ភ្ជាប់​ទៅ​គេហទំព័រ​ទាក់ទង

តុលាការថៃលើកពេលកាត់ទោស ពលរដ្ឋខែ្មរដោយសារគ្មានភស្តុតាង

  • Michael Lapin
  • VOA

តុលាការថៃបានលើកពេលកាត់ទោសប្រជរាស្ត្រខែ្មរអំពីការកាប់ឈើខុសច្បាប់
នៅក្នុងទឹកដីថៃដោយសារតែគ្មាភស្តុតាងគ្រប់គ្រាន់។

តុលាការខេត្តអុប៊ុនរបស់ប្រទេសថៃ នៅថ្ងៃសុក្រនេះបានសម្រេចលើកពេលជំនុំ
ជម្រះប្រជារាស្ត្រខែ្មរចំនួន១៦នាក់ អំពីការឆ្លងចូលប្រទេសថៃដោយខុសច្បាប់
និងការកាប់ឈើនៅក្នុងទឹកដីថៃដោយខុសច្បាប់រហូតដល់ចុងខែក្រោយ បន្ទាប់
ពីគ្មានភស្តុតាងគ្រប់គ្រាន់។

អាជ្ញាធរថៃបានចាប់ប្រជារាស្ត្រខែ្មរដែលរស់នៅតំបន់ក្បែរប្រាសាទព្រះវិហារចំនួន
១៦នាក់ កាលពីថ្ងៃទី ២៣ ខែកក្កដា ខណៈដែលពួកគេកំពុងតែដើររកឃ្មុំ ខ្លឹម
ឈើ និងផ្លែឈើព្រៃ សម្រាប់យកមកផ្គត់ផ្គង់ជីវិភាពរស់នៅប្រចាំថ្ងៃ។

លោកគួយ គង់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា
បានថ្លែងប្រាប់ VOA ថា តុលាការថៃបានបញ្ជាឱ្យបន្តធ្វើការស៊ើបអង្កេតករណី
របស់ប្រជារាស្ត្រខែ្មរចំនួន១៦ នាក់នេះតទៅទៀត ដោយសារតែតុលាការគ្មាន
ភស្តុតាងគ្រប់គ្រាន់ ដើម្បីដាក់ទោសប្រជារាស្ត្រខែ្មរទាំងនេះ។

"តុលាការខេត្តអុប៊ុនរបស់ប្រទេសថៃបានលើកពេលជំនុំជម្រះទោសជនជាតិខែ្មរ
១៦ នាក់នេះ រហូតដល់ថ្ងៃទី ២៣ ខែ កញ្ញាខាងមុខនេះវិញ ដោយសារតុលាការ
ប្រមូលភស្តុតាងមិនទាន់បានគ្រប់គ្រាន់ ហើយលើកនេះ តុលាការយល់ថា មាន
ភស្តុតាងគ្រប់គ្រាន់ហើយ ប៉ុន្តែព្រះរាជអាជ្ញាបានចោទ ហើយប្រជារាស្ត្រខែ្មរទាំង
១៦ នាក់នេះ បានបដិសេធយ៉ាងដាច់អហង្ការចំពោះការចោទប្រកាន់អំពីការកាប់
ឈើខុសច្បាប់។ ដូច្នេះ តុលាការនៅមិនទាន់មានភាពច្បាស់លាស់អំពីការចោទ
ប្រកាន់នេះទេ"។

លោកគួយ គង់ បានបញ្ជាក់ថា "យើងបានរកមេធាវីឯករាជ្យត្រឹមត្រូវ ដើម្បីការ
ពារករណីរបស់ពួកគាត់នៅចំពោះមុខតុលាការថៃ ហើយសព្វថ្ងៃនេះអគ្គកុងស៊ុល
ខែ្មរយើងនៅខេត្តស្រះកែវកំពុងតែធ្វើការជាមួយតុលាការថៃនេះដើម្បីធ្វើយ៉ាង
ណាឱ្យមានយុត្តិធម៌ចំពោះប្រជារាស្ត្រខែ្មរទាំង១៦នាក់នេះ។ អគ្គកុងស៊ុលរបស់
យើង កំពុងតែដុតដៃដុតជើង ដើម្បីធ្វើយ៉ាងណាឱ្យប្រជារាស្ត្រទាំងអស់នេះរួច
ផុតពីការចោទប្រកាន"។

ស្របពេលដែលតុលាការគ្មានភស្តុតាងដាក់បន្ទុកមកលើប្រជារាស្ត្រខែ្មរទាំង១៦
នាក់នេះ លោកស ថាវី អភិបាលរងខេត្តព្រះវិហារ បានសំណូមពរឱ្យក្រុមអាជ្ញា
ធរថៃ ដោះលែងប្រជារាស្ត្រខែ្មរទាំងនេះ ឱ្យត្រឡប់មកផ្ទះវិញ។

“ខ្ញុំជឿថា ប្រជារាស្ត្រទាំងនេះមិនអាចទៅកាប់ឈើព្រៃនៅក្នុងប្រទេសថៃបានទេ
ប៉ុន្តែពួកគាត់ បានដើររកឃ្មុំ ខ្លឹម និងផ្លែឈើ។ ខ្ញុំសូមអំពាវនាវដល់អាជ្ញាធរថៃ ដោះលែងប្រជារាស្ត្រខែ្មរទាំងនេះត្រឡប់មកវិញ"។

កាលពីថ្ងៃព្រហស្បតិ៍ តុលាការខេត្តបន្ទាយមានជ័យរបស់ប្រទេសកម្ពុជា បាន
កាត់ទោសជនជាតិថៃម្នាក់ ឱ្យជាប់ពន្ធនាគារចំនួន៣ខែអំពីបទឆ្លងចូលប្រទេស
កម្ពុជាដោយខុសច្បាប់៕ ចប់

XS
SM
MD
LG