ភ្នំពេញ៖ អង្គការនិងសមាគមមិនមែនរដ្ឋាភិបាលនៅក្នុងប្រទេសកម្ពុជាបានសម្តែងការខ្វាយខ្វល់អំពីចំណុចអវិជ្ជមានមួយចំនួននៅក្នុងសេចក្តីព្រាងច្បាប់សម្រាប់គ្រប់គ្រងអង្គការមិនមែនរដ្ឋាភិបាលដោយនិយាយថាច្បាប់នេះបង្កើតជាឧបសគ្គចម្បងនៅក្នុងការចុះបញ្ជីនិងការអនុវត្តសកម្មភាពរបស់ពួកគេ។
តំណាងក្រសួងមហាផ្ទៃនិងអង្គការមិនមែនរដ្ឋាភិបាលនឹងជួបប្រជុំគ្នាដើម្បីធ្វើការផ្លាស់ប្តូរទស្សនៈ យោបល់លើសេចក្តីព្រាងច្បាប់អង្គការនិងសមាគមមិនមែនរដ្ឋាភិបាលនៅសប្តាហ៍ក្រោយនេះខណៈ ដែលក្រុមមន្ត្រីអង្គការសង្គមស៊ីវិលបានរិះគន់ចំណុចអវិជ្ជមានជាច្រើននៅក្នុងច្បាប់នេះដោយអំពាវ នាវឱ្យមានការកែប្រែមាត្រាមួយចំនួននៃច្បាប់នេះ។
ក្នុងសេចក្តីថ្លែងការណ៍រួមរបស់អង្គការសង្គមស៊ីវិលបានបញ្ជាក់ថាខ្លឹមសារនៃសេចក្តីព្រាងច្បាប់បច្ចុប្បន្ននឹងរឹតបន្តឹងដល់ការងាររបស់អង្គការមិនមែនរដ្ឋាភិបាលទាំងអស់នេះពីព្រោះវាបង្កើតជាឧបសគ្គចម្បងនៅក្នុងការចុះបញ្ជីនិងការអនុវត្តសកម្មភាពរបស់ពួកគេ។ សេចក្តីថ្លែងការណ៍រួមនេះ បានបន្តថាផលវិបាកដែលកើតចេញពីច្បាប់នេះគឺបានធ្វើឱ្យថយចុះនូវការផ្តល់មូលនិធិសម្រាប់ការអភិវឌ្ឍគម្រោងសំខាន់ៗជាច្រើនដែលបាននិងកំពុងអនុវត្តដោយសហការជាមួយរាជរដ្ឋាភិបាលនៅពេលបច្ចុប្បន្នហើយកាត់បន្ថយប្រភពមូលនិធិដែលគ្រោងនឹងផ្តល់ឱ្យសម្រាប់ការអភិវឌ្ឍរយៈពេលយូរអង្វែងផងដែរ។
សេចក្តីថ្លែងការណ៍រួមនេះបានបន្ថែមថាអង្គការមិនមែនរដ្ឋាភិបាលក្នុងស្រុកនិងអន្តរជាតិទាំងអស់ មានការព្រួយបារម្ភយ៉ាងខ្លាំងអំពីផលវិបាកដែលអាចនឹងកើតមានឡើងនៅពេលដែលច្បាប់នេះត្រូវ បានអនុម័តនិងចូលជាធរមានប្រសិនបើគ្មានការកែប្រែនោះទេ។
លោកយ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពបានថ្លែងប្រាប់ វីអូអេសំឡេងសហរដ្ឋអាមេរិកនៅថ្ងៃពុធនេះថាច្បាប់នេះអាចបង្កឧបសគ្គដល់ការចូលរួមរបស់ប្រជាពលរដ្ឋ អង្គការ និងសមាគមមិនមែនរដ្ឋាភិបាលដែលធ្វើឱ្យប៉ះពាល់ដល់គោលនយោបាយរបស់រដ្ឋាភិបាល។
«ច្បាប់នេះបានដាក់កាតព្វកិច្ចស្មុគស្មាញនិងបង្កការលំបាកជាច្រើនដល់អង្គការសង្គមស៊ីវិល។ ជា រួម ច្បាប់នេះហាក់បីជាច្បាប់មានចេតនាគ្រប់គ្រងទៅលើអង្គការមិនមែនរដ្ឋាភិបាលប៉ុន្តែវាមិនមែន ជាច្បាប់ដែលការពារផលប្រយោជន៍និងផ្តល់សេរីភាពទៅដល់ជនស៊ីវិលឱ្យធ្វើសកម្មភាពឱ្យបាន ទូលំទូលាយទេ។ យើងឃើញថា វាជាកង្វល់មួយហើយ។ យើងមើលឃើញមានចំណុចដែលគួរឱ្យ មានការសង្ស័យសម្រាប់ការអនុវត្តច្រើន»។
លោកធន សារាយ ប្រធានសមាគមសិទ្ធិមនុស្សអាដហុក (Adhoc) បានថ្លែងថា មាត្រាមួយចំនួននៅក្នុងសេចក្តីព្រាងច្បាប់នេះរំលោភរដ្ឋធម្មនុញ្ញពីព្រោះវារារាំងនិងបង្កការលំបាកជាច្រើនដល់ការបង្កើតអង្គការនិងសមាគមមិនមែនរដ្ឋាភិបាលរបស់ប្រជាពលរដ្ឋ។
«ចំណុចមួយចំនួននៅក្នុងសេចក្តីព្រាងច្បាប់អង្គការគឺជាក្តីព្រួយបារម្ភរបស់អង្គការសង្គមស៊ីវិលនិងសហគមន៍ ដូចជា ការចុះបញ្ជីមានលក្ខណៈស្មុគស្មាញនិងការបង់អាករដែលមិនបានកំណត់ជាមុន អាចប៉ះពាល់ដល់សិទ្ធិក្នុងការចងក្រងជាសហគមន៍នៅតាមភូមិឃុំនានាដែលលោកធ្លាប់ធ្វើជាប្រពៃ ណីក្នុងការងារសង្គមច្រើនណាស់ហើយបើសិនបង្ខំឱ្យមានការចុះបញ្ជីដែលត្រូវការទាមទារលក្ខន្តិកនិងគោលការណ៍ច្រើនសន្ធឹកសន្ធាប់សហគមន៍នៅមូលដ្ឋានប្រាកដជាមិនអាចធ្វើសកម្មភាពបានទេ ហើយនេះជាសិទ្ធិក្នុងការបង្កើតសហគមន៍-សមាគម នេះជាសិទ្ធិមូលដ្ឋានមួយដែលបានចែងនៅក្នុងរដ្ឋធម្មនុញ្ញ»។
លោកអ៊ូរ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានថ្លែងថាច្បាប់ខ្មែរនេះគឺមិនមែនជាច្បាប់ ដែលអាក្រក់ជាងគេនៅក្នុងពិភពលោកទេហើយក៏មិនមែនជាច្បាប់ល្អជាងគេនៅក្នុងពិភពលោកដែរ ហើយច្បាប់នេះមានលក្ខណៈកណ្តាល។ ប៉ុន្តែច្បាប់នេះមានចំណុចអវិជ្ជមានមួយចំនួនដែលយើង ព្រួយបារម្ភ។
«ការវិភាគរបស់ខ្ញុំគឺប្រហែលជាអង្គការមួយភាគបីនៃអង្គការដែលមានឈ្មោះរួចស្រាប់ក្នុងពេល បច្ចុប្បន្ននឹងប្រហែលជាបាត់ឈ្មោះនិងមិនអាចចុះឈ្មោះបានដោយសារទីមួយអង្គការមួយចំនួនគ្មានសកម្មភាពទាល់តែសោះនិងទីពីរអង្គការមួយចំនួនទៀតអត់មានលទ្ធភាពក្នុងការចុះឈ្មោះតាមនីតិវិធីដែលបានចែងនៅក្នុងច្បាប់នេះ។ ដូច្នេះយើងដឹងថាប្រហែលជាមានអង្គការតិចជាងមុនបន្ទាប់ ពីច្បាប់នេះចេញ»។
សេចក្តីថ្លែងការណ៍រួមបានបញ្ជាក់ថាចំណុចសំខាន់ដែលយើងខ្ញុំមានការព្រួយបារម្ភគឺៈទី១ការប៉ះ ពាល់ដល់សិទ្ធិជាមូលដ្ឋានរបស់ប្រជាពលរដ្ឋដែលត្រូវបានធានាដោយរដ្ឋធម្មនុញ្ញនៃព្រះរាជាណា ចក្រកម្ពុជា ទី២-ភាពស្មុគស្មាញលើលក្ខខណ្ឌនៃការចុះបញ្ជី និងកាតព្វកិច្ចមិនចាំបាច់នៃការបញ្ជូន របាយការណ៍និងសវនកម្ម និងទីបី-ភាពមិនច្បាស់លាស់នៃអត្ថន័យរបស់ពាក្យពេចន៍ដែលប្រើ ប្រាស់នៅក្នុងច្បាប់។
លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថាយើងនឹងទទួលយក អនុសាសន៍ល្អពីអង្គការមិនមែនរដ្ឋាភិបាលសម្រាប់យកមកធ្វើឱ្យសេចក្តីព្រាងច្បាប់អង្គការនិងសមាគម មិនមែនរដ្ឋាភិបាលនេះឲ្យកាន់តែប្រសើរ។ ប៉ុន្តែអនុសាសន៍របស់អង្គការសង្គមស៊ីវិលត្រូវតែបម្រើផលប្រយោជន៍របស់ប្រទេសកម្ពុជា និងប្រជាពលរដ្ឋខ្មែរ៕