គិតមកត្រឹមថ្ងៃទី ១៥ ខែសីហា វីអូអេសំឡេងសហរដ្ឋអាមេរិកផ្នែកខេមរភាសាបានបម្រើដល់អ្នកស្តាប់នៅ ប្រទេសកម្ពុជាបាន ៥៥ ឆ្នាំហើយ ដោយនាំមកនូវព័ត៌មាននៅ ជុំវិញពិភពលោកនិងពីប្រទេសកម្ពុជា។
ហាសិបប្រាំឆ្នាំនៃការបម្រើសេវាកម្មព័ត៌មាន វីអូអេសំឡេងសហរដ្ឋអាមេរិកផ្នែកខេមរភាសារនៅតែរក្សាបានគោលការណ៍ដើមនៃបេសកម្មរបស់ខ្លួនដែលដើរតួជាអ្នកនាំយកព័ត៌មានរហ័សនិងមិនលម្អៀងដល់អ្នកស្តាប់នៅប្រទេសកម្ពុជានិងនៅទូទាំងពិភពលោក។
ទន្ទឹមគ្នានេះដែរ វីអូអេក៏កំពុងអភិវឌ្ឍកម្មវិធីផ្សាយដើម្បីឱ្យស្របតាមការវិវត្តនៃយុគសម័យបច្ចេកវិទ្យាថ្មី ដោយពង្រីកការផ្សាយដែលពីមុនផ្តោតតែលើវិទ្យុ មកបន្ថែមការផ្សាយតាមទូរទស្សន៍និងប្រព័ន្ធអ៊ីនធឺណិត និងបានបង្កើនមាតិកាផ្សាយពីប្រទេសកម្ពុជាបានកាន់តែច្រើនឡើង។
លោកគ្រីស ឌីឃឺដ នាយកផ្នែកការផ្សាយជាខេមរភាសានៃវីអូអេសំឡេងសហរដ្ឋអាមេរិកបានបញ្ជាក់ថា ទាំងអស់នេះគឺក្នុងក្តីសង្ឃឹមថានឹងចូលរួមចំណែកជួយដល់ការពិភាក្សាជាសាធារណៈលើបញ្ហាសំខាន់ផ្សេងៗនៅប្រទេសកម្ពុជាដែលពាក់ព័ន្ធនឹងជីវភាពរស់នៅរបស់ប្រជាពលរដ្ឋកម្ពុជា ចាប់តាំងពីបញ្ហាសិទ្ធិមនុស្ស លទ្ធិប្រជាធិបតេយ្យ ការកាត់ទោសខ្មែរក្រហម សេដ្ឋកិច្ច កិច្ចការក្នុងតំបន់ និងអន្តរជាតិជាដើម។
«វីអូអេខិតខំប្រឹងប្រែងឱ្យអស់ពីលទ្ធភាពក្នុងការនាំយកព័ត៌មានដែលមិនលម្អៀង អព្យាក្រិត និងប្រកបដោយវិជ្ជាជីវៈនៅគ្រប់បញ្ហាទាំងអស់ដែលយើងរាយការណ៍ ទាំងអំពីប្រទេសកម្ពុជានិងបញ្ហាដទៃទៀតនៅជុំវិញពិភពលោក ហើយយើងជឿជាក់ថាការផ្តល់នូវព័ត៌មាននិងការវិភាគប្រកបដោយគុណភាពទៅឱ្យអ្នកស្តាប់របស់យើង ដើម្បីឱ្យពួកគេអាចដឹងព័ត៌មានបាន ហើយធ្វើការសម្រេចចិត្តសម្រាប់ជីវិតរបស់ពួកគេ សេរីភាពរបស់គេ សុបិន្តរបស់គេ និងគោលដៅ របស់គេ ផ្អែកលើសេចក្តី រាយការណ៍ប្រកបដោយការពិតទាំងអស់»។
យ៉ាងណាក៏ដោយកម្មវិធីនៃការផ្សាយព័ត៌មានក៏មានការប្រែប្រួលទៅតាមសម័យកាលនិងចំណុចនៃការចាប់អារម្មណ៍របស់ពិភពលោកផងដែរ។
លោកកែរ យ៉ាន បណ្ណាធិការនៃវីអូអេសំឡេងសហរដ្ឋអាមេរិកដែលបានចូលបម្រើការនៅក្នុងឆ្នាំ១៩៧០ គឺចំពេលដែលសហរដ្ឋអាមេរិកមានការគាំទ្រយ៉ាងពេញលេញដល់រដ្ឋាភិបាលទីក្រុងភ្នំពេញដោយសារតែអាមេរិកបានចូលលូកដៃក្នុងសង្គ្រាមនៅវៀតណាម បានរំលឹកពីកម្មវិធីផ្សាយនាពេលនោះថា៖
«កម្មវិធីផ្សាយរបស់យើងមានការផ្លាស់ប្តូរច្រើន ដោយសាររឿងសង្រ្គាមវៀតណាមនេះ។ សង្គ្រាមវៀតណាមគឺជាដំណឹងផ្សាយទីមួយនៅក្នុងកម្មវិធីផ្សាយរបស់យើង ស្ទើតែជារៀងរាល់ថ្ងៃ ហើយដំណឹងពីប្រទេសកម្ពុជាគឺមានភ្ជាប់ជាមួយនៅក្នុងករណីណាដែលមានព្រឹត្តិការណ៍កើតឡើងផ្ទាល់នៅក្នុងប្រទេសកម្ពុជាក្តីឬនៅក្នុងសមរភូមិនៅក្នុងទឹកដីកម្ពុជា ដែលមានទាក់ទងជាមួយនឹងសង្គ្រាមវៀតណាម»។
នៅឯទីស្នាក់ការធំក្នុងទីក្រុងវ៉ាស៊ីនតោន សហរដ្ឋអាមេរិក វីអូអេមានការិយាល័យកណ្តាលមួយសម្រាប់ប្រមូលយកព័ត៌មានមកពីជុំវិញពិភពលោក។ បុគ្គលិកនៅទីនោះជាអ្នកសរសេរនិងកែសម្រួលសេចក្តីរាយការណ៍ជាភាសារអង់គ្លេស ហើយចែកចាយឱ្យគ្រប់ផ្នែកភាសាផ្សេងៗដែលមានជាង៤០ភាសាបកប្រែសម្រាប់កម្មវិធីផ្សព្វផ្សាយរបស់គេ។ ប៉ុន្តែរបៀបនៃការរៀបចំព័ត៌មានក៏មានការខុសប្លែកគ្នាផងដែរបើប្រៀបធៀបទៅនឹងពេលបច្ចុប្បន្ននេះ។ លោកកែរ យ៉ាន បានធ្វើការរំលឹកថា៖
«យើងមានមុខនាទីជាអ្នកបកប្រែសុទ្ធសាធ។ មិនសូវមានរបាយការណ៍ដែលយើងធ្វើដោយបុគ្គលិកនីមួយៗផ្ទាល់ទេ គឺចេញពីបន្ទប់ព័ត៌មានកណ្តាលមួយដែលយើងហៅថា Central Newsroom។ យើងយកមកប្រែតាមគេសរសេរឱ្យ ហើយសព្វថ្ងៃនេះគឺយើងមានសេរីភាព គេបើកសិទ្ធិឱ្យយើងធ្វើរបាយការណ៍ផ្ទាល់ចេញពីផ្នែកភាសានីមួយ»។
ជារឿយៗវីអូអេ ត្រូវបានគេយល់ថាដើរតួរនាទីជាបណ្តាញឃោសនារបស់រដ្ឋាភិបាលអាមេរិកាំងប៉ុន្តែជាគោលការណ៍និងការអនុវត្តជាក់ស្តែងគឺ វីអូអេផ្សាយព័ត៌មានពីគ្រប់ជ្រុងជ្រោយទាំងអស់ដោយមិនប្រកាន់និន្នាការណាឡើយ។
ធម្មនុញ្ញរបស់វីអូអេ សំឡេងសហរដ្ឋអាមេរិកដែលត្រូវបានលោកប្រធានាធិបតី Gerald Ford ចុះហត្ថលេខាឱ្យក្លាយជាច្បាប់ក្នុងឆ្នាំ១៩៧៦ ចែងយ៉ាងច្បាស់ថា វីអូអេដើរតួនាទីជាប្រភពព័ត៌មានជាទីទុកចិត្តបានដោយផ្តល់ព័ត៌មានត្រឹមត្រូវ មិនលំអៀង និងទូលំទូលាយ។
ធម្មនុញ្ញនោះ ក៏បន្ថែមថាវីអូអេតំណាងឱ្យសហរដ្ឋអាមេរិកទាំងមូលគឺមិនតំណាងឱ្យតែផ្នែកណាមួយនៃសង្គមអាមេរិកាំងទេ ដូច្នេះហើយវីអូអេផ្សាយនូវការឆ្លុះបញ្ចាំងគំនិតនិងស្ថាប័នសំខាន់ៗរបស់អាមេរិកាំងឱ្យបានទូលំទូលាយនិងប្រកបដោយតុល្យភាព។
ចំណុចចុងក្រោយនៃធម្មនុញ្ញរបស់វីអូអេចែងថា វីអូអេនឹងបង្ហាញនូវគោលនយោបាយរបស់សហរដ្ឋអាមេរិកឱ្យបានច្បាស់និងប្រកបដោយប្រសិទ្ធិភាពហើយក៏នឹងបង្ហាញនូវការពិភាក្សានិងគំនិតយោបល់ទាក់ទងនឹងគោលនយោបាយនេះប្រកបដោយការទទួលខុសត្រូវដែរ។
សូម្បីតែនៅក្នុងពេលដែលមានវិវាទជាអន្តរជាតិដែលសហរដ្ឋអាមេរិកចូលរួមពាក់ព័ន្ធក៏ដោយ ក៏វីអូអេរាយការណ៍ព័ត៌មានដូចគ្នានឹងបណ្តាញសារព័ត៌មានអាជីពនានារាយការណ៍ដែរ។
លោក Jing Zhang នាយកស្តីទីនៃវីអូអេ សំឡេងសហរដ្ឋអាមេរិកខាងនាយកដ្ឋានអាស៊ីនិងប៉ាស៊ីហ្វិកបានបញ្ជាក់ថា៖
«ក្នុងនាមជាអង្គការសារព័ត៌មាន យើងមិនគួរកាន់ជើងភាគីណាមួយឡើយ។ យើងមិនការពារគោលនយោបាយរបស់សហរដ្ឋអាមេរិក។ យើងមិនកាន់ជើងរដ្ឋាភិបាលណាមួយឬអង្គការណាមួយឡើយ។ ការទទួលខុសត្រូវរបស់យើងគឺរាយការណ៍ព័ត៌មានតាមតែវាកើតមានឡើង។ ឧទាហរណ៍ ដូចជាយើងក៏រាយការណ៍ពីការពិភាក្សាជាច្រើននៅក្នុងសហរដ្ឋអាមេរិកអំពីគោលនយោបាយរបស់សហរដ្ឋអាមេរិកនៅ អ៊ីរ៉ាក់និងអាហ្វហ្គានីស្ថាន។ យើងរាយការណ៍ថាតើគោលជំហររបស់រដ្ឋាភិបាលអាមេរិកមានយ៉ាងណាលើបញ្ហានេះ។ យើងក៏រាយការណ៍ពីការប្រឆាំងនឹងគោលនយោបាយរបស់អាមេរិកលើបញ្ហានេះដែរ»។
នាពេលបច្ចុប្បន្ននេះវីអូអេប្រើប្រាស់មធ្យោបាយជាច្រើនក្នុងការផ្សាយព័ត៌មានដល់អ្នកស្តាប់នៅទូទាំងពិភពលោក ដែលមានដូចជាការផ្សាយតាមវិទ្យុ ទូរទស្សន៍ និងបណ្តាញអ៊ីនធឺណិត។ សម្រាប់ការផ្សាយទៅប្រទេសកម្ពុជា ការផ្សាយតាមវិទ្យុគឺផ្សាយតាមរលកធាតុអាកាសមធ្យមនិងខ្លី ដោយធ្វើការផ្សាយបន្តផ្ទាល់ពីរដងក្នុងមួយថ្ងៃ ហើយមានកិច្ចសហការជាមួយដៃគូផ្សព្វផ្សាយក្នុងប្រទេសកម្ពុជាដែលយកទៅផ្សាយបន្ត ក្នុងនោះមានដូចជាវិទ្យុរបស់មជ្ឈមណ្ឌលព័ត៌មានស្រ្តីកម្ពុជាតាមរលកធាតុអាកាស FM 102 វិទ្យុសំបុកឃ្មុំ FM 105 និងវិទ្យុអង្គររដ្ឋា FM 95.5 នៅខេត្តសៀមរាប។ កម្មវិធីទូរទស្សន៍ត្រូវបានផ្សាយតាមទូរទស្សន៍ជាតិកម្ពុជានិងទូរទស្សន៍ស៊ីធីអ៊ិន។ រីឯកម្មវិធីដែលបានផ្សាយទាំងអស់នេះត្រូវបានរក្សាទុកក្នុងប្រព័ន្ធអ៊ីនធឺណិតតាមរយៈគេហទំព័រ www.voacambodia.com, Youtube, Facebook, Twitter និងបណ្តាញសង្គម AngkorOne។
វីអូអេ សំឡេងសហរដ្ឋអាមេរិកផ្នែកខេមរៈភាសាមានអ្នកយកព័ត៌មានប្រចាំនៅប្រទេសកម្ពុជាដែលមានបទពិសោធន៍ជាយូរឆ្នាំ ហើយពួកគេផ្តល់នូវសេចក្តីរាយការណ៍ជាប្រចាំនូវព្រឹត្តិការណ៍ថ្មីៗដែលកើតមាននៅក្នុងប្រទេសកម្ពុជា និងក្រុមផ្សាយនៅក្នុងទីក្រុងវ៉ាស៊ីងតោនឌីស៊ី ជាអ្នកទទួលខុសត្រូវរៀបចំការផ្សាយប្រចាំថ្ងៃនិងក៏មានធ្វើសេចក្តីរាយការណ៍ផ្ទាល់ផងដែរ។
រាល់សេចក្តីរាយការណ៍ព័ត៌មានរបស់វីអូអេសុទ្ធតែផ្តោតលើប្រភពព័ត៌មានពី ពីរឬបី ឡើងទៅដើម្បី ធានាថាសេចក្តីរាយការណ៍នោះគ្របដណ្តប់ទៅលើភាគីដែលចូលរួមពាក់ព័ន្ធនៅក្នុងសាច់រឿង។
វីអូអេផ្តោតលើបញ្ហាជាច្រើននៅលើពិភពលោកនិងកម្ពុជាដោយផ្តោតលើបញ្ហានយោបាយ សេដ្ឋកិច្ច សុខភាព បរិស្ថាន សាសនា ការសិក្សាអប់រំ និងប្រវត្តិសាស្រ្តជាដើម។ លោកគ្រិស ឌីឃឺដបានបញ្ជាក់ថា៖
«ទាំងនេះជាផ្នែកមួយនៃបេសកកម្មនិងអាណត្តិរបស់យើងដែលផ្តល់ឱ្យដោយសភាជាតិអាមេរិកាំងក្នុងការរាយការណ៍ព័ត៌មានអំពីពិភពលោក ព័ត៌មានពីសហរដ្ឋអាមេរិកក៏ដូចជាពីកម្ពុជា។ នេះគឺជាផ្នែកមួយនៃបេសកម្មជាមូលដ្ឋានរបស់យើង។ យើងជឿថាពិភពលោកគឺមានការភ្ជាប់គ្នាទៅវិញទៅមក»។
មួយភាគបីនៃកម្មវិធីផ្សាយគឺផ្តោតលើពិភពលោក មួយភាគបីលើបញ្ហានៅសហរដ្ឋអាមេរិក និងមួយភាគបីចុងក្រោយគឺផ្តោតលើបញ្ហាកម្ពុជាប៉ុន្តែជួនកាលការផ្សាយពីប្រទេសកម្ពុជាក៏មានច្រើនជាងនេះផងដែរ។
លោកឈឹម សុមេធ អ្នកអានព័តមានម្នាក់របស់វីអូអេសំឡេងសហរដ្ឋអាមេរិកដែលបានចូលបម្រើការងារក្នុងឆ្នាំ១៩៨៦មក បានបញ្ជាក់ថា លោកតែងតែចាត់ថ្នាក់ដំណឹងផ្អែកទៅបញ្ជីដែលខាងការិយាល័យព័ត៌មានកណ្តាលដាក់ចុះមក ប៉ុន្តែលោកនៅតែចាត់ទុកព័ត៌មានពីកម្ពុជាសំខាន់ជាងគេ។
«ខ្ញុំឱ្យអាទិភាពទៅលើដំណឹង ដែលទាក់ទងទៅនឹងប្រទេសកម្ពុជា ទោះណាជាដំណឹងនោះមិនមាននៅក្នុងបញ្ជីព័ត៌មានសំខាន់ៗក៏ដោយពីព្រោះអ្នកស្តាប់វីអូអេយកចិត្តទុកដាក់ស្តាប់ជាងគេលើប្រទេសកម្ពុជា។ ដូចជាប៉ុន្មានថ្ងៃមុននេះ មានទាក់ទងនឹងរឿងប្រាសាទព្រះវិហារ ខ្ញុំយករឿងប្រាសាទព្រះវិហារយកមកដាក់លើគេរហូត ហើយបន្ទាប់មកបានយករឿងទីមួយក្នុងបញ្ជីមាតិការព័ត៌មានដាក់ ពីព្រោះខ្ញុំជឿជាក់ក្នុងចិត្តខ្ញុំថាបងប្អូនរួមជាតិខ្មែរនៅក្នុងប្រទេសខ្មែរក្តី នៅក្រៅប្រទេសក្តីគឺយកចិត្តខ្លាំងណាស់អំពីបញ្ហាដែលសៀមឈ្លានពានយកទឹកដីយើងនៅជិតប្រាសាទព្រះវិហារហើយដែលវាចង់យកប្រាសាទព្រះវិហារធ្វើជាប្រាសាទរបស់វា»។
លោកសុមេធ ក៏ធ្លាប់បានរៀបចំកម្មវិធី ប្រវត្តិសាស្រ្តកម្ពុជាដែលវីអូអេធ្លាប់បានផ្សាយក្នុងពេលកន្លងមកផងដែរ។
ក្រៅពីខ្លឹមសារនៃព័ត៌មានវីអូអេក៏ផ្តោតលើទាំងគុណភាពនៃការផ្សាយសំឡេងផងដែររាប់តាំងពីការណែនាំសេចក្តីរាយការណ៍នីមួយនិងការផលិតកម្មវិធីផ្សាយ។
លោកស្រីណុច សារីតា បានចូលបម្រើការងារតាំងពីឆ្នាំ១៩៨៤ ជាផលិតករនិងជួនកាលជាពិធីករកម្មវិធីផ្សាយបានបញ្ជាក់ថា៖
«នៅក្នុងការផលិតកម្មវិធីនីមួយៗដោយវីអូអេ ផ្សាយបន្តផ្ទាល់នៅរាល់កម្មវិធីដូច្នេះផលិតករមុននឹងទៅផ្សាយត្រូវធ្វើការទំនាក់ទំនងគ្នាយ៉ាងជិតស្និទ្ធជាមួយអ្នករៀបរៀងកម្មវិធីផ្សាយ ជាមួយនឹងអ្នកផ្សាយហើយនឹងជាមួយនឹងអ្នកឆ្លើយឆ្លងព័ត៌មាននៅ ប្រទេសកម្ពុជា។ នៅក្នុងបន្ទប់ផ្សាយសំឡេងដូចអស់លោកអ្នកជ្រាបស្រាប់ហើយថាវីអូអេជាវិទ្យុតែមួយគត់របស់រដ្ឋាភិបាលអាមេរិកាំងហើយដូច្នេះវីអូអេផ្តោតការយកចិត្តទុកដាក់ទៅលើសំឡេងខ្លាំងណាស់ដើម្បីឱ្យមានគុណភាពល្អព្រោះការផ្សាយនេះផ្សាយទៅពាសពេញពិភពលោក ។ បុគ្គលិកម្នាក់ៗដែលបានចូលមកធ្វើការនៅក្នុងវីអូអេនេះ មិនមែនត្រឹមតែចេះធ្វើព័ត៌មាន មិនមែនត្រឹមតែចេះបកប្រែប៉ុណ្ណោះទេ មិនត្រឹមតែត្រូវចេះដើរតួរឱ្យសមនៅក្នុងសាច់រឿងប៉ុណ្ណោះទេ សំខាន់បំផុតឱ្យមានសំឡេងខ្លាំងជៀសវាងការរំខានពីប្រព័ន្ធផ្សងៗទៀត»។
វីអូអេសំឡេងសហរដ្ឋអាមេរិកផ្នែកខេមរៈភាសារតែងតែយកចិត្តទុកដាក់ដល់គំនិតយោបល់របស់អ្នកស្តាប់ដែលបានជួយចូលរួមកែលម្អតាមការផ្ញើជាសារអេឡិកត្រូនិក សំបុត្រ និងការចុះស្ទាបស្ទង់ប្រចាំឆ្នាំ ហើយក៏ផ្តល់ជាវេទិកាសម្រាប់អ្នកស្តាប់បានចូលរួមសួរសំណួរដោយផ្ទាល់ជាមួយវាគ្មិនក្នុងកម្មវិធីផ្សាយដែលមានទាំងអ្នកនយោបាយ មន្រ្តីរដ្ឋាភិបាល បុគ្គលិកអង្គការក្រៅរដ្ឋាភិបាល និងជំនាញការលើវិស័យជាច្រើន៕