ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ធនាគារ​ពិភព​លោក​នឹង​ស៊ើប​អង្កេត​គម្រោង​ចុះ​បញ្ជី​ដី​ធ្លី


ពល​រដ្ឋ​​ប្រឆាំង​ផែន​ការ​​អភិវឌ្ឍន៍​បណ្តេញ​​ពួក​គាត់​ចេញ​ពី​ក្រុង។
ពល​រដ្ឋ​​ប្រឆាំង​ផែន​ការ​​អភិវឌ្ឍន៍​បណ្តេញ​​ពួក​គាត់​ចេញ​ពី​ក្រុង។

ក្រុម​អធិការ​កិច្ច​របស់​ធនាគារ​ពិភព​លោក​នឹង​បើក​ការ​ស៊ើប​អង្កេត​លើ​គម្រោង​មួយ​របស់ ធនាគារ​ពិភព​លោក​ដែលផ្តោត​លើ​ការ​ចុះ​បញ្ជី​ដីធ្លី​នៅ​ប្រទេស​កម្ពុជា​ បន្ទាប់​ពី​ត្រូវ​បាន​ចោទ​ប្រកាន់ថាគម្រោង​នេះ​មិនបានគោរព​តាម​នីតិ​វិធី​ការងារ​ ហើយ​បណ្តាល​ឱ្យ​បាត់​បង់​សិទ្ធិ​គ្រប់​គ្រង​ដី​ធ្លីរបស់ប្រជា​ពល​រដ្ឋ​រាប់​ពាន់​គ្រួសារ​ក្នុង​សហ​គមន៍​បឹងកក់។

នៅ​ក្នុង​របាយ​ការណ៍​ចុង​ក្រោយ​ដែល​បាន​ដាក់​ផ្សាយ​តាម​គេហ​ទំព័រ​របស់​ក្រុម​អធិការ​កិច្ច​ធនាគារ​ពិភព​លោក​ បានបញ្ជាក់​ថា បញ្ហានិងក្តី​ព្រួយ​បារម្ភ​របស់​សហ​គមន៍​បឹង​កក់​ដែល​បាន​ប៉ះ​ពាល់​ដោយ​គម្រោង​រៀប​ចំ​ដែន​ដីនិងរដ្ឋ​បាលដីធ្លី​ (LMAP)​របស់​ធនាគារ​ពិភព​លោក​ មានលក្ខណៈ​ធ្ងន់ធ្ងរ​ខ្លាំង​ណាស់​ ហើយ​វា​នាំ​ឱ្យ​មាន​សំណួរ​ដ៏​សំខាន់ៗ​ទាក់​ទង​ការ​អនុវត្ត​បាន​ ឬ​មិន​បានតាមគោល​ការណ៍របស់ធនាគារ។

របាយ​ការណ៍​នោះ​បាន​សន្និដ្ឋាន​ថា “ដើម្បី​ធ្វើ​ឱ្យ​មាន​ការ​វាយ​តម្លៃ​ឯក​រាជ្យ​ស្តីពី​ការ​អនុវត្ត​តាម​បាន​ឬ​មិន​បាន​ស្រប​តាម​គោល​ការណ៍​និង​នីតិវិធី​និង​បញ្ហា​ទាក់​ទង​នឹង​ការ​ខូច​ខាត​នៅ​ក្នុង​បរិបទ​គម្រោង​នេះ ក្រុម​អធិការ​កិច្ច​ចាំបាច់​ត្រូវធ្វើការ​ត្រួត​ពិនិត្យ​មើល​ឱ្យ​បាន​ត្រឹម​ត្រូវ​នូវ​រាល់​ហេតុ​ការណ៍​ពាក់​ព័ន្ធ​ទាំង​អស់​និង​គោល​នយោ​បាយ​ព្រម​ទាំង​នីតិ​វិធី​ដែល​បាន​យក​មក​អនុវត្ត។ ​ធ្វើ​ដូច​នេះ​បាន​មាន​តែ​ធ្វើ​ការ​ស៊ើប​អង្កេត​លើ​បញ្ហា​ស្តីពី​ការ​អនុវត្ត​និង​ការ​ខូច​ខាត​ដែល​បាន​លើក​ឡើង​ដោយ​ក្រុម​អ្នក​តវ៉ា”។

ប្រជា​ពល​រដ្ឋ​សហ​គមន៍​បឹង​កក់​ជិត​៤០០០​គ្រួសារ​ ដែល​ភាគ​ច្រើន​ជា​អ្នក​ក្រីក្រ​ បាន​ប្រឈម​មុខ​នឹង​ការ​បណ្តេញ​ចេញ​ឱ្យ​ទៅ​នៅ​ក្រៅ​ទី​ក្រុង​ភ្នំពេញ​ បន្ទាប់​ពី​រដ្ឋា​ភិបាល​បាន​ជួល​ទីតាំងបឹង​កក់ឱ្យក្រុម​ហ៊ុន​ឯក​ជន​អភិវឌ្ឍ​ជា​កន្លែង​ពាណិជ្ជ​កម្ម។​ ប្រជា​ពល​រដ្ឋ​ខ្លះ​បាន​រស់​នៅ​ទីនោះ​ ជាង​២០​ឆ្នាំ​មក​ហើយ​ ព្រម​ទាំង​មាន​បង្កាន់​ដៃ​ពី​អាជ្ញាធរ​មូល​ដ្ឋាន​ទទួល​ស្គាល់​សិទ្ធិ​កាន់​កាប់​របស់​ពួក​គាត់។

មជ្ឈ​មណ្ឌល​សិទ្ធិ​លំនៅ​ដ្ឋាន​និង​ការ​បណ្តេញ​ចេញ​ ហៅ​ថា​ COHRE​ ដែល​ជា​អ្នក​បាន​ដាក់​ពាក្យតវ៉ា​ជួស​មុខ​ឱ្យ​ប្រជា​ជន​សហ​គមន៍​បឹងកក់​បាន​សម្តែង​ការ​ស្វាគមន៍​ចំពោះ​ការ​សម្រេច​ចិត្ត​របស់​ធនាគារ​ពិភព​លោក​បើក​ការ​ស៊ើប​អង្កេត​នេះ។

នៅ​ក្នុង​សេចក្តី​ថ្លែង​ការណ៍​មួយ​ដែល​ចេញ​ផ្សាយ​កាល​ពី​ថ្ងៃ​សុក្រ ​លោក​ Salih​ Booker នាយក​ប្រតិ​បត្តិ​អង្គការ​COHRE​ បាន​ ទទូច​ឱ្យ​មាន​ការ​អនុវត្ត​ជា​បន្ទាន់​នូវ​កិច្ច​ខិត​ខំ​ប្រឹង​ប្រែងរបស់​ធនាគារ​ពិភព​លោក​ក្នុង​ការ​កាត់​បន្ថយ​ការ​រំលោភ​សិទ្ធិ​របស់​ប្រជា​ជន​ដោយ​លោក​បញ្ជាក់​ថា​ "សិទ្ធិលំ​នៅ​ដ្ឋានរបស់ប្រ​ជា​ជនរាប់រយ​គ្រួ​សារកំពុងស្ថិត​ក្នុងស្ថាន​ភាពមានគ្រោះ​ថ្នាក់​ នៅ​ក្នុង​ខណៈ​ពេល​បច្ចុប្បន្ន​នេះ”។

ប៉ុន្តែ​ភាគី​រដ្ឋា​ភិបាល​កម្ពុជា​បង្ហាញ​ចេតនា​មិន​យក​ចិត្ត​ទុក​ដាក់​ចំពោះ​ជំហរ​របស់​ធនាគារ​ពិភព​លោក​ទេ។

លោក​ស្រី នន់ ធានី ​អគ្គ​នាយក​ក្រសួង​ដែន​ដី ​និង​នគរូប​នីយ​កម្ម​ដែ​លជា​ម្ចាស់​អនុវត្ត​គម្រោង​បាន​ប្រាប់​វីអូអេ​ សំឡេង​សហ​រដ្ឋ​អាមេរិក​តាម​ទូរ​ស័ព្ទ​កាល​ពី​ថ្ងៃ​សុក្រ​ថា ​ការ​ស៊ើប​អង្កេត​នោះ​គ្រាន់តែ​ជា​រឿង​ផ្ទៃ​ក្នុងរបស់ធ​នា​គារនោះ​ប៉ុណ្ណោះ​ ព្រោះរដ្ឋា​ភិ​បាលបានបញ្ឈប់ភាពជា​ដៃ​គូ​ជា​មួយ​ហ្នឹងធនាគារ​ពិ​ភព​លោកហើយ។

“ពេល​ដែល​គាត់​មក​ធ្វើអធិការកិច្ច ​វា​ជា​រឿង​របស់​គាត់។​ គាត់​ចង់​ធ្វើ អធិការកិច្ច ​ក៏​ធ្វើ​ទៅ ​ធ្វើ​តែ​គ្នា​គាត់​ហ្នឹង​ទៅ​ រដ្ឋា​ភិបាល​បាន​បញ្ចប់​ហើយ​ អត់​មាន​អ្វី​ទាក់​ទង​ទៀត​ទេ ​ខាង​ភាគី​គម្រោង ​ចុះ​បញ្ជី​ដី​របស់​រដ្ឋា​ភិបាល​លែង​ពាក់​ព័ន្ធ​គាត់​ទៀត​ហើយ”។

យោង​តាម​អង្គការ​COHRE ​ឱ្យ​ដឹង​ថា​ គម្រោង​រៀប​ចំ​ដែន​ដី ​និង​រដ្ឋ​បាល​ដីធ្លី​ (LMAP)​ ដែល​មាន​គោល​ដៅបង្កើត​នូវ​ដំណើរ​ការ​ចុះ​បញ្ជី​ដី​ធ្លី​ជា​ប្រព័ន្ធ​ បែរ​ទៅ​ជា​ធ្វើ​ឱ្យ​ចុះ​ខ្សោយ​និង​ធ្វើ​ឱ្យ​បាត់​បង់​សិទ្ធិ​កាន់កាប់ដី​ធ្លីជា​ប្រ​ពៃ​ណី​របស់ប្រ​ជា​ពល​រដ្ឋដោយ​សារតែ​មិន​បានទទួល​ស្គាល់​ជា​ផ្លូវ​ការ​ឬ​ផ្ទេរ​កម្ម​សិទ្ធិ​របស់​ប្រជា​ពល​រដ្ឋ​ទាំង​នោះ។

គម្រោង​ដែល​មាន​ទឹក​ប្រាក់​ជាង​២៣,៤​លាន​ដុល្លារ​នេះ​ត្រូវ​បាន​រដ្ឋា​ភិបាល​កម្ពុជា​សម្រេច​បញ្ឈប់​កាល​ពី​ចុង​ឆ្នាំ​២០០៩​ ក្រោម​ហេតុ​ផល​ថា​ មាន​ល័ក្ខខ័ណ្ឌ​ច្រើន​ពេក។

លោក​ស្រី​ នន់​ ធានី​ បាន​ឆ្លើយការ​ពារ​ការ​អនុវត្ត​គម្រោង​កន្លង​មក​ថា៖

“នៅ​ពេល​ដែលយើងកំពុង​តែធ្វើ​ជា​មួយ​គ្នា ​គាត់អត់​រំឭក​យើង​ទេ ​គាត់អត់និយាយ​ថា​ យើង​ធ្វើ​ទៅ​ វា​យ៉ាង​ម៉េច​ទេ​ ប៉ុន្តែ​នៅ​ពេលដែលមាន​អធិការកិច្ច ​ខាង​គាត់ចុះ​មក​ គឺ​ចាប់កំហុសតែម្តង​ របាយ​ការណ៍​វាយ​តម្លៃ ​ពី​មួយ​ឆ្នាំ​ទៅ​មួយ​ឆ្នាំគឺយើងមាន​ ទើប​តែ​ចុង​ក្រោយ​នៅ​ពេល​ដែល​មាន​NGO​ ស្រែក​រឿង​ការ​បណ្តេញ​ចេញ​នៅ​បឹងកក់​ហ្នឹង​ក៏គាត់​ផ្សារ​ភ្ជាប់​ការ​ងារ​គាត់​ជា​មួយបញ្ហា​ហ្នឹង ​ព្រោះ​រដ្ឋា​ភិបាល​ប្រើ​ប្រាស់​ទុន​ធនាគារ​ពិភព​លោក​ជា​ទុន​កម្ចី​ អញ្ចឹង​យើង​ធ្វើ​ដោយ​មាន​ផែន​ការ​ តំបន់​ដែល​មាន​ទំនាស់​តំបន់​ដែល​ដី​មិន​ទាន់​បាន​ច្បាស់​លាស់​ ថា​អ្នកណា​ជាម្ចាស់​ យើងត្រូវ​តែរំលងកន្លែងហ្នឹង"។

លោក​ David Pred ​នាយក​អង្គការ​ស្ពាន​ឆ្លង​ព្រំដែន​នៅ​កម្ពុជា​ដែល​បាន​ធ្វើ​ការ​ជាប់​ជា​មួយ​ប្រជា​ពល​រដ្ឋ​សហ​គមន៍​បឹងកក់ បាន​បញ្ជាក់​ប្រាប់​វីអូអេ​ សំឡេង​សហ​រដ្ឋ​អាមេរិក​តាម​សារ​អេឡិក​ត្រូនិក​ថា៖

“វា​ជា​ការ​គួរ​ឱ្យ​សោក​ស្តាយ​ដែល​រដ្ឋា​ភិបាល​កម្ពុជាបាន​ដើរ​ចេញ​ពី​ក្រុម​គ្រួសារ​ពល​រដ្ឋ​ទាំង​នេះ​ហើយ​បដិសេដ​មិន​ធ្វើ​ជា​ដៃ​គូ​ជា​មួយ​ធនាគារ​ពិភព​លោក​ដើម្បី​ស្វែង​រក​ដំណោះ​ស្រាយ​ប្រកប​ដោយវិជ្ជមាន​សម្រាប់​ពួក​គេ។​ ទោះ​ជា​យ៉ាង​ណា​ក៏​ដោយ​ ខាង​ធនាគារ​មិន​អាច​ដើរ​ចេញ​ពី​ក្រុម​គ្រួសារទាំងនេះ​បាន​ទេ​ ដោយ​សារ​តែ​រដ្ឋា​ភិបាល​បាន​បិទ​ទ្វារ​របស់​ខ្លួន​ទៅ​ហើយ។​ ធនាគារ​ពិភព​លោក​មាន​ការ​ទទួល​ខុស​ត្រូវ​ខាង​ផ្លូវ​ច្បាប់​ និង​ខាង​សតិ​អារម្មណ៍​ដើម្បី​ផ្តល់​សំណង​ដល់​ប្រជា​ពល​រដ្ឋ​ដែល​ខ្លួន​បាន​ទទួល​ស្គាល់​ថា​ បាន​ប៉ះ​ពាល់​ដោយ​សារ​គម្រោង​នេះ”។

ក្រោយ​ពី​គម្រោង​នេះ​បិទ​មក ​មាន​មន្ត្រី​ធនាគារ​ពិ​ភព​លោកបានជួប​ពិ​ភាក្សាជា​មួយរដ្ឋា​ភិបាល​កម្ពុជា​ ក្នុង​នោះ​មាន​អាជ្ញា​ធរ​ក្រុង​ភ្នំពេញ​ដើម្បី​ស្វែង​រក​លទ្ធ​ភាព​ក្នុង​ការ​ជួយ​ដល់​ប្រជា​ពល​រដ្ឋ​ដែល​ត្រូវ​ជម្លៀស​ចេញ​ពី​លំនៅ​ដ្ឋាន​ ប៉ុន្តែ​មក​ដល់​ពេល​នេះ​ ហាក់​ពុំ​មាន​ដំណោះ​ស្រាយ​ណាសម​ស្រប​នៅ​ឡើយ​ទេ៕

អត្ថបទ​ទាក់ទង

XS
SM
MD
LG