ក្រុមប្រជាពលរដ្ឋ និងមន្ត្រីឃ្លាំមើលការរំលោភសិទ្ធិមនុស្ស បានចោទប្រកាន់អង្គការទប់ស្កាត់គ្រឿងញៀននិងជំងឺអេដស៍ដែលមានមូលដ្ឋាននៅស្រុកជាំក្សាន្ត ខេត្តព្រះវិហារ ថាបានរំលោភសិទ្ធិមនុស្សយ៉ាងធ្ងន់ធ្ងរចំពោះប្រជាពលរដ្ឋដែលរស់នៅក្នុងអង្គការនេះ។ ការចោទប្រកាន់នេះបានកើតឡើងក្រោយពីប្រជាពលរដ្ឋប្រមាណ៧រូប បានធ្វើដំណើររាប់រយគីឡូម៉ែត្រមកធ្វើសន្និសីទកាសែតក្នុងទីស្នាក់សមាគមសិទិ្ធមនុស្សអាដហុកក្នុងទីក្រុងភ្នំពេញ។
ក្រុមប្រជាពលរដ្ឋរងគ្រោះចំនួនប្រាំបីរូប ដែលតំណាងឲ្យប្រជាពលរដ្ឋចំនួន៣០០គ្រួសារ មកពីភូមិសាឯម និងភូមិកន្ទួត ស្រុកជាំក្សាន្ត ខេត្តព្រះវិហារ បានធ្វើការចោទប្រកាន់ថា អង្គការក្រៅរដ្ឋាភិបាលមួយ ដែលមានឈ្មោះថា អង្គការស្រាវជ្រាវទប់ស្កាត់គ្រឿងញៀននិងជម្ងឺអេដស៍បានជាប់ពាក់ព័ន្ធនឹងការរំលោភសិទ្ធិមនុស្សយ៉ាងធ្ងន់ធ្ងរ។
នៅក្នុងសេចក្តីប្រកាសព័ត៌មានដែលបានចែកជូនក្រុមអ្នកសារព័ត៌មាន នៅថ្ងៃព្រហស្បតិ៍នេះ ប្រជាពលរដ្ឋទាំងនោះបានចោទប្រកាន់ថា អង្គការក្រៅរដ្ឋាភិបាលនេះបានរំលោភយកដីប្រជាពលរដ្ឋចំនួន៥៧គ្រួសារ នៅភូមិសាឯម និងភូមិកន្ទួត។ ការចោទប្រកាន់នេះរួមមាន ការរំលោភសេពសន្ថវៈជាច្រើនករណី ករណីធ្វើទារុណកម្មលើផ្លូវកាយ និងផ្លូវចិត្ត ករណីវាយដំ បង្ករបួសស្នាម និងករណីប្រើប្រាស់អាវុធខុសច្បាប់ គំរាមកំហែងដល់ប្រជាពលរដ្ឋជាដើម។
លោកស្រីឃីម ខុន អាយុ៥៤ឆ្នាំ ប្រជាពលរដ្ឋមួយរូប ដែលធ្លាប់ស្នាក់នៅក្នុងអង្គការនេះអស់រយៈ ពេលពីរឆ្នាំមកហើយ បានថ្លែងប្រាប់អ្នកកាសែតថា អ្នកស្រីបានសម្រេចចិត្តចាកចេញពីអង្គការនេះ ដោយសារតែកូនស្រីរបស់អ្នកស្រីអាយុ១៣ឆ្នាំត្រូវបានគេចាប់រំលោភ ដោយពុំមានដំណោះស្រាយ។
លោកស្រីឃីម ខុនបានរៀបរាប់ថា អង្គការស្រាវជ្រាវទប់ស្កាត់គ្រឿងញៀន និងជម្ងឺអេដស៍បានចាប់អ្នកស្រីដាក់ខ្នោះ និងវាយធ្វើបាប នៅពេលដែលអ្នកស្រីតវ៉ាអំពីករណីរំលោភសេពសន្ថវៈកូនស្រីរបស់អ្នកស្រី។
«ចុងក្រោយ ជនល្មើសឲ្យរួចខ្លួន។ ខ្ញុំជាប់ខ្នោះមួយយប់ទល់ភ្លឺ។ខ្ញុំពីរនាក់កូនត្រូវគេវាយ។ គេវាយ នឹងខ្សែភ្លើង ហើយកូនខ្ញុំ គេទះពីរដៃ»។
លោកប៉ោ ម៉ុក អាយុ៧៤ឆ្នាំ តំណាងឲ្យប្រជាពលរដ្ឋចំនួន៥៨គ្រួសារ ដែលបានបាត់បង់ដីធ្លីចំនួន ជាង១០០ហិកតាដោយសារតែអង្គការមួយនេះរំលោភយក បាននិយាយថា ប្រជាពលរដ្ឋរស់នៅក្នុងអង្គការនេះមានសភាពភ័យខ្លាច ប្រៀបបីដូចជាសហករណ៍មួយដែលគ្រប់គ្រងដោយពួកអតីតមេដឹកនាំខ្មែរក្រហម ចន្លោះពីឆ្នាំ១៩៧៥ដល់ឆ្នាំ១៩៧៩។
«ខ្លាចខ្លាំងណាស់ ព្រោះគាត់មានអាវុធយុទ្ធភណ្ឌ មានប៉ូលិស មានប៉េអ៊ឹម យកទៅគំរាមបាញ់ គំរាម បាទ។ អត់មានអ្នកណាហ៊ាន។ អ្នកណាធ្វើលើដីហ្នឹង គេចាប់យកដាក់គុក»។
លោកនី ចរិយា ប្រធានក្រុមផ្នែកស៊ើបអង្កេតរបស់សមាគមសិទ្ធិមនុស្ស ADHOC បានមាន ប្រសាសន៍ថា សមាគមសិទ្ធិមនុស្ស ADHOC បានទទួលពាក្យបណ្តឹងពីរដាច់ដោយឡែកៗពីគ្នាពាក់ព័ន្ធទៅនឹងការរំលោភសិទ្ធិរបស់ប្រជាពលរដ្ឋ និងការគ្រប់គ្រងបែបរដ្ឋបាលមិនត្រឹមត្រូវ។
លោកនី ចរិយាបានមានប្រសាសន៍ទៀតថា ប្រសិនណា បើបានកើតឡើងដូចមានការអះអាងរបស់ប្រជាពលរដ្ឋពិតប្រាកដមែន នោះអង្គការនេះបានរំលោភច្បាប់។
«យើងអាចនិយាយបានថា ជាការគ្រប់គ្រងមួយបង្កើតរដ្ឋនៅក្នុងរដ្ឋក៏ថាបាន ឬក៏ជាតំបន់មួយដែលអាចទៅជាតំបន់មួយអបគមន៍នៅក្នុងតំបន់នេះតែម្តងក៏អាចថាបាន ប្រសិនបើរឿងហ្នឹង វាកើតឡើងដូចប្រជាពលរដ្ឋលោកមានប្រសាសន៍»។
លោកប៉ែន លឹម ប្រធានអង្គការនេះ និងភរិយារបស់លោកគឺ លោកស្រីគង់ សុមាលី និងលោកតុល រ៉េត តំណាងអង្គការស្រាវជ្រាវទប់ស្កាត់គ្រឿងញៀន និងជម្ងឺអេដស៍ ពុំអាចស្នើសុំដើម្បីសេចក្តីអត្ថា ធិប្បាយបំភ្លឺបានទេនៅថ្ងៃព្រហស្បតិ៍នេះ។ ក៏ប៉ុន្តែមន្រ្តីមួយរូបដែលបម្រើការងារនៅក្នុងអង្គការនេះ ហើយដែលនិយាយក្នុងលក្ខខណ្ឌសុំមិនបញ្ចេញឈ្មោះ បានបដិសេធការចោទប្រកាន់នេះ។
ចំណែកលោកសុខ ហៃ អភិបាលស្រុកជាំក្សាន្ត បានមានប្រសាសន៍ថា លោកបានទទួលពាក្យ បណ្តឹងពីប្រជាពលរដ្ឋពាក់ព័ន្ធទៅនឹងករណីរំលោភសិទ្ធិនេះហើយ។ លោកបានមានប្រសាសន៍ថា អាជ្ញាធរនឹងធ្វើការស្រាវជ្រាវទៅលើអង្គការនេះ។
«ពាក់ព័ន្ធនឹងការគំរាមកំហែងអីហ្នឹង គឺអាជ្ញាធរស្រុកកំពុងធ្វើការស៊ើបអង្កេតណា៎»។
អង្គការស្រាវជ្រាវទប់ស្កាត់គ្រឿងញៀន និងជម្ងឺអេដស៍ ដែលមានទីតាំងនៅក្នុងឃុំកន្ទួត ស្រុកជាំក្សាន្ត ខេត្តព្រះវិហារ បានទទួលដីសប្បទានសេដ្ឋកិច្ចពីរដ្ឋាភិបាលចំនួន៥៦០ហិកតា កាលពីឆ្នាំ២០០៧។
បើតាមសេចក្តីប្រកាសព័ត៌មានរបស់ប្រជាពលរដ្ឋ បានឲ្យដឹងថា បច្ចុប្បន្ននេះមានប្រជាពលរដ្ឋចំនួន៣០០គ្រួសាររស់នៅ ក៏ប៉ុន្តែអង្គការនេះពុំបានផ្តល់ដីសម្បទានសេដ្ឋកិច្ចដល់ពួកគេទេ គឺប្រជាពល រដ្ឋបានទិញក្នុងមួយឡូត៍ ដែលមានទំហំប្រមាណ៣០ម៉ែត្រគុណនឹង៥០ម៉ែត្រ តម្លៃពី៣០០០រហូតដល់៤០០០ដុល្លារសហរដ្ឋអាមេរិក៕