ភ្ជាប់​ទៅ​គេហទំព័រ​ទាក់ទង

ក្រសួង​កសិកម្ម​ណែនាំ​អំពី​របៀប​នាំ​ចេញ​ទៅ​ប្រទេស​ចិន


កសិករ​ខ្មែរ​កំពុង​ច្រូត​ស្រូវ​នៅ​ក្នុង​ស្រែ​ក្នុង​រដូវ​ច្រូត​កាត់​នៅ​តំបន់​សាលា​គំរូ ខេត្ត​ពោធិ៍សាត់។

ក្រសួង​កសិកម្ម​បាន​ផ្សព្វផ្សាយ​ដល់​ក្រុម​ហ៊ុន​អង្ករ​កាលពីថ្ងៃ​អង្គារ៍​នេះ​នូវ​នីតិវិធី​ដ៏មាន​សារៈសំខាន់​សម្រាប់​ការនាំចេញ​អង្ករ​និង​ដំ​ឡូងមី​កម្ពុជា​ទៅកាន់​ប្រទេស​ចិន​ដែល​ជា​វិធី​មួយ​ដើម្បី​ជំរុញ​ការផលិត​ អង្ករ​ប្រកប​ដោយ​អនាម័យ​ និង​គុណភាព​ស្របតាម​តម្រូវការ​របស់​ប្រទេស​ចិន។

នីតិវិធី​សំខាន់ៗ​សម្រាប់​នាំចេញ​អង្ករ​និង​ដំឡូងមី​កម្ពុជា​ទៅ​កាន់​ប្រទេស​ចិន ​បាន​ផ្តោត​លើ​វិធានការ​នៅ ក្នុង​ប្រទេស​នាំចេញ​មាន​ការត្រួតពិនិត្យ​មុនពេល​នាំចេញ ​ការកំចាត់​សមាសភាព​ចង្រៃ​មុនពេល​នាំចេញ ប្រភព​ដើម​នៃ​ទំនិញ​នៅកន្លែង​ដាំដុះ​ដែល​គ្មាន​សមាសភាព​ចង្រៃ ​និង​វិធី​ដែល​មាន​ការទទួល​ស្គាល់​ជា ផ្លូវការ វិធានកា​រភូតគាម​អនាម័យ​នៅពេល​ដឹកជញ្ជូន​មាន​ការធ្វើ​ប្រព្រឹត្តិកម្ម​កម្ចាត់​សមាសភាព​ចង្រៃ​ តាម​លក្ខណៈ​រូបសាស្ត្រ​ ឬ​ ប្រព្រឹត្តិកម្ម​គីមី​វិធាន​ការ​ភូមគា​មអនាម័យ​នៅ​ច្រក​នាំចូល​មាន​ការត្រួតពិនិត្យ​ ឯកសារ​ការពិនិត្យ​ភូតគាម​អនាម័យ​ និង​ការធ្វើ​វិភាគ​សមាសភាព​ចង្រៃ ​ វិធាន​ការផ្សេងៗ​តម្រូវ​ឱ្យ​មាន អាជ្ញាប័ណ្ណ ​ឬ ​លិខិត​អនុញ្ញាត​ ការកំណត់​នូវ​ច្រក​នាំចូល​ ការត្រួតពិនិត្យ​បែបបទ​នៅក្នុង​ប្រទេស​នាំចូល​ និង​វិធានការ​គ្រប់គ្រង​ហានិភ័យ​ផ្សេងៗ​ ដើម្បី​ទប់ទល់​នឹង​សមាសភាព​ចង្រៃ។

លោក​គិត សេង ​អនុរដ្ឋលេខាធិការ​ក្រសួង​កសិកម្ម ​បាន​ថ្លែង​នៅក្នុង​ពិធី​ផ្សព្វផ្សាយ​នីតិវិធី​សម្រាប់​នាំ ចេញ​អង្ករ ​និង​ដំឡូងមី​កម្ពុជា​ទៅកាន់​ប្រទេស​ចិន​ថា ​តម្រូវការ​ និង​លក្ខខណ្ឌ​ទាំងនេះ​ជួយ​ការពារ​ផល ប្រយោជន៍​របស់​ប្រទេស​កម្ពុជា​និង​ផលប្រយោជន៍​នៃ​ដៃគូ​ពាណិជ្ជកម្ម​របស់​ប្រទេស​កម្ពុជា​ស្របតាម​ កិច្ច​ព្រមព្រៀង។

«មូលដ្ឋាន​មួយ​ដ៏សំខាន់​ក្នុង​ការកាត់បន្ថយ​ភាព​ក្រីក្រ​ និង​ការអភិវឌ្ឍ​សេដ្ឋកិច្ចជាតិ ​ជាពិសេស​ឆ្លើយតប​ទៅនឹង​គោលដៅ​របស់​រាជរដ្ឋាភិបាល​ក្នុង​ការអភិវឌ្ឍ​វិស័យ​កសិកម្ម​និង​កាត់បន្ថយ​ភាពក្រីក្រ​នៅ​ជនបទ​ព្រមទាំង​មាន​ភាព​ងាយស្រួល​ដល់​វិស័យ​ឯកជន​ក្នុង​ការនាំចេញ​អង្ករ​និង​ដំឡូងមី​កម្ពុជា​ទៅ​កាន់​ប្រទេស​ចិន»។

លោក​ជាង គឹម​ នាយក​ក្រុមហ៊ុន​ពាណិជ្ជកម្ម​អង្ករ​ BAYON RICE TRADING Co., Ltd​ បាន​ថ្លែងថា​ តម្រូវការ​និង​លក្ខខណ្ឌ​សម្រាប់​ការនាំចេញ​អង្ករ​និង​ដំឡូងមី​កម្ពុជា​ទៅកាន់​ប្រទេស​ចិន​មិ​នមាន​លក្ខណៈ​ស្មុគស្មាញ​ទេ​ហើយ​ការផ្សព្វផ្សាយ​នីតិវិធី​របស់​ក្រសួង​កសិកម្ម​នេះ​គឺជា​ដំណឹង​ល្អ​សម្រាប់​ក្រុមហ៊ុន​នាំចេញ​ អង្ករ​ទាំងអស់​នៅ​កម្ពុជា»។

លោក​គិត សេង ​បាន​បញ្ជាក់​ថា​ប្រទេស​កម្ពុជា​បាន​ទទួល​បរិមាណ​ផលស្រូវ​សរុប​ប្រមាណ​ប្រាំបី​លាន តោន​នៅ​ក្នុង​ឆ្នាំ២០១០។ របាយការណ៍​បូកសរុប​លទ្ធផល​បញ្ចប់​បណ្តោះ​អាសន្ន​ការងារ​បង្ក​បង្កើន​ផល ស្រូវ​ឆ្នាំ២០១០-២០១១ ​បាន​បង្ហាញថា​ការប៉ាន់​ប្រមាណ​តុល្យភាព​ស្បៀង​សម្រាប់​ឆ្នាំ២០១០​នេះ សល់ គិតជា​ អង្ករ​ជាង​២,៤២​លានតោន ​ហើយ​បើ​គិតជា​ស្រូវ​៧,៧៨​លាន​តោន។

លោក​អនុរដ្ឋលេខាធិការ ​គិត សេង ​បាន​បន្ថែម​ថា រាជរដ្ឋាភិបាល​កម្ពុជា​បាន​ជំរុញ​ការនាំចេញ​អង្ករ​ និង ដំឡូង​មី​កម្ពុជា​ទៅកាន់​ប្រទេស​ចិន​និង​ប្រទេស​ដទៃទៀត​ដើម្បី​ធានា​នូវ​កំណើន​សកម្មភាព​សេដ្ឋកិច្ច​ បង្កើត​ការងារ​និង​បង្កើន​ប្រាក់​ចំណូល​នៅ​តំបន់​ជនបទ​ព្រមទាំង​ធានា​សន្តិសុខ​ស្បៀង​សម្រាប់​ប្រជា ពលរដ្ឋ​ទូទៅ ​ធ្វើឱ្យ​ប្រសើរឡើង​នូវ​អាហារូបត្ថម្ភ ​និង​បង្កើន​ការនាំចេញ​កសិផល។

ប្រទេស​កម្ពុជា ​និង​ប្រទេស​ចិន​ បាន​ចុះហត្ថលេខា​លើកិច្ច​ព្រមព្រៀង​ស្តីពី​ការនាំចេញ​អង្ករ​និង​ដំឡូងមី​ កម្ពុជា​ទៅកាន់​ប្រទេស​ចិន​នៅក្នុង​ឆ្នាំ២០១០។ កិច្ចព្រមព្រៀង​នាំចេញ​អង្ករ​នេះ​ ជួយ​ភ្ជាប់​ចំណង​ពាណិជ្ជកម្ម​របស់​ប្រទេស​កម្ពុជា​ជាមួយ​ប្រទេស​ចិន​ដែល​មាន​សេដ្ឋកិច្ច​ធំ​ទីពីរ​របស់​ពិភពលោក។ ប្រទេស​កម្ពុជា​ បានសម្លឹង​ឃើញ​ថា​ទីផ្សារ​របស់​ប្រទេស​ចិន​គឺជា​កន្លែង​នាំចូល​អង្ករ​ពី​ប្រទេស​កម្ពុជា ​ថៃ​និង​វៀតណាម៕

XS
SM
MD
LG