ភ្ជាប់​ទៅ​គេហទំព័រ​ទាក់ទង

កម្ពុជាថ្កោលទោសបាតុករអាវលឿងថៃ អំពីចេតនាអាក្រក់មកលើទឹកដីកម្ពុជា

  • Michael Lapin
  • VOA

ប្រទេសកម្ពុជាបានថ្កោលទោសក្រុមបាតុករអាវលឿងថៃអំពីចេតនាអាក្រក់មក
លើទឹកដីកម្ពុជា ដោយងងឹតងងុល និងខុសច្បាប់។

ក្រុមមន្ត្រីរដ្ឋាភិបាលកម្ពុជា នៅថ្ងៃអាទិត្យនេះបានបដិសេធការអះអាងរបស់ក្រុម
បាតុករអាវលឿងថៃអំពីដីទំហំ ៤,៦ គីឡូម៉ែក្រការ៉េនៅតំបន់ជុំវិញប្រាសាទព្រះ
វិហារជាកម្មសិទ្ធិរបស់ប្រទេសថៃនោះ។

ការបដិសេធនេះបានធ្វើឡើងបន្ទាប់ពីបាតុករអាវលឿងថៃចំនួន ៣០នាក់ពីចំនួន
៥.០០០នាក់ បានចូលមកក្បែរប្រាសាទព្រះវិហារព្រឹកម៉ិញនេះ ដើម្បីធ្វើសេចក្តី
ថ្លែងការណ៍ចោទប្រកាន់ថា រដ្ឋាភិបាលកម្ពុជាគ្រប់គ្រងទឹកដីរបស់ប្រទេសថៃ
នៅតំបន់ជុំវិញប្រាសាទព្រះវិហារនោះ។

លោក ឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារប្រទេស
កម្ពុជា បានថ្លែងប្រាប់VOAតាមទូរស័ព្ទពីកំពូលប្រាសាទព្រះវិហារថា តំណាង
ក្រុមបាតុករអាវលឿងថៃចំនួន ៣០នាក់នេះ បានទាមទារយកទឹកដីកម្ពុជានៅ
ជុំវិញប្រាសាទព្រះវិហារយ៉ាងងងឹតងងុល និង ខុសច្បាប់ ដែលប្រទេសកម្ពុជា
មិនអាចទទួលយកបានជាដាច់ខាត។

“សេចក្តីថ្លែងការណ៍ ដែលគេ(ក្រុមបាតុករអាវលឿងថៃ)ប្រកាសនេះ គឺជាជំហរដ៏
ឆ្កួតលីលារបស់ពួកបាតុករអាវលឿង។ យើងមិនអាចទទួលយកបានទេ ពីព្រោះ
វាជាទឹកដីរបស់ខ្មែរ ។ យើងមានសន្ធិសញ្ញា អនុសញ្ញា និង ខ្សែព្រំដែនត្រឹមត្រូវ
ហើយ។ ដូច្នេះ យើងទាត់ចោលបញ្ហានេះ។ វាជាការទាមទារដ៏ឆ្គួតលីលារបស់
ពួកអាវលឿង”។

ទីភ្នាក់ងារសារព័ត៌មាន AFP បានរាយការណ៍ថា លោក Veera Somkwamkid
មេដឹកនាំក្រុមបាតុករអាវលឿងថៃ បានវាយប្រហារលើរដ្ឋាភិបាលកម្ពុជាចំពោះ
ការអនុញ្ញាតឱ្យកងទ័ព និងប្រជាពលរដ្ឋរបស់ខ្លួនស្នាក់នៅលើដីទំហំ ៤,៦ គីឡូ
ម៉ែត្រការ៉េនៅតំបន់ជុំវិញប្រាសាទព្រះវិហារ ហើយរដ្ឋាភិបាល និងកងទ័ពថៃគួរ
តែធ្វើអ្វីៗគ្រប់យ៉ាងតាមច្បាប់ដើម្បីយកតំបន់នៅជុំវិញប្រាសាទព្រះវិហារមកឱ្យ
ប្រទេសថៃវិញ។

លោកកួយ គង់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា
បានហៅសេចក្តីថ្លែងការណ៍នេះថា ជាចេតនាទុច្ចរិតលើកទឹកដីកម្ពុជា ដោយ
បញ្ជាក់ថា ការលើកឡើងរបស់បាតុករថៃបែបនេះ គ្មានហេតុផល និងគ្មានឯក
សារសំអាងទេ ពីព្រោះប្រទេសកម្ពុជាតែងតែគោរពច្បាប់អន្តរជាតិ ផែនទី
បារាំង-សៀមហើយការអះអាងនេះ គឺជាការខុសឆ្គង និងការមិនត្រឹមត្រូវទាល់
តែសោះ។

"ការលើកឡើងរបស់ក្រុមបាតុករអាវលឿងថៃចំពោះទឹកដីនៅជុំវិញប្រាសាទព្រះ
វិហារ គឺ មិនមែនជាគោលជំហររបស់រដ្ឋាភិបាលថៃទេ ប៉ុន្តែវាជាការលើកឡើង
របស់ក្រុមជ្រុលនិយមមួយចំនួនតែប៉ុណ្ណោះ។ ដូច្នេះទំនាក់ទំនងរវាងកម្ពុជានិង
ថៃ មិនមានផលប៉ះពាល់អ្វីទេ”។

ក្រុមបាតុករអាវលឿងថៃមិនបានសម្រេចគោលបំណងរបស់ខ្លួនក្នុងការឆ្លងចូល
មកក្នុងទឹកដីកម្ពុជានៅតំបន់ក្បែរប្រាសាទព្រះវិហាររបស់ប្រទេសកម្ពុជាតាមការ
គ្រោងទុកនោះទេ ដោយកងទ័ព ប៉ូលិសនិងអ្នកភូមិនៅក្នុងខេត្តស៊ីសាកេត បាន
រារាំងក្រុមបាតុករមិនឱ្យចូលទៅជិតព្រំដែនជាប់ជាមួយប្រទេសកម្ពុជា។

លោក កួយ គង់ អ្នកនាំពាក្យក្រសួងការបរទេសកម្ពុជា បានបញ្ជាក់ថា “លទ្ធ
ផលនេះបានកើតចេញពីទំនាក់ទំនង និង កិច្ចសហប្រតិបត្តិការល្អរវាងកងទ័ព
ព្រំដែននៃប្រទេសទាំងពីរ ហើយរដ្ឋាភិបាលថៃមិនបានគាំទ្រទង្វើរបស់ក្រុម
បាតុករអាវលឿងនេះទេ ហើយនេះបង្ហាញអំពីសុឆន្ទៈរបស់រដ្ឋាភិបាលថៃដែល
មានបំណងដោះស្រាយបញ្ហាព្រំដែនជាមួយប្រទេសកម្ពុជាដោយសន្តិវិធី និង
តាមយន្តការដែលមានស្រាប់”។

លោកនាយករដ្ឋមន្ត្រីថៃAbhisit Vejjajivaបានបញ្ជាក់ប្រាប់សាធារណជនថៃ
ថ្មីៗនេះថា ប្រទេសថៃមិនបានបាត់បង់ទឹកដី សូម្បីតែមួយចំអាមនៅក្នុងតំបន់
ជម្លោះប្រាសាទព្រះវិហារនោះទេ។

តុលាការអន្តរជាតិបានប្រគល់ប្រាសាទព្រះវិហារមកឱ្យប្រទេសកម្ពុជាគ្រប់គ្រង
នៅក្នុងឆ្នាំ ១៩៦២ ប៉ុន្តែមនុស្សយ៉ាងតិច៧នាក់ បានស្លាប់នៅក្នុងការវាយប្រ-
យុទ្ធគ្នាជាច្រើនលើក បន្ទាប់ពីអង្គការ UNESCO បានចុះបញ្ជីប្រាសាទបុរាណ
នេះជាបេតិកភណ្ឌពិភពលោកនៅក្នុងខែកក្កដា ឆ្នាំ២០០៨៕

XS
SM
MD
LG