ភ្ជាប់​ទៅ​គេហទំព័រ​ទាក់ទង

កម្ពុជា​សុំ​ឱ្យ​ថៃ​អនុម័ត​កិច្ច​ព្រមព្រៀង​ព្រំដែន


លោក ហោ ណាំហុង ​រដ្ឋមន្ត្រីការ​បរទេសកម្ពុជា

ភ្នំពេញ៖ ប្រទេស​កម្ពុជា​បាន​ស្នើ​សុំ​នៅ​ថ្ងៃ​ច័ន្ទ​នេះ​ ឱ្យ​រដ្ឋសភា​ថៃ​អនុម័ត​កិច្ចព្រមព្រៀង​ចំនួន​បី​របស់​គណៈកម្មការ​ព្រំដែន​ចម្រុះ​កម្ពុជា-ថៃ​ សំដៅ​ជំរុញ​ការបោះ​បង្គោល​ព្រំដែន​ក្នុង​នោះ​មាន​តំបន់​ប្រាសាទ​ព្រះវិហារ​ដែល​មាន​ជម្លោះ​រវាង​ប្រទេស​ទាំង​ពីរ។

ការស្នើសុំ​នេះ ​បាន​ធ្វើឡើង​នៅក្នុង​ពេល​ជួបពិភាក្សា​ការងារ​រវាង​លោក​រដ្ឋមន្ត្រីការ​បរទេស ហោ ណាំហុង ​និង​សមភាគី​ថៃ​របស់​លោក គឺ​លោក​កាសិត ភីរម្យ​ (Kasit Pirumya) ​នៅក្នុង​ទីក្រុង​ភ្នំពេញ​ និង​បន្ទាប់ពី​សភា​ថៃ ​បាន​ខកខាន​ការអនុម័ត​លើ​កិច្ច​ព្រមព្រៀងចំនួន​បី​របស់​គណៈកម្មការ​ចម្រុះ​ព្រំដែន​កម្ពុជា-ថៃ​ ជា​ច្រើន​លើក។

លោក​ហោ ណាំហុង ​បាន​ថ្លែង​ប្រាប់​ក្រុម​អ្នករាយការណ៍​ព័ត៌មាន​ក្រោយ​ពី​ជំនួប​នោះ​ថា៖

«ខ្ញុំ​បាន​សំណូមពរ​ថា​ ពេល​ណា​សភា​ថៃ​អនុម័ត​កិច្ចព្រមព្រៀង​បី​របស់​គណៈកម្មការ​ចម្រុះ​ព្រំដែន​ កម្ពុជា-ថៃ​ ហើយ​សុំ​ឱ្យ​ប្រជុំ​គណៈកម្មការ​ព្រំដែន​កម្ពុជា​-ថៃ​ ឱ្យ​បាន​រហ័ស​ដើម្បី​បោះ​បង្គោល​ព្រំដែន​ រវាង​ប្រទេស​កម្ពុជា​និងថៃ។ លោក កាសិត ភីរម្យ រដ្ឋមន្ត្រី​ការបរទេស​ថៃ ​បាន​និយាយថា​ ឥឡូវ​នេះ​ គណៈកម្មការ​សភា​កំពុង​ពិនិត្យ​មើល​ថា​តើ​កិច្ចព្រមព្រៀង​បី​របស់​គណៈកម្មការ​ចម្រុះ​ព្រំដែន​កម្ពុជា​-ថៃ​ នេះ​ស្ថិត​នៅ​ក្នុង​មាត្រា១៩០​ឬ​អត់។ ​បើ​កិច្ចព្រមព្រៀង​បី​របស់​គណៈកម្មការ​ចម្រុះ​ព្រំដែន​កម្ពុជា-ថៃ​មាន​នៅក្នុង​មាត្រា​១៩០​នៃ​រដ្ឋធម្មនុ​ញ្ញថៃ​ សភា​ថៃ​ត្រូវ​អនុម័ត។ បើ​កិច្ចព្រមព្រៀង​បី​របស់​គណៈកម្មការ​ ចម្រុះ​ព្រំដែន​កម្ពុជា​-ថៃ​មិន​មាននៅក្នុង​មាត្រា​១៩០​នៃ​រដ្ឋធម្មនុញ្ញ​ថៃ ​រដ្ឋាភិបាល​សម្រេច»។

លោក​ កាសិត ភីរម្យ បាន​ថ្លែង​ថា ​លោក​បាន​តែងតាំង​ឯកអគ្គរាជទូត​មួយ​រូប​សម្រាប់​ទទួល​បន្ទុក កិច្ចការ​ព្រំដែន​ដែល​នឹង​មក​ទីក្រុង​ភ្នំពេញ​ឆាប់ៗ​នេះ​ដើម្បី​ជួប​ពិភាក្សា​ការងារ​ព្រំដែន​ជាមួយ​លោក​វ៉ា គឹម ហុង​ ប្រធាន​គណៈកម្មការ​ព្រំដែន​កម្ពុជា។

ក្នុង​អំឡុង​ការ​ពិភាក្សា​គ្នា​នោះ​ លោក​រដ្ឋមន្ត្រី​ការបរទេស ​ហោ ណាំហុង ​ក៏​បាន​សុំឱ្យ​ភាគី​ថៃ​កុំប្រើ​អំពើ​ហិង្សា​ឬ​បាញ់​សម្លាប់​ប្រជាពលរដ្ឋ​ខ្មែរ​ដែល​បាន​ច្រឡំ​ឆ្លងដែន​ចូល​ទឹកដី​ថៃ​ដោយ​បញ្ជាក់​ថា​បើ​ប្រជា​ពលរដ្ឋ​ខ្មែរ​ធ្វើ​អ្វីមួយ​ខុស​ច្បាប់​នៅក្នុង​ទឹកដី​ថៃ អាជ្ញាធរ​ថៃ​គួរ​តែ​ចាប់​តាម​នីតិវិធី​ធម្មតា​និង​កុំ​ឱ្យ​ប្រើ​អំពើ​ហិង្សា។

លោក ​កាសិត ភីរម្យ ​បាន​សន្យា​ថា​នឹង​លើក​យក​សំណើ​នេះ​ទៅ​ពិភាក្សា​ដើម្បី បញ្ឈប់​អំពើ​ហិង្សានេះ។

លោក​អៀង សុផលឡែត ​អ្នក​នាំពាក្យ​ផ្ទាល់​របស់​លោកនាយករដ្ឋមន្ត្រី​ហ៊ុន សែន ​បាន​ថ្លែងប្រាប់​ក្រុម អ្នករាយការណ៍​ព័ត៌មានក្រោយពី​ជំនួប​ថា​ លោក​នាយករដ្ឋមន្ត្រី​ហ៊ុន សែន ​បាន​ប្រាប់​លោក​ កាសិត ភីរម្យ ​ថា​នេះ​ជា​ពេល​ដ៏ត្រឹមត្រូវ​និង​សមស្រប​មួយ​ដើម្បី​ជំរុញ​គ្រប់​យន្តការ​ទាំងអស់​សម្រាប់​សហការ​រួម​គ្នា​និង​ធ្វើការ​រួមគ្នា​ឆ្ពោះ​ទៅរក​ដំណោះស្រាយ​បញ្ហា​នានា។

នៅ​ក្នុង​ពេល​ជាមួយ​គ្នា​នេះ​ដែរ​ លោក​ឧត្តមសេនីយ៍ប្រាយុទ្ធ ចាន់​អូចា ​(Prayuth Chan-ocha) ​អគ្គ​មេបញ្ជាការ​កងទ័ព​ជើង​គោក​ថៃ​បាន​មក​បំពេញ​ទស្សនកិច្ច​ជាផ្លូវការ​រយៈពេល​ពីរថ្ងៃ​នៅ​កម្ពុជា​នា​ថ្ងៃ​ច័ន្ទ​នេះ​ដើម្បី​ជួប​ពិភាក្សា​ការងារ​ព្រំដែន​ជាមួយ​លោក​នាយករដ្ឋមន្ត្រី​ហ៊ុន សែន​ និង​មេបញ្ជាការ​កង​យោពល​ខេមរៈភូមិន្ទ​ជាន់ខ្ពស់​មួយចំនួន។

លោក​ឧត្តមសេនីយ៍ ឧត្តមដេត លីប៊ុត​ (Udomdet Leebut) ​មេបញ្ជាការ​យោធ​ភូមិភាគ​ទី១​ និង​លោក​ឧត្តមសេនីយ៍​ ថាវ៉ាត់ឆៃ សាមុទសាខន (Thawatchai Samutsakhon)​ មេបញ្ជាការ​យោធ​ភូមិភាគ​ទី២ ​បាន​ហែរហម​ដំណើរ​របស់​លោក​ឧត្តមសេនីយ៍​ប្រាយុទ្ធ ចាន់ អូចា ​ផងដែរ។

កាសែតបាងកកប៉ុស្តិ៍​ (Bangkok Post)​ បាន​រាយការណ៍​ថា​ ដំណើរ​ទស្សនកិច្ច​របស់​លោក​ឧត្តមសេនីយ៍ ​ប្រាយុទ្ធ​ ចាន់​អូចា​មក​កម្ពុជា​នេះ​ សំដៅ​ណែនាំ​ខ្លួន​ បន្ទាប់ពី​ត្រូវ​បាន​តែងតាំង​ជា​អគ្គមេបញ្ជា​កងទ័ព​ជើង​គោក​ថៃ​ ដើម្បី​ពង្រឹង​ចំណង​ទាក់ទង​យោធា​រវាង​ប្រទេស​ទាំងពីរ ​និង​ដើម្បី​ពិភាក្សា​បញ្ហា​នៅ​តំបន់​ប្រាសាទ​ព្រះវិហារ​ជាមួយ​ក្រុម​មេដឹកនាំ​យោធា​កម្ពុជា៕

XS
SM
MD
LG