ភ្ជាប់​ទៅ​គេហទំព័រ​ទាក់ទង

ព្រះ​រាជ​អាជ្ញា​ខេត្ត​ពោធិ៍សាត់​ត្រូវ​ចោទ​ប្រកាន់​ច្រើន​ករណី​អំពី​អំពើ​ពុក​រលួយ


ទិដ្ឋភាព​នៃ​បន្ទប់​សវនការ​តុលាការ​មួយ​នៅ​ប្រទេស​កម្ពុជា។

តុលាការ​ខេត្ត​ពោធិ៍សាត់​បាន​ចោទ​ប្រកាន់​ជា​ផ្លូវការ​លើ​អតីត​ព្រះ​រាជ​អាជ្ញា​ ​លោក​តុប ច័ន្ទ​សេរីវុធ​ ​ពីបទ​ទាក់ទង​នឹង​ការប្រព្រឹត្ត​អំពើ​ពុក​រលួយ​ជាច្រើន​ករណី។ ​លោក​តុប ច័ន្ទសេរីវុធ​ ​ត្រូវ​ចាប់​ខ្លួន​កាលពី​ថ្ងៃ​ច័ន្ទ​ជាមួយ​នឹង​កង​ការពារ​របស់​លោក​ ​បន្ទាប់​ពី​មាន​បណ្ដឹង​ជាច្រើន​ដែល​ចោទ​ប្រកាន់​ចំពោះ​ទង្វើ​ខុស​ច្បាប់​របស់​លោក។

អតីត​ព្រះ​រាជអាជ្ញា​ខេត្ត​ពោធិ៍សាត់​ ​លោក​តុប ច័ន្ទ​សេរីវុធ​ត្រូវ​តុលាការ​ខេត្ត​ដែល​លោក​ធ្លាប់​បំពេញ​ការងារ​ ចោទ​ប្រកាន់​នៅ​ល្ងាច​ថ្ងៃ​អង្គារ​នេះ​ ​ពី​បទ​ថា​ ​បាន​ប្រព្រឹត្ត​អំពើ​ពុករលួយ​ ​ ពី​បទ​បង្ខាំងមនុស្ស​ខុស​ច្បាប់​ ​និង​បទ​ជំរិត​ទារ​ប្រាក់​ ​នេះ​បើ​យោង​តាម​ក្រុម​មន្ដ្រី​តុលាការ ​និង​មន្ដ្រី​ឃ្លាំមើល​សិទ្ធិ​មនុស្ស។

ក៏​ប៉ុន្ដែ​ពុំទាន់​មាន​ការ​បញ្ជាក់​ថា​ ​តើ​អតីត​កង​ការពារ​ចំនួន​ពីរ​នាក់​ ដែល​ទំនង​ជា​ត្រូវ​ជា​សាច់​ញាត្តិ​របស់​អតីត​ព្រះ​រាជអាជ្ញា​លោកតុប ច័ន្ទ​សេរីវុធ​ ​ត្រូវ​ចោទ​ប្រកាន់​ពី​បទ​ល្មើស​អ្វី​ទេ។​ ទោះ​ជា​យ៉ាង​ណា​ ​តុលាការ​បាន​សម្រេច​ឃុំ​ខ្លួន​ជន​ជាប់​សង្ស័យ​ទាំង​បី​នាក់​ជា​បណ្ដោះ​អាសន្ន​នៅ​ល្ងាច​នេះ។

លោក​តុប ច័ន្ទសេរីវុធ​ត្រូវ​អង្គភាព​ប្រឆាំង​អំពើ​ពុក​រលួយ​របស់រដ្ឋាភិបាល​ចាប់​ខ្លួន​កាល​ពី​ព្រឹក​ថ្ងៃច័ន្ទ​ ​ជាមួយ​នឹង​កង​ការពារ​របស់​លោក​ចំនួន​ពីរនាក់​ ដោយ​សង្ស័យ​ថា​ បាន​ប្រព្រឹត្ត​អំពើ​ពុករលួយ​ធ្ងន់ធ្ងរ​នៅ​ក្នុង​ការ​បំពេញ​ការងារ​របស់​ខ្លួន​ជា​ច្រើន​ឆ្នាំ​កន្លង​មក។

លោក​កែវ រ៉េមី ​អ្នក​នាំពាក្យ​អង្គភាព​ប្រឆាំង​អំពើ​ពុករលួយ​ ​មាន​ប្រសាសន៍​ថា​ ​អង្គភាព​របស់​លោក​មាន​ភស្តុតាង​គ្រប់គ្រាន់​ចោទជន​សង្ស័យ​ទាំងបីនាក់​នេះ។

“ប៉ុន្មាន​ខែ​ហើយ​គាត់​ធ្វើ​កិច្ចការ​នេះ។ ​ អញ្ចឹង​កាល​ណា​យើង​ប្រមែប្រមូល​បាន​ភស្ដុតាង​រឹងមាំ​ហើយ​ ​យើង​រៀបចំ​ធ្វើ​ចំណាត់​ការ"។

ទោះ​ជា​យ៉ាងណា​ ​លោក​កែវ រ៉េមី ​បដិសេធ​មិន​ផ្ដល់​ព័ត៌មាន​លម្អិត​ទាក់ទិន​ទៅ​នឹង​កំហុស​របស់​ជន​ជាប់​ចោទ​ខាង​លើ​នោះ​ទេ។

លោកស្រី​ង៉ែត ធាវី​ អ្នក​សម្រប​សម្រួល​អង្គការ​ការពារ​សិទ្ធិ​មនុស្ស​អាដហុក​ ប្រចាំ​ខេត្ត​ពោធិ៍សាត់​ ​បាន​ឲ្យ​ដឹង​ថា​ ​ការ​ចាប់​ខ្លួន​មាន​ការ​ជាប់​ពាក់​ព័ន្ធ​នឹង​បទ​ល្មើស​សំខាន់ៗ​ជាច្រើន។

“ឮថា​ ​មាន​ជាប់​ពាក់ព័ន្ធ​នឹង​រឿងក្ដី​ផង​ ​ពាក់ព័ន្ធ​នឹង​រឿង​ព្រៃ​ឈើ​ផង។ ​សត្វ​ព្រៃ ​ក៏មាន​ពាក់ព័ន្ធ​ខ្លះ​ ​រឿង​នេសាទ​ក៏មាន​ពាក់​ព័ន្ធ​ខ្លះ"។

នេះ​គឺ​ជា​ការ​ចាប់ខ្លួន​ជន​សង្ស័យ​ជាលើក​ដំបូង​ ​បន្ទាប់​ពី​ប្រទេស​កម្ពុជា​បាន​អនុម័ត​ច្បាប់​ប្រឆាំង​អំពើ​ពុក​រលួយ​កាល​ពី​ដើម​ឆ្នាំ​២០១០​នេះ។​ ច្បាប់​នេះត្រូវ​រិះ​គន់​ថា​ ​មាន​ការ​កំណត់ទោស​នៅ​មាន​កម្រិត​ទាប​នៅ​ឡើយ។

ព្រះ​រាជអាជ្ញា​លោកប៉ង់ ច័ន្ទយុទ្ធារ៉ា ​និង​ចៅក្រម ​កុល កំពូល ​ដែល​កាន់​សំណុំ​រឿង​នេះ​ ​មិន​អាច​ធ្វើ​ទំនាក់​ទំនង​បាន​ទេ។

គណបក្ស​ជំទាស់​ និង​មន្ដ្រី​អង្គការ​សង្គម​ស៊ីវិល​ ​បាន​ស្វាគមន៍ចំណាត់​ការ​នេះ​ ​ដោយ​ជំរុញ​ឲ្យ​រដ្ឋាភិបាល​ខ្មែរ​ប្រឹង​ប្រែង​ប្រយុទ្ធ​ប្រឆាំង​អំពើ​ពុក​រលួយ​បន្ថែម​ទៀត​ ​នៅ​ពេល​ដែល​បទល្មើស​នេះ​ត្រូវ​គេ​មើល​ឃើញ​ថា​ ​កំពុង​តែ​កើត​ឡើង​យ៉ាង​រីករាល​ដាល​នៅ​ពាស​ពេញ​ប្រទេស​ ​ហើយ​បាន​ធ្វើ​ឲ្យ​ប្រជា​ពលរដ្ឋ​ជាច្រើន​រង​គ្រោះ​ជា​លក្ខណៈ​ប្រពៃណី។

ប្រទេស​កម្ពុជា​បាន​ចំណាយ​ពេល​ជាង​ដប់ឆ្នាំ​ដើម្បី​អាច​អនុម័ត​ច្បាប់​ប្រឆាំង​អំពើ​ពុក​រលួយ។​ យោង​តាម​របាយ​ការណ៍​របស់​ភ្នាក់ងារ​អភិវឌ្ឈន៍​អន្ដរជាតិ​របស់​សហ​រដ្ឋ​អាមេរិក​ AUSAID ​បាន​ឲ្យ​ដឹង​ថា​ ​ប្រទេស​កម្ពុជា​បាន​បាត់បង់​ចំណូល​ថវិកា​រដ្ឋ​ចន្លោះ​ពី​៣០០ទៅ​៥០០​លាន​ដុល្លារ​ក្នុង​មួយឆ្នាំៗ៕

XS
SM
MD
LG