ភ្ជាប់​ទៅ​គេហទំព័រ​ទាក់ទង

អ្នក​ភូមិ​បឹងកក់​រងរបួស​ពេល​ប៉ះទង្គិច​ជាមួយ​ប៉ូលីស​ ខណៈ​ដែល​ក្រុមហ៊ុន​បន្ត​​ឈូស​ផ្ទះ​ពួកគេ

  • Reuters

រូប​ថត​ដែល​យក​ពី​រូបភាព​វីដេអូ​របស់ Reuters នេះ បង្ហាញ​​​ឲ្យ​ឃើញ​អ្នក​ភូមិ​គប់​ដុំ​ថ្ម​ដាក់​ម៉ាស៊ីន​​កាយ​ដី​​​ដែល​ត្រូវ​បាន​បញ្ជូន​​មក​​​ឲ្យ​វាយ​កម្ទេច​​ផ្ទះ​របស់​ប្រជាពលរដ្ឋ​​នៅ​​​បឹងកក់ ​កាល​ពី​ថ្ងៃ​សុក្រ​ទី​១៦​ខែ​កញ្ញា​ឆ្នាំ​២០១១។

អ្នក​តវ៉ា​ប៉ះទង្គិច​ជាមួយ​ប៉ូលិស​កាល​ពី​ថ្ងៃសុក្រ​ទី១៦​ខែកញ្ញា​សប្តាហ៍​មុន​នេះ ទាក់ទង​នឹង​ជម្លោះ​ដីធ្លី​យ៉ាង​យូរ​នៅ​តំបន់​បឹងកក់ ​ដែល​រដ្ឋាភិបាល​ជួល​ឲ្យ​ក្រុមហ៊ុន​ចិន​អភិវឌ្ឍ​ ហើយ​ដែល​មាន​ទំនាក់​ទំនង​ជាមួយ​ឧកញ៉ា​ម្នាក់។

កាល​ពី​ខែមុន ​លោក​នាយករដ្ឋមន្ត្រី​ហ៊ុន សែន​បាន​យល់ព្រម​ប្រគល់​ដី​១២,៤៤​ហិកតា​ឲ្យ​គ្រួសារ​នៅ​សល់​ ក្រោយពី​ការ​បណ្តេញ​ចេញ។

ការ​សម្រេច​របស់​លោក​ហ៊ុន សែន​ធ្វើឡើង​ក្រោយ​ពី​ធានាគារ​ពិភពលោក​ផ្អាក​ប្រាក់​កម្ចី​កាល​ពី​ខែសីហា។

អ្នកភូមិ​បឹងកក់​ខ្លះ​បាន​កម្មសិទ្ធិ​ពី​សាលាក្រុង​ តែ​អ្នក​មិនមាន​ឈ្មោះ​បាន​ដី​ នៅ​តែ​បន្ត​តវ៉ា។ សាលាក្រុង​ភ្នំពេញ​ពន្យល់​ថា ​ពួក​គាត់​មិនមាន​ឈ្មោះពីព្រោះ​ផ្ទះ​របស់​គាត់​សង់​នៅ​លើ​បឹង។

អំពើ​ហិង្សា​កើត​ឡើង​ ក្រោយ​ពី​ក្រុមហ៊ុន​បញ្ជូន​ម៉ាស៊ីន​ឈូសដី​២​គ្រឿង​បំផ្លាញ​ផ្ទះ​នានា​ ហើយ​ប៉ូលីស​បំបែក​ការ​តវ៉ា។

ប៉ូលិស​កាន់​ខែល​ ដំបង​ឆក់​ ហើយ​បាន​ប្រើ​អំពើ​ហិង្សា​បំបែក​បាតុករ​ប្រហែល​១៥០​នាក់ ​ដែល​ជួបជុំ​គ្នា​នៅ​បឹងកក់។

លោក​អំ សំអាត​ សកម្មជន​សិទ្ធិ​មនុស្ស​លីកាដូ​និយាយ​ថា៖ «នេះ​ជា​ការ​រំលោភ​ទៅ​លើ​សិទ្ធិ​មនុស្ស​ចំពោះ​ប្រជាពលរដ្ឋ​ ក៏​ដូចជា​ការ​រំលោភ​ទៅលើ​ផ្ទះ​សម្បែង​ឬ​ក៏​សិទ្ធិ​លំនៅដ្ឋាន​របស់​ប្រជាពលរដ្ឋ​ ពីព្រោះ​យើង​មិនទាន់​បាន​ធ្វើ​ការ​ចរចា​ដោយ​សន្តិវិធី​ដើម្បី​រក​ដំណោះស្រាយ​សមរម្យ​ផង​ ហើយ​យើង​ទៅ​បំផ្លិច​បំផ្លាញ​ ទ្រព្យសម្បត្តិ​ ផ្ទះ​សម្បែង​របស់​គាត់​ទៀត​គឺ​ធ្វើ​ឲ្យ​ប្រជាពលរដ្ឋ​កាន់តែ​ក្រីក្រ»។

ក្រុម​សិទ្ធិ​មនុស្ស​និង​បុគ្គលិក​ជំនួយ​បរទេស​និយាយ​ថា ​មន្ត្រី​រដ្ឋាភិបាល​បាន​ប្រើ​កម្លាំង​បណ្តេញ​អ្នកភូមិ​ដើម្បី​យក​ដី​លក់​ឲ្យ​ឈ្មួញ​បរទេស​ និង​ឈ្មួញ​ក្នុង​ស្រុក។

ក្រុម​តាមដាន​ការ​បណ្តេញ​មនុស្ស​ចេញ​ពី​ផ្ទះ​សម្បែង​ឲ្យ​ដឹង​ថា ​អ្នកភូមិ​៣​ម៉ឺន​នាក់​ត្រូវ​បណ្តេញ​ចេញពី​ដី​របស់​ខ្លួន​ក្នុង​ឆាំ្ន​២០១០​ និង​២៧.០០០​នាក់​ក្នុង​ឆ្នាំ​២០០៩។ ​គេ​រំពឹង​ថា​ ក្នុង​ពេល​ពីរ​បី​ឆ្នាំ​ទៀត​នឹង​មាន​ការ​បណ្តេញ​អ្នក​ភូមិ​ប្រមាណ​១៤​ម៉ឺន​នាក់ ​ក្នុង​នោះ​មាន​៧​ឬ​៨​ម៉ឺន​នាក់​នៅ​ភ្នំពេញ។

មន្ត្រី​រដ្ឋាភិបាល​អះអាង​ថា​ ផែនការ​នេះ​គឺ​អភិវឌ្ឍ​រាជធានី​ភ្នំពេញ។ ​មាន​ពលរដ្ឋ​ជិត​៤​ពាន់​គ្រួសារ​ពាក់ព័ន្ធ​ក្នុង​ជម្លោះ​ដីធ្លី​នៅ​បឹងកក់​តាំងពី​ឆ្នាំ​២០០៦​មក។

បឹងកក់​នៅ​ភ្នំពេញ​នេះ​ត្រូវ​ចាក់​ដី​បំពេញ​ដើម្បី​សង់​ផ្ទះ​ប្រណិត​ដោយ​ក្រុមហ៊ុន​ចិន​ឈ្មោះ​ Inner Mongolia Erdos Hongjun​ Investemt Corp​ ដែល​សន្យា​ចំណាយ​៣​ពាន់​លាន​ដុល្លារសាងសង់​ផ្ទះ​ ស្ល​ដែក​ និង​ផលិត​អគ្គិសនី​នៅ​កម្ពុជា។

អ្នកភូមិ​២.៧៥២​គ្រួសារ​ត្រូវ​បាន​បណ្តេញ​ចេញពី​ផ្ទះ​នៅ​តំបន់​បឹងកក់​ហើយ​ ហើយ​១.៥០០​គ្រួសារ​មិន​ព្រមចេញ​ ដោយ​នៅ​តវ៉ា​រាល់ថ្ងៃ​ បដិសេធ​សំណង​ចំនួន​៨.៥០០​ដុល្លារ​ ឬ​ផ្ទះ​ថ្នូរ​នៅ​ក្រៅ​ទីក្រុង។​ ការ​ទាមទារ​ចុងក្រោយ​របស់​អ្នក​ភូមិ​គឺ​ដី​នៅ​នឹង​កន្លែង​ទំហំ​៦៤​ម៉ែត្រ​ការ៉េ​ក្នុង​មួយ​គ្រួសារ។

ក្រុមហ៊ុន​ស៊ូកាកូអ៊ីង​ទទួល​បាន​សម្បទាន​ដី​បឹងកក់​នេះ​ ហើយ​មាន​ផែនការ​សាងសង់​មជ្ឈមណ្ឌល​ពាណិជ្ជកម្ម ​និង​ផ្ទះ​សម្រាប់​លក់។​ បឹងកក់​ធ្លាប់​ជា​កន្លែង​ប្រជាប្រិយ​សម្រាប់​អ្នក​ទេសចរ​មើល​ថ្ងៃ​លិច​នៅ​រាជធានី​ភ្នំពេញ​ ហើយ​មាន​ភោជនីយដ្ឋាន​ និង​ផ្ទះ​សំណាក់​ជា​ច្រើន​របស់​ប្រជាជន​ក្នុង​តំបន់​នេះ៕

XS
SM
MD
LG