ប្រធានាធិបតីតួកគីបានច្រានចោលការរិះគន់របស់អ្នកតាមដានអន្តរជាតិទៅលើការបោះឆ្នោតប្រជាមតិរបស់ប្រទេសលោក ដែលត្រូវបានឯកភាពជាមួយនឹងលទ្ធផលប្រកៀកប្រកិតគ្នាកាលពីថ្ងៃអាទិត្យ ដោយលោកនិយាយថា ការបោះឆ្នោតនោះគឺជាការបោះឆ្នោតមានលក្ខណៈប្រជាធិបតេយ្យបំផុត ដែលត្រូវបានគេមើលឃើញនៅបស្ចិមប្រទេស។
ប្រធានាធិបតីតួកគី លោក Recep Tayyip Erdogan បានថ្លែងប្រាប់អ្នកគាំទ្រកាលពីថ្ងៃចន្ទ នៅខាងក្រៅខុទ្ទកាល័យរបស់លោកក្នុងទីក្រុងអង់ការ៉ា ថា អ្នកតាមដានការបោះឆ្នោតអន្តរជាតិគួរតែដឹងអំពីជំហររបស់ខ្លួន បន្ទាប់ពីពួកគេបានរិះគន់ការបោះឆ្នោតប្រជាមតិនេះ ដែលនឹងផ្តល់អំណាចយ៉ាងខ្លាំងដល់ប្រធានាធិបតី។
លោកបានមានប្រសាសន៍ថា តួកគីនឹងមិនយកចិត្តទុកដាក់ទៅលើលទ្ធផលដែលអ្នកតាមដាននៃអង្គការសម្រាប់សន្តិសុខនិងសហប្រតិបត្តិការនៅអឺរ៉ុបហៅកាត់ថា OSCE បានរកឃើញនោះទេ។
លោកបានថ្លែងយ៉ាងដូច្នេះថា៖ «យើងមិនឃើញឬដឹងឮអ្វីពីរបាយការណ៍ដែលមានលក្ខណៈនយោបាយដែលអ្នកបានរៀបចំនោះទេ។ យើងនឹងបន្តមាគ៌ារបស់យើង»។
អ្នកតាមដានបានសាកសួរអំពីភាពយុត្តិធម៌នៃការបោះឆ្នោតប្រជាមតិកាលពីថ្ងៃអាទិត្យនេះ ដោយនិយាយថា វាជាការប្រជែងមិនស្មើភាពគ្នា។ នៅក្នុងសន្និសីទសារព័ត៌មានមួយក្នុងទីក្រុងអង់ការ៉ា អ្នកតាមដានមកពីអង្គការ OSCE បាននិយាយថា យុទ្ធនាការមួយដែលធ្វើឡើងដើម្បី «មិនគាំទ្រ» ការពង្រីកអំណាចដល់ប្រធានាធិបតី បានប្រឈមនឹងឧបសគ្គជាច្រើន រួមទាំងភាពគ្មានសេរីភាពក្នុងការបញ្ចេញមតិ ការបំភិតបំភ័យ និងបញ្ហាប្រឈមក្នុងការទទួលបានព័ត៌មានពីប្រព័ន្ធផ្សព្វផ្សាយផងដែរ៕
