ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

យុទ្ធ​នាការ​ប្រឆាំង​ការ​ទិញ ​លក់​ និង​បរិភោគ​សាច់​សត្វ​ព្រៃ​ និង​ការ​កាប់​បំផ្លាញ​ព្រៃ​ឈើ​


អាជ្ញាធរ​ខេត្ត​មណ្ឌល​គីរី ​និង​អង្គការ​អភិរក្ស​សត្វ​ព្រៃ​ នៅ​ថ្ងៃ​ច័ន្ទ​នេះ​ បាន​បើក​យុទ្ធ​នាការ​ ប្រឆាំង​នឹង​ការ​ទិញ​លក់​ និង​បរិភោគ​សាច់​សត្វ​ព្រៃ​ និង​ការ​កាប់​បំផ្លាញ​ព្រៃ​ឈើ​ នៅ​ក្នុង​ខេត្ត​នេះ។

អាជ្ញាធរ​ខេត្ត​មណ្ឌល​គីរី ​និង​អង្គការ​អភិរក្ស​សត្វ​ព្រៃ​ នៅ​ថ្ងៃ​ច័ន្ទ​នេះ​ បាន​បើក​យុទ្ធ​នាការ​ ប្រឆាំង​នឹង​ការ​ទិញ​លក់​ និង​បរិភោគ​សាច់​សត្វ​ព្រៃ​ និង​ការ​កាប់​បំផ្លាញ​ព្រៃ​ឈើ​ នៅ​ក្នុង​ខេត្ត​នេះ។​ ខេត្ត​មណ្ឌល​គីរី ​គឺ​ជា​ខេត្ត​មួយ​ក្នុង​ចំណោម​ខេត្ត​ជា​ច្រើន​របស់​ប្រទេស​កម្ពុជា​ ដែល​ការ​កាប់​បំផ្លាញ​ព្រៃ​ឈើ​ និង​ការ​ប្រមាញ់​សត្វ​បាន​រីក​រាល​ដាល​យ៉ាង​ខ្លាំង។

នៅ​ថ្ងៃ​ច័ន្ទ​នេះ ​អាជ្ញាធរ​ខេត្ត​មណ្ឌល​គីរី​ និង​អង្គការ​អភិរក្ស​សត្វ​ព្រៃ WWF បាន​ចាប់​ផ្ដើម​យុទ្ធ​នាការ​ទប់​ស្កាត់​ការ​ការ​កាប់​បំផ្លាញ​ព្រៃ​ឈើ ​និង​ការ​បរ​បាញ់​សត្វ​ព្រៃ​ខុស​ច្បាប់​ និង​ការ​បរិភោគ​សាច់​សត្វ​ព្រៃ​ប្រយោជន៍​ដើម្បី​ថែ​រក្សា​ការ​ពារ​ពពួក​សត្វ​កម្រ​ និង​ព្រៃ​ឈើ​មាន​តម្លៃ​នៅ​ក្នុង​ប្រទេស​ឡើង​វិញ។

នេះ​គឺ​ជា​យុទ្ធ​នាការ​លើក​ដំបូង​នៅ​ក្នុង​ប្រទេស​ សម្រាប់​រយៈ​ពេល​មួយ​ឆ្នាំ​ដែល​ក្រោម​ប្រធាន​បទ "និយាយ​ថា​ មិន​ពាក់​ព័ន្ធ​នឹង​បទ​ល្មើស​ព្រៃ​ឈើ ​និង​សត្វ​ព្រៃ" និង​រៀប​ចំ​ដោយ​រដ្ឋ​បាល​ព្រៃ​ឈើ ​អគ្គ​នាយក​ដ្ឋាន​រដ្ឋបាល​ និង​អភិរក្ស​ធម្មជាតិ ​របស់​រដ្ឋា​ភិបាល​ និង​អង្គការ WWF។

យុទ្ធ​នាការ​នេះ​ធ្វើ​ឡើង​ស្រប​ពេល​ដែល​រដ្ឋា​ភិបាល​ខ្មែរ​កំពុង​បង្ហាញ​អំពី​ ការ​បង្រ្កាប​គួរ​ឲ្យ​ភ្ញាក់​ផ្អើល​ ទប់​ទល់​នឹង​ការ​កាប់​បំផ្លាញ​ព្រៃ​ឈើ​ដែល​គេ​បាន​រិះ​គន់​ថា​ ត្រូវ​បាន​បំផ្លាញ​យ៉ាង​ហិន​ហោច។

ក្រុម​ប្រជា​ពល​រដ្ឋ​ ម្ចាស់​សណ្ឋា​គារ​ និង​ភោជនីយ​ដ្ឋាន​ផង​ដែរ​ ត្រូវ​បាន​អញ្ជើញ​ឲ្យ​ចូល​រួម​ក្នុង​យុទ្ធ​នាការ​នេះ​ នៅ​ក្នុង​ទី​រួម​ខេត្ត​មណ្ឌល​គីរី។

លោក​ សេង​ ទៀក​ នាយក​អង្គការ WWF ប្រចាំ​ប្រទេស​កម្ពុជា​ បាន​និយាយ​នៅ​ក្នុង​សេចក្ដី​ប្រកាស​ព័ត៌មាន​ថា​ ដើម្បី​កាត់​បន្ថយ​នូវ​បទ​ល្មើស​ព្រៃ​ឈើ ​និង​សត្វ​ព្រៃ​ អ្នក​លក់​ និង​អ្នក​ទិញ​ត្រូវ​និយាយ​ថា​ មិន​ពាក់​ព័ន្ធ​នឹង​ផលិត​ផល​ព្រៃ​ឈើ​និង​សត្វ​ព្រៃ​ខុស​ច្បាប់។

សេចក្ដី​ប្រកាស​ព័ត៌មាន​ដដែល​បាន​ជំរុញ​ឲ្យ​បណ្ដា​ភោជ​នីយ​ដ្ឋាន​ឈប់​លក់​សាច់​សត្វ​ព្រៃ​ និង ​ជំរុញ​ឲ្យ​អតិថិ​ជន​ឈប់​សួរ​រក​ទិញ​សាច់​សត្វ​ព្រៃ​ត​ទៅ​ទៀត។

បើ​យោង​តាម​ក្រុម​មន្ដ្រី​អង្គការ​ក្រៅ​រដ្ឋា​ភិបាល​ ការ​ជួញ​ដូរ​សត្វ​ព្រៃ​ និង​ការ​កាប់​បំផ្លាញ​សត្វ​ព្រៃ​ នៅ​ក្នុង​ខេត្ត​មណ្ឌល​គីរី​គឺជា​បណ្ដាញ​លួច​លាក់។

លោក​ ហេង​ សំណាង​ អភិបាល​រង​ខេត្ត​មណ្ឌល​គីរី​ ដែល​បាន​ធ្វើ​ជា​អធិបតី​នៅ​ក្នុង​ការ​បើក​យុទ្ធនា​ការ​នៅ​ព្រឹក​មិញ​នេះ​ មាន​ប្រសាសន៍​ថា ​ជន​ល្មើស​ក្នុង​ឧក្រិដ្ឋ​កម្ម​ព្រៃ​ឈើ​ និង​ក្នុង​ការ​បំផ្លាញ​សត្វ​ព្រៃ​ នឹង​ត្រូវ​ផ្ដន្ទា​ទោស​យ៉ាង​ម៉ឺង​ម៉ាត់។

«បើ​សិន​ណា​ជា​ជួប​នៅ​ក្នុង​ករណី​ហ្នឹង​គឺ​យើង​ត្រូវ​មាន​ការ​បង់​ផាក​ពិន័យ​ ដើម្បី​ឲ្យ​រាង​ចាល​ទៅ​តាម​ ប្រភេទ​សត្វ​ដែល​កម្រ​ ឬ​ក៏​សត្វ​មធ្យម​ ឬ​ក៏​សត្វ​សម្បូរ។​ បើ​ថា​ តូច​តាច​ទេ​ គឺ​មួយ​គុណ​នឹង​៥​ ឬ​គុណ​នឹង​១០។​ តែ​បើ​ធ្ងន់​ធ្ងរ​ យើង​អាច​បញ្ជូន​ទៅ​តុលាការ​ដើម្បី​កាត់​ទោស»។

ក៏​ប៉ុន្ដែ​ លោក ​សម​ សារិន​ អ្នក​សម្រប​សម្រួល​អង្គការ​ការ​ពារ​សិទ្ធិ​មនុស្ស​អាដ​ហុក​ ដែល​ឃ្លាំ​មើល​សកម្ម​ភាព​បទ​ល្មើស​ជា​ច្រើន​ ប្រចាំ​ខេត្ត​មណ្ឌល​គីរី​ ហាក់​ដូច​ជា​មិន​សូវ​មាន​ការ​ជឿ​ជាក់​លើ​ប្រសិទ្ធិ​ភាព​នៃ​យុទ្ធ​នាការ​នេះ​នៅ​ឡើយ។

«ខ្ញុំ​ដូច​ជា​មិន​សង្ឃឹម​ប៉ុន្មាន​ទេ​ ក៏​ប៉ុន្ដែ​នេះ​គឺ​ជា​ការ​ចូល​រួម​ចំណែក​មួយ​ដើម្បី​ពញ្ញាក់​ស្មារតី​ ពិសេស ​អ្នក​មាន​តួនាទី​ជា​អ្នក​ការ​ពារ​អភិរក្ស​ ជួយ​បំផុស​ទៅ​ដល់​ប្រជា​ពល​រដ្ឋ​ដើម្បី​ឲ្យ​គាត់​កាត់​បន្ថយ»។

ជា​ច្រើន​ឆ្នាំ​មក​ហើយ​ ស្រប​ពេល​ដែល​ការ​កាប់​បំផ្លាញ​ព្រៃ​ឈើ​ខុស​ច្បាប់​ត្រូវ​ប្រព្រឹត្ត​យ៉ាង​បង្ហិន​បង្ហោច​ ការ​ប្រមាញ់ ​និង​ការ​ចាប់​ និង​ការ​ជួញ​ដូរ​សត្វ​ព្រៃ​នៅ​ក្នុង​ប្រទេស​កម្ពុជា​ក៏​មាន​ចំនួន​ច្រើន​ណាស់​ដែរ។​ សត្វ​ព្រៃ​មួយ​ចំនួន​ត្រូវ​លក់​សម្រាប់​បម្រើ​ជា​ចំណី​ដ៏​ពិសេស​នៅ​ក្នុង​ស្រុក ​និង​មួយ​ចំនួន​ទៀត​ត្រូវ​នាំ​ចេញ​តាម​បណ្ដាញ​ខុស​ច្បាប់​ទៅ​លក់​នៅ​ក្រៅ​ប្រទេស។

នៅ​តាម​ហាង​ ភោជ​នីយ​ដ្ឋាន​មួយ​ចំនួន​នៅ​ទូទាំង​ប្រទេស​កម្ពុជា​ រាប់​បញ្ចូល​ទាំង​ហាង​នៅ​ក្នុង​ក្រុង​ភ្នំពេញ​ផង​ដែរ​ គេ​អាច​សួរ​រក​សាច់​សត្វ​ព្រៃ​ជា​អាហារ​យ៉ាង​ពេញ​និយម​ ដែល​ធ្វើ​ឲ្យ​សត្វ​ព្រៃ​មួយ​ចំនួន​ប្រឈម​មុខ​នឹង​ការ​បាត់​ផុត​ពូជ។

រី​ឯ​សត្វ​ព្រៃ​ខ្លះ​មិន​ត្រឹម​តែ​ស្ថិត​នៅ​ក្នុង​តម្រូវ​ការ​ជា​អាហារ​តែ​ប៉ុណ្ណោះ​ទេ​ ក៏​ប៉ុន្ដែ​គឺ​ស្ថិត​នៅ​ក្រោម​តម្រូវ​ការ​សម្រាប់​ការ​ប្រើ​ប្រាស់​ជា​ឱសថ​បុរាណ​ផង​ដែរ៕

XS
SM
MD
LG