ការជួបប្រជុំមួយខែម្តងដូចនេះរបស់សហគមន៍ខ្មែរក្នុងទីក្រុងឡុងប៊ិចរដ្ឋកាលីហ្វញ៉ាគឺជាឱកាសមួយដែលអនុញ្ញាតឱ្យសមាជិកលើកឡើងពីក្តីកង្វល់នានាចាប់តាំងពីបញ្ហាសុខភាព ការថែរក្សាវប្បធម៌រហូតដល់ការអនុវត្តសិទ្ធិជាពលរដ្ឋអាមេរិកាំងពេញច្បាប់ជាដើម។
ការជួបប្រជុំដែលបានប្រព្រឹត្តទៅកាលពីល្ងាចថ្ងៃពុធកន្លងទៅនេះមានប្រជាពលរដ្ឋខ្មែរប្រមាណ៥០នាក់រួមទាំងប្រធាននិងតំណាងសមាគមខ្មែរចំនួនប្រាំដែលមានដូចជា អង្គការសហគមន៍ខ្មែរ (United Cambodian Community) សមាគមខ្មែរនៅទ្វីបអាមេរិក (Cambodian Association of America) សកម្មភាពស្ត្រីខ្មែរ (Khmer Girls in Action) សមាគមមាតាបិតាខ្មែរ (Khmer Parents Association) និងគ្រួសារសុខភាពល្អ(Families in Good Health) បានចូលរួមដើម្បីជំរុញសុខុមាលភាពសហគមន៍ខ្មែរឱ្យកាន់តែប្រសើរឡើង។
ក្រៅពីនេះមានអង្គការមួយចំនួនទៀតក៏បានមកបង្ហាញខ្លួននិងពន្យល់អ្នកចូលរួមឱ្យដឹងពីសេវាកម្មផ្សេងៗទៀតនៅក្នុងសហគមន៍ដែលពួកគេផ្តល់ឱ្យ។
លោកស្រី Helene Ansel ជាអ្នកជំនួយការពិសេសរបស់សមាជិកព្រឹទ្ធសភាប្រចាំរដ្ឋកាលីហ្វញ៉ាលោក Alan Lowenthal បានមកចូលរួមពន្យល់ប្រជាពលរដ្ឋពីគម្រោងមួយដែលលោកស្រីរួមជាមួយអង្គការផ្សេងទៀតកំពុងធ្វើគឺផ្តល់នូវចិញ្ចើមផ្លូវដើរដើម្បីផ្តល់នូវភាពងាយស្រួលដល់សហគមន៍នឹងជំរុញឱ្យប្រជាជនដើរជាប្រចាំដើម្បីធ្វើលំហាត់ប្រាណផងដែរ។ លោកស្រីបញ្ជាក់ផងដែរថា៖
«យើងចង់ជំរុញឱ្យប្រជាពលរដ្ឋដើរជាប្រចាំជាផ្នែកមួយនៃលំហាត់ប្រាណរបស់គាត់ ហើយក៏ដូចជាសង្កេតមើលកន្លែងជិតខាងតើកន្លែងណាមានសុវត្ថិភាពឬគ្មានសុវត្ថិភាពសម្រាប់ពួកគាត់ ហើយនេះក៏ដូចជាផ្តល់ឱកាសឱ្យគាត់ជួបស្គាល់អ្នកជិតខាងផងដែរ»។
ជាមួយគ្នានេះផងដែរក៏មានការជំរុញឱ្យប្រជាពលរដ្ឋទៅចុះឈ្នោះបោះឆ្នោតដោយសារតែចំនួនអ្នកបោះឆ្នោតរបស់ប្រជាពលរដ្ឋខ្មែរអាមេរិកាំងនៅមានតិចនៅឡើយ។ លោកនេតមនោរម្យជាតំណាងខាងគណៈកម្មការចុះឈ្មោះបោះឆ្នោតនៅតំបន់Los Angelesសង្កេតឃើញថាតួលេខអ្នកចុះឈ្មោះបោះឆ្នោតនៅមានកម្រិតទាបយ៉ាងខ្លាំង។ លោកមានប្រសាសន៍ថានៅLA Countyតំបន់Los Angeles មាន៨៨ទីក្រុងហើយក្នុងនោះគឺមានខ្មែរអាមេរិកាំងពី៤ទៅ៦ម៉ឺននាក់ហើយពេលដែលបោះឆ្នោតម្តងៗមានអ្នកទៅបោះឆ្នោតអត់ដល់៤ពាន់នាក់ទេ។
លោកមនោរម្យបានជំរុញឱ្យអ្នកចូលរួមក្នុងការប្រជុំសហគមន៍នេះទៅចុះឈ្មោះបោះឆ្នោតហើយជួយផ្សព្វផ្សាយទៅដល់អ្នកដទៃទៀត។
លោកបញ្ជាក់បន្ថែមថា៖
«បោះឆ្នោតមួយសំខាន់មែនទែនគឺសំឡេងយើងអាចប្រើគេបាន។ ឧទាហរណ៍យើងចង់បាន Cambodia Town។ ទីក្រុងមួយៗគេដឹងច្បាស់ណាស់ថាខ្មែរយើងមានប៉ុន្មានអ្នក បោះឆ្នោតប៉ុន្មាននាក់បើគេមើលទៅឃើញយើងបោះឆ្នោតច្រើនគេនឹងស្តាប់យើងហើយ។ ហ្នឹងហើយអំណាចរបស់យើង»។
បញ្ហាការនិរទេសក៏ត្រូវបានលើកឡើងយកមកបង្ហាញនឹងពន្យល់ប្រាប់ដល់អ្នកចូលរួមដោយលោក David Ros ជាអ្នករៀបចំចលនាសេចក្តីស្រឡាញ់មួយ(organizer of One Love Movement)
លោកពន្យល់ថាជារឿយៗនៅមានការមិនយល់ជាច្រើនជុំវិញបញ្ហាការនិរទេស ហើយសហគមន៍ចាំបាច់ត្រូវយល់ពីបញ្ហានេះ៖
«មនុស្សភាគច្រើននៅយល់ច្រឡំពីបញ្ហានិរទេស។ គេគិតថានិរទេសជនគឺសុទ្ធតែជាឧក្រិដ្ឋជនអ្នកប្រព្រឹត្តបទល្មើល។ ប៉ុន្តែអ្វីដែលគេមិនបានដឹងនោះគឺអ្នកទាំងនោះបានទទួលទោសហើយទៅហើយ។ ហើយគេបានកែខ្លួនសាងជីវិតថ្មីរួមទាំងមានគ្រួសារមានកូនបង់ពន្ធប្រចាំឆ្នាំបង់ផ្ទះនិងអ្នកខ្លះទៀតជាអ្នកសកម្មជននៅក្នុងសហគមន៍»។
នៅមានអង្គការជាច្រើនទៀតដែលក៏ឆ្លៀតឱកាសបង្ហាញជូនពីសេវារបស់ពួកគេដែរ ក្នុងនោះ មានការផ្តល់នូវសេវាកម្មពេទ្យនិងមេធាវីខាងអន្តោប្រវេសន៍ដោយឥតគិតថ្លៃជូនដល់អ្នកដែលក្រគ្មានលទ្ធភាពនិងកម្មវិធីក្នុងសហគមន៍ផ្សេងទៀតដូចជាការរាំរបាំការបង្រៀនភ្លេងបង្រៀនអក្សរជាដើម៕