ប្រទេសកម្ពុជា និងប្រទេសជប៉ុនបានព្រមព្រៀងគ្នារុករកប្រេង និងឧស្ម័ននៅបឹងទន្លេសាបដើម្បីឈានទៅធ្វើពាណិជ្ជកម្មប្រេងនៅក្នុងប្រទេសកម្ពុជា។
លោក ជន សក្តា ជូនសេចក្តីរាយការណ៍ដូចតទៅ៖
ប្រទេសកម្ពុជា នៅថ្ងៃអង្គារនេះ បានចុះហត្ថលេខាលើកិច្ចព្រមព្រៀងជាមួយក្រុមហ៊ុនសារ ជីវកម្មប្រេងរដ្ឋរបស់ប្រទេសជប៉ុនដើម្បីរុករកប្រេងកាតនិងឧស្ម័ននៅបឹងទន្លេសាបសម្រាប់ ការវាយតម្លៃអំពីឱកាសធ្វើពាណិជ្ជកម្មលើប្រេង និងឧស្ម័ននេះ។
កិច្ចព្រមព្រៀងនេះត្រូវបានចុះហត្ថលេខាដោយលោកឧបនាយករដ្ឋមន្ត្រីសុខ អាន រដ្ឋមន្ត្រី ប្រចាំទីស្តីការគណៈរដ្ឋមន្ត្រី និងជាប្រធានអាជ្ញាធរប្រេងកាតជាតិកម្ពុជា និងលោក Akira Suzuki នាយកប្រតិបត្តិក្រុមហ៊ុនសារជីវកម្មជាតិជប៉ុន JOGMEC ដើម្បីបើកផ្លូវឱ្យមានការរុក រកប្រេងកាត និងឧស្ម័ននៅក្នុងប្លុកទី១៧ដែនគោកនៅភាគខាងជើងបឹងទន្លេសាប ដែលរួម មានការវាយតម្លៃអំពីឱកាសធ្វើពាណិជ្ជកម្មលើប្រេង និងឧស្ម័នបច្ចេកវិទ្យាស្រាវរាវការអភិ វឌ្ឍសកម្មភាពប្រេង និងឧស្ម័ន ព្រមទាំងផ្តល់ការបណ្តុះបណ្តាល។
សេចក្តីថ្លែងការណ៍បានបញ្ជាក់ថា ក្រុមហ៊ុន JOGMEC របស់ជប៉ុន ដែលកាលពីមុនមាន ឈ្មោះជា Japan National Oil Corporation ធ្លាប់បានធ្វើ Airborne Magnetic និង Gravity Survey ដើម្បីសិក្សានូវធនធនប្រេងនៅតំបន់ដែនគោកនៃប្រទេសកម្ពុជាតាំងពីឆ្នាំ១៩៩៧ ដល់ឆ្នាំ១៩៩៩។ ដោយអនុលោមតាមការងារកន្លងមក និងយោងតាមកិច្ចព្រមព្រៀងគោលកម្មវិធីវាស់ស្ទង់ភូគព្ភសាស្ត្រ និងរូបភូគព្ភសាស្ត្រ និងត្រូវបានអនុវត្តនៅក្នុងប្លុក១៧នេះ។
សេចក្តីថ្លែងការណ៍នេះបានបន្តថា ក្រុមហ៊ុន JOGMEC និងក្រុមហ៊ុន Mitsui Oil Exploration Co.,Ltd (MOECO ) បានរៀបចំកម្មវិធីវាស់ស្ទង់នេះ ហើយភាគីទាំង២នឹងធ្វើការវាយតម្លៃទិន្ន ន័យ ដែលទទួលបានពីការវាស់ស្ទង់នេះ។ ក្នុងករណីដែលលទ្ធផលរកឃើញមានលក្ខណៈ វិជ្ជមាន នោះក្រុមហ៊ុនជប៉ុននឹងមានសិទ្ធិផ្តាច់មុខរយៈពេល១ឆ្នាំក្នុងការចរចាជាមួយអាជ្ញា ធរប្រេងកាតកម្ពុជា ដើម្បីចុះកិច្ចព្រមព្រៀងប្រេងកាតក្នុងគោលដៅបន្តសកម្មភាពស្វែងរុក រកផ្សេងទៀត។
លោកសុខ អាន រដ្ឋមន្ត្រីប្រចាំទីស្តីការគណៈរដ្ឋមន្ត្រីបានថ្លែងថា ការចុះហត្ថលេខាលើកិច្ច ព្រមព្រៀងនេះនឹងបង្កើតការអភិវឌ្ឍកាន់តែច្រើន និងបង្កើតការងារសម្រាប់ប្រជាពលរដ្ឋ ខ្មែរកាន់តែច្រើន។
"វត្តមានរបស់ក្រុមហ៊ុន JOGMEC នៅកម្ពុជានាពេលនេះ គឺពិតជារួមចំណែកកសាងសេដ្ឋ កិច្ចកម្ពុជាតាមរយៈការផ្តល់ឱកាសការងារដល់ប្រជាពលរដ្ឋខ្មែរកាន់តែច្រើនថែមទៀត ដែល ជាកត្តាចាំបាច់ក្នុងដំណើរការកាត់បន្ថយភាពក្រីក្រ និងការអភិវឌ្ឍប្រទេសឱ្យកាន់តែរីក ចម្រើនទៅមុខ"។
លោក Fumiaki Fujita អនុប្រធានប្រតិបត្តិក្រុមហ៊ុន JOGMEC បានថ្លែងថា កិច្ចព្រមពៀងនេះ មានសារៈសំខាន់ណាស់សម្រាប់ការបោះជំហ៊ានថ្មីមួយក្នុងទំនាក់ទំនងនិងកិច្ចសហប្រតិបត្តិ ការរវាងប្រទេសកម្ពុជា និងប្រទេសជប៉ុន លើវិស័យរុករកប្រេងកាត និងឧស្ម័ន។
"ខ្ញុំសូមប្តេជ្ញាចិត្តថា ក្រុមហ៊ុនJOGMECនឹងចូលរួមនៅក្នុងឧស្សាហកម្មប្រេងកាតនិងឧស្ម័ន នៅប្រទេសកម្ពុជាជាមួយនឹងសហគ្រាសឯកជននានានៅក្នុងពេលខាងមុខទៀតដើម្បីពង្រឹង ទំនាក់ទំនង និងកិច្ចសហប្រតិបត្តិការជាមួយរដ្ឋាភិបាលកម្ពុជាកាន់តែរឹងមាំ ដើម្បីឆ្ពោះទៅរក ការអភិវឌ្ឍឧស្សាហកម្មប្រេងកាតនៅក្នុងប្រទេសកម្ពុជាជាមិនខាន"។
លោក Chiaki Takahashi អនុរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម បានថ្លែង ថា សកម្មភាពនេះជំរុញកំណើនសេដ្ឋកិច្ចកម្ពុជា និងសង្ឃឹមថា ប្រទេសកម្ពុជានឹងក្លាយទៅជា ប្រទេសដ៏ល្បីល្បាញមួយ ដោយសារប្រេងកាតនៅពេលអនាគត។
លោកឈិត សំអាត នាយកប្រតិបត្តិនៃអង្គការវេទិកាស្តីពីកម្ពុជា បានថ្លែងថា ការរុករកប្រេង នៅបឹងទន្លេសាបអាចប៉ះពាល់ដល់បរិស្ថាន ជីវចម្រុះ និងត្រី។
លោកឈិន សំអាត បានបន្តថា យើងមិនប្រឆាំងនឹងការរុករកប្រេងនេះទេ ប៉ុន្តែយើងទាមទារ ឱ្យរដ្ឋាភិបាលសិក្សាពីផលប៉ះពាល់បរិស្ថាន ដោយមានការចូលរួមអ្នកពាក់ព័ន្ធនៅក្នុងតំបន់ ដើម្បីជៀសវាងផលប៉ះពាល់ដល់បរិស្ថាន។
"ការរុករកប្រេងនេះអាចធ្វើឱ្យប៉ះពាល់ដល់បញ្ហាបរិស្ថាន និងបញ្ហាត្រី ដែលជាប្រភពមួយ យ៉ាងសំខាន់សម្រាប់ប្រជាពលរដ្ឋខ្មែរដែលរស់នៅតាមដងទន្លេ ហើយបឹងទន្លេសាបគឺជា កន្លែងមួយល្បីក្នុងពិភពលោក ដែលសម្បូរទៅដោយត្រី ហើយយើងសង្ឃឹមថា ការអភិវឌ្ឍ ផ្សេងៗមិនធ្វើឱ្យប៉ះពាល់ទៅដល់ធនធានធម្មជាតិរបស់យើងទេ"។
លោក Chiaki Takahashi បានបញ្ជាក់ថា រដ្ឋាភិបាលកម្ពុជា និងក្រុមហ៊ុនសាជីវកម្មជាតិជប៉ុន នេះបានយក ចិត្តទុកដាក់យ៉ាងខ្លាំងទៅលើបរិស្ថាន។
ពីទីក្រុងភ្នំពេញ ខ្ញុំជន ជន សក្តា VOA សំឡេងស.រ.អ.៕