ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អង្គការ​លីកាដូ​​ព្រួយបារម្ភ​អំពី​ការ​ចាប់​ខ្លួន ​និង​ការ​បាញ់​ប្រហារ​​អ្នក​តវ៉ា​រឿង​ជម្លោះ​ដីធ្លី


អ្នក​ភូមិ​បុរីកីឡា​ប្រឈមមុខ​ដាក់​អាជ្ញាធរ​ដែល​បង្ខំឲ្យ​ពួកគេចាកចេញ​ពីលំនៅដ្ឋាន។
អ្នក​ភូមិ​បុរីកីឡា​ប្រឈមមុខ​ដាក់​អាជ្ញាធរ​ដែល​បង្ខំឲ្យ​ពួកគេចាកចេញ​ពីលំនៅដ្ឋាន។

អង្គការ​សិទិ្ធ​មនុស្ស​លីកាដូ​បាន​ចេញ​ផ្សាយ​របាយការណ៍​មួយ​នៅ​ថ្ងៃ​ព្រហស្បតិ៍​នេះ​ ដើម្បី​សម្តែង​ការ​ព្រួយ​បារម្ភ​អំពី​ការ​ចាប់​ខ្លួន ​និង​ការ​បាញ់​ប្រហារ​ទៅ​លើ​អ្នក​តវ៉ា​រឿង​ជម្លោះ​ដីធ្លី​ក្នុង​រយៈពេល​បី​ខែ​កន្លង​មក​នេះ។

របាយការណ៍​នេះ​ បាន​ធើ្វ​ឡើង​ស្របពេល​ដែល​អ្នក​ភូមិ​ជាង​២០០​នាក់​នៅ​ខេត្ត​កំពង់ស្ពឺ​បាន​នាំគ្នា​តវ៉ា​នៅ​មុខ​តុលាការ​ ទាមទារ​ឲ្យ​ដោះលែង​អ្នក​ជាប់​ឃុំ​ចំនួន​៩​នាក់​ទាក់ទង​នឹង​រឿង​ជម្លោះ​ដីធ្លី។

អង្គការ​សិទិ្ធ​មនុស្ស​លីកាដូ​បាន​បញ្ជាក់​នៅ​ក្នុង​សេចក្តី​ថ្លែង​ការណ៍​ថា​ ឧប្បត្តិ​ហេតុ​បាញ់​យ៉ាង​តិច​៥​លើក​ ដោយ​កង​កម្លាំង​ប្រដាប់​អាវុធ​បាន​បើក​ការ​បាញ់​ប្រហារ​ទៅ​លើ​ពួក​អ្នក​តវ៉ា ​ដែល​ធ្វើឲ្យ​អ្នក​តវ៉ា​១៩​នាក់​រងរបួស​នៅ​កន្លែង។

សេចក្តីថ្លែង​ការណ៍​នេះ​បាន​លើកឡើង​ថា​ ឧប្បត្តិហេតុ​នីមួយៗ​ត្រូវ​បាន​ចងក្រង​ជា​ឯកសារ​វីដេអូ ​និង​រូប​ថត ​ប៉ុន្តែ​ជន​ល្មើស​បាន​រត់​គេច​ពី​ការ​ដាក់​ទណ្ឌកម្ម ​ដែល​ជា​ឧទាហរណ៍​ប្រព័ន្ធ​និទណ្ឌភាព​ដ៏​គ្រោះថ្នាក់​របស់​ប្រទេស​កម្ពុជា។

លោកស្រី​ ពុង ​ឈីវកេក ​ប្រធាន​អង្គការ​សិទិ្ធ​មនុស្ស​លីកាដូ ​បាន​បញ្ជាក់​ក្នុង​សេចក្តីថ្លែង​ការណ៍​ថា​ ឧប្បត្តិហេតុ​ថ្មីៗ​ទាំង​នេះ​គឺ​ជា​ជម្ងឺ​នៃ​អំពើ​អាក្រក់​កើន​ឡើង​នៅ​ក្នុង​សង្គម​កម្ពុជា។

លោកស្រី​ ពុង​ ឈីវកេក​បាន​បន្ថែម​ថា​ វា​ដល់​ពេល​ដោះស្រាយ​មូលហេតុ​ឫស​គល់​នានា​នៃ​អំពើ​អាក្រក់​នេះ​ដើម្បី​ធានា​នូវ​សមធម៌ ​តម្លាភាព​ និង​ភាព​ត្រឹមត្រូវ​ក្នុង​សិទិ្ធ​ដីធ្លី។

សេចក្តី​ថ្លែង​ការណ៍​នេះ​បាន​លើក​យក​ករណី​បាញ់​នៅ​ខេត្ត​កំពង់ស្ពឺ ​ខេត្ត​បាត់ដំបង​ រាជធានី​ភ្នំពេញ ​ខេត្ត​រតនគីរី ​និង​ខេត្ត​ក្រចេះ។

លោក​អំ ​សំអាត ​ប្រធាន​ផ្នែក​ស៊ើបអង្កេត​នៃ​អង្គការ​សិទិ្ធ​មនុស្ស​លីកាដូ ​បាន​ថ្លែង​ថា ​ក្នុង​រយៈពេល​បី​ខែ ​ការ​បាញ់​ប្រហារ​ចំនួន​ប្រាំ​ករណី​បាន​កើត​ឡើង ​ដោយសារ​តែ​ការ​រំលោភ​ដីធ្លី ​ដែល​កើត​ចេញ​ពី​ការ​តវ៉ា​ និងកើត​ចេញ​ពី​ការ​បណ្តេញ​ប្រជា​ពលរដ្ឋ​ចេញ​ពី​ផ្ទះ​សម្បែង​របស់​ពួក​គាត់​ដោយ​បង្ខំ។

«មាន​ទំនាស់​ធ្ងន់ធ្ងរ។ ​មាន​ការ​បាញ់ប្រហារ។ ​មាន​ការ​រងរបួស។ ​មាន​ការ​បណ្តេញ​ចេញ។ ​យើង​ចាត់​ទុក​ថា ​វា​ជា​ករណី​រំលាភ​ទៅ​លើ​សិទិ្ធ​មនុស្ស​ ក៏ដូច​ជា​រំលោភ​ទៅ​លើ​សិទិ្ធ​មាន​ដីធ្លី ​និង​សិទិ្ធ​មាន​លំនៅដ្ឋាន​របស់​ប្រជា​ពលរដ្ឋ»។

លោក​ឯក​ ថា ​អ្នក​នាំពាក្យ​អង្គភាព​ព័ត៌មាន ​និង​ប្រតិកម្ម​រហ័ស​នៃ​ទីស្តីការ​គណៈ​រដ្ឋមន្រ្តី​ បាន​ថ្លែង​ថា​ រដ្ឋាភិបាល​មិន​បាន​បោះបង់ចោល​បញ្ហា​សិទិ្ធ​មនុស្ស​ទេ។

«អី្វ​ដែល​យើង​អាច​ធើ្វ​បាន​ដើម្បី​អភិវឌ្ឍ​ប្រទេស​ឲ្យ​បាន​ចីរភាព​ទាំង​ផ្នែក​ផ្លូវ​ច្បាប់​ ទាំង​ការងារ​បច្ចេកទេស ​និង​គោរព​ទៅ​តាម​វប្បធម៌ ​ប្រពៃណី​របស់​យើង​ផង​ដែរ។ ​យើង​ធើ្វ​អ្វីៗ ​ដើម្បី​ផល​ប្រយោជន៍​ប្រជា​ពលរដ្ឋ​ និង​ប្រទេស​ជាតិ»។

ស្របពេល​ជាមួយ​គ្នា​នេះ​ អ្នក​ភូមិ​ជាង​២០០​នាក់​មក​ពី​ឃុំ​អមលាំង​ ស្រុក​ថ្ពង​ ​ខេត្ត​កំពង់ស្ពឺ ​បាន​មក​ជួបជុំ​គ្នា​នៅ​មុខ​តុលាការ​ ដើម្បី​ទាមទារ​ឲ្យ​តុលាការ​ជួយ​រក​យុត្តិធម៌ ​លើកលែង​ទោស ​និង​ដោះលែង​អ្នក​ជាប់​ឃុំ​៩​នាក់​ ទាក់ទង​នឹង​រឿង​ជម្លោះ​ដីធ្លី​ ពីព្រោះ​អ្នក​ទាំង​នោះ​មិន​មាន​ទោស​កំហុស​ដូច​ការ​ចោទ​ប្រកាន់​នោះ​ទេ។

ក្រុមហ៊ុន​ Phnom Penh Sugar​ បាន​ចោទ​ប្រកាន់​អ្នក​ទាំង​នេះ​អំពី​ការ​រំលាភ​យក​ដី ​និង​បំផ្លិច​បំផ្លាញ​ទ្រព្យ​របស់​ក្រុមហ៊ុន​ក្នុង​ជម្លោះ​ដីធ្លី​ទំហំ​ជិត​៧០០០​ហិចតា​នៅ​ឆ្នាំ​២០១០។

អ្នកស្រី​យឹម​ ពៅ ​អាយុ​៣៤​ឆ្នាំ​ នៅ​ភូមិ​អូរព្រឡៅ ​ឃុំ​អមលាំង ​បាន​និយាយ​យ៉ាង​ដូច្នេះ​ថា៖

«ឥឡូវ​យើង​មក​សុំ​ឲ្យ​គេ​ដោះ​ខ្លួន​យាយ​នួន។ ​គាត់​អត់ព្រម​ឲ្យ​ដី​ទៅ​គេ ​ហើយ​អញ្ចឹង​គេ​ចាប់​ខ្លួន​គាត់។ ​បើ​គាត់​អត់មាន​អី្វ​ផង ​គាត់​ត្រូវ​បាន​គេ​ចាប់​ខ្លួន​គាត់។ ​ព្រោះ​រឿង​អយុត្តិធម៌​ហ្នឹង​ហើយ​បាន​ខ្ញុំ​មក​សុំ​ខ្លួន​យាយ​នួន​ហ្នឹង​បាន​ចេញ​ពី​ការ​ឃុំឃាំង​វិញ»។

លោក​យ៉ន ​ភុល ​អាយុ​៥៣​ឆ្នាំ​នៅ​ភូមិ​អូរ​ព្រឡៅ ​ឃុំ​អមលាំង​ ដែល​ភរិយា​របស់​លោក​ត្រូវ​ជាប់​ឃុំ​រឿង​ជម្លោះ​ដីធ្លី​ បាន​បញ្ជាក់​ថា​ លោក​មាន​ការ​សោក​ស្តាយ​យ៉ាង​ខ្លាំង​ចំពោះ​ការ​ចាប់​ខ្លួន​ភរិយា​របស់​លោក​ដែល​គ្មាន​កំហុស។ ​លោក​មាន​ការ​តូចចិត្ត​យ៉ាង​ខ្លាំង​ចំពោះ​អំពើ​អយុតិ្តធម៌​នេះ។

«យើង​និយាយ​មិន​ចេញ​ទេ​ ពីព្រោះ​វា​ជ្រុលហួស​ហេតុ។ ​សម្រាប់​ខ្ញុំ ​វា​អយុតិ្ត​ធម៌​ពេក​ហើយ ​ព្រោះ​ថា ​គ្រាន់​តែ​ចាប់​ប្រពន្ធ​បាន ​ហៅ​ខ្ញុំ​ទៅ​ចរចា​ប្រគល់​ដី​អញ្ចឹង»។

របាយ​ការណ៍​របស់​អង្គការ​សិទិ្ធ​មនុស្ស​លីកាដូ​បាន​បង្ហាញ​ថា ​ក្នុង​ឆ្នាំ​២០១១​ អ្នក​ភូមិ​យ៉ាង​តិច​៥០​នាក់​ត្រូវ​បាន​ចាប់​ដាក់​ពន្ធនាគារ ​និង​ជាង​១០០​នាក់​បាន​ជាប់​បណ្តឹង​នៅ​តុលាការ​ និង​អ្នក​ខ្លះ​បាន​រត់​គេច​ពី​ការ​ចាប់​ខ្លួន​របស់​តុលាការ៕

XS
SM
MD
LG