រដ្ឋធានីវ៉ាស៊ីនតោន៖ រយៈពេលឃុំខ្លួនបីឆ្នាំបានកន្លងផុត ហើយការកំណត់រយៈពេលបួនខែត្រូវកាត់ទោសក្រោយពេលបញ្ចប់ការស៊ើបអង្កេតក៏នឹងត្រូវបញ្ចប់នៅថ្ងៃ១៥មករាដែរ តែអង្គបុរេជំនុំជម្រះបានសម្រេចនៅនាទីចុងក្រោយថាសាលាក្តីខ្មែរក្រហមត្រូវបន្តឃុំខ្លួនអតីតមេដឹកនាំខ្មែរក្រហមបួននាក់រង់ចាំការកាត់ទោស។
នៅក្នុងសេចក្តីប្រកាសព័ត៌មានរបស់អង្គបុរេនៅថ្ងៃព្រហស្បតិ៍ដែលបដិសេធបណ្តឹងឧទ្ធរណ៍របស់មេធាវីការពារជនជាប់ចោទទាំងបួនបានបញ្ជាក់ថា៖
«អង្គបុរេបានចេញដីកាបង្គាប់ឱ្យបញ្ជូនជនជាប់ចោទទៅជំនុំជម្រះនិងបន្តដាក់ជនជាប់ចោទក្នុងមន្ទីរឃុំឃាំងបណ្តោះអាសន្នរហូតដល់ពេលមានការនាំខ្លួនពួកគាត់ទៅជំនុំជម្រះនៅចំពោះមុខអង្គជំនុំជម្រះសាលាដំបូង»។
ក្រុមមេធាវីជនជាប់ចោទទាំងបួនបានដាក់ពាក្យប្តឹងឧទ្ធរណ៍ប្រឆាំងនឹងដីកាដំណោះស្រាយរបស់ក្រុមចៅក្រមជាច្រើនចំណុចដែលពួកគេចាត់ទុកថាមិនសមរម្យ ដូចជាការឃុំខ្លួនហួសការកំណត់ ការកំណត់ពេលជំនុំជម្រះទោសនឹងត្រូវហួសពេលនៅចុងសប្តាហ៍នេះនិងបទចោទមួយចំនួនដែលគេចាត់ទុកថាមិនត្រឹមត្រូវជាដើម។
លោក សុន អារុណសហមេធាវីកម្ពុជាការពារក្តីជនជាប់ចោទឈ្មោះ នួន ជាអតីតបងធំទី២ នៃរបបខ្មែរក្រហមបានអះអាងថាលោកបានទទួលដំណឹងហើយកាលពីថ្ងៃព្រហស្បតិ៍ពីការបដិសេធរបស់អង្គបុរេចំពោះកូនក្តីរបស់លោក តែពុំឃើញមានការដាក់ថ្ងៃជំនុំជម្រះទោស។
«ប្រសិនបើការកាត់ក្តីហ្នឹងចេះតែបន្លាយវែងទៅៗយ៉ាងហ្នឹងគឺថាមេធាវីនិងសហមេធាវីនួន ជានឹងរកមធ្យោបាយផ្សេងតទៅទៀតដើម្បីឱ្យតុលាការដោះលែងកូនក្តីរបស់ខ្លួនឱ្យនៅក្រៅឃុំ»។
លោក សុន អារុណ បានថ្លែងយ៉ាងដូច្នេះដោយទំនងជាត្រូវទុកពេលតវ៉ានៅក្នុងពេលបើកសវនាការជំនុំជម្រះក្នុងសាលាដំបូង។
លោកថ្លែងថាលោកបានត្រៀមនឹងដាក់ពាក្យប្តឹងទៅអង្គបុរេពេលដល់រយៈពេល បួនខែនៃការឃុំខ្លួនដែលត្រូវចប់នៅថ្ងៃសៅរ៍ទី១៥ ខែមករា ក្រោយពីរយៈពេល បួនខែដែលចៅក្រមបញ្ជូនដីកាដំណោះស្រាយ (Closing Order)ទៅកាន់ចៅក្រម សាលាដំបូងដើម្បីដាក់កាលបរិច្ឆេទកាត់ទោស។
«ខាងខ្ញុំនេះកំពុងរៀបចំថាបើសិនដល់ថ្ងៃ បួនខែ ក្រោយពី Closing Order ហ្នឹង ចៅក្រមស៊ើបអង្កេតដាក់ទៅខាងសាលាដំបូងហើយ បើបួនខែមិនឃើញចម្លើយ មិនឃើញហៅទៅកាត់ទេ និងដាក់ពាក្យប្តឹងសុំឱ្យនៅក្រៅឃុំតែថ្ងៃនេះ(ព្រហស្បតិ៍) អង្គបុរេជំនុំជម្រះបានចេញមុនដល់បួនខែ»។
អង្គបុរេជំនុំជម្រះតាមច្បាប់ដែលគេគិតថាមានការប្រទាញប្រទង់គ្នានោះអាចពន្យាពេលបួនខែម្តងៗដើម្បីបន្តឃុំខ្លួនជនជាប់ចោទ បើទោះបីរយៈពេលឃុំខ្លួនបីឆ្នាំចប់កាលពីចុងឆ្នាំ២០១០ សម្រាប់អតីតមេដឹកនាំបួននាក់គឺនួន ជា អៀង សារី អតីតឧបនាយករដ្ឋមន្ត្រី រដ្ឋមន្ត្រីក្រសួងការបរទេស ខៀវ សំផន អតីតប្រមុខរដ្ឋ អ្នកស្រីអៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច។
ទោះជាយ៉ាងណាក៏ដោយ លើកលែងតែខៀវ សំផនចេញ អង្គបុរេបានទទួលយកផ្នែកខ្លះនៃបណ្តឹងឧទ្ធរណ៍ជនជាប់ចោទបីនាក់ផ្សេងទៀតដោយបង្គាប់ឱ្យមានការកែប្រែបទចោទទាក់ទងនឹងឧក្រិដ្ឋកម្មសង្រ្គាមដែលក្រុមមេធាវីអះអាងថាកូនក្តីរបស់ពួកគេមិនជាប់ទាក់ទង។
លោក ផាត់ ពៅស៊ាង មេធាវីការពារក្តីអ្នកស្រី អៀង ធីរិទ្ធបានអះអាងថាបទល្មើស រឿងឧក្រិដ្ឋកម្មសង្គ្រាមគួរត្រូវដកចេញព្រោះពួកគាត់ជាជនជាប់ចោទនោះមិនមែនជាយោធាទេ។ លោក ពៅស៊ាងបានអះអាងថាអាជ្ញាយុកាលឃុំខ្លួនកូនក្តីលោកបានផុតនៅខែវិច្ឆិកាឆ្នាំ២០១០ ហើយដោយការសម្រេចរបស់អង្គបុរេជាការសម្រេចចុងក្រោយនោះលោកមេធាវីបានអះអាងថាការតវ៉ាគ្នាមួយលើកទៀតគឺនៅក្នុងពេលសវនាការលើអង្គសេចក្តីក្នុងសាលាដំបូងចំពោះរឿងខុសនីតិវិធីទាក់ទងនឹងការឃុំខ្លួនលើសពេលកំណត់។
«ហើយបើសិនជាគេហៅថាក្នុងករណីដូចខ្ញុំជម្រាបជូនបើសិនជាអង្គបុរេជំនុំជម្រះសម្រេចហើយ មិនអាចតវ៉ាបានតទៅទៀតទេ មានតែតវ៉ានៅលើអង្គសេចក្តីស្តីអំពីហៅថាតុលាការធ្វើខុសនីតិវិធីតែប៉ុណ្ណឹង»។
លោកឡាត់ គីមន្ត្រីឃ្លាំមើលសាលាក្តីខ្មែរក្រហមនៃអង្គការសិទ្ធិមនុស្សអាដហុកបានអះអាងថា រយៈពេលឃុំខ្លួនមានការហួសមែនតែចេតនានៃសាលាក្តីចង់ឱ្យមេដឹកនាំខ្មែរក្រហមទាំងអស់ដែលកំពុងជាប់ឃុំត្រូវប្រឈមមុខនឹងការកាត់ទោស។
សាលាក្តីខ្មែរក្រហមដែលចូលរួមដោយអ.ស.បគ្រោងនឹងកាត់ទោសពួកអតីតមេដឹកនាំខ្មែរក្រហមបួននាក់ក្នុងករណី០០២ នៅអំឡុងពេលពាក់កណ្តាលឆ្នាំ២០១១នេះពីបទឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្រ្គាមនិងបទឧក្រិដ្ឋ មួយចំនួនទៀតដែលគេសង្ស័យថាមានជាប់ទាក់ទិននឹងការសម្លាប់ពលរដ្ឋខ្មែរស្លូតត្រង់ជិតពីរលាននាក់ក្នុងចន្លោះឆ្នាំ១៩៧៥ដល់១៩៧៩៕