ស្របពេលដែលរដ្ឋាភិបាលកំពុងជាប់គាំងក្នុងការដោះស្រាយបញ្ហាប្រជាពលរដ្ឋដែលនៅសេសសល់នៅតំបន់បឹងកក់ នៅថ្ងៃច័ន្ទនេះ ប្រជាពលរដ្ឋអតីតរស់នៅតំបន់បឹងកក់ដែលបានចាកចេញបន្ទាប់ពីទទួលយកសំណងចំនួន៨.០០០ដុល្លានិងប្រាក់២លានរៀល បានលេចមុខតវ៉ាទាមទារសំណងពីក្រុមហ៊ុន និងពីសាលាក្រុងភ្នំពេញចំនួន២ម៉ឺនដុល្លារក្នុងមួយគ្រួសារ។
ការតវ៉ារបស់ពលរដ្ឋនេះបានកើតមានឡើងបន្ទាប់ពីលោកនាយករដ្ឋមន្ត្រីហ៊ុន សែន បានធ្វើសម្បទានដីចំនួន១២,៤៤ហិកតាដល់ប្រជាពលរដ្ឋដែលនៅសេសសល់ជិត៨០០គ្រួសារសម្រាប់ធ្វើការអភិវឌ្ឃន៍ដោយខ្លួនឯងក៏ប៉ុន្តែក្នុងចំណោមទំហំដីទាំងនោះក៏មានប្រជាពលរដ្ឋប្រមាណ៤៤គ្រួសារត្រូវបានបដិសេធមិនប្រគល់ប្លង់កម្មសិទ្ធិស្របច្បាប់ទេ។
យ៉ាងតិចមានប្រជាពលរដ្ឋប្រមាណជាង៣.០០០គ្រួសារបានចាកចេញពីដំបន់បឹងកក់ហើយបានទៅរស់នៅកន្លែងផ្សេងៗគ្នាចម្ងាយប្រមាណជាង២០គីឡូម៉ែត្រពីទីក្រុងភ្នំពេញ។ ក៏ប៉ុន្តែការចាកចេញនោះត្រូវបានប្រជាពលរដ្ឋទាំងនោះបានអះអាងថា បានធ្វើឡើងតាមការបង្ខិតបង្ខំ ហើយការផ្តល់សំណងមិនត្រូវបានព្រមព្រាងគ្នាដោយស្ម័គ្រចិត្តទេដោយមានពលរដ្ឋខ្លះបានទទួល៣.០០០ដុល្លារនិងអ្នកផ្សេងទៀតទទួលបាន៨.០០០ដុល្លារ និង២លានរៀល។ សំណងនេះសម្រាប់អ្នកដែលមិនទទួលយកដីទំហំ៤ម៉ែត្រគុណនឹង១៦ម៉ត្រ។
អ្នកស្រី សំ វណ្ណា អតីតរស់នៅក្នុងតំបន់បឹងកក់ហើយសព្វថ្ងៃរស់នៅបូរីសន្តិភាពពីរចម្ងាយ១៦គីឡូម៉ែត្រពីទីក្រុងភ្នំពេញបាននិយាយថា ការទទួលយកសំណងកន្លងមកត្រូវបានធ្វើឡើងតាមការគំរាមនិងបង្ខិតបង្ខំ។
អ្នកស្រីបាននិយាយទៀតថា អ្នកស្រីចង់ឲ្យសាលាក្រុងនិងក្រុមហ៊ុនផ្តល់សំណងបន្ថែមទៀតដល់ពួកគាត់រហូតដល់ចំនួន២ម៉ឺនដុល្លារក្នុងមួយគ្រួសារដោយសារសំណងលើកមុនតិចតួចពេកដែលធ្វើឲ្យពួកគាត់មិនអាចយកទៅទិញផ្ទះឬក៏ប្រកបអាជីវកម្មដោយខ្លួនឯងបាន។
«ខ្ញុំធ្វើនេះមិនមែនប្រឆាំងចំពោះអ្នកពួករស់នៅទេ គឺខ្ញុំរីករាយណាស់ដែលពួកគេបានរស់នៅតំបន់បឹងកក់»។
អ្នកស្រី ទេព វន្នី តំណាងប្រជាពលរដ្ឋដែលនៅសេសសល់នៅតំបន់បឹងកក់បាននិយាយថាអ្នកស្រីគាំទ្រចំពោះការតវ៉ានេះ។ អ្នកស្រីបាននិយាយថា ការទាមទាររបស់ពលរដ្ឋដែលបានចាកចេញនិងមិនធ្វើឲ្យប៉ះពាល់ដល់អ្នកដែលទទួលបានដីពីគោលការណ៍របស់លោកនាយករដ្ឋមន្រ្តី ហ៊ុន សែនទេ។
«អនុក្រឹត្យរបស់សម្តេចបានកាត់ដី១២,៤៤ហិកតាគឺសម្រាប់ប្រជាពលរដ្ឋដែលគាត់មិនទទួលយកសំណងជាទឹកប្រាក់ ឬដូរផ្ទះមួយល្វែងនៅដំណាក់ទ្រយឹង។ នេះគឺជាដីកាដូពីសម្តេចដែលជូនប្រជាពលរដ្ឋដែលនៅសេសសល់ដែលមានជិត៨០០គ្រួសារ។ អញ្ចឹងខ្ញុំជឿជាក់លើប្រមុខរដ្ឋាភិបាលថាមិនអាចជាមានបញ្ហាដល់ពួកខ្ញុំទេ»។
លោក សៀ ភារម្យ នាយកលេខាធិការដ្ឋាននៃក្រុមការងារពិសេសសិទ្ធិលំនៅស្ថានបាននិយាយថាក្រុមអង្កការសង្គមស៊ីវិលតែងតែបារម្មណ៍ថា អាចនិងមានរឿងតវ៉ាមិនសុខចិត្តកើតឡើងដោយសារតែការផ្តល់សំណងមិនសមរម្យ។ លោកបានបញ្ជាក់ថាប្រសិនបើរដ្ឋាភិបាលនូវតែបន្តទង្វើដូចរាល់ថ្ងៃនោះរដ្ឋាភិបាលនឹងដោះស្រាយបញ្ហាដដែលៗដោយគ្មានទីបញ្ចប់។
«អញ្ចឹងវាជាបន្ទុករបស់រដ្ឋាភិបាល។ វាជាការខ្ជះខ្ជាយថវិកា ឬក៏ពេលវេលាដោះស្រាយតែរឿងដ៏ដែលៗអត់ចេះចប់អត់ចេះហើយទេ។ អញ្ចឹងការវិវត្តន៍ហ្នឹងនឹងមិនមាននិរន្តរភាពទេប្រសិនបើយើងនូវតែបន្តឬអនុវត្តការងារដដែលៗ»។
លោក អំ សំអាត មន្ត្រីផ្នែកស៊ើបអង្កេតរបស់អង្កការសិទ្ធិមនុស្សលីកាដូបាននិយាយថា នេះជាមេរៀនមួយថ្មីសម្រាប់រដ្ឋាភិបាល។ នៅពេលណាប្រគល់ដីទៅឲ្យក្រុមហ៊ុនឯកជនធ្វើការអភិវឌ្ឍត្រូវតែមានការដោះស្រាយឲ្យមានសំណងសមរម្យ និងតម្លាភាពសម្រាប់ប្រជាពលរដ្ឋដើម្បីឲ្យពួកគេអាចកសាងជីវភាពបាននូវពេលដែលបានចាកចេញពីទីតាំងចាស់។
«រដ្ឋាភិបាលនិងសាលាក្រុងគាត់ត្រូវតែពិនិត្យនិងពិចារណាឡើងវិញសម្រាប់ប្រជាពលរដ្ឋទាំងអស់ហ្នឹងដើម្បីបញ្ជៀសនូវបាតុភាពនៃការតវ៉ាអាចក្លាយទៅជាអំពើហឹង្សាផ្សេងៗគឺមិនមែនជាផលចំណេញទេទាំងរដ្ឋាភិបាលនិងក្រុមហ៊ុនឯកជន»។
លោក កែប ជុតិមា អភិបាលក្រុងភ្នំពេញមិនអាចទាក់ទងដើម្បីសុំបំភ្លឺបានទេនៅថ្ងៃច័ន្ទនេះ។ចំណែកលោក កើត ឆែ នាយករងរដ្ឋបាលនៃសាលាក្រុងមាននិយាយថាលោកកំពុងជាប់រវល់ប្រជុំ។
សាលាក្រុងភ្នំពេញកន្លងមកធ្លាប់បានផ្តល់សំណងដល់ប្រជាពលរដ្ឋដែលព្រមចាកចេញក្នុងជម្រើសផ្សេងៗគ្នាគឺផ្តល់ប្រាក់ចំនួន៨.៥០០ដុល្លារ ឬផ្ទះល្វែងមួយខ្នងដែលមានទំហំ៤ម៉ែត្រគុណនិង១៦ម៉ែត្រនៅដំណាក់ទ្រយឹង។ ការផ្តល់សំណងនេះបានធ្វើឲ្យប្រជាពលរដ្ឋជាង៣.០០០គ្រួសារបានចាកចេញហើយបាននៅសេសសល់តែជិត៨០០គ្រួសារតែប៉ុណ្ណោះ៕