ព្រឹទ្ធសភានិងរដ្ឋសភាកម្ពុជាបានបោះឆ្នោតជ្រើសតាំងអតីតសមាជិកក្រុមប្រឹក្សា ធម្មនុញ្ញ ២ រូប ឱ្យធ្វើជាតំណាងរបស់ស្ថាប័ននីតិបញ្ញត្តិ នៅក្នុងក្រុមប្រឹក្សាជាតិប្រឆាំង អំពើពុករលួយ ប៉ុន្តែក្រុមអ្នកវិះគន់មិនសូវមានជំនឿលើសមាសភាពនេះទេ។
លោក ជន សក្តា ជូនសេចក្តីរាយការណ៍ដូចតទៅ៖
ព្រឹទ្ធសភានិងរដ្ឋសភាបានតែងតាំងអតីតសមាជិកក្រុមប្រឹក្សាធម្មនុញ្ញ លោក ប្រាក់ សុខ និងលោក តុប សំ ឱ្យធ្វើជាតំណាងរបស់ខ្លួននៅក្រុមប្រឹក្សាជាតិប្រឆាំងអំពើពុករលួយនៅថ្ងៃអង្គារនេះ ដែលមន្ត្រីគណបក្សប្រឆាំង និងអង្គការសង្គមស៊ីវិលបាននិយាយថាពួកគេមិនសូវមានជំនឿលើសមាសភាពនេះទេ។
លោក តុប សំ អាយុ ៦៣ ឆ្នាំ បានទទួលសម្លេងឆ្នោតគាំទ្រចំនួន ៨៣ ទល់នឹង ២៣ សម្លេង ពីសមាជិករដ្ឋសភាដើម្បីក្លាយទៅជាតំណាង របស់រដ្ឋសភានៅក្នុងក្រុមប្រឹក្សាជាតិប្រឆាំងអំពើពុករលួយ។ លោក តុប សំ ធ្លាប់ធ្វើជាអនុរដ្ឋមន្ត្រីក្រសួងពាណិជ្ជកម្មពីឆ្នាំ ១៩៨៩ ដល់ឆ្នាំ ១៩៩៨ និងសមាជិកក្រុមប្រឹក្សាធម្មនុញ្ញរយៈពេល ១២ ឆ្នាំ តាំងពីឆ្នាំ ១៩៩៨ ដល់ឆ្នាំ ២០១០។
លោក ប្រាក់ សុខ អាយុ ៦៧ឆ្នាំ បានទទួលសម្លេងឆ្នោតគាំទ្រចំនួន ៤៥ ទល់នឹង ៨សម្លេងពីសមាជិកព្រឹទ្ធសភា ដើម្បីក្លាយទៅជាតំណាងរបស់ព្រឹទ្ធសភានៅក្នុងក្រុមប្រឹក្សាជាតិប្រឆាំងអំពើពុករលួយ។ លោក ប្រាក់ សុខ ធ្លាប់ធ្វើជាអនុប្រធានតុលាការកំពូល និង សមាជិកក្រុមប្រឹក្សាធម្មនុញ្ញ រយៈពេល ១២ ឆ្នាំ តាំងពីឆ្នាំ ១៩៩៨ ដល់ឆ្នាំ ២០១០។
ក្រុមប្រឹក្សាជាតិប្រឆាំងអំពើពុករលួយមានសមាជិកចំនួន ១១ រូប ដែលតំណាងឱ្យព្រះបរមរាជវាំង ព្រឹទ្ធសភា រដ្ឋសភា គណៈរដ្ឋមន្ត្រី ឧត្តមក្រុមប្រឹក្សានៃអង្គចៅក្រម អាជ្ញាធរសវនកម្មជាតិ និង ស្ថាប័នផ្សេងៗទៀត។
ក្រុមប្រឹក្សានេះមានភារកិច្ចកសាងយុទ្ធសាស្ត្រនិងនយោបាយប្រយុទ្ធប្រឆាំងអំពើពុករលួយ ពិគ្រោះយោបល់ និងផ្តល់អនុសាសន៏ដល់អង្គភាពប្រឆាំងអំពើពុករលួយជាប់ពាក់ព័ន្ធនឹងការងារប្រយុទ្ធប្រឆាំងអំពើពុករលួយ។
អង្គភាពប្រឆាំងអំពើពុករលួយបច្ចុប្បន្នស្ថិតនៅក្រោមទីស្តីការគណៈរដ្ឋមន្ត្រី។ព្រឹទ្ធសភានិងរដ្ឋសភានឹងបញ្ចូនឈ្មោះលោក តុប សំ និងលោក ប្រាក់ សុខ ទៅជូនរដ្ឋាភិបាល ដើម្បីចូលរួមជាមួយតំណាងផ្សេងៗទៀតដើម្បីស្នើសុំព្រះមហាក្សត្រឡាយព្រះហស្ថលេខាលើព្រះរាជក្រឹត្យតែងតាំងជាផ្លូវការ។
លោក តុប សំ និងលោក ប្រាក់ សុខ មន្ត្រីគណបក្សគ្រប់គ្រងអំណាច CPP បានប្តេជ្ញាចិត្តខិតខំបំពេញការងារថ្មីនេះ។
"ខ្ញុំមានអារម្មណ៍សប្បាយរីករាយ និងខិតខំធ្វើការទទួលខុសត្រូវចំពោះភារកិច្ចថ្មី។ លោកបានប្តេជ្ញាចិត្តខិតខំបំពេញការងារនេះ ឱ្យស័ក្តិសមនឹងសេចក្តីជឿទុកចិត្តរបស់ ព្រឹទ្ធសភាដែលបានបោះឆ្នោតជូនរូបលោក"។
លោកស្រី ម៉ម ស៊ីថា នាយីកាគណៈកម្មាធិការប្រឆាំងអំពើពុករលួយ បានថ្លែងថាយើងមិនមានជំនឿលើឯករាជ្យភាព និងប្រសិទ្ធភាពរបស់តំណាងព្រឹទ្ធសភា និងរដ្ឋសភាទាំង២រូបនេះ ក្នុងការ ប្រយុទ្ធប្រឆាំងនឹងអំពើពុករលួយពីព្រោះឥស្សរជនទាំងនេះ គឺជាមន្ត្រីគណបក្សគ្រប់គ្រងអំណាច។
"ឥឡូវសមាសភាពយើងអត់សូវមានជំនឿក្នុងការចាត់ការ។ យើងនៅតែមានកង្វល់ក្នុងការអនុវត្តន៍។ នេះគ្រាន់តែជាកង្វល់មួយដែលយើងបានទទួលព័ត៌មានអម្បាញ់មិញនេះ"។
លោកស្រីបានបន្តថា ក្រុមប្រឹក្សាជាតិប្រឆាំងអំពើពុករលួយនេះ អាចសម្រេចទៅលើរឿងក្តីពុករលួយតូចតាចដែលប្រព្រឹត្តដោយអ្នកគ្មានអំណាច ប៉ុន្តែមិនអាចសម្រេចទៅលើរឿងក្តីពុករលួយធំដុំ ដែលមានអ្នកមានអំណាចនៅពីក្រោយនោះទេ។
លោក សុន ឆ័យ តំណាងរាស្ត្រគណបក្សសម រង្សី បានថ្លែងថា លោក តុប សំ និងលោក ប្រាក់ សុខ ដែលធ្លាប់ធ្វើជាសមាជិកក្រុមប្រឹក្សាធម្មនុញ្ញមិនមានបទពិសោធន៍ប្រយុទ្ធប្រឆាំងអំពើពុករលួយនោះទេ ប៉ុន្តែប្រសិទ្ធភាពប្រឆាំងអំពើពុករលួយស្ថិតនៅលើឆន្ទៈពិតប្រាកដរបស់រដ្ឋាភិបាល។
"ខ្ញុំមិនចាប់អារម្មណ៍ទៅលើប្រវត្តិរបស់ឯកឧត្តមប្រាក់ សុខ និងឯកឧត្តមតុប សំទេ។ ប៉ុន្តែរឿងសំខាន់យើងត្រូវមានឆន្ទៈ ហើយការប្រើប្រាស់ច្បាប់ (ប្រឆាំងអំពើពុករលួយ) របស់យើងដែលមានភាពស្មុគស្មាញ អាចធ្វើទៅកើត។ យើងមិនអាចវិនិច្ច័យសមាសភាព ២ រូបនេះ (ថា)ហ៊ានធ្វើប៉ុណ្ណាដើម្បីបំពេញតួនាទីនោះ។ យើងនឹងរង់ចាំមើលទៅទៀត បាទ"។
លោក ប៉ែន ថុល សមាជិកក្រុមប្រឹក្សាធម្មនុញ្ញ ដែលបានធ្វើការជាមួយលោក ប្រាក់ សុខ និងលោក តុប សំ អស់រយៈពេល ៦ ឆ្នាំ បានបញ្ជាក់ថាលោក ប្រាក់ សុខ និងលោក តុប សំ មានទំនាក់ទំនង និងកិច្ចសហប្រតិបត្តិការយ៉ាងល្អជាមួយសមាជិកក្រុមប្រឹក្សាធម្មនុញ្ញ៧រូបទៀត និងធ្វើកិច្ចការអ្វីៗផ្អែកលើច្បាប់ទាំងស្រុង។
"មនុស្សដឹងខុសត្រូវ មានតម្រិះគ្រប់គ្រាន់ មានសមត្ថភាពគ្រប់គ្រាន់ និង ធ្វើកិច្ចការអ្វីៗច្បាស់លាស់ណាស់។ មនុស្សល្អត្រឹមត្រូវ ធ្វើកិច្ចការអ្វីៗមធ្យ័ត និងមានការស្រឡាញ់រាប់អានគ្នា"។
ច្បាប់ប្រឆាំងអំពើពុករលួយត្រូវបានអនុម័តដោយរដ្ឋសភា និងព្រឹទ្ធសភា នៅក្នុងខែមិនា និងព្រះមហាក្សត្រស្តេចបានឡាយព្រះហស្ថលេខានៅក្នុងខែមេសា ហើយច្បាប់នេះនឹងចូលជាធរមាននៅចុងឆ្នាំនេះ៕