ភ្ជាប់​ទៅ​គេហទំព័រ​ទាក់ទង

ជំងឺ​អាសន្នរោគ​កំពុង​រាតត្បាត​នៅ​កម្ពុជា


ក្រសួង​សុខាភិបាល​របស់​ប្រទេស​កម្ពុជា​បាន​ឱ្យដឹង​ថា ជំងឺ​អាសន្នរោគ​កំពុង​រាតត្បាត​នៅ​តាម​បណ្តា​ខេត្ត​មួយ​ចំនួន​ ​ ហើយ​កំពុង​ចាត់​វិធានការ​ទប់ស្តាត់។

នាង ​ធីតា​ វីន​សូម​ជូន​សេចក្តី​ពិស្តារ​អំពី​រឿង​នេះ។

មន្រី្ត​ផ្លូវការ​របស់​ក្រសួង​សុខាភិបាល​នៃ​ប្រទេស​កម្ពុជា​បាន​ឱ្យ​ដឹង​ថា​ ​នៅ​ក្នុង​អំឡុង​ពេល​នេះ​ យ៉ាង​ហោច​ណាស់​មាន​ប្រជា​ពលរដ្ឋ​ជាង​៤០០​នាក់​បាន​ឆ្លង​ជំងឺ​អាសន្ន​រោគ​ដែល​ជា​ជំងឺ​មួយ​ អាច​សម្លាប់​មនុស្ស​បាន​យ៉ាង​ឆាប់​រហ័ស​ បើ​សិន​មិន​ជួយ​បាន​ទាន់​ពេល​នោះ​ទេ។

លោក​វេជ្ជ​បណ្ឌិត ​សុខ ទូច ​អ្នក​នាំពាក្យ​ក្រសួង​សុខាភិបាល​ និង​ជា​ប្រធាន​នាយក​ដ្ឋាន​ប្រយុទ្ធ​នឹង​ ជំងឺ​ឆ្លង​នៃ​ក្រសួង​សុខាភិបាល​បាន​មាន​ប្រសាសន៍​ថា​ ​ជំងឺរាករូស​ស្រួច​ស្រាវ​បាន​ រាតត្បាត​នៅ​ក្នុង​ប្រទេស​កម្ពុជា​ចាប់​តាំងពី​ចុង​ឆ្នាំ​២០០៩​ រហូត​មក​ដល់​ពេល​នេះ​មាន​អ្នក​ជំងឺ​ ចំនួន​ជាង​៤០០​នាក់​បាន​រក​ឃើញ​ថា​ មាន​ជំងឺ​អាសន្ន​រោគ​ក្នុង​ចំណោម​មនុស្ស​ដែល​មាន​ជំងឺ​រាករូស​ទូទាំង​ប្រទេស​ចំនួន​ជាង​៨​ពាន់​នាក់​ ហើយ​ជំងឺ​នេះ​បាន​បណ្តាល​ឱ្យ​អ្នក​ជំងឺ​៥៩​នាក់​បាន​ស្លាប់។

«រោគ​សញ្ញា​អាសន្ន​រោគ​ដែល​ធ្ងន់ធ្ងរ​នោះ​រាករូស ​ហើយ​ក្អួត​ ​ហើយ​អត់មាន​ក្តៅ​ខ្លួន​ទេ​គឺ​ថា​ ក្អួត​ខ្លាំង​ណាស់​ហើយ​រាក​ដូចទឹក។ បាទ ​អញ្ចឹង​តែ​បី​ឬ​បួន​ម៉ោង​ខូង​ភ្នែក​ ខ្សោះ​ជាតិទឹក​អស់។ ​អានេះ​អត់​នៅ​បាន​ទេ។ ​ត្រូវ​ប្រញាប់​មក​មន្ទីរពេទ្យ​ភ្លាម​ដើម្បី​ទទួល​បាន​ការ​ព្យាបាល​ត្រឹមត្រូវ​ដើម្បី​ជៀស​វាង​គ្រោះថ្នាក់​ដល់​ជីវិត​របស់​គាត់។ ​នេះ​គឺ​ជា​ការ​រាតត្បាត​យ៉ាង​ខ្លាំង​ដោយ​ជំងឺ​រាករូស​ស្រួចស្រាវ​និង​ជំងឺ​អាសន្នរោគ​នៅ​ក្នុង​ប្រទេស​កម្ពុជា​ដែល​គេ​ដឹង​ថា​ ​យ៉ាងហោច​ណាស់​កើត​ឡើង​យ៉ាង​ធ្ងន់ធ្ងរ​នៅ​ក្នុង​ខេត្ត​មួយ​ចំនួន​ ដូចជា​ខេត្ត​ក្រចេះ​ កំពង់ចាម​ រតនៈ​គីរី​ និង​តំបន់​ផ្សេងៗ​មួយ​ចំនួន​ទៀត»។

ទោះបី​ជា​យ៉ាងណា​ក៏​ដោយ ​លោក​សុខ ទូច​បាន​មាន​ប្រសាសន៍​ថា​ ​ចំនួន​អ្នក​កើត​ជំងឺ​អាសន្ន​រោគ​អាច​មាន​ច្រើន​ជាង​នេះ​ ដោយសារ​បច្ចុប្បន្ន​ការ​ប្រមូល​ទិន្នន័យ​អ្នក​ជំងឺ​ពុំទាន់​បាន​ទូលំទូលាយ​នៅ​ឡើយ។

«យើង​មិន​បាន​បញ្ជាក់​ទេ​ ពីព្រោះ​ថា​ គាត់​នៅ​តាម​មូលដ្ឋាន​ នៅ​ព្រៃ​ជ្រៅ ​នៅ​ឆ្ងាយ។ ​គាត់​មិន​អាច​មក​បាន​ ​គឺ​គាត់​បាន​ស្លាប់ហើយ។ ​ក៏​ប៉ុន្តែ​អ្នក​ដែល​ឈឺ​ក្នុង​រង្វង់​គាត់​នោះ​ គឺ​យើង​អាច​យក​វត្ថុ ធាតុ​មក​បញ្ជាក់​បាន។​ ហើយ​យើង​ឃើញ​មាន​ការ​បញ្ជាក់​ថា​ ​មាន​អាសន្នរោគ។​ ជំងឺ​អាសន្នរោគ​មិនមែន​ត្រឹមតែ​រាតត្បាត​លើ​មនុស្ស​ពេញ​វ័យ​នោះ​ទេ។ ​ជំងឺ​នេះ​ក៏​នឹង​កំពុង​បាន​រាតត្បាត​យ៉ាង​ខ្លាំង​ទៅ​លើ​កុមារ​ផង​ដែរ»។

លោក​ វេជ្ជ​បណ្ឌិត ​Beat Richner ​ប្រធាន​មន្ទីរ​ពេទ្យ​គន្ធបុប្ជា​បាន​ឱ្យ​ដឹង​ថា​ ​ចាប់​តាំង​ពី​ខែ​ វិចិ្ឆកា​ឆ្នាំ​២០០៩​មក​ ​មាន​កុមារ​មក​សម្រាក​នៅ​មន្ទីរពេទ្យ​គន្ធបុប្ជា​ដែល​មាន​អាការៈ ​ក្អួត ​និង​រាករូស​ ដែល​សង្ស័យ​ថា​ ​អាច​មាន​ជំងឺ​អាសន្ន​រោគ​ចំនួន​១៣០០​នាក់​ក្នុង​នោះ​យ៉ាង​ហោច​ណាស់​កុមារ​ចំនួន​២៩០​នាក់​បាន​រក​ឃើញ​ថា​ ​មាន​ជំងឺ​អាសន្ន​ ​ហើយ​ចំនួន​ជំងឺ​អាសន្ន​រោគ​នេះ​អាច​មាន​ចំនួន​ច្រើន​ជាង​នេះ ។

លោក​វេជ្ជ​បណ្ឌិត​ Beat ​Richner​ បាន​លើក​ឡើង​ថា​ ជំងឺ​អាសន្នរោគ​បាន​កំពុង​បន្ត​ការ​កើន​ ឡើង​គួរ​ឱ្យ​ព្រួយ​បារម្ភ​ក្នុង​ខេត្ត​មួយ​ចំនួន​ ដូច​ជា​កំពង់ធំ ​សៀមរាប​ បាត់ដំបង ​និង​បន្ទាយ​ មានជ័យ​ជាដើម​ ដូច្នេះ​ជំងឺ​អាសន្នរោគ​នេះ​ត្រូវ​មាន​វិធានការ​ទប់​ស្កាត់​ជា​បន្ទាន់។

«វា​គឺ​ជា​បញ្ហា​ដ៏​ធំ​ បើ​សិន​ជា​គ្មាន​ចំណាត់​ការ​ដ៏​សមស្រប​ណា​មួយ​នោះ​ទេ​ ​ប្រហែល​ ជា​មិន​អាច​ទប់ស្កាត់​ការ​រីក​រាលដាល​នៃ​ជំងឺ​អាសន្នរោគ​នេះ​បាន​ទេ​ ​ហើយ​វា​អាច​ក្លាយ​ជា​បញ្ហា​ ដ៏​ធំ​ជាង​នេះ​ មាន​ន័យ​ថា​ ​ចំនួន​អ្នក​ជំងឺ​កាន់​តែ​ច្រើន​ឡើង។ ​ពួក​អ្នក​ទាំង​នោះ​មាន​តែ​ស្លាប់​ប៉ុណ្ណោះ»។

គេ​សង្កេត​ឃើញ​ថា​ ​នៅ​ក្នុង​ប្រទេស​កម្ពុជា​ទាំង​អនាម័យ​និង​បរិដ្ឋាន​នៅ​មាន​កម្រិត​នៅ​ឡើយ​ហើយ​ប្រជា​ពលរដ្ឋ​ខ្មែរ​មួយ​ចំនួន​ ជាពិសេស​អ្នក​ដែល​រស់​នៅ​តាម​ជនបទ​និង​អ្នក​ដែល​មាន​ជីវភាព​ក្សត់​ខ្សោយ​មិន​សូវ​បាន​យកចិត្ត​ទុកដាក់​ចំពោះ​ការ​ធ្វើ​អនាម័យ​ទៅ​លើក​ការ​បរិភោគ​ឡើយ​ដែល​ជាហេតុ​ធ្វើឱ្យ​ប្រជា​ពលរដ្ឋ​ទាំង​នោះ​មាន​ការ​ប្រឈម​មុខ​ខ្ពស់​ទៅ​នឹង​ការ​ឆ្លង​ជំងឺ​ផ្សេងៗ​ ដូច​ជា​ជំងឺ​រាករូស​ អាសន្ន​រោគ​និង​គ្រុន​ផ្តាសាយ​បក្សី​ជាដើម។

លោក​ប្រធាន​មន្ទីរ​ពេទ្យ​គន្ធ​បុប្ជា​បាន​ឱ្យដឹង​បន្ត​ថា​ ជំងឺ​អាសន្នរោគ​មាន​រោគ​សញ្ញា​រោគ​ ក្អួត​យ៉ាង​ខ្លាំង​ភ្លាមៗ​ ​បន្ទាប់​ពី​បាន​ឆ្លង​ជំងឺ​នេះ​ ​ក៏​ប៉ុន្តែ​អ្នក​ជំងឺ​មិនមាន​ក្តៅ​ខ្លួន​ឡើយ។​ចំណុច​សំខាន់​ដែល​បណ្តាល​ឱ្យ​ឆ្លង​ជំងឺ​នេះ​គឺ​ដោយសារ​តាម​រយៈ​ការ​លាង​ដៃ​ ឬ​មិន​បាន​ធ្វើ​អនាម័យ​ឱ្យ​បាន​ស្អាត​បន្ទាប់​ពី​ចេញ​ពី​បន្ទប់​ទឹក​ ​ហើយ​ភ្នាក់ងារ​ចម្លងមេរោគ​នេះ​គឺ​ជា​សត្វ​រុយ។

លោក​សុខ ទូច​បាន​បញ្ជាក់​ថា​ ​ជំងឺ​អាសន្នរោគ​មិនមែន​ជា​ជំងឺ​ដែល​កាច​សាហាវ​នោះ​ទេ​ ​ តែ​វា​ជា​ជំងឺ​មួយ​ដែល​យើង​ត្រូវ​មាន​ការ​ចាំបាច់​ និង​ប្រុង​ប្រយ័ត្ន​បំផុត​ក្នុង​ការ​ធ្វើ​អនាម័យ​ឱ្យ​បាន​ស្អាត​ជាប់ ជា​ប្រចាំ​ ដូច​ត្រូវ​លាង​ដៃ​ជា​មួយ​សាប៊ូ​ឱ្យ​បាន​ស្អាត​ ក្រោយ​ពី​ចេញ​ពី​បន្ទប់​ទឹក ​និងមុន​បរិភោគ។ ​ម្ហូបចំណី​អាហារ​ត្រូវ​មាន​អនាម័យ​ ជាពិសេស​នៅ​ក្នុង​អំឡុង​ពេល​រដូវ​ក្តៅ​នេះ​ ដើម្បី​ជៀស​ផុតពី​ ជំងឺ​អាសន្ន​រោគ៕

XS
SM
MD
LG