ភ្ជាប់​ទៅ​គេហទំព័រ​ទាក់ទង

ជនបរទេសអាចមានកម្មសិទ្ធិ អចលនទ្រព្យនៅកម្ពុជា

  • Michael Lapin
  • VOA

ប្រទេសកម្ពុជា បានអនុញ្ញាតឱ្យជនបរទេសមានសិទ្ធិមានកម្មសិទ្ធិផ្ទះសម្បែង
នៅក្នុងប្រទេសកម្ពុជា ដែលអ្នកសេដ្ឋកិច្ច និង ជំនួញអចលនទ្រព្យ បានហៅ
ច្បាប់នេះថា ជាកម្លាំងជំរុញសកម្មភាព អចលនទ្រព្យឱ្យរស់ឡើងវិញសម្រាប់
កំណើនសេដ្ឋកិច្ចកម្ពុជា ក៏ប៉ុន្តែមន្ត្រីគណបក្សប្រឆាំងបានសម្បែងការព្រួយ
បារម្ភអំពីការអនុវត្តច្បាប់នៅកម្ពុជា។

លោកជន សក្តា សូមជូនព័ត៌មាននេះ៖

គណៈរដ្ឋមន្ត្រីកម្ពុជា នៅថ្ងៃសុក្រនេះ បានអនុម័តនីតិកម្មដ៏មានសារៈសំខាន់
មួយសម្រាប់អនុញ្ញាតឱ្យជនបរទេសមានសិទ្ធិទិញកម្មសិទ្ធិផ្ទះសម្បែងនៅក្នុង
ប្រទេសកម្ពុជាចាប់ពីជាន់ទីឡើងទៅ។

សេចក្តីព្រាងច្បាប់ស្តីពីការផ្តល់សិទ្ធិកម្មសិទ្ធិលើចំណែកឯកជននៃអគារសហ
កម្មសិទ្ធិដល់ជនបរទេសនេះ ត្រូវបានតាក់តែងឡើងដោយក្រសួងដែនដីនគ-
រូបនីយកម្មនិងសំណង់ដោយមានការពិគ្រោះយោបល់ជាមួយក្រសួងយុត្តិធម៌។

សេចក្តីថ្លែងការណ៍របស់គណៈរដ្ឋមន្ត្រីបានបញ្ជាក់ថា សេចក្តីព្រាងច្បាប់ដែល
មាន២៤មាត្រានេះគឺសំដៅឆ្លើយតបទៅនឹងគោលនយោបាយរបស់រដ្ឋាភិបាល
ក្នុងការទាក់ទាញវិនិយោគគិន ការសម្រួលដល់កំណើនទីផ្សារអចលនវត្ថុ និង
ជំរុញការអភិវឌ្ឍន៍ ដើម្បីកាត់បន្ថយភាពក្រីក្ររបស់ប្រជាពលរដ្ឋខ្មែរ។

លោកសឹង្ហ បុណ្ណា ប្រធានសមាគមវាយតម្លៃអចលនទ្រព្យកម្ពុជាបានបញ្ជាក់
ថា ច្បាប់នេះនឹងជំរុញនិងលើកទឹកចិត្តដល់អ្នកវិនិយោគទុនបរទេសដែលមាន
បំណងមកតាំងទីលំនៅ និង វិនិយោគនៅកម្ពុជាសម្រាប់ជំរុញការរស់ឡើងវិញ
នៃអចលនទ្រព្យ។

"បើមានច្បាប់នេះចេញមកភ្លាម វាអាចជំរុញតម្រូវការនៃវិស័យអចលនទ្រព្យ
ឱ្យបានកើនឡើងបន្តិច តែកន្លងមកនេះ វាបានបាត់ទៅហើយ។ យើងត្រូវការ
ច្បាប់នេះ ដើម្បីជួយដាស និងជួយពញ្ញាក់អារម្មណ៍អ្នកវិនិយោគទុនបរទេស
ឱ្យចូលមកទិញដូរ និងតាំងទីលំនៅ។ ច្បាប់នេះមិនមែនជួយឱ្យតម្លៃអចលន
ទ្រព្យឡើងថ្លៃទេ តែវាគ្រាន់តែជាការជួយទប់ស្កាត់កុំឱ្យវាចេះតែទ្រោមទៅមុខៗ
ដោយអត់មានទី ផ្សារសោះ"។

លោក ចាន់ សុផល អ្នកវិភាគសេដ្ឋកិច្ចឯករាជ្យ បានថ្លែងថា ជនបរទេសដែល
មានកម្មសិទ្ធិផ្ទះសម្បែងនៅក្នុងប្រទេសកម្ពុជា នឹងនាំមកនូវទុនវិនិយោគ និង
ជំនាញផ្សេងៗ ដើម្បីបង្កើតការងារសម្រាប់ជំរុញកំណើនសេដ្ឋកិច្ចកម្ពុជា។

"បើច្បាប់នេះអនុម័តទៅ ហើយមានជនបរទេសទិញផ្ទះជាន់ខាងលើនោះគឺជា
រឿងល្អសម្រាប់អ្នកសង់ផ្ទះលក់។ គេអាចជំរុញឱ្យមានកំណើនសេដ្ឋកិច្ចអាចធ្វើ
ឱ្យមានសាច់ប្រាក់ហូរចូលក្នុងប្រទេសកម្ពុជា ដោយជនបរទេសយកប្រាក់មក
ទិញផ្ទះសម្បែង។ ប៉ុន្តែអកុសល ពេលនេះជាពេលវិបត្តិសេដ្ឋកិច្ច ដូច្នេះយើង
ប្រហែលមិនអាចទទួលលំហូរទឹកប្រាក់ច្រើនដូចដែលយើងរំពឹងទុកនោះទេ"។

លោក យឹម សុវណ្ណ អ្នកនាំពាក្យគណបក្ស សម រង្ស៊ី បានបញ្ជាក់ថា បើយើង
អនុញ្ញាតឱ្យជនបរទេសមានកម្មសិទ្ធិស្របច្បាប់នៅកម្ពុជា យើងត្រូវពង្រឹងការ
អនុវត្តច្បាប់អន្តោប្រវេសន៍ដើម្បីជៀសវាងវិបត្តិជនអន្តោប្រវេសន៍និងច្បាប់គ្រប់
គ្រងធនាគារ ដើម្បីជៀសវាងការលាងប្រាក់កខ្វក់របស់ពួកឧក្រិដ្ឋជនអន្តរជាតិ
នៅកម្ពុជា។

"យើងត្រូវតែប្រុងប្រយ័ត្នក្នុងការផ្តល់សិទ្ធិកាន់កាប់កម្មសិទ្ធិផ្ទះសម្បែងនៅកម្ពុជា
ចំពោះជនបរទេស ដែលមករកស៊ីមិនស្របច្បាប់នៅប្រទេសកម្ពុជា។ អ្នកខ្លះជា
ភេរវករនិងអ្នកខ្លះទៀតជាជនឧក្រិដ្ឋផ្សេងៗទៀតដែលគេតាមរកចាប់ខ្លួនដោយ
សារទាំងប្រព័ន្ធតុលាការ និងប្រព័ន្ធច្បាប់ គឺនៅមានភាពខ្សោយច្រើនណាស់"។

បច្ចុប្បន្ននេះ អ្នកវិនិយោគទុនបរទេស មិនត្រូវបានអនុញ្ញាតឱ្យមានកម្មសិទ្ធិលើ
ដីធ្លី និងផ្ទះសម្បែងនៅ ក្នុងប្រទេសកម្ពុជាទេ។ នៅក្នុងឆ្នាំ ២០០៥ រដ្ឋាភិបាល
កម្ពុជាបានធ្វើវិសោធនកម្មច្បាប់វិនិយោគដើម្បីអនុញ្ញាតឱ្យជនបរទេសមានកម្ម
សិទ្ធិលើអគារចាប់ពីជាន់ទី១ឡើងទៅ។

ពីរាជធានីភ្នំពេញ ខ្ញុំ ជន សក្តា VOA ស.រ.អា.៕

XS
SM
MD
LG