ភ្ជាប់​ទៅ​គេហទំព័រ​ទាក់ទង

ក្រុម​គ្រូពេទ្យ៖​ កម្ពុជា​អាច​ប្រឈម​នឹង​ការបាត់​ជំនួយនិង​ការ​កើន​ឡើង​អត្រា​ឆ្លង​មេរោគ​អេដស៍


ជន​រង​គ្រោះ​ដោយ​ជំងឺ​អេដស៍​កំពុង​​អង្គុយ​នៅ​ខាង​ក្រៅ​ផ្ទះ​ទួល​សម្បូរ​ក្នុង​ក្រុង​ភ្នំពេញ។

ការស្រាវជ្រាវ​មួយ​ដែល​សហការ​ដោយ​វិទ្យាស្ថាន​របស់​សហរដ្ឋ​អាមេរិក​មួយ​បង្ហាញ​ថា​ ប្រទេស​កម្ពុជា​ត្រូវការ​បង្កើន​ការចំណាយ​ថែមទៀត​ដើម្បី​ប្រយុទ្ធ​ប្រឆាំង​នឹង​ការរីករាលដាល​នៃ​មេរោគ​អេដស៍។

ក្រុម​វេជ្ជបណ្ឌិត​របស់​សហរដ្ឋ​អាមេរិក​ និង​កម្ពុជា ​បាន​លើកឡើង​នៅថ្ងៃ​អង្គារ៍​នេះ​ថា​ប្រទេស​កម្ពុជា​គួរតែ​បង្កើន​ការចំណាយ​របស់​ខ្លួន​ឲ្យ​កើន​ដល់​ចំនួន ​៦៨​លាន​ដុល្លារ​ក្នុង​មួយឆ្នាំ​សម្រាប់​ការពារ​និង​ទប់ស្កាត់​ការរីករាលដាល​នៃ​មេរោគ​អេដស៍ ​ចាប់ពី​ពេលនេះ​រហូតដល់​ឆ្នាំ២០៣១​ហើយ​ជាមួយ​គ្នា​នេះ​កម្ពុជា​ត្រូវ​កាត់​បន្ថយ​ការពឹងផ្អែក​ទៅលើ​ជំនួយ​ថវិកា​សហគមន៍​អន្តរជាតិ។

លោក​វេជ្ជបណ្ឌិត​ សោភ័ណ​ វុនឋានៈ ​នាយករង​វិទ្យាស្ថាន​ជាតិ​សម្រាប់​សុខភាព​សាធារណៈ​ មាន​ប្រសាសន៍​ក្នុង​កិច្ច​ពិភាក្សា​នៅ​មន្ទីរ​រដ្ឋសភា​ក្នុង​ក្រុងភ្នំពេញ​ លើការ​ផ្ដល់​ហិរញ្ញប្បទាន​សម្រាប់​ទប់​ស្កាត់​ការរីករាលដាល​នៃ​ជំងឺ​អេដស៍​ថា​ ការចំណាយ​ទៅលើ​ការទប់ស្កាត់​ការរីករាលដាល​នៃ​ជំងឺ​អេដស៍​របស់​រដ្ឋាភិបាល​រហូត​មកទល់​ពេល​នេះ ​បានកើន​ដល់​ជាង ​៥០​ លាន​ដុល្លារ​ក្នុង​មួយឆ្នាំ។ ក្នុង​នោះ​៩០​ភាគរយ​នៃ​ការចំណាយ​គឺជា​ថវិកា​ដែល​បាន​មកពី​ប្រទេស​ផ្តល់​ជំនួយ។

លោក ​វេជ្ជបណ្ឌិត​ សោភ័ណ​ វុនឋានៈ ​បញ្ជាក់​ថា​យោងតាម ការប៉ាន់​ប្រមាណ​លើ​កំណើន​សេដ្ឋកិច្ច ​ការប៉ាន់​ប្រមាណ​លើ​និន្នាការ​នៃ​ការ​កាត់បន្ថយ​ជំនួយ​បរទេស​ ដូច្នេះ​ប្រទេស​កម្ពុជា​ត្រូវការ​បង្កើន​ការ​ចំណាយ​នូវ​ថវិកា​ផ្ទាល់​របស់​ខ្លួន​សម្រាប់​ការប្រឆាំង​នឹង​ជំងឺ​អេដស៍​រហូតដល់​ឆ្នាំ ២០៣១។

លោក​ សោភ័ណ​ វុនឋានៈ បាន​បញ្ជាក់​ថា៖

«សេណារីយោ ​hard choice II​ គឺ​តម្រូវ​ថវិកា​ជាង ​៦០​លាន​ដុល្លារ​ក្នុង​មួយឆ្នាំ»។

យោងតាម​របាយការណ៍​ស្រាវជ្រាវ​របស់​ក្រុម​វេជ្ជបណ្ឌិត​ និង​ក្រសួង​ហិរញ្ញ​វត្ថុ​កម្ពុជា​ក្រោម​ជំនួយ​របស់​បច្ចេកទេស​របស់​ក្រុម​វេជ្ជបណ្ឌិត​អាមេរិកាំង​មកពី​វិទ្យាស្ថាន​លទ្ធផល​សម្រាប់​ការអភិវឌ្ឍ​ដែល​មាន​ចំណង​ជើង​ថា ​តម្លៃ ​និង​ហិរញ្ញ​ប្បទាន​រយៈពេល​វែង​សម្រាប់​ទប់ស្កាត់​ការរីករាល​ដាល​ និង​ជំងឺ​អេដស៍​នៅ​កម្ពុជា​បាន​បង្ហាញ​ថា​ម្ចាស់​ជំនួយ​នានា​បាន​កាត់បន្ថយ​ការយកចិត្ត​ទុកដាក់រ​បស់​ពួកគេ​មក​លើ​ការទប់ស្កាត់​ការរីករាលដាល​ជំងឺ​អេដស៍ ​ហើយ​សម្លឹង​មើល​លើ​អាទិភាព​ផ្សេងៗ​ទៀត ដោយ​សារ​តែ​គាប់​ជួនគ្នា​ជាមួយ​នឹង​វិបត្តិ​សេដ្ឋកិច្ច​សកល ​និង​ដោយ​សារ​តែ​អត្រា​ប្រេវ៉ាឡង់​នៃ​មេរោគ​នេះ​មាន​កម្រិត​ទាប។ ហើយ​ជំនួយ​ថវិកា​របស់​ពួកគេ​នឹង​ត្រូវកាត់​បន្ថយ។

របាយការណ៍​ដដែល​លើក​ជា​ឧទាហណ៍​ថា​ទីភ្នាក់ងារ​សម្រាប់​ការ​អភិវឌ្ឍ​អន្ដរជាតិ​របស់​ប្រទេស​អង់គ្លេស​ នឹង​បិទ​ការិយាល័យ​របស់​ខ្លួន​នៅ​ប្រទេស​កម្ពុជា ​នៅឆ្នាំ ​២០១១​ ខាង​មុខ​នេះ ​ហើយ​ប្រទេស​នេះ​នឹង​បញ្ឈប់​ការផ្ដល់​ជំនួយ​សម្រាប់​កម្មវិធី​សុខភាព​ដល់​កម្ពុជា​នៅ​ឆ្នាំ ២០១៣។

លោក​សាស្ដ្រាចារ្យ​វេជ្ជបណ្ឌិត​ រីឆាដ ស្នូលនីក​ (Richard Snolnik) ​មកពី​សកល​វិទ្យាល័យ​ចច​វ៉ាស៊ីនតោន​ (George Washington University) ​និង​ជា​អ្នក​សម្រប​សម្រួល​ក្នុងការ​ធ្វើការ​ស្រាវជ្រាវ​លើ​តម្លៃ​នៃ​ការព្យាបាល​ជំងឺ​អេដស៍​នៅ ​កម្ពុជា ​មាន​ប្រសាសន៍​ថា ​លទ្ធផល​នៃ​ការស្រាវជ្រាវ​បាន​បង្ហាញ​ពី​ការសន្និដ្ឋាន​លើ​ចំណុច​សំខាន់ ៗ​ ចំនួន​បួន​នោះ ​គឺ​បើ​ទោះជា​កម្ពុជា​ទទួល​បាន​ជោគជ័យ​ក្នុងការ​ប្រយុទ្ធ​ទប់ទល់​នឹង ​ការរីក​រាលដាល​ នៃ​មេរោគ​អេដស៍​ និង​ជំងឺអេដស៍​ក៏ដោយ​ក៏​ជំងឺ​ឆ្លង​ដ៏ប្រល័យ​នេះ​នឹង​មិន​រលាយ​បាត់​នោះទេ។ ហើយ​ជម្រើស​នយោបាយ​ដែល​ប្រទេស​កម្ពុជា​ប្រើ​ក្នុង​ពេល​បច្ចុប្បន្ន​នេះ​អាច​នឹង​បង្ក​ឲ្យ​មាន​ភាព​ខុសគ្នា​យ៉ាងធំ​សម្បើម​ក្នុងការ​ចំណាយ​សម្រាប់​ទប់ទល់​នឹង​ជំងឺ​នេះ​ប្រកប​ដោយ​ប្រសិទ្ធភាព​នោះ។

«ជាពិសេស​នៅពេល​មាន​វិបត្តិសេដ្ឋកិច្ច ​មាន​ហានិភ័យ​ខ្លាំង​ណាស់ថា ​ដៃគូ​អភិវឌ្ឍន៍​របស់​កម្ពុជា ​នឹង​បញ្ឈប់​ការផ្ដល់​ជំនួយ​ហិរញ្ញវត្ថុ​ចំនួន ​៩០ភាគរយ​ដល់​កម្មវិធី​កម្ចាត់​មេរោគអេដស៍​និង ជំងឺ​អេដស៍។ ដូច្នេះ​ចំណុច​ទីបី​ដែល​យើង​រកឃើញ​នោះ​គឺថា ​រដ្ឋាភិបាល​កម្ពុជា​ និង​ដៃគូអ​ភិវឌ្ឍន៍​របស់​ខ្លួន​ត្រូវតែ​ធ្វើការ​រួមគ្នា​ដើម្បី​រៀបចំ​គម្រោង​ផ្ដល់​ថវិកា​មួយ។ ដូច្នេះ​នៅ​ពេល​ដែល​ដៃគូអ​ភិវឌ្ឍន៍​ចាប់ផ្ដើម​ដក​ខ្លួន​រដ្ឋាភិបាល​ចាប់ផ្ដើម​ជំនួស​ថវិកា​ផ្ទាល់​របស់​ខ្លួន។ ចំណុច​សន្និដ្ឋាន​ចុងក្រោយ​មាន​សារៈសំខាន់​ណាស់​ដោយសារ​តែ​ប្រទេស​កម្ពុជា​ទទួល​បាន​ជោគជ័យ​ក្នុង​ការប្រយុទ្ធ​ប្រឆាំង​នឹង​ការរីករាល​ដាល​នៃ​ជំងឺ​ អេដស៍ ​និង​មេរោគ​អេដស៍ ​តែ​បែរ​ជា​ជំនួយ​ត្រូវ​កាត់ផ្ដាច់​យ៉ាង​តក់ក្រហល់​នោះ ​កម្មវិធី​ប្រយុទ្ធ​នឹង​ជំងឺ​ អេដស៍​អាច​នឹង​បាត់បង់​ចីរភាព ​ហើយ​ចំនួន​នៃ​ការឆ្លង​មេរោគ​ថ្មីៗ​នឹង​កើនឡើង»។

បច្ចុប្បន្ន​កម្ពុជា​មាន​អ្នកផ្ទុក​មេរោគអេដស៍​ចំនួន​ប្រមាណ​ជា ​៦ ម៉ឺននាក់។ របាយការណ៍​ដែល​ស្រាវ​ជ្រាវ​រួមគ្នា​រវាង​ក្រុម​វេជ្ជបណ្ឌិត​កម្ពុជា ​និង​ក្រុម​វេជ្ជបណ្ឌិត​មកពី​សហរដ្ឋ​អាមេរិក​ និង​អ្នក​ស្រាវជ្រាវពី​ក្រសួង​ហិរញ្ញវត្ថុ​លើ​តម្លៃ​នៃ​ការព្យាបាល​ជំងឺ​អេដស៍​នៅ​កម្ពុជា​បាន​បង្ហាញ​ថា ​ប្រទេស​កម្ពុជា​បាន​ប្រយុទ្ធ​ប្រឆាំង​នឹង​ជំងឺ​អេដស៍​ប្រកប​ដោយ​ជោគ​ជ័យ​ហើយ​ករណី​ឆ្លង​ថ្មីៗ​បាន​ធ្លាក់ចុះ​ពី​ជាង

១៥.០០០ ​ករណី​ក្នុង​មួយឆ្នាំ​ នៅ​ទសវត្ស​រ៍​១៩៩០ ​មកត្រឹម​២.០០០​ ករណី​នា​ពេល​បច្ចុប្បន្ន​នេះ។

វេជ្ជ​បណ្ឌិត​ មាន ឈីវុន​ ទីប្រឹក្សា​ក្រសួង​សុខាភិបាល ​និង​ជា​នាយក​មជ្ឈមណ្ឌល​ជាតិ ដើម្បី​មេរោគ​ អេដស៍​និង​ជំងឺ​សើស្បែក ​និង​កាមរោគ ​មាន​ប្រសាសន៍​ថា​កម្ពុជា​ធ្វើ​បាន​ត្រឹមត្រូវ​នឹង​អាចកាត់​បន្ថយ​ការឆ្លង​ថ្មី​ថែម​ទៀត ​ក្នុង​រយៈពេល ​២០ ឆ្នាំ​ទៅមុខ​ទៀត។ ហើយ​ធនធាន​ថវិកា​ក៏​នឹង​ត្រូវ​បន្ដ​កើន​ឡើង​ដែរ។ ដូច្នេះ​ត្រូវ​មាន​វិនិយោគ​លើ​តម្លៃ​ថោក ​និង​មាន​ប្រសិទ្ធភាព។ លោក​វេជ្ជបណ្ឌិត​ មាន ឈីវុន ​ព្រមានថា​ ការបរាជ័យ​ណា​មួយ​ក្នុង​បញ្ហា​នេះ​នឹង​ធ្វើ​ឲ្យ​ការផ្ទុះ​នៃ​ការចម្លង​ថ្មី​កាន់តែ​ខ្លាំងក្លា។

លោកស្រី ​ហូ ណូន​ ប្រធាន​គណៈកម្មាការ​សុខាភិបាល ​សង្គមកិច្ច ​អតីត​យុទ្ធជន ​កិច្ចការ​នារី​ និង​បណ្ដុះបណ្ដាល​វិជ្ជា​ជីវៈ​របស់​រដ្ឋសភា​មាន​ប្រសាសន៍ថា ​ការផ្ដល់​ហិរញ្ញវត្ថុ​លើ​ការប្រយុទ្ធ​ប្រឆាំង​នឹង​ជំងឺ​អេដស៍​គួរតែ​ផ្ដោត​លើ​គោលដៅ​មួយ​ចំនួន។

«ហិរញ្ញ​ប្បទាន​លើ​ជំងឺ​អេដស៍ ​មេរោគ​អេដស៍​សម្រាប់​រយៈពេល​ខាង​មុខ​គួរផ្ដោត​លើ​អន្ដរាគមន៍​បង្ការលើ​គ្រប់​ប្រជាជន​គោលដៅ ​ជាពិសេស​ប្រជាជន​វ័យក្មេង​ បុរស​រួមភេទ​ជាមួយ​បុរស ​អ្នក​ប្រើប្រាស់​គ្រឿង​ញៀន​ និង​ប្រជាជន​ចំណាក​ស្រុក»។

ដោយឡែក​លោក​ ប្រាក់ ធុល​ អនុប្រធាន​គណៈកម្មាការ​ទី៨​ដដែល​នេះ​នៃ​រដ្ឋសភា​រំពឹង​ថា​រដ្ឋាភិបាល​នឹង​ពិចារណា​លើ​ការផ្ដល់​ហិរញ្ញវត្ថុ​ដែល​នឹង​មាន​កម្រិត​កើនឡើង​នេះ។

«យើង​សង្ឃឹម​ថា ​ រាជរដ្ឋាភិបាល​ប្រាកដ​ជា​យកចិត្ត​ទុកដាក់​លើ​ហិរញ្ញប្បទាន​នេះ ​រួម​ជាមួយនឹង​ដៃ គូអភិវឌ្ឍន៍នានា»។

មេរោគអេដស៍​កើត​និង​ឆ្លង​រាតត្បាត​ក្នុង​ពិភពលោក​យើង​នេះ​ ចាប់តាំង​ពី​ប្រមាណ​ជា ៣០ ឆ្នាំមកហើយ។ ដោយ​ឡែក​ប្រទេស​កម្ពុជា​ ត្រូវបាន​គេ​រកឃើញ​ថា​ មាន​ការឆ្លង​រាតត្បាត​នៃ​ជំងឺ​នេះ​នៅ​ចាប់​តាំង​ពីឆ្នាំ ១៩៩១ ​មកម្ល៉េះ។ ការចម្លង​មេរោគ​អេដស៍​ក្នុង​ពេល​នេះ​ត្រូវគេ​រកឃើញ​តាមរយៈ​ស្ដ្រី​រក​ស៊ី​ផ្លូវភេទ ​តាមរយៈ​បុរស​រួមភេទ​ដូចគ្នា ​ឬ​ហៅថា ​MSM នឹងតាមរយៈ​ការចាក់​ថ្នាំញៀន​ដោយ​ប្រើ​ម្ចុល​រួម​គ្នា​ជា​ដើម៕

XS
SM
MD
LG