ភ្ជាប់​ទៅ​គេហទំព័រ​ទាក់ទង

បុណ្យ​ខួប​ឯករាជ្យ​ទី​៥៧​​អវត្តមាន​លោក​ជា​ស៊ីម


លោក​ជា ស៊ីម នៅ​ក្នុង​​ពិធី​មួយ​ជាមួយ​ថ្នាក់​ដឹក​នាំ​គណបក្ស​ប្រជាជន​កម្ពុជា​​២​រូប​ទៀត គឺ​លោក​ហេង សំរិន និង​លោក​ហ៊ុន​ សែន។

ប្រទេស​កម្ពុជា​បាន​ប្រារព្ធ​ពិធី​បុណ្យ​ឯករាជ្យ​ខួប​លើក​ទី​៥៧​ឆ្នាំ​ ​នៅ​ថ្ងៃ​នេះ ​ក្រោម​អធិបតី​ភាព​របស់​ព្រះ​មហា​ក្សត្រ​សម្ដេច​ព្រះ​បរមនាថ​ ​នរោត្តម​ ​សីហមុនី​ ​ក៏​ប៉ុន្ដែ​ពុំ​មាន​សេចក្ដី​ថ្លែង​ការណ៍​នយោ​បាយ​នោះ​ទេ។ ​លោកជា ស៊ីម​ ​ប្រធាន​គណបក្ស​កំពុង​គ្រប់គ្រង​ប្រទេស​ ​មិនមាន​វត្តមាន​នៅ​ក្នុង​ឱកាស​នេះ​ទេ។

ប្រធាន​គណបក្ស​ប្រជាជន​កម្ពុជា​ ​និង​ជា​ប្រធាន​ព្រឹទ្ធសភា​ គឺ​លោក​ជា ស៊ីម​ខកខាន​មិន​បាន​ចូលរួម​អបអរ​ពិធី​បុណ្យ​ឯករាជ្យ​ជាតិ​ជា​ផ្លូវការ​នៅ​ថ្ងៃ​អង្គារ​នេះ​ទេ ​ដោយសារ​បញ្ហា​សុខភាព។ ​នេះ​បើ​យោង​តាម​មន្ដ្រី​របស់​គណបក្ស​កាន់​អំណាច។

ប្រទេស​កម្ពុជា​ប្រារព្ធ​ពិធី​បុណ្យ​ឯករាជ្យ​ជាតិ​ខួប​លើក​ទី​៥៧​ឆ្នាំ​ ​នៅ​ថ្ងៃ​នេះ​ដោយ​មាន​ពិធី​ប្រទាន​ភ្លើង​ជ័យ​ ​ដោយ​ព្រះ​មហា​ក្សត្រ​សម្ដេច​ព្រះ​បរមនាថ​ ​នរោត្តម​ ​សីហមុនី។​ លោក​ប្រមុខ​រដ្ឋាភិបាល​ខ្មែរ​ ​ហ៊ុន សែន​ ​លោកហេង សំរិន​ ​ប្រធាន​រដ្ឋសភា​ ​និង​មន្ដ្រី​រាជការ​ ​រួមទាំង​សិស្សានុសិស្ស​ជាច្រើន​រយ​នាក់ ​បាន​ចូលរួម​ក្នុង​ពិធី​បុណ្យ​នេះ​ដែរ។​ ដោយ​ឡែក​ ​លោកជា ស៊ីមមិន​បាន​មាន​វត្តមាន​ក្នុង​ឱកាស​នេះ​ទេ។

លោក​អ៊ំ សារិទ្ធ​ ​អគ្គ​លេខាធិការ​ព្រឹទ្ធ​សភា​ ​និង​ជា​នាយក​ខុទ្ទកា​ល័យ​របស់​លោកជា ស៊ីម​បញ្ជាក់​ថា​ ​លោក​ប្រធាន​ព្រឹទ្ធ​សភា​ខ្មែរ ​និង​ជា​ប្រធាន​គណបក្ស​ប្រជាជន​កម្ពុជា​ បាន​ចាក​ចេញ​ទៅ​ព្យាបាល​រោគនៅ​ប្រទេស​សឹង្ហបុរី​ចាប់​តាំង​ពី​ថ្ងៃ​ច័ន្ទ​ម្សិលមិញ​ម្ល៉េះ​ ដោយ​បាន​ចេញ​ដំណើរ​លឿន​ជាង​ពេល​ធម្មតា​ចំនួន​បី​ខែ។

«លោកអញ្ជើញ​ចេញ​ទៅ​ពិនិត្យ​ជំងឺ​នៅ​ប្រទេស​សឹង្ហបុរី។​ ធម្មតា​ប្រាំមួយខែ​ ​ប៉ុន្ដែ​លើក​នេះ​បី​ខែ។ ​តាម​ពិត​ ​មិន​មាន​ហេតុការណ៍អ្វី​ធំ​ដុំ​ទេ។ ​ប៉ុន្ដែ​ជាការ​ ត្រួត​ពិនិត្យ​ធម្មតា"។

មន្ដ្រី​ជាន់​ខ្ពស់​គណបក្ស​ប្រជាជន​កម្ពុជា​ដដែលមិន​បាន​បញ្ជាក់​អំពី​អាការៈ​រោគ​របស់​លោក​ជា ស៊ីម​យ៉ាងណា​ទេ។

សូម​រំឭក​ថា​ ​ប្រទេស​កម្ពុជា​បាន​ស្ថិត​នៅ​ក្រោម​អាណានិគមន៍​របស់​ប្រទេស​បារាំង​អស់​រយៈ​ពេល​ចំនួន៩០​ឆ្នាំ​ ​ហើយ​បានឯករាជ្យ​ភាព​ពី​ប្រទេស​នេះ​វិញ​នៅ​ឆ្នាំ​១៩៥៣​ ​ក្រោម​បូជនីយ​កិច្ច​របស់​សម្ដេចឳ​ ​នរោត្តម​ ​សីហនុ ​នា​សម័យ​នោះ។

លោក​ជា ស៊ីម​នឹង​ឈាន​ដល់​វ័យ៧៨​ឆ្នាំ​ពេញលេញ​ ​នៅ​ថ្ងៃទី​១៥​ ខែវិច្ឆិកា​នេះ។ ​លោក​ត្រូវ​គេ​សង្កេត​ឃើញ​ថា​ ​មាន​ជំងឺ​ជា​ប្រចាំ។ ​កាល​ពី​ឆ្នាំ​២០០៨​ ​លោក​បាន​ចាក​ចេញ​ពី​ប្រទេស​កម្ពុជា​មួយ​រយៈ​ពេលខ្លី​ ដោយ​ហេតុផល​ជា​ផ្លូវការ​ថា​ ​ទៅ​ព្យាបាល​រោគ​នៅ​ក្រៅ​ប្រទេស​ ​ក្នុង​ពេល​ដែល​ប្រទេស​កម្ពុជា​ជាប់​គាំង​នយោបាយ​យ៉ាង​ពេញ​បន្ទុក​ ក្រោយ​ពី​ការ​បោះឆ្នោត​ខែ​កក្កដា។ ​ក្នុង​ឱកាស​នោះ​ ​លោក​ញ៉ឹក ប៊ុនឆៃ​ ​អនុ​ប្រធាន​ព្រឹទ្ធ​សភា​ចុះ​ហត្ថលេខា​ផ្ដល់​សុពល​ភាព​លើ​ការ​អនុម័ត​ការ​បោះឆ្នោត​ជា​កញ្ចប់​សម្រាប់​បង្កើត​រដ្ឋាភិបាល​ថ្មី។

លោក​យឹម សុវណ្ណ ​តំណាង​រាស្ដ្រគណបក្ស​សម រង្ស៊ី ​ដែល​ជា​គណបក្ស​ជំទាស់​ ហើយ​ដែល​បាន​ចូល​រួម​ក្នុង​ពិធី​បុណ្យ​ឯករាជ្យ​ជាតិ​នេះ​ដែរ​ ​មាន​ប្រសាសន៍​ថា​ ​លោកបាន​កត់​សម្គាល់​ពី​អវត្ត​មាន​របស់​លោក​ជា ​ស៊ីម ​ក្នុង​ពិធី​ផ្លូវ​ការ​នេះ​ ​ក៏ប៉ុន្ដែ​លោកមិន​មាន​សេចក្ដី​អត្ថាធិប្បាយ​អ្វី​ទេ។

ដោយ​ឡែក​លោកស្រី​ជា វណ្ណាត​ ​អ្នក​វិភាគ​ឯករាជ្យ​ពី​បញ្ហា​នយោបាយ​ខ្មែរ​ ​មាន​ប្រសាសន៍​ថា​ ​មិន​ទាន់​មាន​សញ្ញា​កើត​ចេញ​ពី​បញ្ហា​នយោបាយ​នៅ​ជុំវិញ​ការ​ចាក​ចេញ​ទៅ​ព្យាបាល​រោគ​របស់​លោក​ជា ស៊ីម​ នៅ​ក្រៅ​ប្រទេស​នោះ​ទេ។

«ដូច​ជា​មិនមាន​ស្នាម​អ្វី​ ​មើល​ទៅ​ឃើញ​ថា​ ​មិន​មាន​ការ​សន្និដ្ឋាន​ថា​ ​ទាក់ទង​ទៅ​នឹង​រឿង​នយោបាយ​អ្វីទេ​ ​ ព្រោះ​ថា​ ​មុន​ដល់​ដំណាក់​កាល​ហ្នឹង​ ​តែងតែ​មាន​ហេតុ​ការណ៍​អ្វី​កើត​ឡើង​បណ្ដើរៗ​ដែល​គួរ​ឲ្យ​ចាប់​អារម្មណ៍។​ ខ្ញុំ​យល់​ថា​ ​អវត្ត​មាន​នេះ​ប្រហែល​ជា​មក​ពី​មូល​ហេតុ​អ្វី​ផ្សេងៗ​ទៀត"។

យ៉ាង​ណា​ក៏​ដោយ​ ​លោកអ៊ំ សារិទ្ធ​មាន​ប្រសាសន៍​ថា​ ​លោក​ជា ស៊ីម​អាច​នឹង​វិល​ត្រឡប់​មក​បំពេញ​ការងារ​វិញ​នៅ​សប្ដាហ៍​ក្រោយ៕

XS
SM
MD
LG