ភ្ជាប់​ទៅ​គេហទំព័រ​ទាក់ទង

កំពុង​អង្គុយ​នៅ​ក្រោយ​ខ្ទម​ដ៏​តូច​មួយ ​ដែល​ធ្វើ​អំពី​ឈើ​តូច​ៗ ​និង​ប្រក់​សំពត់​កៅស៊ូ​ចាស់​ៗ​ អ្នកស្រី ​ឃួន ​តឿន ​អាយុ​៣៣​ឆ្នាំ​ បាន​យំ​ខ្សិបខ្សួល​យ៉ាង​ខ្លាំង​ បន្ទាប់​ពី​កូន​របស់​អ្នកស្រី​បាន​ស្លាប់​បាត់បង់​ជីវិត​កាល​ពី​ថ្ងៃ​ចន្ទ។

«ខ្ញុំ​អាណិត​កូន​របស់​ខ្ញុំ​ណាស់!»។

ទារក​ឈ្មោះ​ចាន់ សំណាង ​អាយុ​៩​ខែ ​បាន​ស្លាប់​បាត់បង់​ជីវិត​យ៉ាង​អាណោចអាធម៌​កាល​ពី​វេលា​ម៉ោង​៤​ល្ងាច ​ថ្ងៃ​ចន្ទ​ម្សិល​មិញ​នេះ​ នៅ​មន្ទីរពេទ្យ​គន្ធបុប្ផា​ក្រោយ​ព្រះបរមរាជវាំង​ នា​ក្រុង​ភ្នំពេញ ​បន្ទាប់​ពី​បាន​សម្រាក​ព្យាលបាល​អស់​រយៈពេល​ជាង​មួយ​ខែ។

ឪពុក​ម្តាយ​កុមារ​ជន​រងគ្រោះ​បាន​និយាយ​ថា ទារក​ចាន់ ​សំណាង ​បាន​ធ្លាក់​ខ្លួន​ឈឺ​រ៉ាំរ៉ៃ​អស់​ពេល​ជា​យូរ​មក​ហើយ​ បន្ទាប់​ពី​ក្រុម​គ្រួសារ​បាន​ទទួល​រងគ្រោះ​ជាមួយ​នឹង​ប្រជាពលរដ្ឋ​នៃ​សហគម​បុរីកីឡា​ដទៃ​ផ្សេងទៀត ​ដោយសារ​តែ​ការ​បណ្តេញ​ចេញ​ដោយ​បង្ខំ​កាល​ពី​ខែ​មករា​ កន្លង​ទៅ​នេះ។

សព​ទារក​ចាន់ សំណាង​ ត្រូវ​បាន​ឪពុកម្តាយ​បាន​ប្រគល់​ទៅ​ឲ្យ​ក្រុម​គ្រូពេទ្យ​ជា​អ្នក​រៀបចំ​ដោយសារ​តែ​គ្មាន​ថវិកា​សម្រាប់​ធ្វើ​បុណ្យ។

អ្នកស្រី ​ឃួន ​តឿន ​ម្តាយ​របស់​ទារក​ចាន់ ​សំណាង ​បាន​និយាយ​ថា ដោយសារ​តែ​ការ​រស់នៅ​របស់​អ្នក​ស្រី​នៅ​កន្លែង​ដែល​មាន​បរិស្ថាន​មិន​ស្អាត​បាន​បណ្តាល​ឲ្យ​កូន​របស់​អ្នកស្រី​បាន​ឆ្លង​ជំងឺ​ស្លាប់។

«ឈូស​ឆាយ​ផ្ទះ​ហ្នឹង​មក​ កូន​ខ្ញុំ​មាន​ការ​ក្តៅ​គ្រុញ​រាគអាចម៍​ ព្រោះ​រវល់​ខ្ញុំ​ដើរ​តាម​តវ៉ា​រហូត​មិន​ដឹង​ថា​កូន​ឈឺ​ទេ។ ​ដល់​ពេល​ឃើញ​ថា​កូន​វា​រាគ​ខ្លាំង ​ហើយ​ហើម​ ដល់​ពេល​យក​ទៅ​ពេទ្យៗ​ពេទ្យ​ថា វា​ឈឺ​ខ្លាំង​មើល​មិន​បាន​ទេ»។

ប្រជាពលរដ្ឋ​ប្រមាណ​១១៧​គ្រួសារ ​ដែល​នៅ​សេសសល់​ពី​ការ​បណ្តេញ​ចេញ​ដោយ​បង្ខំ​ពី​សហគមន៍​បុរីកីឡា​បាន​មក​ចង​តង់កៅស៊ូ​ចាស់​ៗ ​និង​ជញ្ជាំង​ពី​កន្ទេល​ចាស់​ៗ ​សម្រាប់​ធ្វើ​តូប​ស្នាក់​នៅ។ ក្រុម​គ្រួសារ​ភាគច្រើន​រស់នៅ​ក្បែរ​ទឹកស្អុយ ​និង​គំរសំរាម​ដែល​រុំជំជិត​ដោយសារ​សត្វរុយ​ ជាមួយ​នឹង​ការ​លាយ​ឡំ​ក្លិនស្អុយ​ដែល​ភាយ​ចេញ​ពី​គំនរសំរាម ​ហើយ​គ្មាន​ទេ​បង្គន់​អនាម័យ​បន្ទូរបង់​ឲ្យ​បាន​ត្រឹមត្រូវ។ ​ចំណែក​ឯ​ទឹក​ស្អាត​សម្រាប់​ប្រើប្រាស់​ក៏​មិន​គ្រប់គ្រាន់​ដែរ។

ប្រជាពលរដ្ឋ​បាន​សង់​ខ្ទម​តូច​ៗ​ សម្រាប់​ស្នាក់នៅ ​និង​អ្នក​ខ្លះ​ក្រាល​សំពត់​កៅស៊ូ​សម្រាប់​គេង​ផ្ទាល់ដី​ និង​មួយ​ចំនួន​ទៀត​មាន​គ្រែ​សម្រាប់​គេង។

អ្នកស្រី ​សោម ​សុម៉ាលី ​ប្រធាន​ក្រុម​ទី​៣​ នៃ​សហគម​បុរីកីឡា​បាន​និយាយ​ថា​មាន​កុមារ​ជា​ច្រើន​មាន​ជំងឺ​ក្អក​ និ​ងក្តៅ​ខ្លួន​ដោយសារ​តែ​ពួក​គេ​មិន​អាច​ទ្រាំ​នឹង​បរិស្ថាន​ជុំវិញ​របស់​ពួក​គេ​បាន។

«ក្មេង​នៅ​ទីនេះ​ ឈឺ​ច្រើន​ដែរ​ហ្នឹង​។ ​ក្តៅ​ត្រជាក់​ៗ​មិន​ទៀង​ដែរ​ សូម្បី​តែ​កូនខ្ញុំ​។ ​ភាគច្រើន​ក្អក​ក្តៅ​តែ​ម្តង។ ​ដោយសារ​តែ​ចំហាយ​ជ្រំ​ហ្នឹង​ វា​ឥត​ល្អ ​ហើយ​ណាមួយ​ហ្នឹង​ខាង​លើ​ហ្នឹង​គេ​បោះ​សំរាម​មក​ ដុំថ្ម​ សំបក​ដូង​អីញ្ចឹង។ ​មុន​ដំបូង​កូន​ខ្ញុំ​ពីរ​នាក់​ ធ្លាប់​ត្រូវ​ពក​ក្បាល»។

នៅ​ចម្ងាយ​ប្រមាណ​ពីរ​ម៉ែត​ពី​ផ្ទះ​ទារក​រងគ្រោះ ​អ្នកស្រី​កែវ ​ថា ​អាយុ​៥៨​ឆ្នាំ​ បាន​និយាយ​ថា ចៅ​របស់​អ្នកស្រី​ពីរ​នាក់​កំពុង​តែ​ធ្លាក់​ខ្លួន​ឈឺ។

«ឈឺ​ដល់​តែ​ពីរ​នាក់ ​មួយ​អាយុ​មួយ​ខួប មួយ​ទៀត​អាយុ​ប្រាំពីរ​ខែ។ ពីរ​នាក់​ហ្នឹង​តូច​ៗ​ហ្នឹង​ ឈឺ​រហូត។ ​សុំ​ឲ្យ​រដ្ឋាភិបាល​ជួយ​រក​ទី​ជម្រក​ឲ្យ​ខ្ញុំ​នៅ​កន្លែង​សំរាម​ហ្នឹង ​នៅ​ប្រក់​តង់​ហ្នឹង​ក្តៅណាស់ ​ហើយ​ឥត​មាន​អី​ហូប​ផង​។ ​ណាមួយ​ចៅ​សុទ្ធ​តែ​កំព្រា ​មាន​ម៉ែ​ឥត​ឪពុក ​មាន​ឪពុក​ឥត​ម្តាយ​។ ​ខ្ញុំ​ហ្នឹង​ចាស់​ហើយ​ មិន​ដឹង​ទៅ​រក​អី​បាន​ទេ»។

ទារក​ចាន់ ​សំណាង ​បន្ទាប់​ពី​បាន​ស្លាប់​បាត់បង់​ជីវិត​គ្មាន​ក្រុមហ៊ុន​ណា​ចេញ​សំណង​ និង​ផ្តល់​សោហ៊ុយ​សម្រាប់​ចេញ​ធ្វើ​បុណ្យ​ទេ​។ ​នេះ​បើ​តាម​ការ​បញ្ជាក់​ពី​ឪពុកម្តាយ​របស់​កុមារ​រងគ្រោះ។

អ្នកស្រី​ស៊ុយ ​ស៊ីផាន​ ប្រធាន​ក្រុមហ៊ុន​ផានអ៊ីម៉ិច​ ដែល​ជា​ដើមចម​ក្នុង​ការ​ដឹកនាំ​កម្លាំង​បណ្តេញ​ប្រជាពលរដ្ឋ​ចេញ​ដោយ​បង្ខំ​ពី​សហគម​បុរីកីឡា​មិន​បាន​ធ្វើ​អត្ថាធិប្បាយ​ទេ​ ដោយ​អ្នកស្រី​និយាយ​ថា​កំពុង​តែ​ជាប់​រវល់​ប្រជុំ។

«មាន​ស្អី​ចាំ​ល្ងាច ​ឬ​ក៏​ព្រឹក»។

លោក​មឿន ​តុលា ​ប្រធាន​កម្មវិធី​សិទ្ធិ​ការងារ​នៃ​មជ្ឈមណ្ឌល​អប់រំ​ច្បាប់​សម្រាប់​សហគម​ បាន​និយាយ​ថា​រដ្ឋាភិបាល​បាន​ខកខាន​មិន​បាន​បំពេញ​កាតព្វកិច្ច​លើ​កត្តិកាសញ្ញា​ស្តីពី​សេដ្ឋកិច្ច​ និង​សង្គមកិច្ច​ ដែល​រដ្ឋាភិបាល​បាន​ផ្តល់​សច្ចាបណ្ណ។​ លោក​បាន​បញ្ជាក់​ថា​ប្រជាពលរដ្ឋ​នៃ​សហគមន៍​បុរីកីឡា​ ក្រោយ​ពី​បាន​បណ្តេញ​ចេញ​ដោយ​បង្ខំ ​ពួក​គេ​មិន​ត្រូវ​បាន​ធានា​តាម​កត្តិការសញ្ញា​នេះ​ទេ៕

XS
SM
MD
LG