ក្រុមអ្នកកាសែតកម្ពុជាបានសម្តែងការព្រួយបារម្ភអំពីការប្រើប្រាស់ប្រព័ន្ធតុលាការប្រឆាំងនឹងពួកគេ ដោយក្រុមមន្ត្រីជាន់ខ្ពស់រដ្ឋាភិបាល និងមហាសេដ្ឋីខាងជំនួញ។
លោក ជន សក្តា ភ្នំពេញ
ក្រុមសកម្មជនសារព័ត៌មាននិងសិទ្ធិមនុស្ស នៅក្នុងទិវាសេរីភាពសារព័ត៌មានពិភពលោក នៅថ្ងៃច័ន្ទនេះ បានសម្តែងនូវការព្រួយបារម្ភអំពីការប្រើប្រាស់ប្រព័ន្ធតុលាការពីសំណាក់មន្ត្រីមានអំណាចនិងអ្នកជំនួញដែលមានសម្ព័ន្ធភាពជាមួយមន្ត្រីរដ្ឋាភិបាលជាន់ខ្ពស់ ដើម្បីគាបសង្កត់ មកលើក្រុមអ្នកកាសែត។
របាយការណ៍ប្រចាំឆ្នាំរបស់ក្លឹមអ្នកកាសែតកម្ពុជា បានបង្ហាញថា ក្នុងរយៈពេល១ឆ្នាំពីថ្ងៃទី៣ ខែឧសភាឆ្នាំ២០០៩ដល់ថ្ងៃទី៣ខែឧសភាឆ្នាំ២០១០ អ្នកកាសែតចំនួន២៤នាក់ ត្រូវបានចាប់ ខ្លួននិង១០នាក់ផ្សេងទៀតត្រូវបានប្តឹងដោយមន្ត្រីមានអំណាចនិងដោយរដ្ឋាភិបាល។
លោកហង្ស ចក្រា ចាងហ្វាងការផ្សាយនៃកាសែតខ្មែរម្ចាស់ ត្រូវបានកាត់ទោសឱ្យជាប់ពន្ធនាគារអស់រយៈពេល១ឆ្នាំ បន្ទាប់ពីបានសរសេរអត្ថបទចោទប្រកាន់ក្រុមមន្ត្រី នៅក្រោមការគ្រប់គ្រងរបស់លោក សុខ អាន រដ្ឋមន្ត្រីប្រចាំទីស្តីការ គណៈរដ្ឋមន្ត្រីអំពីការប្រព្រឹត្តអំពើពុករលួយ។ ប៉ុន្តែលោកត្រូវបានដោះលែងឱ្យមានសេរីភាពកាលពីថ្ងៃទី១៣ខែមេសា។
លោករស់ សុឃិត អ្នកយកព័ត៌មានសេរី ត្រូវបានកាត់ទោសឱ្យជាប់ពន្ធនាគាររយៈពេល២ឆ្នាំ អំពីការផ្សព្វផ្សាយព័ត៌មានមិនពិតនៅក្នុងខែវិច្ឆិកា បន្ទាប់ពីតុលាការបានសម្រេចថា លោក រស់ សុឃិត បានបញ្ចូនសារអត្ថបទបង្កាច់បង្ខូចលោក សយ សុភាព អតីតអ្នកអត្ថាធិប្បាយ ទូរទស្សន៍ CTN។
លោកហង្ស ចក្រា និពន្ធនាយកកាសែតខ្មែរម្ចាស់ស្រុក ដែលបានទទួលរងនូវការឈឺចាប់ ចំពោះការប្រើប្រាស់ប្រព័ន្ធតុលាការប្រឆាំងនឹងរូបលោកពីសំណាក់មន្ត្រីរដ្ឋាភិបាលជាន់ខ្ពស់ បានបញ្ជាក់ថា សេរីភាពសារព័ត៌មាននៅកម្ពុជាមិនត្រូវបានបើកទូលំទូលាយនៅឡើយទេ។
"សំខាន់មានការប្តឹងផ្តល់ទៅតុលាការជាដើម ហើយពេលនេះខ្លួនខ្ញុំបានរួចចេញពីពន្ធនាគារ នេះក៏ខ្ញុំនៅតែបន្តការងាររិះគន់បែបស្ថាបនានេះតទៅទៀត។ ខ្ញុំសុំឱ្យរដ្ឋាភិបាលបើកនូវ សេរីភាពសារព័ត៌មានដ៏ពិតប្រាកដ ពោលគឺសេរីភាពសារព័ត៌មានដែលគ្មានព្រំដែន។ ខ្ញុំសុំ រដ្ឋាភិបាលកុំយកប្រព័ន្ធតុលាការមកគាបសង្កត់អ្នកកាសែតទៀត"។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានថ្លែងថា បច្ចុប្បន្ន អ្នកសារព័ត៌មានបន្ត ប្រឈមនឹងការគម្រាមកំហែង និងការរុកកួន ខណៈដែលបទចោទប្រកាន់ដែលបង្កប់គោល បំណងនយោបាយត្រូវបានលើកឡើងប្រឆាំងនឹងសមាជិកនៃសារព័ត៌មាន ដើម្បីបញ្ឈប់កិច្ច ពិភាក្សាទាក់ទងនឹងរឿងនយោបាយ និងការរិះគន់នានា។
"ស្ថានភាពបច្ចុប្បន្ននេះ រដ្ឋាភិបាលគួរតែបញ្ចៀសនូវការប្រើប្រាស់ប្រព័ន្ធតុលាការបន្ថែម ជា ពិសេសដែលយើងត្រូវព្រួយបារម្ភនៅឆ្នាំខាងមុខនេះ។ វាអាចមានអ្នកមានអំណាចនិងមហា សេដ្ឋីមួយចំនួនប្រើប្រាស់ប្រព័ន្ធតុលាការ ដើម្បីគាបសង្កត់ការផ្សព្វផ្សាយណាដែលប៉ះពាល់ ដល់ផលប្រយោជន៍របស់ពួកគេ"។
លោក អ៊ុំ សារិន ប្រធានសមាគមកម្ពុជាការពារអ្នកកាសែត បានស្នើសុំដល់តុលាការឲ្យយក ច្បាប់សារព័ត៌មានមកកាត់ក្តីក្នុងសំណុំរឿងក្តីផ្សេងៗ ដែលទាក់ទងនឹងការបំពេញវិជ្ជាជីវៈ របស់អ្នកសារព័ត៌មាន។
លោកអ៊ុំ សារិន បានថ្លែងថា ប្រទេសកម្ពុជាមិនទាន់គោរពសេរីភាពសារព័ត៌មានពេញលេញ ទេ។ អ្នកសារព័ត៌មាន លោក រស់ សុឃិត កំពុងជាប់ពន្ធនាគារនៅព្រៃសនៅឡើយ។
"មានការធ្លាក់ចុះសេរីភាពសារព័ត៌មានជាទូទៅ។ អ្នកកាសែតវិជ្ជាជីវៈមួយចំនួនត្រូវប្រឈមមុខនឹងការលំបាកក្នុងការសរសេរអត្ថបទ ដើម្បីបង្ហាញទៅសាធារណជនឬបម្រើសង្គមឱ្យបាន អស់សេចក្តី ហើយសរសេរមួយចំនួនអត់មានតុល្យភាពត្រូវបានគេប្តឹងទៀត ដោយសារភាគី ម្ខាងទៀតមិនអាចទាក់ទងសុំសេចក្តីអត្ថាធិប្បាយបាន"។
លោក ខៀវ កាញារិទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា សហគមន៍អ្នកសារព័ត៌មាន មិន ត្រូវភ័យព្រួយអំពីការប្តឹងនៅក្នុងតុលាការទេ បើយើងមិនធ្វើខុសច្បាប់នោះ។
"អ្នកសារព័ត៌មានធ្វើកុំឱ្យខុសច្បាប់ទៅ។ វាមិនមានបញ្ហាទេ។ សុខចិត្តឱ្យគេប្រើប្រព័ន្ធតុលា ការ។ កុំឱ្យគេប្រើកាំភ្លើង វាពិបាក។ អ្នកកាសែតចេះសាមគ្គីគ្នា ចេះរួមគ្នានិងមានអ្នកច្បាប់។ វាជាការល្អ"។
អង្គការអ្នកយកព័ត៌មានឥតព្រំដែនបានចាត់ចំណាត់ថ្នាក់សេរីភាពសារព័ត៌មានរបស់ប្រទេសកម្ពុជាទី១១៧ ក្នុងចំណោមប្រទេស១៧៤ កាលពីឆ្នាំ២០០៩។
ពីទីក្រុងភ្នំពេញ ខ្ញុំ ជន សក្តា VOA សំឡេងស.រ.អ. ។