្រះ​សាលាដំបូងដើម្បី​ធ្វើការ​សម្រេច​ទទួល​យក​ជន​រងគ្រោះ​ជាដើម​បណ្ដឹង​រដ្ឋ​ប្បវេណី​ឲ្យ​បាន​ច្រើន​បំផុត។ ​ការបញ្ជូន​រឿង​ទៅ​ជំនុំជម្រះ​គឺ​គ្រោង​ធ្វើ​នៅ​ពាក់​កណ្ដាល​ខែ​កញ្ញា​ខាង​មុខ​នេះ។​ ក្រុម​មន្ដ្រី​សង្គម​ស៊ីវិល​ធ្លាប់​បាន​លើក​ឡើង​ថា​ ​ការ​ចូល​រួម​កាន់​តែ​ច្រើន​របស់​ជន​រងគ្រោះក្នុង​ដំណើរ​ការ​កាត់ទោស​នឹង​ធ្វើ​ឲ្យ​ការ​កាត់​ទោស​កាន់តែ​មាន​សារៈ​សំខាន់៕

XS
SM
MD
LG